Salmos 10
10
1Hneˉ DSAˉJØ̱Ø̱Hˈ kya̱a̱nꜙ, ¿heˉlaˈ dsaˉläˉø̱ø̱hꜘ kinꜙ?
Ja̱ˉgaˊ läꜙ maˊ jmeeꜙ biiꜗ kinꜙ, ¿heˉlaˈ hmäähˊ hneˉ?
2Hi̱ˉ hñaaˉ dsëꜗ heꜘ, kihꜗ heˉ jmääy˜ hñiiyꜘ jø̱ø̱hˈ,
heˉja̱ˉ jmeeyhꜙ hi̱ˉ täˉñeeꜘ.
Pero ja̱ˉbaˊ nehꜙ läꜘ heˉ hɨɨyˉ ja̱ˉ tä̱yhꜙ.
3Hi̱ˉ hñaaˉ dsëꜗ heꜘ jmeeyꜙ ta̱a̱yhꜗ
kihꜗ läꜙjëꜙ heˉ hlɨɨhˈ heˉ he̱e̱ꜘ dsëyꜗ.
Hiꜙ hlëëyhꜙ lluꜗ kihꜗ hi̱ˉ he̱e̱ꜘ dsëꜗ kuuˊ,
mahꜗ miˉkwa̱yhꜗ DSAˉJØ̱Ø̱Hˈ jnänˋ.
4Hi̱ˉ hñaaˉ dsëꜗ heꜘ, taꜙlaꜙ kihꜗ heˉ jmääy˜ hñiiyꜘ jø̱ø̱hˈ saꜙ hnaayhˉ Dio.
Saꜙ cha̱a̱ˉ Dio kiyhꜗ niꜙ saꜙ cha̱a̱ˉ hi̱ˉ ka̱ꜗ kwa̱a̱t˜ la̱a̱yꜘ.
5Tä̱ä̱hˊ tä̱ä̱yꜘ läꜙ hyohˉ dsëyꜗ.
Saꜙ kye̱yˉ hʉʉˊdsëˉ heˉ llahˈ taˊ kiyhˈ,
hiꜙ miˉkwa̱hꜗ bihꜗ kihꜗ hi̱ˉ naˉhøøhˊ kiyhˈ.
6La̱a̱yꜘ, niꜙ ja̱a̱ˉ saꜙ cha̱a̱ˉ hi̱ˉ ka̱a̱hꜗ jnäꜘ.
Hiꜙ la̱a̱yꜘ, saꜙ jäꜙ niꜙ ko̱o̱ˉ heˉ wɨɨꜘ nëˊ kinꜙ.
7Dsoˊjwɨɨꜘ jmahꜗ jwäy˜ kihꜗ jñahꜘ,
la̱a̱yꜗ hi̱ˉ taˉju̱u̱ˈ, hiꜙ hɨ̱ɨ̱y˜ kihꜗ dsaˉ kaˉlähꜘ.
Hnooyhˉ tä̱ä̱ꜘ baˊ haˉ läꜙ jmeeyꜗ kihꜗ dsaꜙ
mahꜗ jmeeyhꜙ jeeˊ naˉhmääˊ.
8Gyayꜗ toˉkëˊ nehꜙ nuuˉ jeeˊ saꜙ liihꜚ dsaˉ,
mahꜗ jeeˊ naˉhmääˊ ja̱ˉ jngëëyhꜙ dsaˉ hi̱ˉ dsaˉngëëꜘ jeeˊ ja̱ˉ.
Tääꜘ saꜙ jä̱ä̱yˉ jëëy˜ haˉ läꜙ jmeeyꜗ kihꜗ hi̱ˉ täˉñeeꜘ.
9Toˉkëˊ baˊ jmeeyꜙ läꜙko̱hꜘ ja̱a̱ˉ león hi̱ˉ gyaꜗ nehꜙ tooꜙ kihꜗ.
Ko̱o̱ˉ jø̱ø̱y˜ toˉkëˊ baˊ haˉ läꜙ jeeˊ sa̱a̱yhˈ ja̱a̱ˉ hi̱ˉ täˉñeeꜘ.
10Hi̱ˉ täˉñeeꜘ heꜘ, ko̱o̱ˉ ko̱ˉdsu̱yhˉ hñiiyꜘ,
maˊ gaꜙta̱yhꜘ gooˉ hi̱ˉ hñaaˉ dsëꜗ hi̱ˉ hä̱ä̱ˈ heꜘ.
Jëëhꜘ saꜙ chaˉ heˉ kya̱a̱hˊ lä̱ä̱yˈ hñiiyꜘ.
11Hi̱ˉ hñaaˉ dsëꜗ heꜘ jmeeyꜙ hʉʉˊdsëˉ maˉgaaꜘ dsëꜗ Dio.
Maˉhmäꜗ Dio nëˊ, moꜙsoꜙ jëë˜ gaˊ Dio kiyhꜗ, la̱a̱yꜘ.
12DSAˉJØ̱Ø̱Hˈ kya̱a̱nꜙ jëëˋ daˊ, nooˉ nëˊ kya̱a̱ꜗ jnäähˈ.
Taꜙ waˊ gaaꜘ hohꜘ kihꜗ hi̱ˉ jëë˜ wɨɨꜘ.
13¿Heˉlaˈ miˉkwa̱hꜗ hi̱ˉ hñaaˉ dsëꜗ kihꜗ Dio?
Dsaˉta̱a̱yhˋ jmeeyꜙ hʉʉˊdsëˉ jäyhꜘ:
“Saꜙ ka̱ꜗ Dio kwa̱a̱t˜ jnänˋ.”
14Pero hneˉ baˊ jëëhꜘ läꜙjëꜙ.
Hneˉ baˊ kye̱hˊ kwa̱a̱t˜ haˉ läꜙ hnøøꜗ kihꜗ heˉ hlɨɨhˈ.
Hi̱hꜗ hi̱ˉ täˉñeeꜘ, chaˉ baˊ oˉjø̱hꜙ dsëˉ kiyhꜗ kya̱a̱hˊ hneˉ,
hiꜙ läꜙja̱ˉ dsaˉ hnɨɨꜘ, hä̱ä̱hꜙ baˊ hnihꜘ kaˉlähꜘ.
15He̱e̱ꜙ goˉte˜ beꜘ kihꜗ hi̱ˉ hñaaˉ dsëꜗ heꜘ.
Ngɨɨhˊ kwa̱a̱t˜ kihꜗ läꜙjëꜙ dsoˊkyeˉ kiyhꜗ
mahꜗ saꜙ jä̱ꜗ läꜙnaˉ.
16Hñiiꜘ DSAˉJØ̱Ø̱Hˈ jnänˋ baˊ la̱a̱ˈ dsaˉtaˊ jø̱ø̱hꜗ
gaꜙläꜙjëꜙ johꜘ jmɨɨˊ chaˉ.
Läꜙjë̱ë̱ꜙ hi̱ˉ saꜙ jmeeꜙ dsooꜘ dsëꜗ kiyhꜗ
dsaˉhyahˋ goˉte˜ nëˊ hwaˈ laˉ.
17Hneˉ DSAˉJØ̱Ø̱Hˈ kya̱a̱nꜙ,
nuuhˉ baˊ hneˉ kihꜗ läꜙjë̱ë̱ꜙ hi̱ˉ hwa̱a̱ˊ,
hiꜙ jmeehˉ baˊ hneˉ heˈ
kihꜗ läꜙjëꜙ heˉ chu̱u̱yꜘ kya̱a̱hˊ hneˉ.
18Nooˉ nëˊ kihˈ dsaˉ hnɨɨꜘ hiꜙ kihꜗ hi̱ˉ jëë˜ wɨɨꜘ,
mahꜗ läꜙja̱ˉ hi̱ˉ hñaaˉ dsëꜗ moꜙsoꜙ jmeehꜙ gyihꜗ dsaˉ jmɨˉgyʉʉꜙ.
Obecnie wybrane:
Salmos 10: chz
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2003, Wycliffe Bible Translators, Inc. All rights reserved.
