Эхин 8
8
1Тиигээд Бурхан Ной тухай, тэрээнтэй суг ханза-онгосо соо ябаһан амитадые һанаандаа оруулжа, һалхи үлеэлгэхэдэнь, үерэй уһан татажа эхилбэ. 2Тиигээд Эзэн газарай гүнһөө гарагша уһа шэргээбэ, огторгойһоо адхарһан бороое тогтообо. 3Зуун табин үдэрэй туршада үерэй уһан бага багаар шэргэбэ.
4Долоодохи һарын арбан долооной үдэр ханза-онгосо Арараат уула дээрэ газардан тогтобо. 5Үерэй уһан аалиханаар татажа, арбадахи һарын нэгэндэ зарим хада уулануудай орой харагдаба.
6Тэрээнһээ хойшо дүшэн хоногой үнгэрһэнэй удаа Ной ханза-онгосынгоо сонхо нээгээд, 7хирээе газаашань табиба. Уһанай тататар хирээ ойро тойронгоор ниидэжэ байба.
8Үер дүүрэбэ гү гэжэ мэдэхэеэ Ной гулабхаа шубуу газаашань табиба. 9Зүгөөр гулабхаа һууха хуурай газар олонгүй бусажа, Ной сонхоор гараа һарбайн, досоошонь оруулба. Газарай нюруу үшөөл уһан доро байба.
10Долоо хоноһоной һүүлээр Ной гулабхаагаа дахин газаашань табиба. 11Тэрэнь үдэшэлэн бусахадаа, хушуундаа олива модоной нарай набша зуугаад ерэбэ. Тиихэдэнь Ной уһанай татаһые ойлгобо. 12Тэрэ үшөө долоон хоног хүлеэгөөд, дахин гулабхаагаа табиба, тэрэнь һөөргөө бусабагүй.
13Тэрэ жэлэй нэгэдэхи һарын нэгэндэ, Нойн зургаан зуун нэгэ наһатай болохо үедэ үерэй ехэ уһан одоошье шэргэбэ. Ной ханза-онгосын хушалта нээгээд харахадаа, газарай хуурай боложо байһые обёорбо.
14Хоёрдохи һарын хорин долооной үдэр газарай хүрьһэн дууһан хатаба. 15Бурхан Нойдо айладхаба:
16– Мүнөө һамгантаяа, хүбүүдтэеэ, бэреэдтэеэ ханза-онгосоһоо гарахадаш болохо. 17Мүн хамаг амитадые – гэрэй, зэрлигшье амитадые, мүлхин амидарагшадые, жэгүүртэниие сүлөөдэ таби. Иигэжэ тэдэ үдэжэ, хаа-хаанагүй таран олошорог.
18Иигэжэ Ной һамгантаяа, хүбүүдтэеэ, бэреэдтэеэ хамта ханза-онгосоһоо гаража, 19янза бүриин амитадые, мүлхигшэдые, шубуудые түрэл түрэлөөрнь сүлөөдэ табиба.
Бүхы амитадтай Эзэнэй баталһан хэлсээн
20Ной Эзэндэ үргэл үргэхэ шэрээ бүтээгөөд, янза бүриин сээргүй амитад болон шубуудһаа нэгэ нэгые шэлэжэ, амиинь таһалан, түгэс шатаалта үргэл болгон шатааба.
21Эзэндэ энэ үнэр ехэ һайшаагдажа, Тэрэ иигэжэ шиидэбэ:
– Саашадаа Би хүнэй түрэлхиин муу шанар, хара һанаанда голхорон, хүрьһэтэ газарта хараал шэнгээхэеэ болёоб. Дахин Би хэзээшье амиды амитадые иимэ аргаар усадхахагүйб. 22Түби дэлхэйн байгаа сагта хододоо үрэһэ тариха, ургаса хуряаха уларил, үбэлэй хүйтэн, зунай халуун, үдэр, һүнинүүд таһарангүй байг лэ.
Obecnie wybrane:
Эхин 8: BurBBL2024
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
