यहून्ना 3
3
ईसु और नीकुदेमुस
1फरीसिऔं मै से नीकुदेमुस नाम को एक आदमी हो, और बौ यहूदिऔं को एक नेता हो। 2बानै रात मै ईसु के धौंरे आकै कैई, “हे गुरू, हम जानै हैं कै तू परमेसर की ओर सै आओ भओ गुरू है, कैसेकै इन चमत्कारौं कै जो तू दिखाबै है, अगर परमेसर उसके संग ना होतो तौ जे चमत्कार कोई ना दिखा सकतो।” 3ईसु नै जबाब देते भए उस्सै कैई, “मैं तेसै सच-सच कैरओ हौं कै जब तक कोई नओ जलम ना लेए, तब तक बौ परमेसर के राज कै ना देख सकैगो।” 4नीकुदेमुस नै उस्सै पूँछी, “बुढ्ढो आदमी कैसे जलम ले सकै है? का बौ अपनी अईया के गरब मै दूसरी दफै भीतर जाकै जलम ले सकै है?” 5ईसु नै जबाब देओ, “मैं तुमसै सच-सच कैरओ हौं, जब तक कोई आदमी पानी और आत्मा सै ना जलमै तब तक बौ परमेसर के राज मै ना जा सकै है। 6कैसेकै जो सरीर सै जलमो है बौ सरीर है, और जो आत्मा सै जलमो है बौ आत्मा है। 7मैंनै जो तुमसै कैई है उसमै अचम्बो मत करौ, ‘तुमकै नओ जलम लेनोई है।’ 8हवा जितै चाँहबै है उतैइ चलै है और तू बाकी अबाज सुनै है, पर ना जानै है कै बौ कितै सै आवै है और कितै कै जावै है? जो कोई आत्मा सै जलमो है बौ ऐंसोई है।” 9नीकुदेमुस नै जबाब देते भए उस्सै कैई, “जौ सब कैसे हो सकै है?” 10ईसु नै उसकै जबाब देते भए कैई, “तू ईसराइलिऔ को गुरू होकै बी का तू इन बातौं कै ना समजै है? 11मैं तुमसै सच-सच कैरओ हौं, हम जो जानै हैं बौ कैबै हैं, और जो हमनै देखो है बाकी गभाई देवै हैं, और तुम हमरी गभाई ना मानौ हौ। 12मैंनै तुमकै धरती की बात बताँई और तुमनै उनमै बिसवास ना करो, अगर मैं सुरग की बात बताऔं तौ तुम उनमै कैसे बिसवास करौगे? 13सुरग मै ऊपर कोई ना गओ, सिबाए उसके, जो सुरग सै उतरकै आओ है यानी आदमी को लौंड़ा। 14और जैसे मूसा नै रेगिस्तान मै साँप ऊपर उठाओ, बैसेई आदमी को लौंड़ा बी ऊपर उठाओ जागो, 15कै जो कोई उसमै बिसवास करै बौ हमेसा की जिन्दगी पाय।”
16 “कैसेकै परमेसर नै दुनिया सै ऐंसो पियार करो कै बानै अपनो इकलौतो लौंड़ा दे दओ, कै जो कोई उसमै बिसवास करै बौ नास ना होए, पर हमेसा की जिन्दगी पाय। 17परमेसर नै अपनो लौंड़ा दुनिया मै इसताँई ना भेजो कै बौ दुनिया कै डन्ड की आगियाँ देए, पर इसताँई भेजो कै दुनिया उसके दुआरा मुक्ति पाय। 18जो कोई बामै बिसवास करै है, बाकै दोसी ना ठैराओ जागो, पर जो कोई बामै बिसवास ना करै है, बौ दोसी ठैराओ जा चुको है, इसताँई कै बानै परमेसर के इकलौते लौंड़ा के नाम मै बिसवास ना करो। 19और डन्ड की आगियाँ को कारन जौ है, कै जोती दुनिया मै आई है और आदमिऔ नै इन्धेरे कै जोती सै जादा अच्छो मानो कैसेकै उनके काम बुरे हे। 20हर बौ आदमी जो पाप करै है, जोती सै नफरत करै है और जोती के धौंरे ना आवै है ताकि बाके पाप सबके सामने ना आ जाँय। 21पर बौ जो सच्चाई मै चलै है, जोती के धौंरे आवै है ताकि जौ पतो लग जाय कै बाके करम परमेसर के ओर सै करे गए हैं।”
ईसु के बारे मै यहून्ना की गभाई
22इसके बाद ईसु और उसके चेला यहूदिया मुलक मै आए, और बौ बहाँ उनके संग रैहकै जल संस्कार देल लगो। 23यहून्ना बी सालेम के धौंरे ऐनोन जघै मै जल संस्कार देवै हो, कैसेकै बहाँ भौत पानी हो, और लोग आकै जल संस्कार लेबै हे। 24#मत्ती 14:3; मरकु 6:17; लूका 3:19,20कैसेकै यहून्ना कै अबी तक जेल मै ना डारो गओ हो।
25सुद्दिकरन के रिबाज के बारे मै एक यहूदी के संग यहून्ना के चेलौ की बैहैस हो गई। 26और उनौनै यहून्ना के धौंरे आकै उस्सै कैई, “हे गुरू, जो आदमी यरदन नद्दी के पार तेरे संग हो, और जिसकी तैनै गभाई देई है, देख बौ जल संस्कार देवै है, और सब बाके धौंरे जावै हैं।” 27यहून्ना नै जबाब दओ, “आदमी कै बौई मिलै है जो बाकै सुरग सै देओ जावै है। 28#यहून 1:20तुम खुदई मेरे गभा हौ, जो मैंनै कैई ही कै, ‘मैं मसी ना हौं, पर बासै अग्गे भेजो गओ हौं।’ 29दूलाह बौई है जिसकी दुलहैन है, पर दूलाह को दोस्त जो खड़ो भओ बाकी सुनै है, दूलाह की अबाज सुनकै खुस होवै है और बैसेई मेरी जौई खुसी पूरी भई है। 30जरूरई है कै बौ बढ़तो जाय और मैं घटतो जांऔ।”
सुरग सै आनै बारो सबसै बढ़कै
31जो ऊपर सै आवै है बौ सबसै बढ़कै है, जो धरती सै है बौ धरती को है और धरती की बात करै है। बौ जो सुरग सै आवै है सबसै बढ़कै है। 32जो कुछ बानै देखो और सुनो है, बाई की गभाई देवै है, पर कोई बाकी गभाई ना मानै है। 33जिसनै बाकी गभाई मान लई बानै इस बात मै मौहर लगा दई कै परमेसर सच्चो है। 34कैसेकै जो परमेसर नै भेजो है, बौ परमेसर की बात कैबै है, कैसेकै बौ बिना तोल कै उनकै आत्मा देवै है। 35#मत्ती 11:27; लूका 10:22अब्बा अपने लौंड़ा सै पियार करै है, और बानै बाईके हात मै सब कुछ दे दओ है। 36जो लौंड़ा मै बिसवास करै है, हमेसा की जिन्दगी बाई की है, पर बौ जो लौंड़ा की ना मानै है बाकै जिन्दगी ना मिलैगी, और परमेसर को घुस्सा बाके ऊपर बनो रैहगो।
Obecnie wybrane:
यहून्ना 3: TKB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
New Life Compute Institute [NLCI] - CC BY-NC-ND 4.0
