Matayu 2
2
Yes ŋgara to aaz puughu tila tighita Yesu
1Saawe tau kinik Erod ighamgham pooz pa yes Israela, Yesu tiina Maria ipoopa izi nugh Betelem tau igheen izi taan sirivu to Yudea. Murei ra, zeran siriv tau lezi ŋgar tintiina pa pitum na, tilaagh tila tivot Yerusalem. Zeran tawe, nugh toozi igheen malau kat ila pa aaz puughu. #2:1 Yes ŋgara to aaz puughu tiwatagh Maaron kat mako. Tisuŋsuŋ pa maaron siriv. 2Yes tilam tivot Yerusalem, ve tighason tighe: “Kinik to yes Yuda tau tiina ipoopa na, ileep sindei? Pa yei nileep izi nugh tsiei ta aaz puughu we, ve nighita pitum paaghu ee imin ilaal pani. Tauta nilam nighe nighita, ve niput aghemai pani, ve nipakuru.” Nam 24:17
3Kinik Erod ilooŋ saveeŋ tane le irur ve igham ŋgar naol. Ve eval tiina to Yerusalem tisov tirur, ve tigham ŋgar naol paam. 4Tauvene Erod ipoi yes daaba to watooŋrau tomania ŋgara siriv to tutuuŋ tilam tilup zi, ve ighason zi ighe: “Laak, Mesia, pale tiina ipoopa izi sindei?”
5Yes tiyol aliiŋa tighe: “Pale ipoopa izi nugh Betelem tau igheen taan sirivu to Yudea na. Pa muuŋ, propet ee ibood saveeŋa tauvene:
6 ‘Nugh Betelem tau ugheen taan sirivu to Yudea na, yo nugh sorok mako.
Varum pale iliiv nugh tintiina tau tighamgham pooz pa Yudea.
Pasaa, ŋeer tiina ee pale ivot ilat tsio.
I pale iŋgin tamtamon tsiau Israel, ve igham pooz pazi.’ ” Mika 5:2; Yo 7:42
7Erod isavsaav tomani zi le isov, ra ipoi yes ŋgara to aaz puughu imin yoŋgaaŋ tilam, ve ighason zi poi pa saawe sindei kat tau tighita pitum tawe ivot. 8Ra imbaaŋ zi tila pa nugh Betelem ighe: “Ala ail marani tawe le ighe andeeŋa, o amuul alam apaes payau. Leso yau paam nala naghita, ve naput agheg pani, ve napakuru.”
9-10Erod isavsaav tomani zi le isov, ra tiburig gha tila. Ve pitum tau muuŋ tighita izi nugh toozi na, ila imuuŋ pazi, ve titaghoni gha tila. Yes tighita pitum tawe muul, ve lolozi poia kat. Pitum tana ila le iyooz duduuŋ ila ruum tau ŋeer marani ighengheen pani na paavo. 11Tila tivot ta sewe, ve tiloŋ tila ruum loolo, ve tighita ŋeer marani yesuru tiina Maria. Tiput aghezi pani ve tipakuru, ra tikaak pepelazi, ve tiwaan kuaz siriv tau atuyazi tintiina, ve tigham pani imin pakuruuŋni. Tigham maet gol, ve naunauŋ siriv tau vazizi popoia kat. #2:11 Gol imin ilaal pa Yesu ighe i kinik. Ve frankinsens, ene naunauŋ tau tighamgham pa watooŋrau. Ene itotoi ighe Yesu i Maaron. Ve miir, ene gabua tau tighurghuru izala mateegha pavozi to tigharaat zi. Ene itotoi ighe Yesu pale imaat pait. Mbo 72:10+; Is 60:6
12Murei ra, Maaron ivot toozi ila vivuuŋ, ve iŋgalsekin zi ighe timuul tila to kinik Erod sov. Tauvene titaghon eez ite, ve timuul tila pa nugh toozi.
Yosep igham Yesu yesuru tiina Maria, ve tighau tila pa Isip
13Yes ŋgara to aaz puughu tiburig gha tila, ve malau mako, Maaron imbaaŋ aŋela tooni ee ila ivot to Yosep ila vivuuŋ, ve isaav pani ighe: “Ulooŋ. Erod ighe iil ŋeer marani tane, leso iravu imaat. Tauvene yo aat uburig, ugham ŋeer marani yesuru tiina, ve aghau ala pa Isip. Ala aleep ta sewe, le irau yau nasaav payo muul.”
14Tauvene Yosep iburig pa mboŋ, ve igham ŋeer marani yesuru tiina, ve tighau tila pa Isip. 15Tilepleep ta sewe le Erod imaat.
Tauta saveeŋ tau Maaron ivotia ila propet tooni ee aavo na ighur anooŋa. Saveeŋ tauvene:
“Natug ileep izi Isip, ve napoii imuul ilam.” Igham 4:22; Hos 11:1
Erod irav yes geegeu to nugh Betelem
16Erod isaŋan yes ŋgara to aaz puughu le mako, ra ighilaal ighe yes aat titombaana. Tauvene aate yavyav kat. Ve maata iŋgal saveeŋ tau yes ŋgara to aaz puughu tisavia pa saawe tau tighita pitum ivot, tauvene imbaaŋ zaaba tooni siriv tila nugh Betelem ve nugh siriv tau tigharau na. Tila tivot ta sewe, ve tirav natuzŋa zitamoot tisov tau ndaman toozi ruŋruŋa ve izi. 17Tauvene Maaron aliiŋa tau muuŋ propet Yeremia ivotia na, anooŋa ivot. Saveeŋ tauvene:
18 Taŋiiz tiina pale ivot izi nugh Rama. # 2:18 Nugh Rama igheen igharau nugh Betelem.
Rael pale itaŋ tiina pa natŋa.
Pasaa, tirav zi tisov timataar. Eta ileep muul mako.
Tauvene titoova to tirav Rael aate, eemon tirao mako. Gnp 35:19; Yer 31:15
Yosep igham Yesu yesuru tiina Maria, ve timuul tila pa taan to Israel
19Yosep yesuru Maria ve natuzi Yesu tilepleep izi Isip le Erod imaat. Ra aŋela ee to Maaron ila ivot to Yosep ila vivuuŋ, 20ve isaav pani ighe: “Uburig, ugham ŋeer marani yesuru tiina, ve amuul ala pa taan to Israel. Pa yes tau tiil eez pa ravuuŋ marani tana imaat na, ene tisov timataar wa.” Igham 4:19
21Tauvene Yosep iburig, igham ŋeer marani yesuru tiina, ve timuul tila pa taan to Israel. 22Eemon Yosep ilooŋ tighe Erod naatu Arkelaus igham taama niia, ve imin kinik pa taan sirivu to Yudea. Tauvene iroi pa ila ileep izi Yudea. Ve gabua ite, Maaron ivot tooni ila vivuuŋ, ve iveveena ighe tileep izi Yudea sov. Tauvene Yosep ipaghau ŋeer marani yesuru tiina tila taan sirivu to Galilaia. 23Tila tivot ta sewe, ve tileep izi nugh Nasaret. Tauta Maaron aliiŋa tau propet tooni tivotia na ighur anooŋa. Saveeŋ tauvene:
Tamtamon pale tiwaato tighe ‘Ŋeer to Nasaret.’ Lu 2:39; Yo 1:46
Obecnie wybrane:
Matayu 2: tucNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2011, Wycliffe Bible Translators, Inc. All rights reserved.
