Gẹnẹsis 9
9
Ile Ne Osanobua Gu Noa Ta
1Osanobua keghi khaẹmwẹ ya fiangbe Noa kevbe avbe ivbi ẹre vbenian wẹẹ, “Te u gha biẹlẹ emọ nibun vbene a gha na miẹn wẹ uniẹn ruẹn ghi gba otọe agbọn hia. 2Aranmwẹ hia kevbe ahianmwẹ ni rre otọ agbọn hia, kevbe ehẹn, te ohan ruẹn gha mu iran hia. A viọ ehia ye ototọ asẹ ruẹ. 3U sẹtin gha rri iran kevbe ebe uwọnmwẹ. I ya ehia fiohan nuẹn zẹ vbe evbare. 4Emwi ọkpa kẹkan ọre ọ rrọọ ne u i khian re, ọnii ọre emiowo ne esagiẹn ye ye. I mu awua yọ rhunmwuda, esagiẹn ọre orhiọn ye. 5A deghẹ ọmwaikọmwa gbe ọmwa, uwu ọre I ra ya rria ẹre ikhi. Aranmwẹ ne ọ rhirhi gbe ọmwa, I gha fuọn ruan, I gha vbe rri ọre oya ighẹ ọmwaikọmwa ne ọ de ihua re izigha. 6Ọmwa ne ọ rhirhi gbe ọmwa ran, ọmwa ne ihuaẹre ọ gha vbe gbẹe rua. Rhunmwuda te a yi ọmwa zẹ vbe Osanobua.
7“Banbanna nian, u ghi biẹlẹ emọ nibun, ne ivbuẹ miẹn ehe na gha bun ne iran vbe gha rre ehe hia vbe agbọn.”
8Osanobua keghi tama e Noa kevbe ivbi ẹre wẹẹ, 9“I ra guẹ kevbe uniẹn ruẹn ta ile, 10kevbe emwi ni ghi hiọnrọn hia ni guẹ, ahianmwẹ, aranmwẹ oha, emwi hia fẹẹrẹ ni lele uwẹ ke uwe okọ ladian. 11Ẹmwẹ ne I ya gu uwa ta ile ọre ọna khin: I yanrẹn wẹ aira dọlegbe ye amẹ fuẹn emwi ni hiọnrọn hia a, uromwẹ amẹ i gha ye dọlegbe fuẹn agbọn na an.”
12Zẹ vbe emwi ne a ya yi ama ye ile etẹbitẹ ne I ra guẹ kevbe avbe aranmwẹ na ta, 13I rhie ere ne ukhunmwu mwẹ ye odukhunmwu. Rẹn ọre ọ khian gha re ama ye ile ne I gu agbọn ta. 14Ẹghẹikẹghẹ ne I gha ya wẹ ne amẹ bi vbe agbọn, ere ghẹ ghi ladian, 15I ghi ye ile ne I gu uwẹ vbe avbe aranmwẹ ta wẹ uromwẹ amẹ i gha ye dọlegbe fuẹn emwi ni hiọnrọn hia ọvbehe. 16Ere ghẹ ghi ladian vbe iso, I ghi bẹghe ẹre I ghi ye ile etẹbitẹ ne I gu emwi ni hiọnrọn ni rre agbọn hia ta.
17“Ọnọna ọrọre ama emwi ne I ve emwi ni hiọnrọn hia ni rre agbọn re.”
Noa Kevbe Ivbiẹre Nikpia
18Ivbi e Noa, nikpia ni ke uwe okọ ladian kegha re Siẹn, Ham (ne ọre erha Kenan) kevbe Jafẹt. 19Ivbi e Noa nikpia na ọrọre erha odede ọghe emwa ni rre agbọn hia.
20E Noa keghi re ọgbugbo, rẹn ọre ọmwa ne ọ ka gha kọ ogba azara. 21Ọ ghi da vbe ayọn rẹn nẹ, ayọn kegha gbẹe, ọ keghi bannọ ukpọn ẹnrẹn kua, ọ keghi ya irhunmwirhun lovbiẹ ye uwe owa ukpọn ọghọe. 22Ugbẹn vbe Ham ne ọ re erha Kenan ghi miẹn wẹ erha ẹe bannọ uan, ọ keghi ya tama etiọnrẹn. 23Ẹghẹ nii ọre Siẹn kevbe Jafẹt na mu ẹwu, iran keghi muẹn ye odieke vbe izabọ iran. Iran keghi ya iyeke la uwe owa ukpọn nii, iran keghi yae gue erha iran. Iran na fi aroa ne iran i ghẹ miẹn ọre eban. 24Aro ghi gbannọ Noa nẹ, vbe ọ ghi họn emwi ne Jafẹt ne ovbi ẹre nekherhe ru ẹre re 25Rẹn keghi wẹẹ,
“Ihẹn ọre ọghe Kenan!
Ọviẹn ọre ọ ra gha khin ne etiọnrẹn.
26Urhomwẹ nọ ne Nọyaẹnmwa Osanobua Siẹn!
Ọviẹn Siẹn ọre Kenan ra gha khin.
27Te Osanobua gha gie Jafẹt gha muan yọ!
Uniẹn ọnrẹn ghi vbe gu emwa Siẹn gha rrọọ!
Ọviẹn Jafẹt ọre Kenan ra gha khin.”
28Vbe iyeke uromwẹ amẹ, e Noa keghi ya ukpo ekigbesiyeha irrọ vbe arriaeva (350) vbe agbọn. 29Ọ keghi wu vbe ọ rre ukpo ekigbesiyeha irrọ vbe arriaisẹn (950).
Obecnie wybrane:
Gẹnẹsis 9: EDO96
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@ The Bible Society of Nigeria, 1996
