Oosana 13
13
Abarammasa Rootasa naadu naadu fu ufafa.
1Abarammafa Isipa maqa maaqakiqari suani afu dinni ataaqeendari dinni ataaqeenni Kannaana maqa maaqai qumurandee narí anaaqa faqa Rootana faqa narí aiqama qumiasana faqa maree finau. 2Abarammafa ainaina faqaafa marinau. Sipsipa faqa mimmi faqa burimakau faqa siruaa faqa koora faqa faqaafa marinau.
3Mifa miqooqari quqasee fifiiufanoo Beeteera maqusa amummaqa fimarinau. Mifa ooqai narí Beeteera maqusa faqa Ai maqusa faqa qambaana uiqaana maqa usakaqooqoo ooqu ranau. 4Ooqai mifa miqoo tatufira qainda auquqoo ooqureenoo Karaambaiqa innaaru qimamaqanau.
5Rootafa faqa sipsipauqa faqa mimmiuqa faqa burimakauqa faqa faiqi anaasee faqa narí ainainira faiqiuqa faqa maanaaqauqa faqa Abarammana faqa nimariqau. 6Miqanda moomoo aandau ainaina faqaaqanda maridaqa aandauqa neemaru andandafa sia amanaikufaqa sia amana moodaanaki mariaqaa inoo marinau. 7Miqiqa marufanoo Abarammana aandausaa rakisi marusa faqa Rootana aandausaa rakisi marusa faqa andanda narana saara tinooriqau. Mikari Kannaana maqannaasa faqa Peerisa maqannaasa faqa mi maqanasaa kaqi mariqau. 8Abarammafa mina qafamaseenoo Rootana qimaminau. Maasa moodaa oosana maridaqa anee faqa qinee faqa sia tinooria, ani faiqi namu faqa qini faiqi namu faqa sia tinooriaqa. 9Maqa maaqa firaatiamma maridanoo ania, anindiri rainaa, anee aninna aidimari maqana qafamasee utaaqamasee mi tinai finaqa qinee moo tinai fuanaura.
10Miqi qimasee qimamufanoo Rootafa afu maqaidanoo Yooradanna noopundu dinni marufanoo Sooara maqusa dinni marufanoo mi qambaanna nammari moomoo marinau. Karaambaiqa kadidakiara foora moomoo nammari marinau. Amiqinoo maridanoo Isipa maqa maaqara foora marinau. Mi aukuannai Karaambaiqa Soodoomma maqusa faqa Koomoora maqusa faqa sia naru kammuqoo Rootafa mi maqa maaqana qafanau. 11Rootafa qafamaseenoo aiqama Yooradanna afaasasaa ooqu mariraree qimaseenoo suani oosanai fimaru aatata finau. Miqi mandeeqara rainaqau. 12Abarammafa Kannaana maqa maaqai kaqi marufanoo Rootafa Soodoomma maqusa aaqa maqusauqa dinni dinni marufanoo qambaana noopunduki narí uiqaana maqa usakanau. 13Soodooma maqannaasa kaaqa mandainaina maree marusa maridaqa. Karaambaiqa afusaa oosana oosana mandainaina uqanna auqee mariqau.
Abarammafa Heebaroona maqa maaqai finau.
14Rootafa fifufanoo Karaambaiqa Abarammana qimaminoo qinau, anee mariannaqooqari amiqimmasee aiqama atinai aiuqia. 15Anee qafaanna maqa maaqana ani faqa anisaaqari kambiqainausa faqa nimisaananoo naaruara naaruara innindi kamminoo mariannoo. 16Qinee ani aiku asauku asumu moomoo kambiqa nimaqaanaura. Sia amana moo fannoo asaana rirana amanaikiannoo. Nukuda aiqama amana asaana rifaranoo, ani faiqi namu kai sia amana nisaana rifaranoo. 17Doo maqee oonuree aiqama maqa maaqa qinee ani amiannana aiuqia.
18Abarammafa minara iriseenoo narí uiqaana maaqa rapeemma mareenoo Heebaroona maqa maaqaki Mamareena saqariuqa atukaki ooqureenoo miqoo Karaambaiqa tatufira qainda ooninnai auquseenoo tatufirana suqa aminau.
Obecnie wybrane:
Oosana 13: bjr
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017 Wycliffe Bible Translators, Inc. All rights reserved.
