मर्कुस 13
13
इसुले मुन्दिर उन्तिम हुन्या बार्यामै बोल्या
(मत्ति २४:१-२; लुका २१:५-६)
1इसु मुन्दिरबाट निस्कुदैछिया, इसुका चेलाहरुमद्दि एक जुनाले इसुकन भुन्यो, “गुरुज्यु हेर, कति ठुला ठुला ढुंगाहरु र घरहरु।”
2इसुले तेइकन भुन्या, “हेर यिँ ठुला ठुला घरहरु अइले तुमिहरुले देखिरयाछौ तर यि घरहरुका एक ढुंगामाथि अक्को ढुंगा पुनि रन्यानाइ स्हबै ओद्दाइन्याछुन्।”
दुख स्हनु पड्न्याछ
(मत्ति २४:३-१४; लुका २१:७-१९)
3अनि इसु मुन्दिरको अगाडि जैतुन डाँडामै बस्याबेला पत्तुरुस, याकुब, युहन्ना र अन्द्रियासले इसुकन स्हुटुक्क स्होद्या, 4“हामिकन भुन, यि घटनाहरु कैले हुन्याछुन्? र यि स्हबै कुडा पुरा हुनका निम्ति क्या चिन्न हुन्याछ?”
5इसुले तिनुहरुकन भुन्या, “चुनाखा होउ, कोइले तुमिहरुकन नछकाओस्। 6मथ्थै जुनाले मेरो नाउँमै ‘मुक्ति दिन्या ख्रिस्ट मुइ हुँ’ भुन्दै आउन्याछुन्, र तिनुहरुले मथ्थैकन छकाउन्याछुन्। 7जब तुमिहरुले लडाइहरु भया र लडाइहरुको हल्ला स्हुन्न्याछौ, तब भेइ नमान। यइथा घटनाहरु हुनैपड्छ। तर सुन्सारको उन्तिम हुन्या दिन आउन अज बाँकि छ। 8क्यानभुन्या जातिको बिरुद्दमै जाति, र राज्याको बिरुद्दमै राज्या उठ्न्याछुन्। ठौर ठौरमै भुइँचल्लो जान्याछ, उनिकालहरु पड्न्याछ। यइ सुमय स्हैनिले स्हुत्केरि हुन्याबेला पाउन्या सुरुको दुखको जैथै हुन्याछ।
9“तुमिहरु आम्ना बिअ चुनाखा होउ। तिनुहरुले तुमिहरुकन अदालतमै सुम्पिदिन्याछुन्। तुमिहरु सबाघरहरुमै कुटिन्याछौ। अनि हाकिमहरु र राजाहरुका अगेडि मेरो बार्यामै तुमिहरु स्हाँचि दिन उबिन्याछौ।” 10तर उन्तिमको दिन आउनुभुन्दा पैला स्हबै जातिहरुकन राम्मो रैबार स्हुनाउनै पड्छ। 11जब मान्ठहरुले तुमिहरुकन पक्डेर मुद्दा हाल्छुन्, तब क्या भुन्या भुनि अगाडिनै झर्को नमान। तर तेइबेला परमेसोरले ज्या तुमिहरुकन बोल्ल दिन्छुन्, तेइ बोल। क्यानकि बोल्ल्या तुमिहरु हैनौ, तर पबित्त आत्मा हुन्याछुन्। 12“एक भाइले अक्को भाइकन मार्नका निम्ति स्हुम्पिन्याछ। तेइथैगरि बाबाआमा छोरा छोरिहरुका बिरुद्दमै र छोराछोरि बाबा आमाहरुका बिरुद्दमै हुन्याछुन् र आपु आपुकन मार्न लाउन्याछुन्। 13अनि मेरो नाउँको निम्ति तुमिहरुकन स्हबैले घिन गन्न्याछुन्, तर जो उन्तिम स्हम्म भरिलो हुन्छ, तेइको उद्दार हुन्याछ।
भेइलाग्दो सुमय
(मत्ति २४:१५-२८; लुका २१:२०-२४)
14“जब तुमिहरुले नास गन्न्या घिन लाग्दो चिजकन जाँ नहुनु पड्न्या हो ताँइ देख्न्याछौ (यइको अथ्थ पड्न्याले बुजोस्), तेइबेला यहुदियामै हुन्याहरु डाँडातिर भागुन्।#दानिएल ९:२७; ११:३१; १२:११ 15घरको थाडामै हुन्या तल नआओस्, आम्नो घरबाट केइ निकाल्न भित्त नपसोस् 16खेतबारिमै हुन्या आम्नो टालो ल्हिन घरतिर नजाओस्। 17तेइबेला गुर्बिनि र दुत ख्वाउन्या आमाहरुकन कैथो बिचल्लि होला! 18यइ कुडा हिउँदमै नहोस् भुनि परमेसोरस्हात प्रार्थना गर। 19क्यानकि तिँ दिनहरुमै यइथो म्हाँसंकट आउन्याछ कि परमेसोरले रच्या सृस्टिको सुरुदेखि अइलेस्हम्म न त यइथो भयाछ। न कैले हुन्याछ।#दानिएल १२:१; प्रस्थान ७:१४ 20यति परमेसोरले आपतका दिन नघटाइ दिया भया त कोइ मान्ठ बाँइन्या छियोन्, तर आपुले छान्याहरुका निम्ति तिँ दिन घटायाछुन्।
21“तेइबेला कोइले तुमिहरुकन ‘हेर, मुक्तिदिन्या ख्रिस्ट न्या छुन्’ या ‘ताँइ छुन्’ भुन्यो भुन्या, तुमिहरुले बिसास नगर। 22क्यानभुन्या झुटा मुक्तिदिन्या ख्रिस्टहरु र झुटा रैबार्याहरु उबिन्याछुन्। अनि स्हकेस्हम्म छान्याहरुकन पुनि छकाउन अच्चुम्मका कामहरु र चिनारिहरु देखाउन्याछुन्। 23यइबिअ तुमिहरु चनाखो होउ। हेर, मोइले तुमिहरुकन स्हबै कुडा अगिबाटै भुन्दियाछु।”
मान्ठको छोरा फेरि आउन्या छ
(मत्ति २३:२९-३१; लुका २१:२५-२८)
24“तर तिँ दिनमै आपतको दिनपछि बेल उँद्यारो हुन्याछ र जुनले आम्नो उज्यालो दिन्यानाइ,#यसैया १३:१०; इजकिएल ३२:७; योएल २:१०,३१; ३:१५; प्रकास ६:१२ 25ताराहरु सरगबाट छत्तिन्याछुन्, र सरगमै भया सक्तिहरु हल्लिन्याछुन्।#यसैया ३४:४; योएल २:१०; प्रकास ६:१३ 26अनि तेइ सुमयमै मान्ठहरुले मान्ठको छोराकन ठुलो सक्ति र महिमा स्हात बादलमै आया देख्न्याछुन्।#दानिएल ७:१३; प्रकास १:७ 27तब परमेसोरले सोर्गका रैबार्याहरुकन धत्तिको र सरगको चारै कुना स्हुम्म पठाउन्याछुन् र आम्ना छानियाहरुकन जुम्मा गन्न्याछुन्।”
अन्जिरको रुखबाट सिच्छ्या
(मत्ति २४:२३-३५; लुका २१:२९-३३)
28“अन्जिरको रुखबाट केइ सिक: तेइको डाला कौंलो भयर पातहरु पलाना बित्तिकै तातो सुमय आयोछ भुन्न्या तुमिहरु थाँ पाउँछौ। 29यइगरि नै तुमिहरुले यि घटनाहरु भइरया देख्छौ, मु आउन्या बेला भयो भुन्न्या जान। 30स्हाँच्चि मु तुमिहरुकन भुन्दछु, यि स्हबै कुडा नभया स्हुम्म यइ पुस्ता बिलाउन्या नाइ। 31सोर्ग र धत्ति बिलाइ जान्याछ, तर मेरो बचन कैले बिलाउन्या नाइ।”
चुनाखो भइ बस
(मत्ति २४:३६-४४; लुका १२:३८-४०)
32“तर तेइ दिन र तेइ बेलाको बार्यामै परमेसोर बाबाले बायक अरु कोइले जान्दैनुन्, न त सोर्गमै हुन्या सोर्गका रैबार्याहरुले न त छोराले जान्दोछ। 33तेइबिअ चुनाखा होउ, र जागै बस, क्यानकि तेइबेला कैले आउन्या हो, तेइ तुमिहरु जान्दैनौ।” 34यइत मालिकले आम्ना कमाराहरुकन घरको स्हबै काम र कर्तब्याको जुम्मा दियर पाल्याकन चुनाखो रनु भुनि आग्या दिइ परदेस लाग्या जैथै हो। 35“यइबिअ तुमिहरु चुनाखो होउ, क्यानकि घरको मालिक बेलबुड्या, कि मद्दि रात, कि भाल्या बास्न्याबेला, कि ब्याना, कैले आउन्या हो, तेइ तुमिहरुले जान्दैनौ। 36नतर तेइ अचानक आयो भुन्या तुमिहरुकन ढुलिरया देखला। 37मोइले तुमिहरुकन भुन्या जैथै स्हबैकन भुन्दछु, ‘चुनाखो होउ।’”
Obecnie wybrane:
मर्कुस 13: JUML
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2024 (Active), Mother Tongue Translators Society and Wycliffe Bible Translators, Inc. All rights reserved.
