Éxodo 32
32
Baca rijijieein, oro caje ichacuruhane
(Dt 9.6-29)
1Nitohaneein, jataain carajaa, nii ichatane ucuuno caje faelanaala Moisesane jaun jetaote, Aaroon tinonoritiin nisichuruhin jetao:
“Chajaain canacaanu rai chosi ichaaute, canaacha ichanenu beeinete coitucuhacache, chaaquechaainti nerurujuae, jataain carajaane coina, caa Egipto caje canacaanu rocoeralu Moisesa”, naauruha isaraelitaaurune jaun jetaote:
2“Inara comasaihuru, inara calaohichuru, inara cacunucuru, naaonjoainuri caje, nii acaauru irichoque acaauruacha sirii, oro caje nenaa, acaauru sarsicho uhaauchejia carai”, naa acaauru rai Aaroonne jaun jetaote.
3-4Nii nirichoque nii amaauri, oro caje nenaa acaauru sarsicho rocohacoaain, satiin Aaroon rai teeuruhane jaun jetao, acaauru caje raain, coata saeraque, nii oro sauhin, tucacaain caje leeinjiin baca narejeen rijijieein ichae. Nitohaneein ichaane jaun jetaote:
“Caate Egipto caje cana rocoera, isarael nichaachene coaunerane”, naauruha satiin ita raine 5coaraane jaaun jetao, nii baca rijijieein, niicha ichai rohan teein, leinjiin rori jaane baiha jetao:
“Eresite naineje, cana Curuaanaa coroaena coina, beseta ichana”, nae jetao, acaauru rai Aaroon.
6Cojoanoo jetaote, janohetiin nimichuhin, acaauru que suujua acatiha, acaauru chosine coina jetao, lenonecuru sohin, lenonecuru mocoore. Nii baiha jetaote, jiniiquiin nelauriaain, acau cohin lenoneein, nii baiha nimichuhin rachoojoeeure, nii cachaauru. 7Nii jaun jetaote:
“Chajaain fauhin, taa ii cachaauru, Egipto caje iicha rocoori coaanihu, inaen nitaje raite neeure, 8inaen nii caitoonjoan rijijieein, ichaaoruhane jianeeinte, baasoneein ichaaore. Nii jaaute, oro tucuacaain, caje leinjiin baca rijijieein jaerateein, acaacha coroajeein, rai lenonecuru sohin benateein: ‘Caate, cana chosineein, Egipto caje isarael nichaachene rocoerane’, naaure”, naain jetao, Moisesa letoae Cana Coaunera.
9Niritiin jetaote:
“Inaen jataain erenaa tonoraaureniha, caa cachaaurune coaracaaun. 10Aihane jaun, cau jelai canu ratirihu, inaen jataain obaecaaune jaun, caa cachaauru itajerichaauni. Nena laen ichorataanereeuni, lauri lauri nenacaauru, cachaauru foerateraneein neeine coina”, naa Moisesa rai Cana Coaunerane jaun jetaote:
11“Chanuna, iichujia, itolere ichana naineeine coaarateein, Egipto caje iicha rocoorineein, ii cachaauruneein neeuruha natiin, acaauru aina obajeein, itajenajanaa jereeite Curuaanaa. 12Nitohaneein tenajaaine chujiara: ‘Nechu jataain, caa atane caje itajenajaain, acaauru ateinaain ichatane ecuuno coinana, Egipto caje acaauru rocohin nihalu Cana Coaunerate’, naain ereeurure egipto cocoaichacurune. Aihane jaun, chajaain obajeein, ii cachaauru itajenaa jereeine baiteein, caohacha que ii suujua coreeu. 13Ii cachaneein nenacaaurulu, Abaraaun, Isaca, Isarael, naaonjoainuri rai ichaajenihane: ‘Canune dede que nenaa, arasijieniji jeeoneein, nefaauruha inara nefoerateeurune coina coroatajanenajaain, satiin caa atane, inara que banihateein, quiicha rucujilu tereeuni, chariji bana satonoelanaala, acaauruque banijiaaineein nihane coina’, naain acaauru rai ereeine coaaucu”, naain jetao, Cana Coaunera ajete Moisesa.
14Niritiin ajetihane jaun jetaote, inaen nii cachaauru itajenaa jerihane baiteein, caohacha que suujua coriha Cana Coaunerane jaun jetao, 15inaen nii ichatane ecuuno caje fauha cue jetao Moisesa, jerane biji cuhane, jerane rauhi siriin laenanohin, coroatajai tabara amaain. 16Cana Coaunera jetaote, raajenihane, nii ajeri caje tabara ichaain, nii niicha laenai tihacoae jetao que teein.
17Nitohaneein, inaen fauha cuuruhane jaun, nichuutaauruhane jaun jetaote, cojiorichuruha cachaaurune aonaain jetao:
“Sonaanaque, neein aitona rijitiin naate cojiorichure, toon loanarihu toniicha”, naa Moisesa rai, Josoene jana jetaote:
18“Coatiha leeochaauru amuritooruhane jaun, rachoojoeein nenatenaneein aonaaun, nii amuritonajaauruhane jaunchu, inaderanaaneein aonaaun, nechu rachoojoenaaneein leeocha nenateinene aonaaun”, nae jetao, Moisesa.
19Niritiin, nii loanari rohan nichuutaain coaraa Moisesane jana jetaote, oro caje ichanohineein teecoa baca jana, nacatiha raasaauruhane jaun jetao, obajeein nii biji cuhane coroatajaain, niicha amai tabara bate bateein, ichatane ramara jaohin jetao, 20nii rijieeoritin, nii oro caje ichanohi baca mucohin usihanau jaohane baiha jetao, raain ajane rijijieein caohachajeein tutuhane baiha, acau ichoae cuaain, nii ajane rijijieein niicha tutuhi riajaain jetao, nii nitohaneein niicha teei, acau coerate isaraelitaauru que. 21Nii baiha jetaote:
“Chana ichei ichacure caa cachaaurute, osa tabaique sarunajaain, neeine coina”, naa Aaroon rai Moisesane jana jetaote:
22“Canu curuaana, coa jataain canu cotaain obaeca, iite raotojoeein caa cachaauru coitucuhi, itolere bana, baaso nejesinaachaque coaaucuruhane jaun. 23Acaaurute canurai: ‘Canacaanu rai chosi ichaaute, canaacha ichanenu beeinete coitucuhache, chaaquechaainti nerurujuae jataain carajaane coina, caa Egipto caje, canacaanu rocoeralu Moisesa’, naauruha canu raine jaunne: 24‘Inara comasaihuru, inara bereecuru, naaonjoainuri irichoque nenaa oro caje acaauru sarsicho uhaauchejia carai’, naanu acaauru raine jaaun, canurai oro teeuruhane jaun, acaauru caje raain usihanau jaohanune janate, caje mitue caa leinjiin baca rijijieein”, naa Aaroone jana jetaote.
25Inaen naitoonjoan rijijieein ichaaoruhane jianeein, leeocha ichaonaaque ichaohi, acaauru nocoeje chanuuruha, acaauru laurijiracurune rijitojoeein, acaauru suujuatenaa coacuelanaala, acaauru rijijieein ichaoha Aaroone coaraane jaun jetao, 26nii loanari bacuujuaniha chujutoroaain:
“Cana Coaunera esenetaerauru, cajiha carohan uhine”, naa Moisesane jaun jetaote, satiin rohan necoodoriaaure lebitacuru. 27Nii jana jetaote, acaauru rai:
“Isarael nichaachene Coaunerate: ‘Chajaain inara loanarihu cauhin, nenainetiin sabere amaain, nenaanajaauru nainetiin, le cachene quichene, inara nejeraauru, laurijiracuru, inaraacha belaihuri, naaonjoainuri sonichuche’, naa Cana Curuaanaa”, nae jetao acaauru rai Moisesa.
28Nii niritoha acaauru rai Moisesane jaun jetaote, nii aitohane rijijieein ichacuruha lebitacurune jaun jetao, nii bananeein nichata oharaacaain cachaauru soaajeeure. 29Nii jaun jetaote:
“Inaen laen enate, esinae rauhijiriin canu cachaneein, canuque banijiaaineein cocoainanohineein neeiche, nii caitoonjoan tonoraelanaala nenacaauru, inara calaohichuru, inara nejeraauru, naaojoainurique nejerateein sohin jaonajaainchene jaun. Nii corenihate, inara coroajeein, inara coroatajanereein Cana Coaunera”, nae jetao, acaauru rai Moisesa.
30Nii cojoanoo jetaote:
“Jataain banejelanaalate, osaque nesaruquiche inara. Nii jaaune, taa Cana Coaunera aina neein irihanune jaun, iniha cureeun, aina irihanune, inara osaque suujua acatena nainihane coina”, nae jetao, ititiacuru rai Moisesa.
31Niritiin jetaote, nii Cana Coaunera aina neein irihane jaun turuhin jetao:
“Esinae rauhijiriin techuisi, osa tabai que nesarucure cachaauru, oro caje baca rijijieein jaain. 32Nii jaune, ichei aitoon acaauruque ii suujua acateeine coina, jana acaauruque ii suujua, acateneeine, nii ii quiricha que teein, iicha laenai canu curuaa jaao”, nae jetao, Cana Coaunera rai Moisesa.
33Niritohane jana jetaote:
“Caitoonjoan tonorae lanaala, osaque nesarunacaauru curuaacuruhachane jaoreeuni, canu quiricha caje. 34Aihane jaun, chajaain nii ichei aitocoaaunne jaaun, nii cachaauru amaaun. Canurai anjerate, nii cuhichene jaa jelai coitucuhin, inara amareein. Inaen acaauru caseteca rihanuhine jaa cojoanonaaque tihane banane, acaauru osa coreniha casetecanaareeuni canu”, nae jetao, Cana Coaunera.
35Niritiin jetaote, nii cachaauru ichoae cunai nalutiae Cana Coaunera, nii oro caje baca rijijieein, acaauru rai Aarooncha ichai coroaecuruhane coreniha.
Obecnie wybrane:
Éxodo 32: URA
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2005, 2024, Wycliffe Bible Translators, Inc.
