Salmos 9
9
1Läꜙka̱a̱ˉ tuhˉdsënꜙ hänˋ kyahˈ DSAˉJØ̱Ø̱Hˈ kya̱a̱nꜙ.
Jmeenˋ juuˈ kihꜗ dsaꜙ haˉ läꜙ laꜗ heˉ jʉhˉga̱a̱ˉ heˉ jmeehˉ.
2Taꜙlaꜙ kyahꜗ hneˉ baˊ jë̱ë̱ˉ dsënꜙ,
hiꜙ cha̱a̱nˉ chaˉmiihˉ lluꜗ.
Jmeenˋ jʉʉhˉ kyahꜗ DSAˉJØ̱Ø̱Hˈ kya̱a̱nꜙ jeeˊ hänꜙ kyahꜗ.
3Dsaˉ hi̱ˉ naˉhøøhˊ kinꜙ kyʉ̱ʉ̱yꜙ.
Jeeˊ gaꜙnääyꜗ ja̱ˉ, dsaˉtä̱yhꜙ hiꜙ dsaˉju̱u̱yꜘ toꜙloꜙnëhˊ.
4Jëëhꜘ, hneˉ baˊ hä̱ä̱hꜗ jnäꜘ, hneˉ baˊ chehˈ nëˊ kinꜙ.
Jeeˊ ñehꜘ jmeehˉ hihꜙ,
jë̱ë̱hꜙ baˊ jnäꜘ kya̱a̱hˊ juꜗdsooꜘ jmahꜗ.
5Hneˉ maˉjʉʉhˊ kihꜗ dsaˉ jmɨˉgyʉʉꜙ
hiꜙ maˉhe̱e̱hˈ goˉte˜ läꜙjë̱ë̱ꜙ hi̱ˉ hlë̱ë̱hˈ.
Läꜙkye̱ˉ jmɨɨˉ kiyhꜗ maˉcheˋ goˉte˜.
6Läꜙjë̱ë̱ꜙ hi̱ˉ naˉhøøhˊ kinꜙ maˉta̱a̱hˋ tiiˊ,
hiꜙ maˉnaˉhe̱e̱ꜚ goˉte˜.
Läꜙkye̱ˉ jeeˊ jwɨɨˉ kiyhꜗ maˉhe̱e̱hˈ goˉte˜.
Ji̱hˊko̱hꜘ moꜙsoꜙ läꜙdsooh˜ dsëꜗ dsaˉ jeeˊ jwɨɨˉ ja̱ˉ.
7Pero DSAˉJØ̱Ø̱Hˈ jnänˋ, läꜙ maˉgyayꜗ ja̱ˉbaˊ gaꜙläꜙjëꜙ johꜘ jmɨɨˊ chaˉ, maˉnaˊllu̱u̱yˋ llayꜗ taˊ kihꜗ dsaꜙ.
8Llayꜗ taˊ kihˈ dsaˉ jmɨˉgyʉʉꜙ kya̱a̱hˊ juꜗdsooꜘ jmahꜗ.
Llayꜗ taˊ kihˈ hi̱ˉ tä̱ä̱hˊ läꜙka̱a̱ˉ jeeˊ jwɨɨˉ
läꜙko̱o̱ˉ laꜗ hihꜙ kiyhꜗ.
9DSAˉJØ̱Ø̱Hˈ jnänˋ hä̱ä̱˜ läꜙjë̱ë̱ꜙ hi̱ˉ jëë˜ wɨɨꜘ.
Kwayꜙ dsaˉta̱a̱yhˋ jeeˊ saꜙ hiiꜘ gooˉ
läꜙ maˊ dsaˉngëëyꜘ heˉ wɨɨꜘ.
10Läꜙjë̱ë̱ꜙ hi̱ˉ maˉdsooꜘ dsëꜗ kyahꜗ,
chaˉ baˊ oˉjø̱hꜙ dsëˉ kiyhꜗ kya̱a̱hˊ hneˉ.
Ji̱hˊko̱hꜘ saꜙ jä̱ꜗ hñiiꜘ hi̱ˉ hnaahˉ hneˉ, DSAˉJØ̱Ø̱Hˈ kya̱a̱nꜙ.
11Häˊ su̱ꜚ kihꜗ DSAˉJØ̱Ø̱Hˈ jnänˋ hi̱ˉ gyaꜗ Sión.
Jmeehˋ juuˈ kihꜗ dsaꜙ kihꜗ taˊ heˉ maˉjmeeyꜘ.
12Hi̱ˉ ngɨɨhꜗ kwa̱a̱t˜ kihꜗ hi̱ˉ jngëëhꜙ dsaˉ,
dsooh˜ baˊ dsëyˈ kihꜗ hi̱ˉ jëë˜ wɨɨꜘ,
hiꜙ saꜙ dsaˉgaaꜘ dsëyꜗ kihꜗ hi̱ˉ tä̱ä̱hˊ kɨˉhooh˜.
13DSAˉJØ̱Ø̱Hˈ kya̱a̱nꜙ, waˊ läˉñihꜘ hohꜘ kiꜙ jnäꜘ.
Jëëˋ daˊ haˉ läꜙ dsaˉngëënꜘ wɨɨꜘ kwa̱a̱t˜ kihꜗ hi̱ˉ naˉhøøhˊ kinꜙ.
Lä̱ä̱ˋ jnäꜘ jeeˊ maˉchehnꜗ ju̱u̱nꜘ.
14Mahꜗ läꜙja̱ˉ läꜙka̱a̱ˉ jeeˊ laˈ chaˊjwëꜗ jʉʉhˉ kihꜗ Sión,
jmeehnꜚ juuˈ kihꜗ dsaꜙ kihꜗ läꜙjëꜙ heˉ jʉhˉga̱a̱ˉ heˉ jmeehˉ.
Jëëhꜘ, cha̱a̱nˉ lluꜗ kihꜗ heˉ maˉlä̱ä̱hˊ jnäꜘ.
15Läꜙjë̱ë̱ꜙ dsaˉ jmɨˉgyʉʉꜙ gaꜙta̱yhꜘ nehꜙ tooˉ
jeeˊ naˉgyuˊ kihˈ jñahꜘ.
Läꜘ heˉ gaꜙhɨɨyꜘ jeeˊ naˉhmääˊ,
ja̱ˉbaˊ heˉ ja̱ˉ gaꜙhñuuyꜘ hñiiyꜘ.
16Kya̱a̱hˊ taˊ heˉ maˉllaꜘ Dio,
maˉmiˉjnääyˉ hñiiyꜘ haˉ läꜙ la̱a̱yꜗ.
Hiꜙ hi̱ˉ hñaaˉ dsëꜗ heꜘ
gaꜙjlë̱ë̱yꜗ kya̱a̱hˊ ja̱ˉbaˊ läꜘ heˉ gaꜙjmeeyꜘ hñiiyꜘ.
17Läꜙjë̱ë̱ꜙ hi̱ˉ hñaaˉ dsëꜗ dsaˉnääyꜗ chaˊjeˉ,
läꜙkye̱ˉ hi̱ˉ dsaˉgaaꜘ dsëꜗ kihꜗ Dio.
18Maꜙraꜙ heˉ dsooh˜ baˊ dsëˈ Dio kihꜗ läꜙjë̱ë̱ꜙ hi̱ˉ llaˉkya̱a̱ꜗ.
Hehꜗ oˉjø̱hꜙ dsëˉ heˉ chaˉ kihꜗ hi̱ˉ täˉñeeꜘ saꜙ jä̱ꜗ läꜙnaˉ.
19Hneˉ DSAˉJØ̱Ø̱Hˈ kya̱a̱nꜙ,
taꜙ kwaˉ jwëˈ jmeeꜗ dsaˉ läꜙ hyohˉ dsëꜗ.
Llaˊ taˊ kiyhˈ läꜙjë̱ë̱ꜙ dsaˉ läꜙ gaꜙtëꜘ jeeˊ ñehˊ.
20Jmeeˊ waˊ läꜙga̱yhꜙ hneˉ DSAˉJØ̱Ø̱Hˈ kya̱a̱nꜙ.
Jmeeˊ waˊ läˉngëëyꜘ heˉ la̱a̱yꜗ maꜙraꜙ dsaˉ jmɨˉgyʉʉꜙ jmahꜗ baˊ.
Obecnie wybrane:
Salmos 9: chz
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2003, Wycliffe Bible Translators, Inc. All rights reserved.
