यूहन्ना 2
2
काना गौं मा यीशु को पैलु चमत्कार
1फिर तिसरा दिन गलील मुलक का काना गौं मा एक ब्यौ छौ। अर उख यीशु की माँ भि छै। 2यीशु अर वेका चेला भि वे ब्यौ मा न्यूत्यां छा। 3अर जब अंगूरों को रस कम ह्वे गै, त यीशु की माँ न वेकू बोलि कि, “ऊंका पास अंगूरों को रस खतम ह्वे गै।” 4तब यीशु न वींकू बोलि, “हे माँ, मिकू अभि नि बोला की मिन क्या करण, किलैकि अभि मेरु बगत नि ऐ।” 5पर वेकी माँ न नौकरों कू बोलि, “जु कुछ भि उ तुमकु बोललु, उन्नि कर्यां।”
6उख त ढुंगो का बणयां छह बड़ा-बड़ा भाँडा धरयां छा, जैमा चार-छह गागर पाणि ऐ जान्दी छै। यू त यहूदियों की रीति का मुताबिक शुद्धिकरण खुणि धरयां छा। 7अर यीशु न ऊं नौकरों कू बोलि, “यों भाँडो तैं पाणिळ भोरी द्या।” तब ऊंन भाँडो तैं मुख तक पाणिळ भोरी दिनी। 8फिर वेन ऊंकू बोलि, “अब उखुन्द बटि गाडी के दावत का कर्ता-धर्ता का पास लि जा।” अर वु लि गैनी। 9तब दावत का कर्ता-धर्ता न उ पाणि चखी जु अंगूरों को रस बणि गै छौ। अर उ नि जणदु छौ कि यू कख बटि ऐ। (पर जौं नौकरों न पाणि निकाळि छौ, ऊ जणदा छा)। तब दावत का कर्ता-धर्ता न ब्यौला तैं बुलै अर वे बटि बोलि, 10“हरेक मनखि त पैलि अच्छु अंगूरों को रस देन्दु च अर जब लोग पी के छक ह्वे जनदिन, तब हलकु वळु देन्दु च। पर तुमुन त अभि तक अंगूरों को अच्छु रस रख्युं च।”
11अर यीशु न गलील का काना गौं मा अपणु पैलु चमत्कार कैरिके अपणी महानता दिखै। अर वेका चेलों न वे पर बिस्वास कैरी।
12येका बाद यीशु अपणी माँ, भैयों अर चेलों का दगड़ा मा कफरनहूम नगर गै। अर उख ऊ कुछ ही दिन रैनी।
यीशु न मन्दिर तैं शुद्ध कैरी
(मत्ती 21:12,13; मर 11:15-17; लूका 19:45,46)
13अर जब यहूदियों को फसह को त्योवार नजदीक छौ, तब यीशु यरूशलेम नगर कू गै। 14अर वेन मन्दिर मा बल्दों, भेड़ों, अर कबूतरों तैं बिकौण वळो#2:14 वे बगत मन्दिर मा जानबरों तैं बलिदान खुणि बिकौन्दा छा। अर पैसौं को अदलण-बदलण करण वळो तैं बैठयूं देखि। 15तब वेन ज्यूडों को एक कोड़ा बणै के सभि भेड़ों अर बल्दों तैं मन्दिर बटि भैर निकाळि दिनी, अर पैसौं को अदलण-बदलण करण वळो का पैसा छिलारी दिनी, अर ऊंकी मेजों तैं उल्ट-पुल्ट कैरी दिनी। 16अर कबूतर बिकौण वळो बटि बोलि, “यू सब इख बटि लि जा। तुम मेरा पिता का घौर तैं व्यापार को घौर नि बणावा।” 17तब पवित्रशास्त्र मा जु लिख्यूं च उ वेका चेलों तैं याद ऐ, कि
#
भजन 69:9 “तेरा घौर की धुन का कारण मेरु नास किये जालु।”
18अर यहूदियों का मुखिया लोगु न यीशु तैं पूछी, “यू सब करणु को त्वेतै अधिकार च, यू साबित करणु कू तू हमतै कु चिन्न दिखै सकदी?” 19तब यीशु न ऊंतैं जबाब देई, “ये मन्दिर तैं ढोळि द्या अर मि येतैं तीन दिन मा बणै द्यूलु।” 20तब ऊंन बोलि, “ये मन्दिर तैं बणौण मा छियालिस साल लगि गैनी अर क्या तू येतैं तीन दिनों मा बणै दिली?” 21पर उ त अपणा सरील रुपी मन्दिर का बारा मा ऊंतैं बतौणु छौ। 22इलै जब यीशु मुरदो मा बटि ज्यून्द ह्वे तब वेका चेलों तैं यू सब याद ऐ। अर ऊंन पवित्रशास्त्र अर यीशु मसीह का द्वारा बुलयां वचन पर बिस्वास कैरी।
मनों तैं जनण वळु यीशु
23अर फसह का त्योवार का बगत पर यीशु यरूशलेम नगर मा छौ, अर वेका द्वारा जु चमत्कारिक काम किये जाणा छा, ऊंतैं देखि के भौत सरा लोगु न वे पर बिस्वास कैरी। 24पर यीशु न ऊं पर भरोसा नि कैरी, किलैकि उ सब लोगु तैं अच्छी तरौं से जणदु छौ। 25अर वेतैं कुई जरुरत नि छै, कि कुई भि वेतैं मनखियों का बारा मा बतौ। किलैकि उ खुद ही जणदु छौ, कि मनखियों का मनों मा क्या च।
Obecnie wybrane:
यूहन्ना 2: GBM
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© (Active) Wycliffe Bible Translators, Inc. All rights reserved.
