Mateo 13
13
Ri c'ambal na'oj puwi ri awanel
(Mr. 4:1-9; Lc. 8:4-8)
1Chupa la' la k'ij, ri Jesús xel bi pa ri ja y xe'tz'ula chuchi' ri mar. 2Y uq'uiyal winak c'ut xemolotaj chiri' pa c'o wi Rire. Ruma la', ri Jesús xoc chupa jun barco, xtz'uyi' chupa y conoje ri winak xecanaj can chuchi' ri mar. 3Yey Rire xujek uya'ic uq'uiyal c'utunic chiquiwach ruc' tak c'ambal na'oj, jewa' xubi'ij chique:
«Jun awanel xel bi cha' que'awanok. 4Ec'uchiri' catajin che ujopopexic rija',#13:4 E rojertan chila' Israel echiri' caqui'an rawanic re ri trigo xa caquijopopej rija' pulew, tec'uchiri' caquich'uk uwi' ruc' ulew. c'o xtzak can chuchi' ri be. Xec'un c'u lo tz'iquin y xo'lquitija bi.
5»C'o ija' xtzak can pa tak abaj; yey ruma na jinta uq'uiyal ulew chuxe', xel tan lo rija'. 6Ec'uchiri' xel lo ri k'ij, xc'atic; yey ruma na jinta ratz'ayak, xchakijic.
7»C'o ija' xtzak can pa tak q'uix. Ec'u ri q'uix xq'uiyic yey rija' xjik' can chuxe'.
8»No'j c'o ija' xtzak can pa chomilaj ulew. Ec'u ri' wa' lic xu'an reka'n. C'o ne jujun rakan xuya jun ciento, c'o jujun chic xuya sesenta y c'o xuya treinta. 9China c'u ri c'o utanibal che utayic, ¡chuta c'u ri'!» xcha'.
Sa' ruchac tak ri c'ambal na'oj
(Mr. 4:10-12; Lc. 8:9-10)
10Ec'u rutijo'n xekib ruc' ri Jesús y xquitz'onoj che:
—¿Su'be cac'utun la chiquiwach ri winak ruc' tak c'ambal na'oj? —xecha'.
11Ri Jesús xuc'ul uwach:
—Chiwe ri'ix ya'talic cak'alajisax runa'oj ri Dios chwi rutakanic petinak chila' chicaj; no'j chique tak ri winak, na ya'tal taj. 12Ma china ri c'o umajom chic, ri' caya'taj ne che cha' más c'o cumajo. No'j china ri na jinta c'o umajom, camaj ne che ri cuch'obo umajom chic. 13Ruma la' quinch'a't cuc' rique xa ruc' tak c'ambal na'oj. Ma tob rique quetzu'nic, e junam ruc' na quetzu'n taj; tob quetanic, e junam ruc' na quetan taj y e ri' na jinta c'o caquimaj usuc'. 14Ma ri quic'ulumam rique e cu'ana pacha' rubi'im can ri Dios ruma ri k'alajisanel Isaías:
Ri'ix tob quixtanic, na jinta c'o quimaj usuc' che ri quito;
y tob ne quixtzu'nic, na jinta c'o quimaj usuc' che ri quiwilo.
15Ma wa tinamit lic u'anom co ri canima';
e pacha' lic c'ayew chique quetanic,
y ri quiwach e pacha' yupulic.
Jec'ula' na jinta c'o caquilo,
na jinta c'o caquito
y na jinta c'o caquimaj usuc';
yey na caquitzelej tane quitzij chinuwach
cha' jela' quebenucunaj Is. 6:9-10
xcha'.
16»No'j ri'ix lic nim ik'ij iwalaxic, ma ri Dios cuya chiwe quiwilo y quita janipa ri cu'an Rire wuma ri'in. 17Pakatzij wi cambi'ij chiwe: Ojertan uq'uiyal k'alajisanelab y ticawex jusuc' quibinic quisilabic lic xcaj caquil bi janipa ri quiwil ri'ix wo'ora; pero na xquimaj ta chi rilic bi. Lic xcaj caquita bi janipa ri quita ri'ix wo'ora, pero na xquimaj ta chi utayic bi.
Ri Jesús cuk'alajisaj ri c'ambal na'oj puwi ri awanel
(Mr. 4:13-20; Lc. 8:11-15)
18»Chita c'ut sa' que'elawi ri c'ambal na'oj puwi ri awanel. 19Rija' xtzak can chuchi' ri be, e pacha' ri ticawex quetaw re ri ch'a'tem chwi rutakanic ri Dios yey na caquimaj ta usuc'. Cac'un c'u lo ritzel winak y caresaj bi ri ch'a'tem xtiqui' pa canima'.
20»Rija' xtzak can pa tak abaj, e pacha' ri ticawex caquita Ruch'a'tem ri Dios y caquicoj ruc' qui'cotemal. 21Pero ruma na e tiquil ta chi utz, na quecowin taj. Ma echiri' cac'un lo c'ambal quipa o queternabex ruc' c'ax ruma quic'ulum Ruch'a'tem ri Dios, quepajtaj c'u ri'.
22»Rija' xtzak can pa tak q'uix e pacha' ri ticawex caquita Ruch'a'tem ri Dios. Pero rubis quic'u'x chwi tak ri cajawax chique, ruc' ri socoso'nic re tak ri beyomalil, cusachisaj uwach Ruch'a'tem ri Dios c'o pa canima'. Ruma c'u ri', na jinta c'ana quijik'obalil quilitaj che ri quibinic.
23»No'j rija' xtzak can pa chomilaj ulew e pacha' ri ticawex caquita Ruch'a'tem ri Dios, lic caquimaj usuc' y lic c'o c'u quijik'obalil quilitaj che ri quibinic. E jela' pacha' rija' lic xu'an reka'n; c'o ne jujun rakan xuya jun ciento, c'o jujun chic xuya sesenta y c'o xuya treinta —xcha ri Jesús.
Ri c'ambal na'oj puwi rak'es cizaña xel lo chuxo'l ri trigo
24Ri Jesús xutzijoj tanchi jun c'ambal na'oj chique:
«Ri cu'ana pa rutakanic ri Dios petinak chila' chicaj e jela' pacha' ri xu'ano echiri' jun achi xutic chomilaj ija' trigo chwa ri rulew. 25Ec'uchiri' quewar conoje ri ticawex, xopon jun achi tzel caril ri rajaw rulew; xe'lak'ay c'u ri' xutic can rak'es cizaña chuxo'l ri trigo#13:25 Rak'es cizaña jela' catzu'nic pacha' ri trigo yey lic na utz taj echiri' quel lo xo'libal ri trigo, ma e cuya rib wa'. y xe'ec c'ut. 26Xel c'u lo ri trigo y echiri' xpok'ic, xk'alajin rak'es c'o chupa.
27Ec'u ri aj chaquib xe'quibi'ij che ri rajaw ri tico'n: “Kajawal, we chomilaj ija' xe'tica la chwa rulew la, ¿pachawi c'u ri' xpe wi rak'es xel lo chupa?”
28»Yey ri rajaw ri tico'n xubi'ij chique: “C'o junok la' tzel quinrilo xolu'tica chupa.”
Xquibi'ij c'u ri raj chaquib che: “We ca'aj la, que'kamich'a ronoje rak'es chupa.”
29»Ec'u ri rajaw ri tico'n xubi'ij chique: “Na qui'mich'a taj; ma we ximich' rak'es, c'axtaj quimich' ri trigo ruc'. 30Chiya'a luwar cheq'uiy na junam, copon na ruk'ijol ri molonic. Ma c'a e chiri' quebenutak ri waj chac cha' caquimol na rak'es nabe, caqui'an chiyata'j y caquixim upa re caporoxic. Tec'uchiri', caquimol ri trigo y que'quiya'a pa cac'oli' wi ri trigo we'in”» xcha'.
Ri c'ambal na'oj puwi rija' re moxtasa
(Mr. 4:30-32; Lc. 13:18-19)
31Ri Jesús xutzijoj tanchi jun c'ambal na'oj chique:
«Rutakanic ri Dios petinak chila' chicaj e pacha' juna ija' re moxtasa xutic jun achi chwa ri rulew. 32Pakatzij wi, la' li'ja' e más ch'uti'n chwa tak rija'; no'j we xq'uiyic, más canimar chwa tak rak'es y cu'ana pacha' jun che'. Quec'un ne ri tz'iquin quexiq'uic' che ruwa caj y caqui'an quisoc puwi tak ruk'ab» xcha'.
Ri c'ambal na'oj puwi ri levadura
(Lc. 13:20-21)
33Ri Jesús xutzijoj wa jun chic c'ambal na'oj chique:
«Rutakanic ri Dios petinak chila' chicaj e pacha' ri levadura. Ma echiri' juna ixok cu'an pam, cuc'am jubik' levadura y cutuc chuxo'libal oxib pajbal harina; yey ri levadura cusipowirisaj upa ronoje ri k'or»#13:33 Wa c'ambal na'oj puwi ri levadura que'elawi tob rutakanic ri Dios xujek xa ruc' queb oxib pero wa' cumaj ronoje ruwachulew. xcha'.
Su'be ri Jesús cac'utun ruc' tak c'ambal na'oj
(Mr. 4:33-34)
34Ri Jesús xuc'ut ronoje wa' chique ri winak ruc' tak c'ambal na'oj y na jinta c'o xuc'utu we na ruc' ta c'ambal na'oj xu'ano. 35E xu'an wa' cha' e cu'ana rubi'im can ri jun k'alajisanel echiri' xutz'ibaj:
Ruc' tak c'ambal na'oj quinc'utunic;
e cank'alajisaj ri na eta'matal ta
chwi lo ri jekebal re ruwachulew Sal. 78:2
xcha'.
Ri Jesús cuk'alajisaj ri c'ambal na'oj puwi rak'es cizaña xel lo chuxo'l ri trigo
36Ec'uchiri', ri Jesús xebuch'a'bej can ri winak y xoc bi pa ja. Xekib c'u rutijo'n ruc' y xquitz'onoj che:
—Kajawal, k'alajisaj la chike sa' que'elawi ri c'ambal na'oj puwi rak'es cizaña —xecha'.
37Ec'u ri Jesús xuc'ul uwach:
—Rachi caticow re ri chomilaj ija' e Ralaxel Chiquixo'l Ticawex. 38Rulew pa catic wi ri tico'n e ruwachulew. Ri chomilaj ija' e tak ri ticawex e c'o chupa rutakanic ri Dios. Rija' re rak'es cizaña e tak ri ticawex eteran chirij ritzel winak. 39Ri jun itzel uc'u'x xutic rak'es e ritzel winak. Ri molonic e ri q'uisbal re ruwachulew, yey ri que'anaw re ri molonic e ri ángeles.
40»Jec'ula' pacha' ri ca'an che rak'es cizaña, camolic y caporox pa ak', jela' ri cu'ana che ri q'uisbal re ruwachulew. 41Ralaxel Chiquixo'l Ticawex quebutak bi ru ángeles cha' quequimolo y quequesaj chupa rutakanic conoje ri equiminom jujun chic pa mac y ri caqui'an ri na utz taj. 42Quebequic'ak bi pa ri orna cajomow ak' chupa; chiri' c'u ri' quebok' wi y cakich'ich' ruwi que'. 43No'j ri jusuc' quibinic quisilabic e jela' pacha' ri k'ij quewon chila' pa catakan wi ri quikaw Dios. China c'u ri c'o utanibal che utayic, ¡chuta c'u ri'! —xcha'.
Ri c'ambal na'oj puwi ri beyomalil mukutalic
44«Rutakanic ri Dios petinak chila' chicaj e pacha' jun beyomalil ewatal can chupa juna ulew. C'o c'u jun achi que'tzak lo puwi' y carewaj tanchi canok. Que'ec c'u chirocho y cu'c'ayij ronoje rubitak re; tec'uchiri', culok' ri ulew pa c'o wi ri beyomalil.
Ri c'ambal na'oj puwi ri chomilaj perla lic q'ui rajil
45»Rutakanic ri Dios petinak chila' chicaj e pacha' ri cu'an juna aj c'ay cutzucuj tak chomilaj abaj perla. 46Ec'uchiri' curik juna chomilaj perla lic q'ui rajil, que'ec y cu'c'ayij ronoje rubitak re; tec'uchiri', culok' ri chomilaj abaj perla.
Ri c'ambal na'oj puwi ri atarraya
47»Ri cu'an chupa rutakanic ri Dios petinak chila' chicaj e pacha' ri cu'ano echiri' cac'ak bi juna atarraya pa ri mar cha' quebu'chapa lo uq'uiyal quiwach tak car. 48»Echiri' nojinak chi ri atarraya che car, raj chapal car caquesaj lo chuchi' ri mar, quetz'uyi' c'ut y quequicha' quipa ri car. E tak c'u ri utzilaj car, quequiya pa chacach; no'j tak c'u ri na e ta utz, quequic'ak bi.
49»Jec'ula' cu'ana che ri q'uisbal re ruwachulew. Quebel bi ri ángeles y quequesaj c'u ri ticawex itzel quic'u'x chiquixo'l ri e jusuc' chwach ri Dios. 50Quebequic'ak c'u bi pa ri orna cajomow ak' chupa; chiri' c'u ri' quebok' wi y cakich'ich' ruwi que'» xcha'.
Ri beyomalil c'ac' y ri beyomalil xex chi c'o wi
51Ec'uchiri', ri Jesús xutz'onoj chique:
—¿Quimaj usuc' ri'ix ronoje tak wa'? —xcha'.
Rique xquic'ul uwach che ri Jesús:
—Cakamaj usuc', Kajawal —xecha'.
52Ec'u ri Jesús xubi'ij chique:
—E juna aj c'utunel re ri tzijpixab, we lic c'o cumaj chwi rutakanic ri Dios petinak chila' chicaj, e pacha' juna achi rajaw ja caresaj lo che rubeyomalil uc'olom, tak ri c'ac' y ri xex chi c'o wi; yey ucabichal wa' cuchapabej. Ma ri aj c'utunel cac'utun chwi tak ri c'ac' umajom, junam ruc' tak ri xex chi umajom lok —xcha'.
Ri Jesús copon pa ri tinamit Nazaret
(Mr. 6:1-6; Lc. 4:16-30)
53Ri Jesús echiri' xuq'uis ubi'xic tak wa c'ambal na'oj chique, xel bi chiri'. 54Echiri' xopon pa rutinamit, xujek cac'utun chiri' pa ri sinagoga. Ec'u ri winak lic xcam canima' che y xquibi'ij:
—¿Pa xu'maja wi wa'chi lu'na'oj? ¿Su'anic cu'an tak wa milagros? 55¿Na e ta neba uc'ajol wa' ri jun carpintero yey ralab ri María? ¿Na e ta neba catzixel ri Jacobo, ri José, ri Simón y ri Judas? 56¿Na ejekel ta neba ri ranab wara chikaxo'l? ¿Pa c'u xu'maja wi ronoje tak ri' wa cu'ano? —xecha'. 57Ewi lic e q'ui tzel xquita ri xubi'ij.
No'j ri Jesús xubi'ij chique:
—Chupa ronoje luwar cayac uk'ij juna k'alajisanel; no'j chupa rutinamit o chiquiwach ri ratz-uchak', na cayac ta uk'ij —xcha'.
58Y ri Jesús na xu'an ta uq'uiyal milagros chiri' ruma na xquicoj taj china Rire.
Obecnie wybrane:
Mateo 13: acrT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2009, Wycliffe Bible Translators, Inc. All rights reserved.
