Mateo 11

Nagtanung ti Juan a Mágbawtismo Ni Talaga ti Jesus U Cristo

(Lukas 7:18-23)

1Nadid nikuna natapos dán a nagtoldo ti Jesus tu sapulo ay ti duwwa na a disepulus ay linakaden na itona a banuwan sakay immangay siya tu ibaiba pa a banuwan ti Galilea para magtoldu. 2Ti iye be a panahun ay nepireso ti Juan a mágbautismo. Nabaheta na u ginággimet ni Cristo kanya pinalakad na u disepulus na para tanungan ti Jesus. 3Tinanung de ti Jesus “Hiko beman a talaga u Cristo a áuhayán me oni magguhay kami pa ti iba?” 4Tinábbeg hide ni Jesus “Angay moy ikagi ni Juan u netan sakay nasaneg moy he. 5Ikagi moy a maketa dán u buhák. Makalakad u pilay. Nagpiyya u te ketong. Makasaneg dán u bángngág. Nabiyag u patay sakay natolduwan dán u pobre hide tu maganda a baheta. 6Sakay ikagi moy pa nikuna a ‘Pagpalaán nu Diyos u tolay a awan manghina u pánniwala de nikán.’”

Impaliwanag ni Jesus tu Tolay Hide Ni Ti Deya ti Juan

(Lukas 7:24-30)

7Nikuna lumakad dán u disepulus ni Juan ay sinapulan a impaliwanag ni Jesus u patungkul ni Juan tu katolayan hide. Kinagi na nide “Anya beman u angay moy inileng tu kaparangan? Essa beman a mahina a lállake a konna tu kugun a alisto la idappay-dappay nu pahás? 8Oni essa a tolay a maganda ti badu? U magbadu ti konna hina ay hod la mágyan ti palasyo bakán a ti kaparangan. 9U angay moy beman inileng ay essa a propeta? Tama, pero ti Juan ay mas higit pa tu propeta. 10Ti Juan u nesulat tu Kasulatan a kinagi nu Diyos a ‘Pakatandaan moy, ipadipalongu ku a paangayán u tagabaheta ko para maghanda tu angayan mo#11:10 Basaan tu Malakias 3:1 .’ 11Kagiyán ku nikam a tu atanan a nagin tolay ti munduwáy ay awan ti humigit pa nan ti Juan a mágbawtismo. Pero u pinakababa tu kahariyan nu Diyos ay higit pa nan ni Juan. 12Sapul tu págtoldu ni Juan a Mágbawtismo hanggan nadid u kahariyan nu Diyos ay nakadanas ti grabe a atake sakay gusto nu mágkatapang a tolay a agiwán u kahariyan. 13Dipo bagu ti Juan a dumemát ti munduwáy ay nagtoldu u Kasulatan tungkul tu kahariyan nu Diyos. 14Sakay ni maniwala kam tu kagiyán ko, ti Juan ay ti Elias a dati dán a nehula tu kasulatan a magsoli a huway. 15Ni ti deya u masoh a mágsaneg ay dapat mágsaneg ti husto sakay intendiyán na u kinagi ko.”

Makpal a Tolay a Umád a Maniwala

(Lukas 7:31-35)

16Kinagi pa ni Jesus nide “Kodya ko a ipareho u tolay nadid? Kumán hide a anak a mággayam tu pággayaman sakay magreklamo tu kaayam de, 17kagi de ‘Tinogtugan mi kam pero awan kam magsayaw, nagsanget kame pero awan kam nalungkut.’ 18Dipo ti Juan a mágbautismo ay awan uminom ti alak sakay pirmi magkulasyon tapos kagi de a te demonyo kan siya. 19Nadid hikán a Anak nu Tolay ay kuman sakay uminom ti alak ay kagiyán di be a ‘Katoy u essa a tolay a maunas sakay lasingero. Barkada siya nu tagakolekta hide ti buwes sakay u makasalanan hide.’ Pero ketan labe u bunga nu karunungan nu Diyos tu biyag nu tolay a sumunud.”

Parusaan nu Diyos U Tolay a Umád a Magsisi

(Lukas 10:13-15)

20Sakay nágngál ti Jesus tu tolay hide tu banubanuwan hide a makpal siya a ginimet a himala dipo awan hide nagsisi. 21“Kakagbi kam a taga Corazin sakay Betsaida. Dipo ni u ginimet ko a himala hide nikam ay nangyare ti Tiro sakay ti Sidon tu itod ay nagsisi nakwa hide. Nagbadu nakwa hide ti kostal sakay sássapwagan de u ulo de ti abu bilang pángpeta a nagsisi hide. 22Ikagi ku nikam a mas higit u parusa moy nan tu parusa nu taga Tiro sakay Sidon tu Aldew nu Pághukom. 23Sakay hikam a taga Capernaum, dyan moy ipalalo a makaangay kam ti langet dipo iyangay kam nu Diyos ti impiyerno. Ni u himala hide a ginággimet nikam ay nangyare ti Sodoma ay nagsisi nakwa u tolay hod hide tu itod sakay awan hide napuksa. 24Pakatandaan moy tu Aldew nu Pághukom ay mas higit u parusa moy nan tu parusa a nadanas nu taga Sodoma tu itod.”

Atádden Ni Jesus ti Imang U Pagud Hide

(Lukas 10:21-22)

25Sakay ti itona be a panahun ay nanalangin ti Jesus “Amáng, u Panginoon ti langet sakay ti munduway, magpasalamaták niko dipo awan mo impakapospos u kalooban mo tu mágkalalake hide pero impakapospos mo tu mapagpakumbaba hide. 26On Amáng dipo ina i kagustuwan muway.” 27Káttapos na a nanalangin ay kinagi ni Jesus tu disepulus na hide “Intád nu Ama nikán u atanan a kapangyariyan tu atanan a bagay. Awan talaga ti makatukoy tu Ama, u Anak la. Sakay awan talaga ti makatukoy tu Anak nan u Ama la sakay tu atanan a napili nu Anak a ipatenggi u Ama. 28Umadeni kam nikán u pagud sakay nadággiyan hide, dipo atádden ta kam ti imang. 29Magpasakup kam nikán konna tu essa a hayup a te paud sakay matuto kam nikán. Mabaiták sakay mapagpakumbaba kanya makaimang kamon. 30Dipo u pággiya ko ay malagen sakay u iyatád ko nikam a utus ay awan mahirap.”

Obecnie wybrane:

Mateo 11: MBJC

Podkreślenie

Udostępnij

Kopiuj