Luke 1
1
Luke aa chamlang ma wit aa
1Hiqtang jaktungna chamlang lang angta ethitang tung aa raaq tha daqhan miqtang aa witta. 2Bari miqtang rey jakho wangduk ning miik eq khita, ethitang tha í ma battaphi, ethi raaq tha ning aa witta. 3Ethirangma, Ajongwa Theophilus, nga tho phang wangduk jaqhal eq samtol eq barang ma thajok jat hunga witma tathin ang. 4Nga iri tang raa ethi rangma somlo ang chammatakoi, nang ma bara tatal taphu ethitang thaji asing thi jaqhal eq cham samtol u.
John jungthalamtey wa uchang angma bat aa
5Herod sha Judea mung lungwang ang tok tho, Zechariah ta thaming atha ashey tingwa angta. Piq sha Abijah tingwa phan ajat wang angta. Uhimteynu miing tha Elizabeth ta angta; etho piq sha tho Aaron tingwa phan ajat wang thutapha. 6Shkewa jakhona ningni rollung tha aqhal angta etho ningni aa Teyhungwa raaq nia thong tha jaqhal eq tatna ta. 7Ningni sa ashey tho ahung angta chammatakoi Elizabeth sha athom angta, etho ningni thani tha rapney sey ku kang ta.
8Salsey ang atho, Zachariah ma tingwa jaksom angta etho piq rangnuk himna jaksom som chey ta. 9Teyhungwa rangnuk himna utang aa shongnol tachapna ta talma tingwa tang aa likwit jin tun ta etho eshimal tun atho Zachariah miing kap tun ta. 10Etho piq rangnuk him mongna shongnol tachap atho ranna daqhan miqtang they uwaan eq romtam rong chu chey ta. 11Etho Teyhungwa rangkamwa ujakhona thok langta etho rongthung na shongnol tachap aa ethi aqhak ko tho langta. 12Zechariah piq tha khi atho patti eq ucho angta. 13Etharin, eshi rangkamwa they piq thima batta, “Zechariah, nak cho u! Shkewa ba romtam tha utat eq ta, etho ba himteynu Elizabeth aa ashey miqwasa chang na. Nang aa piq sha John ta miing ching! 14Nang rapney sungrang nu, etho piq chang tungkang o, miq daqhan rapney sungrang na. 15Teyhungwa jakho na piq ashey ajong miq angna. Piq aa kham ling moq angna etho umok pang ang ching chamtho ling phaksa moq angna. Piq uqhong wangduk Asang Tsija piq hanphung mongna angna. 16Etho piq aa Israel miqtang daqhan sha ning Shkewa Teyhungwa relnáng wey thawel solna. 17Piq sha rangsamal Elijah mal rapney achan etho tarong som eq Teyhungwa jakho khona kana. Piq aa uwa nia sa tang wey kara eq na; piq aa raaq tat moqtey tang tha aqhal lam náng wey thawel solna; piq aa Teyhungwa miqtang urangma kacha chol angna tha kapna.”
18Zechariah aa rangkamwa thima batta, “Ira asing ta nga chamal eq samnáng? Nga tikang sey, etho ihimteynu tho wiku sey.”
19Rangkamwa they thawel batta, “Nga raa Gabriel, nga Shkewa jakhona lang ang, etho piq aa nga raa baching náng iri sungrang raaq raa batma takat taphang. 20Etharin nang aa iraaq kam mu angtu, bara khakla rangham thupha jo asing angna; nang aa kam mu angtu ethi rangma nang raaq may raaq mu angnu; nga nang ma chamta bat taphang sha asing ang wey moq ling nang raaq hunga shu shu tong nu.”
21Ranna miqtang they Zechariah tha rong banta etho piq chamma Rangnuk him mongna itan karel aa ta tathin ta. 22Piq ran náng sey thalat atho piq miqtang jamoq raaq may wan moq sey angta, etho iri rangma ning they samta piq aa rangnuk him na Shkewa wang chamli ashey máng khita. Piq raaq qhong raaq moq angko eq jak tha thamot eq chamli takhi chey ta.
23Rangnuk him na jaksom saal tang tha tathun shing eq, Zechariah him náng wey wel ta. 24Saltom ni jio uhimteynu Elizabeth aa no sey holta etho jappi banga nángduk him wang ran náng thalat moq angta. Elizabeth aa batta. 25“Thanga Teyhungwa irangma ira somta etho nga ma nong taphang; miqtang jakho o piq aa irakri tha thamat chak ta!”
Jesu uchang angma raaq bat aa
26Elizabeth aa uwokna usa japi tharok sey hol atho, Shkewa urangkamwa Gabriel tha Galilee mung Nazareth samhaq náng takatta. 27Mary ta miing aa ashey jahansa ma tung aa raaq batma piq sha takat ta. Eshi miqnu sha Joseph ta miing aa miqwa jamoq tharik ma thangdang kot ta. Piq David Lungwang phi aa lí angta. 28Rangkamwa tha thu eq Mary thima batta, “Nungmay eq chamtong u! Teyhungwa bajam jamna!”
29Mary they uraaq tha tat eq rapney chota chammatakoi piq aa rangkamwa raaq tha sammoq angta. 30Etharin rangkamwa they piq thima batta, “Mary, nak cho u; Shkewa barangma sungrang aa. 31Nang bahan han sey angnu etho miqwasa ashey chang nu, etho piq miing tha Jesu ta angna. 32Piq sha ajong angna etho piq sha Ajong Shkewa ma Miqwasa ta halna. Teyhungwa Shkewa piq sha ning tey aa wa lungwang David lungwang tongching kona. 33Etho piq sha salwet ma Jacob tang phi aa lí lungwang ta thamiing eq tong na, piq rangmungtan sha baluk otho thun moq angna!”
34Mary aa rangkamwa thima batta, “Irimal chamal eq angna, chammatakoi nga jahansa wey?”
35Rangkamwa they thawel batta, “Bakhom o Asang Tsija thupha na, etho Shkewa tarong bajamna tong na. Ethirangma nang aa changnu eshi asang sa sha Shkewa Miqwasa ta thamiing na. 36Bahim khungthaktey miq wang Elizabeth shi tasik u. Thaji miqtang aa piq ma athom ta raaq ta. Wiku sey ang eq tho uwokna no japi tharok sey hol aa. 37Shkewa jin moq phanli chamtho ahung.”
38Mary aa batta, “Nga raa Teyhungwa sanga. Nang aa bat u shimal hun cham ang aa.” Etho rangkamwa tha eshiwang chuwang ta.
Mary Elizabeth jamoq tachong aa
39Chomwey ang atho, kalo hun Mary kacha ang eq, Judea haqkan mungna ashey samhaq náng kata. 40Piq Zechariah him náng thu eq Elizabeth ching náng ka eq piq tha unuk eq ta. 41Mary aa nuk atha tat atho, Elizabeth wokwang usa tha mota. Etho Elizabeth khom o Asang Tsija tha thuta. 42Etho piq aa ring eq batta, “Nang thaji miqnu tang pheywang eq ahan sunmaan! Etho bawok mong wang sa sha ahan sunmaan! 43I Teyhungwa nu iching náng kat ma itan rangka nga chamal eq kap táng? 44Chammatakoi nang aa nga nuk taphu tha tat eq kalo hun iwok wang nosa tha sungrang wang eq mota. 45Teyhungwa raaq raa asing ta kam tu ethima nang raa rapney sunmaan!”
Mary tasapsey
46Mary aa batta,
I tin eq Teyhungwa tha tasapsey aa;
47I thaluntey Shkewa ma itsija sungrang ang chey aa,
48Chammatakoi nga itan aming sanga ashey, etharin piq aa nga lakchak moq angta phang!
Thanga thaji miqtang aa nga ma sunmaan ta batna.
49Tarong Shkewa nga ma tinshit eq ajong jaksomlot somta,
Ethirangma umiing sha asang;
50Iri patwang tha adak pat nángduk
piq rangkatey thima piq aa tinshit na.
51Piq aa utarong jaktha thalo ta
etho tharangka angtey tang sha shaap na chak na.
52Piq aa lungwang tang sha ning tongching wang taqhat chakta
etho tinmang miqtang sha tun ta.
53Piq aa chamlal tey tang sha jaqhal tangwang wang taphut ta
etho tanglom tang sha jak changpol takat ta.
54Usanga Israel tha piq aa nongta
etho umiq tang tha piq aa salwet tinshit ta.
55Piq aa hiqtang tey aa wa ma rangtum aa thimal
Abraham nia uphi aa lí thima salwet tinshit ta.
56Mary japi tom Elizabeth jamoq tong ta etho ethi jio uhim náng wey wel ta.
John jungthalam tey wa chang
57Elizabeth ma no khi ma usal sey angta etho piq aa miqwasa chang ta. 58Uhimkhung thaktey nia ujuntey tang aa samta Teyhungwa piq ma rapney tinshit aa ta etho ning ujamoq rapney sungrang ta.
59Eshi nijangsa tha saal ashat sey ang atho, ning aa uhankhup qhan ching thong somma solkat ta, etho ning aa uwa miing wang Zechariah ta miingma tathin ta. 60Etharin unu they batta, “Ang moq! Umiing raa John ta miing ching!”
61Ning aa piq thima batta, “Nim himtey wang irimal utang miing tho ahung!” 62Etho ning aa uwa chingko náng siin eq pitta, “Iri miqwasa miing ri chamta shing ma ta u?”
63Zechariah aa witma chamli lang chu eq esho witkot ta, “Umiing raa John.” Ning tha rapney pattita! 64Kalo hun Zechariah tha raaq sey wey raaq ta, etho piq aa Shkewa miing tha phang tasapsey ta. 65Himkhung thaktey tang aa etha khi eq rapney rongcho ta, etho iri raaq raa Judea haqkang mung thaji ko aa kan tey tang aa samta. 66Barey iri raaq raa tatta tang thaji they rong tathin eq pitta, “Iri sa ri chamal angwang ko?” Teyhungwa tarong ujamna tha ta thaji eq samta.
Zechariah raaqtóng
67John wa Zechariah haan na Asang Tsija ushey ang eq piq aa Shkewa raaq tha irimal ta batta:
68Israel Shkewa, Teyhungwa miing o hiqtang aa tasapsey i!
Chammatakoi piq ka eq umiq tang tha taqhapta.
69Piq aa hiqtang rangma ashey thunjong thaluntey tathok tapha,
piq sha usanga David phi aa lí.
70Ira piq aa asang urangsamal tang tungkang o jakho wangduk rangtum ta,
71piq aa hiqtang ralwa tang wang etho utang aa miiksuk phi eshi tarong wang thalun phani.
72Piq aa hiqtang tey aa wa tangma manchan takhina
etho piq asang raaqkhak sha tasik na ta piq aa batta.
73-74Piq aa hiqtang tey aa wa Abraham ma rangtatum ta,
hiqtang ralwa tang wang hiqtang thalun phani,
etho chamtho chopan hunga tasom phani,
75Irimal ang ajo hiqtang ujakhona salwet asang
etho jaqhal lam o tong ni.
76Etho nang isa, nang ajong Shkewa rangsamal ta hal phanu.
Etho nang raa Teyhungwa lam hun ma
ujakho kho qhing nu,
77Umiq tang ma batna, ngarey wang tolchak kap eq ning sha lunna
78Hiqtang Shkewa raa tinshit nia tinmat,
Ethirangma mungtan wang rangnapkha rangwung hiqtang khom o kaphana,
79etho anak na etho utik jakhangna tongtey tang khom o litna,
etho hiqtang raa nungmay lam náng solkat phani.
80Nijangsa tha cha eq tsija o rongta. Israel miqtang aa tasam nángduk shushu haqna tong ta.
Obecnie wybrane:
Luke 1: Mmmm
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
CC BY-NC-ND 4.0
