Jọn 3
3
Jizọs Nyẹ Pa Nikodimọs Diem
1Mị́sa gbẹ́rẹ́ Farisii owitụ́wọ imi Nikodimọs pa sịḅọ, táarị Juuapụ ma ogbobie gbẹ́rẹ́ḅọ. 2O Jizọs damaḅom dii bie sị ḅẹẹ, <<Rabbai, wa nimim ḅẹ́ ịrị anị Tamuno ḅara sághị ḅo nyẹ́dieḅọ. Gbẹ́rẹ́ḅọ sọ ine i nwángịarị ḅụ́gbérépuma fịrị ma nwángịbịgha ḅọ́rọ́ Tamuno nnị ḅo na ofori.>>
3Ori ọ págháraarị sáá, Jizọs dughom ḅẹẹ, <<A karakárányẹ ma dugho ị pịrịm gbẹ́rẹ́ḅọ sọ ine Tamuno kọnsịn ma arịbịgha ḅọ́rọ́ nnị sima n ḅo yiigha yiigha.>> 4Nikodimọs gbilam, <<Nnị tọ́rọ́pa owitụ́wọ yii bẹ n ḅo ọ́lọ́máa sáá? Karakárányẹ ori ine mmẹẹ́ kárámá sá pa o nyingi furobie sọbịgha sị n ḅo o yii!>>
5Jizọs pagharam, <<A karakárányẹ ma dugho ị pịrịm gbẹ́rẹ́ḅọ sọ ine Tamuno kọnsịn ma sọbịgha ḅọ́rọ́ n mingi na Tẹ́mẹ́ pa n ḅo yiigha yiigha. 6Ojumẹnị ojumẹnị yiim, kụ́ma Tẹ́mẹ́ ma Tẹ́mẹ́ yiim. 7Ị́yẹ́ ẹ́gẹ́rẹ́ ma anị ịḅụ ḅụ́gbérépuma ma, <Nnị sima ị yii nyánam.> 8Fọ́rụ ma ofuro anị ḅụḅẹlẹ ngá daari. Ịrị anị ọwụ naarị, kụ́ma inimigha anị saghị ḅo angaá anịgha anị muarị ngá. Anị ḅara ma anịị nnị Tẹ́mẹ́ pa yiiḅọ gonyẹ́ gonyẹ́ fịnị ḅara.>>
9Nikodimọs gbilam, <<Mịma anị ḅọ́rọ́ tọrọ́ pa fịnị bẹ?>>
10Jizọs dughom, Ịrị kọkọ Izirẹlịapụ nyẹ́dieḅọ sị mịnanyẹ ma akanyaḅogha? 11A karakárányẹ ma dugho ị pịrịm, wa níminyẹ ma anịị wa dughoarị nyẹ, wamịnị árịmaa nyẹ ma anịị wa dugho pághámaarị nyẹ kụ́ma ọmịnị wámịna dugho págháma nyẹ ma daákịgha. 12A tuminikiri gbolomanyẹ dugho ị pịrịmam ị pa mininigha; anịsáa ị tọ́rọ́pa minini bẹ a so gbolomanyẹ dugho sáá? 13Gbẹ́rẹ́ḅọ sọ jẹ́ éné na sobie mugha, sobie saghị ḅoḅọ ma ngéré anịị Tamuno Tụ́wọ ma. 14Mosis elesiri ḅụ ododó ma saghị ọgọ́nọ́ daá ḅara ma, anị ḅara anịị nnị Tumḅọ yii Tụ́wọ ma sághị ọ́gọ́nọ daá bẹ ḅara, 15sị ọ ḅụ mininiḅọ gonyẹ́ gonyẹ́ ine duma gbámásó nyáná bẹ ḅara.
16<<Tamuno opuma tuminikiri ma ḅẹ́lẹ́mam ẹrẹ́sị ori ọrẹ kpọ́kpọ́ gbẹ́rẹ́ Tụ́wọ ma pịrịm, sị ọ ḅụ mininiḅọ gonyẹ́ gonyẹ́ mịnị fịbịghaa kụ́ma duma gbámásó nyánábẹm. 17Tamuno ọ Tụ́wọ fịrịma tuminikiri ḅogha ḅẹ́ o ḅoo anị ḅẹ́rẹ́kọḅọ sọ, kụ́ma ọ ḅụ ḅọ́rọ́ tuminikiri ma dụaḅọ́rọ́ma. 18Ọ ḅụ mininiḅọ gonyẹ́ gonyẹ́ n ḅẹ́rẹ́kọbịgha n ḅọ sịbị, kụ́ma mininighaḅọ gonyẹ́ gonyẹ́ n ḅẹ́rẹ́kọ pẹ́lẹ́ ḅọ́rọ́mamam n ḅọ sịbị, tegó n ḅọ na Tamuno kpọ́kpọ́ gbẹ́rẹ́ Tụ́wọ ma ḅụ mininigha. 19Mịị ḅẹ́rẹ́kọ pẹ́lẹ́ma ḅẹẹ: Baá sọọ tuminikiri ma ḅomam, kụ́ma tuminikiriapụ baá ma nakaragha kánákáná ma ḅẹ́lẹ́mam tegó nna mịẹnyẹ opuma sim. 20Siiamịẹnyẹ mịẹarị ḅo gonyẹ́ gonyẹ́ baá ma ḅẹlẹmagha n ḅo pịghị baá ma dámáḅobịgha ḅáláfa go, ḅẹẹ baá ma mịẹbẹm sị kị́nị́mamgba n ḅọ fịrị arịị. 21Kụ́ma karakáráma pa ngáarị ḅọ gonyẹ́ gonyẹ́ baá ma bie sọḅo sọḅom, sị kị́nị́mamgba árị bẹ ḅara ḅẹ́, n ḅo mịẹnyẹ ma Tamuno ḅụ ḅọ́rọ́ anịị n ḅo anị mịẹnyẹ.>>
Jizọs Gboloma Sị Jọn Mingi Saraḅọ Dughonyẹ
22Mịma ḅọ́rọ́ sáá Jizọs na ori ọḅụduaapụ gbẹ́rẹ́ Judiya kálá ámá múm sị anị ngá kẹ́lẹ́ dii fịnị sị pịghị mingi pa kị́nị́ sárá. 23Mị́sa Jọn sọ mingi sáráarị Aenon ḅụ anịị Salim na kikia ngá, tegó anị ngá mingi dụḅam túminị́ pịghị sámámgba anị ngá ma ḅoarị n mingi sára bẹ ḅara. 24(Mị sáá ma, na nnị Jọn pa ịkóli bie suagha.) 25Jọn ori ọḅụduaapụ ma ḅụ jẹ́apụ warị saghị gbẹ́rẹ́ Juuḅọ na ḅẹ́rẹ́ nụná ḅụ́ọ́sịrị na ḅárásịrị mịẹ mịẹnyẹ ma gosi. 26Nnị warị Jọn dámámuu sị dugho ọ pịrị ḅẹẹ, <<Nyẹ́dieḅọ, i biekórómagha ịrí na fịnị owitụ́wọ ma Jọdan tọ́rụ́ ma ḅụ (anịị ịrụa ma saghị saghị ngá ma ḅụ) ịrị o gbolomanyẹ dughoḅọ ma, dighi o mingi sáráarị kị́nị́mamgba pịghị o dámámụarị.>>
27Jọn warị mịma pagharaa ḅẹẹ, <<Tumḅọ ine bẹnyẹ bẹnyẹ nyánáḅobịgha ḅọ́rọ́ sobie nnị saghị n ḅọ pịrịgha. 28Ọmịnị sọ onyẹsẹ́ i pịrịbẹm ḅẹẹ, a dughom ḅẹ́, <Irị Krais magha, kụ́ma nnị i fịrịmam ḅẹẹ a tarị ọ ḅụ ḅoo.> 29Ọ́rụ́ḅọ ma fịnị ọrụḅọyaḅọ ma pịrịm kụ́ma ọrụḅọyaḅọ ma nángwọ fịrịnwangị ọ pịrịarịḅọ ma ngása sẹ sị o pughu pughum, sị bieḅẹlẹ ori ọrụḅọyaḅọ ma pụghọ náa sáá. Mịị ị́yẹ́ bieḅẹlẹ ma ḅo furo bi ḅara. 30Ori géléḅa nyánam; irị ịrụ nyánam.
Ori Sobie Saghị Ḅooḅọ
31<<Sobie sághị ḅoḅọ ma kị́nị́mamgba nẹngịm; tuminikiri sághị ḅoḅọ ma fịnị tuminikiri pịrịm, sị pịghị tuminikiriḅọ ḅara pa ẹ́gẹ́rẹ́kọarị, sobie sághị ḅoḅọ ma kị́nị́mamgba nẹngịm. 32Ọ tọ́rụ pa árị pịghị biri namaa nyẹ ma gbólómanyẹ anịị o dugho pághámaarị nyẹ, kụ́ma gbẹ́rẹ́ḅọ sọ ori dugho págháma nyẹ ma daákịgha. 33Kụ́ma anị daákịmáaḅọ gonyẹ́ gonyẹ́ ḅara pụ́nụ́ anị pịrịmam ḅẹẹ Tamuno ori ma karakáram. 34Tamuno fịrịmaḅọ ma Tamuno ẹ́gẹ́rẹ ma kọarị, ḅẹ́ Tamuno ẹ́kẹ́tọgha ḅara pa ori Tọ́ntọ́ Tẹ́mẹ́ ma pịrịarị. 35Daḅọ ma Tụ́wọ ma ḅẹ́lẹ́mam sị pịghị nyẹ gonyẹ́ gonyẹ́ pa o ḅárabie suamam. 36Tụwọ ma ḅụ mininiḅọ gonyẹ́ gonyẹ́ duma gbámásó nyánam, kụ́ma Tụ́wọ ma sịghịḅọ gonyẹ́ gonyẹ́ duma arịbịgha, ḅẹ́ Tamuno igani fịnị n ḅọ pịrịm.>>
Obecnie wybrane:
Jọn 3: IBY
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
©2024 Luke Initiative for Scripture Translation
