โยฮัน 1
1
ปือมือเลา นู บูวัจ บรี ฮีโดะ
1ลามูลา ดูลู นูตู เตอ_ นู บลาโลก จะ ปือมือเลา นะ ตูฮัด_ ญา อาดา ดัฮ. ปือมือเลา อีตู_ ญา อาดา ดูโดะ บือซามา ฌางัน ตูฮัด บือซัยํ เดะ อาตัซ ดัฮ. นู จะ_ ปือมือเลา อีตู เตอ_ ฌาดี ตูฮัด เลอ. 2ญา เตอ_ ลามูลา ดูลู นูตู_ ญา อาดา ดูโดะ บือซามา ฌางัน ตูฮัด บือซัยํ เดะ อาตัซ. 3ตูฮัด เดะ อาตัซ บือเลฮ ซูโรฮ ปือมือเลา อีตู_ บือฌาดี โกะ ซือบารัก ราตา ซือมูฮา. เดะ บือนา บารัก นู บือเลฮ บือฌาดี เตอ_ ฮอย นามา โปด_ นู ตูฮัด เตด บือเลฮ ซูโรฮ ปือมือเลา อีตู บือฌาดี. 4ปือมือเลา นะ ตูฮัด อีตู_ ญา เลอ นู บรี ฮีโดะ. นู ฮีโดะ อีตู เตอ_ ฌาดี ตือปัจ จรัฮ นู ซูโลฮ บรี กะ โกะ อูมัจ ซือมียา ราตา_ บรี ลีฮัจ ลาฆู ซูโงฮ. 5นู จรัฮ เตอ_ ญา ซูโลฮ มาแรฮ โซะ ตือปัจ กือลับ_ จะ นู กือลับ อีตู เตอ_ นะ อาเมด ฌือนัฮ เดะ ลาฆู จรัฮ เตด บือเลฮ ดัฮ เลอ.
6อาดา ซือมียา ซืออูรัก_ นู ตูฮัด เดะ อาตัซ ซูโรฮ มาแรฮ ดัฮ_ ญา ปือนามา จะ_ โยฮัน.#มท. 3.1; มก. 1.4; ลก. 1.13,17,76; 3.2 7ญา โปด_ มาแรฮ ฌาดี ซะซรี_ ปาซัน ลาฆู นู จรัฮ อีตู_ บีดา โกะ ซือมียา ซือมูฮา นะ ปือจายา กะ ลาฆู จรัฮ_ กรานา ปือมือเลา นะ ญา เลอ. 8โยฮัน เตอ_ บูกัด ญา ฌาดี นู จรัฮ อีตู_ ตาปี ญา มาแรฮ_ บีดา นะ มือเลา บรี ฌาดี ซะซรี_ กะ ปาซัน ลาฆู นู จรัฮ อีตู เลอ. 9อีตู เลอ_ ฌาดี ลาฆู จรัฮ ซูโงฮ_ นู ซูโลฮ มาโซะ กะ ดือนียา_ นู บูวัจ บรี กะ โกะ อูมัจ ซือมียา ราตา_ บือเลฮ ลีฮัจ ลาฆู นู ซูโงฮ.
10ปือมือเลา นะ ตูฮัด อีตู_ ญา อาดา ดูโดะ เดะ ดาลับ ดือนียา. มีเซ จะ ญา โปด_ บือเลฮ บือฌาดี ดือนียา ดัฮ เตอ_ ตาปี โซะ ซือมียา เดะ ดือนียา_ กูญา เตด กราลา ญา เลอ. 11ญา มาแรฮ รอจ กะ นังฆรี นะ ญา ดัฮ_ ตาปี โกะ ลูมอฮ นะ ญา โปด_ ฮอย เตด บือเลฮ ซาโมจ ญา. 12ตาปี โซะ โกะ ซือมียา นู มาแรฮ ซาโมจ ญา_ ซือมียา นู ปือจายา กะ ญา เตอ_ ญา บือเลฮ อาเกะ บรี กะ กูญา ฌาดี นานะ นะ ตูฮัด บือซัยํ เดะ อาตัซ เลอ. 13กูญา บือฌาดี ดัฮ_ บูกัด ตูโรจ บือกะ โกะ อูมัจ ซือมียา ราตา_ บูกัด ตูโรจ ฮาตี นะ โกะ ซือมียา ดีฮา โปด_ ตาปี ตูฮัด เดะ อาตัซ เลอ_ นู ฌาดี อาโปก นะ กูญา.
14ปือมือเลา นะ ตูฮัด อีตู เตอ_ ญา มาแรฮ ฌาดี อูมัจ ซือมียา ดัฮ_ ญา บือเลฮ ดูโดะ เดะ ตืองัฮ ลูมอฮ กีตา_ บือเลฮ ปลีฮัจ บรี ปือนอฮ จะ_ ตูฮัด เดะ อาตัซ ฌาดี กะฮามี ซูโงฮ_ จะ ญา นะ ฮาลัย บรี ซือลามัจ กะ อูมัจ ซือมียา. กีตา บือเลฮ ลีฮัจ ลาฆู บือซรี บือซายา นะ ญา_ ซือรูปา บือกะ ลาฆู บือซรี นะ นานะ ตูงัน นะ อาโปก เดะ อาตัซ เตอ.
15โยฮัน ญา มือเลา บรี ฌาดี ซะซรี_ กะ ปาซัน นู ปือมือเลา อีตู เตอ_ ญา บือเลฮ บือซูระ มือญาเระ จะ_ “นี เลอ_ ฌาดี ซือมียา นู กู บือเลฮ มือเลา ดูลู ดัฮ จะ_ ‘ซือมียา นู นะ มาแรฮ เดะ บลากัก กู เตอ_ ญา เลอ_ นู บือซัยํ ลือเบฮ เดะ กู_ ซาเบะ จะ_ ญา อาดา ดูลู เดะ กู.’ ” ญา จะ.
16นู ญา ปือนอฮ ฌางัน ลาฆู บาฌิ เตอ_ ญา บือเลฮ ฮาลัย บรี ซือลามัจ กะ กีตา ซือมูฮา_ บือกะ ลาฆู บาฌิ นู ซูโซด ลาฆู บาฌิ ดัฮ เลอ. 17ซาเบะ จะ_ ตูฮัด เดะ อาตัซ บือเลฮ กีเรบ ปือมือซัด ฮูโกบ อีตู บรี กะ มูซา มือญาเระ. ตาปี ลาฆู นู ญา ฌาดี กะฮามี ซูโงฮ_ นู ญา นะ ฮาลัย บรี ซือลามัจ กะ อูมัจ ซือมียา เตอ_ เยซู คริด เลอ_ ฌาดี ซือมียา นู บาวา ลาฆู อีตู มาแรฮ ปลีฮัจ. 18ฮอย ซือมียา ดีฮา โปด_ ดือละ ลีฮัจ ตูฮัด เดะ อาตัซ. นู นานะ ตูงัน อีตู_ นู ฌาดี ตูฮัด_ นู ดูโดะ โซะ รูโซะ นะ อาโปก เดะ อาตัซ เตอ_ ญา เลอ บือเลฮ บรี ลีฮัจ ดัฮ จะ_ ตูฮัด ฌาดี กะฮามี เลอ.
โยฮัน_ นู บรี ซือลับ เดะ อาเย_ ฌาดี ซาปา?
(มัดทัย 3.1-12; มาระโก 1.1-8; ลูกา 3.1-18)
19ปือมือเลา ซะซรี นะ โยฮัน ฌาดี กะฆีนี เตอ. ตานา โกะ กือปาลา ลูมอฮ บักซา ยิว_ เดะ นังฆรี เยรูซาเลม_ ซูโรฮ โกะ ซามี ฌางัน โกะ ลูมอฮ เลวี ซือตืองัฮ ปี_ บีดา นะ ตาญา จะ_ ญา ฌาดี ซาปา เตอ_ 20โยฮัน ญา เตด กีปัซ_ ตาปี ญา ซาโงะ จะ_ “กู บูกัด ราฌา นู บรี ซือลามัจ อีตู เลอ.”
21กูญา ตาญา ญา จะ_ “ดัฮ กะฆีเตอ_ เกา ฌาดี ซาปา เลอ? ฌาดี เอลียา เฆอ?”
ญา ตีกัฮ จะ “บูกัด เลอ.”
กูญา จะ “กะฆีเตอ เกา ฌาดี ซือมียา ตูโดฮ อีตู เฆอ?”#1.21 ลูมอฮ ยิว กูญา อาดา นาตี ซือมียา ตูโดฮ ลาฆู นะ ตูฮัด ซืออูรัก_ นู นะ มาแรฮ มือญาเระ จะ_ ราฌา นู บรี ซือลามัจ เตอ_ ญา ฆามะ นะ มาแรฮ รอจ. ลีฮัจ ปฮก 18.15,18
ญา ตีกัฮ จะ “บูกัด.”
22กูญา อีตู ตาญา ปูลัก จะ_ “เกา ฌาดี ซาปา? มีตา บรี มือญาเระ กะ กามี ดูลู_ บีดา กามี นะ บือเลฮ ปี มือญาเระ_ กะ ซือมียา นู ซูโรฮ กามี มาแรฮ เตอ. เกา มืองากู ญาวา ตะอาซิก จะ_ ฌาดี ซาปา เลอ?”
23โยฮัน ตีกัฮ จะ_ “กู นี_ ฌาดี ซือมียา อีตู_ บือกะ นู อิซายา ญา บือเลฮ มือเลา ตูโดฮ ดูลู ดัฮ จะ
“ ‘อาดา ซือวารา นะ ซือมียา บือซูระ_ เดะ ปาดัก ตานัฮ ตูโฮยํ นู ลือฆา จะ
กือนา บือกรือฌา ฌาลัด บรี รือมัก เลอ_ บีดา ตูฮัด นะ มาแรฮ #
อซย 40.3 .’ ญา จะ.”
24โซะ โกะ ซือมียา นู ลูมอฮ ฟาริซี ซูโรฮ มาแรฮ เตอ_ 25กูญา อีตู ตาญา โยฮัน จะ_ “ดัฮ เกา บูกัด ราฌา นู บรี ซือลามัจ อีตู_ บูกัด เอลียา_ บูกัด ซือมียา ตูโดฮ ปือมือเลา นะ ตูฮัด อีตู เตอ_ บูวัจ นามา ปะ_ เกา บูวัจ ลาฆู ซือลับ เดะ อาเย เลอ?”
26โยฮัน ญา บือเลฮ ตีกัฮ กะ กูญา อีตู จะ_ “กู นี_ บรี ลาฆู ซือลับ ฌางัน อาเย_ ตาปี อาดา ซือมียา ซืออูรัก_ นู ดูโดะ เดะ ตืองัฮ ลูมอฮ กาเญา_ นู กาเญา เตด กราลา. 27ซือมียา อีตู เลอ_ นะ มาแรฮ เดะ บลากัก กู. ตาลี ปะตาปะ นะ ญา โปด_ กู เตด ปาโตจ นะ อูฆัย เลอ.”
28ลาฆู กะฆีนี_ บือเลฮ บือฌาดี เดะ ตูโปะ เบดทานี_ เดะ ซรือบัก ซูงัย จอแดน_ โซะ อาตัซ มาตาอารี_ นู ตือปัจ โซะ โยฮัน ญา บูวัจ ลาฆู ซือลับ เดะ อาเย เลอ.
อานะ กาเมก นะ ตูฮัด
29ลือปัซ ซืออารี โซะ ปาฆี_ โยฮัน บือเลฮ ลีฮัจ เยซู มาแรฮ มียา ญา. ญา มือเลา จะ_ “ลีฮัจ เลอ_ อานะ กาเมก นะ ตูฮัด_ ซือมียา นู ซาโมจ ลาฆู ซาลัฮ บือดูซา นะ ดือนียา_ ปี บูวัก เตอ. 30ญา เลอ_ นู กู บือเลฮ มือเลา ตูโดฮ ดัฮ จะ_ ‘เดะ บลากัก กู_ อาดา ซืออูรัก นู นะ มาแรฮ_ ฌาดี บือซัยํ เดะ กู เลอ_ ซาเบะ จะ_ ญา อาดา ดูโดะ ดูลู เดะ กู.’ 31กู ตะอาซิก โปด_ เตด บือเลฮ ตาฮู ดัฮ จะ_ ซาปา นู นะ ฌาดี ซือมียา อีตู. ตาปี กู มาแรฮ บูวัจ ลาฆู บรี ซือลับ เดะ อาเย เตอ_ บีดา นะ บรี ตาฮู ปาซัน ลาฆู นะ ญา_ กะ ลูมอฮ บักซา อิซราเอน.”
32โยฮัน ญา มือเลา ฌาดี ซะซรี จะ_ “กู บือเลฮ ลีฮัจ ซือมืองัจ นะ ตูฮัด_ ซือรูปา บือกะ บูโรก ปาตี_ ตูโรด มาแรฮ ดาตัก เดะ โซะ ลาแงะ_ มาแรฮ ดูโดะ เดะ ซือมียา อีตู เลอ. 33ดูลู_ กู ตะอาซิก โปด_ เตด บือเลฮ ตาฮู ดัฮ จะ_ ซาปา นู นะ ฌาดี ซือมียา อีตู_ ตาปี ตูฮัด เดะ อาตัซ_ นู บือเลฮ ซูโรฮ กู มาแรฮ บูวัจ ลาฆู ซือลับ เดะ อาเย เตอ_ ญา มือเลา ฌางัน กู จะ_ ‘ดัฮ เกา ลีฮัจ ซือมืองัจ นะ ตูฮัด_ ตูโรด มาแรฮ ดูโดะ เดะ ซือมียา ดีฮา_ ญา เลอ_ นู นะ บูวัจ ลาฆู ซือลับ_ เดะ ซือมืองัจ นะ ตูฮัด.’
34“กะฆีเตอ_ กู บือเลฮ ลีฮัจ ดัฮ_ บือเลฮ ฌาดี ซะซรี จะ_ ซือมียา อีตู เตอ_ ญา ฌาดี นานะ นะ ตูฮัด เดะ อาตัซ เลอ.” โยฮัน ญา จะ.
โกะ ซือมียา ลามูลา_ นู ตูโรจ กะ เยซู
35จรัฮ ปาฆี_ ซืออารี ปูลัก_ โยฮัน ญา ตืองัฮ บือดีรี โซะ อีตู_ ฌางัน มูเระ นะ ญา_ ดูวา อูรัก. 36กูญา ลีฮัจ เยซู ตืองัฮ บือฌาลัด_ โยฮัน ญา มือเลา จะ_ “ลีฮัจ เลอ_ อานะ กาเมก นะ ตูฮัด เดะ อาตัซ.”
37ตานา กูญา ดืองัยํ โยฮัน มือเลา กะฆีเตอ_ กูญา ดูวา อูรัก_ บือฌาลัด ตูโรจ กะ เยซู ปี. 38โซะ เยซู ญา กรือเลฮ กะ บลากัก_ ลีฮัจ กูญา ดูวา อูรัก อีตู_ ตูโรจ กะ ญา. กะฆีเตอ_ ญา ตาญา จะ_ “กาเญา มียา นามา เลอ?”
กูญา ดูวา อูรัก ตีกัฮ จะ_ “บูมอยํ_ เกา ดูโดะ ปัจ ดีฮา?” นู จะ_ บูมอยํ_ เดะ บาซา นะ กูญา_ ฌาดี จะ_ ซือมียา ปานัย อาฌัยํ.
39เยซู ญา ตีกัฮ กะ กูญา จะ_ “มาแรฮ ลีฮัจ เลอ.” กะฆีเตอ_ กูญา ตูโรจ ปี_ กูญา ลีฮัจ ตือปัจ นู เยซู ดูโดะ. กูญา โปด_ ดูโดะ ฌางัน เยซู เดะ อารี อีตู_ ซาเบะ จะ_ วะตู อีตู ฆามะ ปูโกยํ ปัจ บือเลฮ ดัฮ.
40นู ซืออูรัก เดะ ดูวา อูรัก อีตู_ นู ดืองัยํ โยฮัน มือเลา_ นู บือเลฮ ตูโรจ เยซู ปี เตอ_ ญา ปือนามา จะ_ อันดรู_ อาดี เดะ ซีโมน เปโตร. 41กะฆีเตอ_ อันดรู ปี ดูลู_ มียา ซีโมน_ จา เดะ ญา_ มือญาเระ จะ_ “กามี บือเลฮ ดาปัจ ซือมียา อีตู_ นู ฌาดี มาซีฮา.” นู จะ มาซีฮา อีตู_ ฌาดี จะ “ ราฌา นู บรี ซือลามัจ”. 42กะฆีเตอ_ อันดรู_ ญา บาวา ซีโมน ปี ดาปัจ เยซู. เยซู ญา ลีฮัจ ซีโมน_ มือเลา จะ_ “เกา ปือนามา ซีโมน_ นานะ นะ โยฮัน_ บูกัด เฆอ? ตาปี กูญา นะ บลาโลก เกา จะ_ เคฟา.” ปือนามา อีนี ญา ซือรูปา กะ ปือนามา จะ_ เปโตร_ ฌาดี จะ_ บาตู บือซัยํ.
เยซู บลาโลก ฟีลิบ ฌางัน นาทานาเอน
43จรัฮ ปาฆี ปูลัก_ เยซู ญา ตือตู เดะ ฮาตี จะ_ นะ ปี กะ นังฆรี ฆาลิลี. ญา ดาปัจ ฟีลิบ_ มือเลา ฌางัน ญา จะ_ “เกา กือนา ตูโรจ กะ กู เลอ.” 44ฟีลิบ เตอ_ ญา ดาตัก มาแรฮ เดะ ตูโปะ เบดซัยดา_ ตูโปะ นะ อันดรู ฌางัน เปโตร. 45ฟีลิบ ญา ปี มียา นาทานาเอน_ มือญาเระ กะ ญา จะ_ “กามี บือเลฮ ดาปัจ ซือมียา อีตู_ นู มูซา ญา บือเลฮ มือเลา เดะ ซูรัจ ปือมือเลา ฮูโกบ นะ ตูฮัด ดัฮ_ นู ลูมอฮ ซือมียา ตูโดฮ บือเลฮ มือเลา ตูโดฮ ปาซัน ลาฆู นะ ญา. ญา เตอ_ ฌาดี เยซู_ นานะ นะ โยเซบ_ ซือมียา ตูโปะ นาซาเรด.”
46นาทานาเอน_ ญา ตาญา จะ_ “ลาฆู นู บาฌิ นามา_ นะ มาแรฮ ดาตัก เดะ นาซาเรด_ บือเลฮ เฆอ?”
ฟีลิบ ญา ตีกัฮ จะ_ “มาแรฮ ลีฮัจ เลอ.”
47ตานา เยซู บือเลฮ ลีฮัจ นาทานาเอน_ มาแรฮ มียา ญา_ ญา มือเลา ปาซัน ลาฆู นะ ญา จะ_ “ลีฮัจ เลอ_ ซือมียา ลูมอฮ อิซราเอน_ นู ซูโงฮ. เดะ ญาวา นะ ญา_ ฮอย ลาฆู ตีปู เลอ.”
48นาทานาเอน_ ญา ตาญา เยซู จะ_ “เกา กราลา กู ปัจ ดีฮา เลอ?”
เยซู ตีกัฮ จะ_ “ดูลู เดะ ฟีลิบ บือเลฮ บลาโลก เกา_ วะตู เกา ตืองัฮ ดูโดะ เดะ บาวัฮ ปูโฮด กรายา บูดี อีตู_ กู บือเลฮ ลีฮัจ เกา เลอ.”
49นาทานาเอน ญา มือเลา จะ_ “บูมอยํ_ เกา ฌาดี นานะ นะ ตูฮัด เดะ อาตัซ_ ฌาดี ราฌา นะ ลูมอฮ อิซราเอน เลอ.”
50เยซู ญา ตีกัฮ กะ ญา จะ_ “ซาเบะ กู บือเลฮ มือญาเระ กะ เกา ดัฮ จะ_ กู ลีฮัจ เกา ดูโดะ เดะ บาวัฮ ปูโฮด กรายา บูดี อีตู_ กะฆีเตอ เกา ปือจายา เฆอ? จะ_ เกา นะ บือเลฮ ลีฮัจ ลาฆู นู บือซัยํ ลือเบฮ เดะ อีตู ลาฆี เลอ.” 51กะฆีเตอ_ เยซู มือเลา กะ ญา จะ_ “กู มือญาเระ ลาฆู ซูโงฮ กะ กาเญา จะ_ กาเญา นะ ลีฮัจ ลาแงะ ญา บูกา ดัฮ_ อาดา โกะ ฮูลู บาลัก นะ ตูฮัด บือกะ กูญา ตูโรด_ ญาแญะ โซะ อาตัซ#ลมล 28.12 นานะ นะ อูมัจ ซือมียา เลอ.”
Obecnie wybrane:
โยฮัน 1: ULBIBLE
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
