Oosana 14
14
Rootafa namuqaaki marufanoo Abarammafa afiqoo ufafa.
1Mi fasannai Amarafeerafa Babiroonia maqannaa karaambaiqa marinau. Mi aukuannai Eerasaa maqannaa karaambaiqa Ariookafa faqa Eeramma maqannaa karaambaiqa Keedooraoomafa faqa Kooimma maqannaasa karaambaiqa Tidarafa faqa minamusa aiqama nári sundiauqa moodaanaki nifiqeeqa Soodooma maqannaasa narirara fiqau. 2Misa moodaannai qisauku karaambaiqauqa faqa rakiraree qimaseeqa fiqau. Soodooma maqannaa karaambaiqa Beerana faqa Koomoora maqannaa karaambaiqa Birasana faqa Adama maqannaasa karaambaiqa Sinabana faqa Seeboyima maqusanaasa karaambaiqa Seemeebeerana faqa Beeraa moo auqu Sooara maqanna karaambaiqa faqa mi moodaannai qisauku karaambaiqausa faqa rakiraree qimasee qumiqau. 3Mi moodaannai qisauku karaambaiqausa rufiasee Sidimma noopunduki suqiqau. Maqee mi noopundunaki ooruku nammari rafaaqa finoo marifaqa mina auqu raidaqa Kuqira Nammari fee qidaqa. 4Qisaukuqara taikasee qikunni ooqu qaara marasee 12 aukuanaki Keedooraoomana asauku ameemaanai mariqau. Qisaukuqara taikasee qikunni ooqu qaaramoo marasee 13 aukuanaki mina ufa rukiee mariqau.
514 aukuannasaa Keedooraoomafa findifinoo aqoonna karaambaiqauqa faqa nári rakira fasiqauqa faqa findifiqa ooqu fiqau. Ooqu fiu faqa moo maqannaasa ooqi naru maree fiqau. Reefaimma maqannaasa Aseetaroota Karanaimma maqusaki nariqau. 6Naruseeqa Susima maqusanaasa Qamma maqa maaqaki faqa nariqau. Naruseeqa Eemimma maqannaa faqa Kiriataimma afaasa maqa maaqaki marusa nariqau. Miqooqari ooquree Qoora maqannaasa Eedoona aaqanasaa marusa nariqau. Misa naru mareeqa Eeraparanna aadana maqa maaqa atinni munu quqaqau. 7Miqooqari oonu randeeqa Kadeeasa maqusai ooqeenaa auqu Eenamisapatee qimaru maqusaanaasa faqa nariqau. Amareekana aiku asauku misaqa maru maqusausa aiqama rafaaqa fiqau. Rafaaqafusee Amoorana aiku asauku Qasasoona Tamara maqusaki marusa faqa rafaaqafu nimaqaqau.
8Miqimmasoofaqa Soodooma maqannaa karaambaiqa faqa Koomoora maqannaa karaambaiqa faqa Adamma maqannaa karaambaiqa faqa Seebooyima maqannaa karaambaiqa faqa Beera moo auqu Sooaa maqannaa karaambaiqa faqa mi maqusa namusa karaambaiqauqa faqa nári rakira fasiqauqa faqa moodaaqoo Sidima noopunduki suqiqau. 9Suqufufaqa Eeramma maqannaa karaambaiqa faqa Kooimma maqannaa karaambaiqa faqa Babiroonia maqannaa karaambaiqa faqa Eerasara maqanna karaambaiqa faqa rakirara deedaqiqau. Moodaanai qisauku karaambaiqauqa qaara faqa qaara faqa karaambaiqauqa faqa rakirara deedaqiqau. 10Sidima noopunduki koorootaqa madika moomoo marinau. Soodooma faqa Koomoora maqannaa karaambaiqauqa rakiranakiqari quqasee sandaani quna mi madikausaki aqufiqau. Qaaramoo karaambaiqauqa sanda maqaraasiqa aaqanai akaraqau. 11Qaara faqa qaarafaqa karaambaiqauqa Soodoomma maqannaasa faqa Koomoora maqannaasa faqa aiqama ainaina uqanna maraqau. Afuqakinaa nara ainaina faqa maree fiqau. 12Rootafa Abarammana akaqa amaaku fannoo Soodooma maqusai marufaqa mina faqa mina qumiasana faqa maraqau. 13Faiqí moo fannoo rakiranakiqari sandeenoo Abarammafa Qeeburu maqannaa fasiqa fannoo Amoora maqannaa fasiqa Mamareena saqariuqa atukaki marufanoo ooru qimaminau. Mamareefa narí akaqaqara Eesakoorana faqa Aneerana faqa minamusa Abarammana aqoondi mariqau. 14Abarammafa Rootana mara maree funara iriseenoo narí ainainira faiqiuqaki nimudaanai qimarusa narí uiqaana maqusakinaasa 318 fasiqa nifiqanau. Nifiqaseenoo qimannimufaqa qaara faqa qaara faqa karaambaiqauqa nifaqamaree Dannaa maqa maaqai nianai fiqau. 15Ooruree namuqaa nindafamaseenoo narí faqa fusa rainaseenoo eendaki namuqaa maruqoo oonureeqa naru nindaqaaqa qiqau. Mifa misa nifaqa maree suani afu dinni ataaqeenni Damasakusa maqusa fiaaqaree Hoobaa maqusaki munusaqau. 16Ooru randee qumureeqa Abarammafa Rootana faqa mina qumiasana faqa aiqama aanaaseeuqa faqa rumbee fusauqa faqa aiqama nifiqee aniqau.
Meerakiseedeekafa Abarammana amiqi amiqira ufa qimamaqanau.
17Abarammafa Keedooraoommana faqa mina aqoonna karaambaiqauqa faqa naruseenoo aniroofanoo Soodooma maqanna karaambaiqa fannoo mina qafarara Saavee noopunduki moo auqu Kinna noopunduki fee qimaruqoo paqurinau.
18Sareema maqannaasa karaambaiqa auqu Meerakiseedeekafa uriqarara Anutuna aanaiqikirafa marufa feemu faqa uainna nammari faqa Abarammana mini aminau. 19Meerakiseedeekafa amiseenoo maaqi qimaseenoo amiqi amiqira ufa qimamaqanau.
Uriqarara Anutufa innaaruna faqa maqa faqa auqufa mifa kai Abarammana amiqi amiqiannoo.
20Kaaqa uriqarara Anutufa kai namuqaa mareeqee ani asaukuki quqeenoo miqinara Anutuna amoo qiaqa.
Miqi qimasee amiqi amiqira ufa qimasoofanoo Abarammafa namuqaa ainaina maraqoona qisaukuqaraki rainaseenoo moodaaki Meereekiseedeekana aminau.
21Amisoofanoo Soodooma maqannaa karaambaiqa Abarammana qimaminoo qinau. Anee rakiranaki maraanna ainainausa aneennara mareenana qini faiqí anaasee kai qimia.
22Miqi qufanoo Abarammafa asauku uqeeraseenoo qinau. Qeeqa qisauku uqeereeqa, kaaqa uriqarara Anutuna innaaruna faqa maqa faqa auquna afusaa uqeerasee qimamidaqa. 23Sia uqanna ani ainaina kaqikaa ainaina maraanaura tirita faqa niku aanaamu sanda faqa ririmma sia maraanaura. Anee qiniara maasa ainaina maraseenoo moomoo ainaina faqaasee qidanoo mifoo qinoora. Sia uqanna maraanaura. 24Qinee sia uqanna moo ainaina qeeqara maraanaura. Qini faqa rakiranaki fuasa misa namasaa ainainnara kai doo maree fee qidaqa. Qini qiqoodi namu Aneerafa faqa Eesakoorafa faqa Mamareefa faqa misa kai nári nimanasaa maraaqa.
Obecnie wybrane:
Oosana 14: bjr
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017 Wycliffe Bible Translators, Inc. All rights reserved.
