Luke 2
2
Jesu chang
(Matthew 1:18–25)
1Ethi rangham tho Ajong lungwang Augustus aa Rome mung thaji ma miing takaching ta batta. 2Ira phang miing taka angta etho ethi rangham tho Quirinius tha Syria mung governor angta. 3Etho thaji miqtang eq miq mama miing taka ma miq mama samhaq náng kata.
4Req Joseph Galilee mung na Nazareth samhaq thiwang Judea mung na Bethlehem samhaq náng kata. Chammatakoi Bethlehem tha David chang haq angta etho Joseph tha David phi aa lí angta. 5Piq aa umiing taka ma Mary jamoq kata, bara ujamoq tharik angma kaam shingta. Piq tha bahan han angta. 6Ningni Bethlehem na sey ang atho, miqnu they no sey khi ma angta. 7Etho piq aa phokho miqwasa tha khita, khatlo o thup eq maan taap o shingta. Chammatakoi ningni ma panghim na jibching ahung angta.
Kelwut rimtey tang etho rangkamwa tang
8Eshi haq rel namtham sho kelwut rimtey tang angta, rangpal o ning aa namtham na kelwut tang tha ban eq rimkum eq tong ta. 9Ning rel tho Teyhungwa rangkamwa thok langta etho ning khophang tho Shkewa phun amun thok phangta etho ning waan tha baltik rong angta. 10Etha ang atho rangkamwa aa ning thima batta, “Nak cho inn; nga nim ma tungtang qhal raaq batma thuta phang. Iri raaq raa thaji mung rangma sungrang raaq tatatphang. 11Thaney saal o David samhaq na nim rangma thaluntey chang ta etho ira hun Teyhungwa Khristo. 12Etho iriwang hun sam nin, nim aa nijangsa ashey khatlo na tathup chey atha maan khung o shing chey atha khi nin.”
13Rikla ang atho rangmuntan wang ralkoltey rangkamwa tang thu eq Shkewa tha shumnuk eq sungsey eq katapha.
14Aluk mungtan na Shkewa phun amun cham ang aa
etho mingkang wang miqtang bari ma piq nuk aa eshima nungmay cham ang aa.
15Ning rel wang rangkamwa rangnáng sey wey wang atho kelwut rimtey tang tha ning jaktung na rongwan titta, “Hiqtang Bethlehem náng ka i, etho thanga chamlang angta bara Teyhungwa batta thi ka eq siin i.”
16Req ning kalo kasho ka eq Mary nia Joseph tha kap khi bita etho nijangsa tha maan taap na jib chey atha khita. 17Nijangsa tha khi eq kelwut rimtey tang aa rangkamwa batta ethi raaq tang tha ning ma batta. 18Kelwut rimtey tang aa bat atha tat eq ning waan tha pattik rong angta. 19Etharin Mary aa ethi raaq tang tha tat eq utin na shing eq tasik lakta. 20Kelwut rimtey tang aa chamlang tatta etho khita ethirangma Shkewa tha shumnuk nia tasapsey eq wey wel chuwang ta; iritang raa rangkamwa batta thimal angta.
Jesu miing shing aa
21Saal ashat angta etho piq hankhup qhan ma rangham thuta etho bara rangkamwa piq wokmong na ang wey moq jakho tho batta thimal, umiing tha Jesu ta shingta.
Jesu tha rangnuk him náng solkat aa
22Moses Thong na ning tasang saal thu atho Joseph nia Mary aa Jesu tha Teyhungwa ma kotma Jerusalem náng thoksolta. 23Teyhungwa Thong na taka: “Thaji phokho miqwasa sha Teyhungwa ma hun asang eq kotching.” 24Teyhungwa Thong na bat aa thimal wotokkhu upong uhaan ang moq o wotopin sa ani thoksom eq pinthong kotma tho ning ukat angta.
25Ethi rangham tho Jerusalem na Simeon tamiing aa ashey miq angta. Piq tha miq qhal angta, etho Shkewa ma cho eq tongtey miqwa angta etho piq aa Israel sha thalun ma banta. Asang Tsija ujamna atha angta. 26Etho Asang Tsija piq ma takhita, Teyhungwa khristo khi wey moq nángduk piq sha timoq angna. 27Tsija wang sol eq Simeon Rangnuk him himthal náng thuta; etho unu nia uwa eq nijang Jesu tha thong na chamal takata thimal somma Rangnuk him náng thoksolta tho, 28Simeon aa nijangsa tha jak o tunpey eq Shkewa ma kechu ajong kot eq batta:
29Teyhungwa, nang aa rangtum tha shingtu,
etho thanga nang aa ba sanga ri nungmay jamoq takat u.
30I miik eq ba thalun tha ukhi sey táng
31Iri thalun raa nang aa thaji mung miqtang thim o kacha kotu:
32Gentile phan miqtang ma takhitey rangwung
etho ba miq Israel tangma phun amun.
33Simeon aa nijangsa tung aa raaq bat aa thima unu nia uwa tha patjatita. 34Simeon aa ning ma sunmaan ko eq nijangsa nu Mary thima batta, “Iri sa raa ahan #2:34 Greek raaq na Israel tang uqhat ma etho ushat ma Shkewa talta irimal taka aaIsrael tang tatal ma etho thalun ma Shkewa talta. Piq raa Shkewa wang ashey umal etharin thaji miqtang aa piq raa miiksuk na, 35irimal ang eq ning hotshu raaq sha thalatna. Batin na tho jaantong eq suk aa thimal tak na.”
36Anna tamiing ashey miqnu rangsamal angta, bara Asher phan wang Phanuel miqnu sa angta; piq rapney wiku angta. Piq tharik jio pangsanat nángduk uhimteywa jamoq thok tong ta 37etho pang rokashat pang bali wang notinu angta. Piq rangnuk him tha shingchak hunga tong ta etho rangpal rangwung romtam chu eq wokcham tong eq Shkewa tha shumnuk ta. 38Piq eshi rangham tho eshináng thuta etho Shkewa ma kechu ajong ta kotta, etho Jerusalem thalun rangma bantey miqtang ma eshi nijangsa tung aa raaq batta.
Nazareth náng wel
39Joseph nia Mary Teyhungwa thong na batta tha thun som eq Galilee mung na ningni samhaq Nazareth náng welta. 40Nijangsa chalo eq tarong ma sey angta; piq thunglam ahan sey angta, etho Shkewa sunmaan tha piq ma angta.
Jarosa Jesu rangnuk him na
41Pangwet Jesu nu nia wa Jerusalem náng Ulit kut aa kan ma kata. 42Jesu pang asi pang ni sey ang atho, ning aa som aa thimal ning kut aa kan náng kata. 43Kut aa kan náng sey thu atho ning him náng welta, etharin jarosa Jesu Jerusalem na tong ta. Unu ni wa ira sammoq angta; 44Ningni aa tathin ta piq tha miq waan tang jamna, req saalshey sey linchu wangta etho piq tha ning himkungthak nia nokwa tang jamnáng phang bita. 45Ningni aa piq tha khi moq angta, req ningni piq tha siin ma Jerusalem náng wey welta. 46Saltom salsey ang atho ningni aa piq tha Rangnuk him himthal na kap khita. Piq tha Jehudi raaq tataltey tang jamna tong chey eq ning raaq tha tat eq raaq pitpi chey ta. 47Piq raaq tha tat eq thaji miqtang aa piq asam atol etho raaq thawel bat thima patja ta. 48Unu nia wa piq tha khi eq patja angta, etho unu aa piq ma batta, “I sa miqwasa, nang aa ini jamoq chamlang ma irimal som tu? Ba wa nia nga tsamnang tathin eq nang raa bitaphi.”
49Piq aa ningni ma thawel batta, “Nimni aa nga chamlang ma bi shinphin? Nga raa Iwa him na ang ching ta nang aa sammu i?” 50Etharin piq aa raaq thawel bat tha ningni aa sammoq angta.
51Req Jesu ningni jamoq Nazareth náng wey welta, eshina piq aa ningni raaq tat eq tong ta. Unu aa thaji raaq tha tin o shingta. 52Jesu thunglam tha hannta etho piq tha chata. Etho Shkewa nia miqtang tinmat piq jamna angta.
Obecnie wybrane:
Luke 2: Mmmm
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
CC BY-NC-ND 4.0