ลามูลา 8
8
อาเย กริก ดัฮ.
1กะฆีเตอ_ ตูฮัด เดะ อาตัซ เตอ_ ญา บรีงัจ กะ โนอา_ ฌางัน โกะ บือนาตัก ฮูตัด_ ฌางัน โกะ บือนาตัก บือเลฮ ซูโรฮ_ นู ดูโดะ ฌางัน โนอา เดะ ดาลับ กาปัน. กะฆีเตอ_ ตูฮัด บูวัจ บรี อาดา อาเงน ตีโยะ เดะ ดือนียา_ อาเย โปด กูรัก ดัฮ. 2มาตา อาเย เดะ บาวัฮ ตานัฮ ตูโดก ดัฮ. จือลัฮ ลาแงะ โปด_ ตูโดก ฌูฆา. ฮูฌัด โปด_ บราดู ดัฮ. 3อาเย โปด_ กูรัก เดะ ดือนียา ซือรูโลยํ. ลือปัซ ซือราตุซ ลีมา ปูโลฮ อารี (150) เตอ_ อาเย โปด กูรัก บาญะ ดัฮ. 4กะฆีเตอ_ เดะ อารี ตูโฌฮ บือลัซ_ บูลัด ตูโฌฮ_ กาปัน อีตู มาแรฮ ตือกริก เดะ อาตัซ บูเกะ_ ปือนามา อารารัด. 5กะฆีเตอ_ อาเย พรัด กูรัก_ พรัด กูรัก_ ตือดะ บูลัด ซือปูโลฮ. เดะ อารี ซา เดะ บูลัด ซือปูโลฮ_ บือเลฮ ลีฮัจ โกะ ฮูโฌก บูเกะ.
6ตานา ฆือนะ ปัจ ปูโลฮ (40) อารี ดัฮ_ โนอา เตอ_ ญา บูกา ตีกะ_ นู ญา บูวัจ เดะ กาปัน ดัฮ. 7ญา ปลือปัซ บูโรก อากๆ ซืออีโกยํ. บูโรก อากๆ อีตู โปด_ ตรือบัก ปี มาแรฮ_ ฌู ตือดะ อาเย กริก เดะ ดือนียา.
8กะฆีเตอ_ โนอา ปลือปัซ บูโรก ปาตี ซืออีโกยํ_ นะ ลีฮัจ จะ_ อาเย ญา กริก เดะ ดือนียา_ เฆอ เตด. 9ตาปี บูโรก ปาตี อีตู_ ฮอย ตือปัจ นะ มืองาตอจ_ กรานา อาดา อาเย อาโปฮ เดะ ดือนียา ลาฆี. กะฆีเตอ_ บูโรก อีตู ตรือบัก มาแรฮ_ ปาเระ กะ โนอา เดะ กาปัน. โนอา อาเงา ตางัน_ รีฆะ บูโรก อีตู_ อาเมด ปือมาโซะ กะ ดาลับ กาปัน ปาเระ.
10ตานา โนอา นาตี ตูโฌฮ อารี ลาฆี_ ญา ปลือปัซ บูโรก ปาตี อีตู ปี ปูลัก. 11รอจ วะตู ปะฮือญา_ บูโรก ปาตี อีตู_ ญา ตรือบัก ปาเระ มาแรฮ กะ โนอา_ อาดา ฌางัน ดาโวด ปูโฮด กือดูโนด นู ฮีเฌา_ เดะ ปาโตะ นะ ญา. กะฆีเตอ_ โนอา ตาฮู จะ_ อาเย กริก เดะ ตานัฮ ดัฮ. 12กะฆีเตอ_ โนอา นาตี ลาฆี_ รอจ กะ ตูโฌฮ อารี ปูลัก_ ญา ปลือปัซ บูโรก ปาตี อีตู_ ปี ปูลัก_ ตาปี บูโรก อีตู_ ญา ฮอย เตด ปาเระ มาแรฮ ซารี โนอา ดัฮ.
13ตานา อูมอยํ นะ โนอา รอจ กะ นัม ราตุซ ซา (601) ตาโฮด_ เดะ บูลัด ซา_ เดะ อารี ซา เดะ บูลัด อีตู_ อาเย กริก เดะ ตานัฮ ดัฮ. กะฆีเตอ_ โนอา บูกา ปราโบก กาปัน_ ฌือเงาะ ลีฮัจ บือฆารี จะ_ อาเย กริก ดัฮ. 14เดะ บูลัด ดูวา_ เดะ อารี ดูวา ปูโลฮ ตูโฌฮ_ ตานัฮ กริก ฮาบิฮ ดัฮ.
15กะฆีเตอ_ ตูฮัด มือเลา ฌางัน โนอา จะ 16“ตรือเบะ เดะ กาปัน ปี เลอ. เกา ฌางัน โกะ อานะ บีนี นะ เกา_ ฌางัน โกะ มือนาตู นะ เกา_ กือนา ตรือเบะ ซือมูฮา เลอ. 17โกะ บือนาตัก นู ฮีโดะ ราตา_ นู ดูโดะ ฌางัน เกา_ ราตา มาจับ เตอ_ โกะ บูโรก_ โกะ บือนาตัก_ โกะ บือนาตัก มือรากะ เดะ ตานัฮ ฌูฆา_ อาเมด กูญา ซือมูฮา_ ตรือเบะ ปี ซามา เลอ_ นะ บือเลฮ บือตามัฮ บือแนฮ บรี บาญะ_ เดะ ดือนียา” ตูฮัด ญา จะ.
18กะฆีเตอ_ โนอา ตรือเบะ ปี_ ฌางัน โกะ อานะ บีนี นะ ญา_ โกะ มือนาตู นะ ญา ฌูฆา. 19โกะ บือนาตัก ราตา ฌือแนฮ_ โกะ บือนาตัก มือรากะ_ ฌางัน โกะ บูโรก ฌูฆา_ โกะ บือนาตัก นู ฮีโดะ ปี มาแรฮ เดะ ตานัฮ เตอ_ กูญา ซือมูฮา ตรือเบะ เดะ กาปัน_ บือกะ บือแนฮ นะ ญา.
ลาฆู บือฌาญี นะ ตูฮัด ฌางัน โนอา
20วะตู อีตู_ โนอา บูวัจ ตือปัจ มือญือมัฮ กะ ตูฮัด บือซัยํ เดะ อาตัซ. บือนาตัก นู จรัฮ บาฌิ_ ราตา ฌือแนฮ เตอ_ ฌางัน บูโรก นู จรัฮ บาฌิ ราตา ฌือแนฮ ฌูฆา_ โนอา อาเมด มาแรฮ บูนอฮ ซือตืองัฮ_ ตูนู มือญือมัฮ กะ ตูฮัด_ เดะ ตือปัจ มือญือมัฮ อีตู. 21ตานา ตูฮัด บือซัยํ เดะ อาตัซ ญา บาวู กรือซัย นู ซูกา เดะ ฮาตี ดัฮ_ ญา มือเลา เดะ ฮาตี จะ_ “ตะเดะ อีนี ปี_ กู นะ เตด อาโบยํ ตานัฮ ปูลัก. มีเซ จะ_ อูมัจ ซือมียา เตด บาฌิ เตอ_ ราตา ลาฆู เดะ ฮาตี นะ ญา_ ฌาดี ลาฆู นู ฌาฮัจ_ ตะเดะ ดือมิ มาแรฮ เตอ_ ตาปี กู นะ เตด บูวัจ บรี บือนา นู ฮีโดะ ซือมูฮา บือนาซา_ บือกะ นู กู บูวัจ ดัฮ กะฆีนี. 22กาลา นู ดือนียา อาดา ลาฆี_ นะ อาดา มูเซด มือนานัม_ มูเซด กือตับ. อาดา วะตู บือแฌะ_ วะตู ฮางัจ. อาดา มูเซด ฮางัจ_ มูเซด บือแฌะ. อาดา โซะ ซียัก_ โซะ มาลับ. บือนา อีนี ซือมูฮา_ ฮอย เตด บราดู ดัฮ”_ ตูฮัด ญา จะ.
Obecnie wybrane:
ลามูลา 8: ULBIBLE
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
