मरकुस 12

अंगूरा ची बाड़ी चे हेंस्सेदार

(मत्ती 21:33–46; लूका 20:9–19)

1बल्ति ईशु मिसाला मां वांचे लारे बाता करु लाग़ला, “कुई इन्साना ने अंगूरा ची बाड़ी लाली, ते विचे चारो-तरफ बाढ़ लाली, ते रस चा कुण्डा खोदला, ते मन्हा बणाला ते जमींदारा नु विचा ठेका ङिती कर प्रदेस चाह्‍ला गेला। 2बल्ति फला चे मौसमा मां ओणे जमींदारा चे गोढु हेक दासा नु भेज़ले कि जमींदारा कनु अंगूरा ची बाड़ी चे फला चा हेंस्सा गिहो। 3पर वाणे ओनु पकड़ती कर कोटले ते खाली हाथ भेज़ती ङिले। 4बल्ति वांचे गोढु ओणे हेक नेरे दासा नु भेज़ले, वाणे ओचे ठोङ फाड़ती नाखले ते ओचा अपमान करला। 5बल्ति ओणे हेक नेरे नु भेज़ले, वाणे ओनु मारती नाखले। बल्ति ओणे नेरे घणा नु भेज़ले, वांचे महु वाणे कईयां नु कोटले, ते कईयां नु मारती नाखले। 6हमा हेक ही रेहती गेलता, जको ओचा प्यारा पूत हुता, अन्त मां ओणे ओनु वी वांचे गोढु ईं सोचती कर भेज़ले कि वे माये पूता चा कद्दर करे। 7पर वां जमींदारा ने आपस मां केहले, हाओ तां वारिस छै, आवा, अम्ही ऐनू मारती नाखु, तब विरासत अम्ची हुती जई 8ते वाणे ओनु पकड़ती कर मारती नाखले, ते अंगूरा ची बाड़ी कनु ब़ाहर भुकाती नाखले।

9“ऐवास्ते अंगूरा ची बाड़ी चा मालिक का करी? ओ आती कर वां जमींदारा नु नाश करी, ते अंगूरा ची बाड़ी नेरा नु सोंपती ङी। 10का तम्ही पवित्रशास्त्र मां हा वचन कोनी पढ़ला,

“जिसे पत्थरा नु राजमिस्त्रीया ने निक्‍कमे ठहराले हुते,

ओही कूणे चा सिरा हुती गेला।”

11“ईं प्रभु ची ओर कनु हुले,

ते अम्ची नजरी मां अदभोत छै।”

12तब वाणे ओनु पकड़ने चाह्‍ले, कांकि समझती गेलते कि ओणे अम्चे विरोध मां हा मिसाल केहली। पर वे लौका कनु ङरले, ते ओनु छोड़ती कर चाह्‍ले गेले।

कैसर नु कर् ङेणा

(मत्ती 22:15–22; लूका 20:20–26)

13तां वाणे ओनु बाता मां फसाणे वास्ते कोच्छ फरीसिया ते हेरोदियां नु ओचे गोढु भेज़ले। 14वाणे आतीकर ओनु केहले, “हे गुरु, अम्ही जाणु कि तु सच्‍चा छी, ते काई परवाह ना करी, कांकि तु इन्साना चे मुँह ङेखती कर बाता ना करी, पर नरीकारा चा मार्ग़ सच्‍चाई लारे बावड़ी। तां का कैसर नु कर् ङेणा वाजिब छै, जा कोनी? 15अम्ही ङिऊं, जा ना ङिऊं?”

ओणे वांचा कप्पट जाणती कर केहले, “मनु कां परखा? हेक चान्दी चा सिक्‍का माये गोढु आणा कि मैं ओनु ङेखे।”

16वे गेहती आले, ते ओणे वानु केहले, “हा छाप ते नां काये छै?” वाणे केहले, “कैसर चे।”

17ईशु ने वानु केहले, “जको कैसर चे छै, ऊं कैसर नु, ते जको नरीकारा चे छै, नरीकारा नु ङिया,” तब वे ओचे उपर ब़ोहत अचम्भा करु लाग़ले।

मरती कर जीते हुवणे ची चर्चा

(मत्ती 22:23–33; लूका 20:27–40)

18 # प्रेरि 23:8 बल्ति सदूकिया चे मनणे छै कि मरले आला चे जीते हुवणे छै ही कोनी, ईशु चे गोढु आती कर ओकनु पूछले, 19“हे गुरु, मूसा ने अम्चे वास्ते लिखले कि अगर काया भऊ बिना ऊलाद्धी चे मरती जाये ते ओची घराआली रेहती जाये, तां ओचा भऊ ओची घराआली लारे बीहा करती गिहे ते आपणे भावां वास्ते ऊलाद्ध पैदा करे। 20सात भऊ हुते। पेहला भऊ बीहा करवाती बिना ऊलाद्धी चे मरती गेला। 21बल्ति ङुजे भावा ने वे असतरी लारे बीहा करवाती गेला ते बिना ऊलाद्धी चे मरती गेला, ते यूं करती तीजे ने वी करले। 22ते साता कनु ऊलाद्ध कोनी हुली। सारा चे बाद वा असतरी वी मरती गेली। 23तां जीते हुवणे उपर वा वांचे महु काई घराआली हुवी? कांकि वा साता ची घराआली हुती चुकली हुती। ”

24ईशु ने वानु केहले, “का तम्ही ये वजह कनु भूल मां कोनी पले कि तम्ही ना तां पवित्रशास्त्र ही नु जाणा, ते ना ही नरीकारा ची सामर्थ नु। 25कांकि जब वे मरले आला महु जीते हुवे, तां ना वे बीहा करवावे ते ना बीहा मां ङिले जाये, पर स्वर्ग़ा मां स्वर्ग़दूता चे समान हुवे। 26मरले आला चे जीते हुवणे चे बारे मां का तम्ही मूसा ची किताबे मां झाड़ी ची कथा मां कोनी पढ़ले कि नरीकारा ने ओनु केहले, ‘मैं अब्राहम चा नरीकार, ते इसहाक चा नरीकार, ते याकूब चा नरीकार छै’ ? 27नरीकार मरले आला चा कोनी, बल्कि जीता चा नरीकार छै, तां तम्ही बङी भूली मां पले।”

सारा महु बङी आज्ञा

(मत्ती 22:34–40; लूका 10:25–28)

28शास्त्रीया महु हेक ने आती वानु तर्क करते सुणले, ते ईं जाणती कर कि ओणे वानु आच्छे ढंगा लारे उत्तर ङिला, ओकनु पूछले, “सारा महु ज्यादा खास किसी आज्ञा छै ?”

29ईशु ने ओनु उत्तर ङिला, “सारा महु खास आज्ञा हा छै, ‘हे इस्राएल सोण! प्रभु अम्चा नरीकार हेको ही प्रभु छै, 30ते तु प्रभु आपणे नरीकारा लारे आपणे सारे मना लारे, ते आपणे सारे प्राण लारे, ते आपणी सारी ब़ुध्दि लारे, ते आपणी सारी ताकत लारे प्रेम राखा।’ 31ङुजी आज्ञा हा छै, ‘तु आपणे पड़ोसीया चे लारे आपणे समान प्रेम राख।’ जा ङोन आज्ञा कनु कुई बङी आज्ञा कोनी।”

32यहूदी धर्मशास्त्रीया ने ओनु केहले, “गुरु ते ठीक केहले। ईं सच्‍च छै, कि नरीकार हेको छै, ओचे अलावा ङुजा कुई कोनी। 33आपणे सारे मना लारे, सारी ब़ुध्दि लारे, सारे प्राण लारे, सारी ताकत लारे नरीकारा नु प्रेम राखा ते आपणे समान पड़ोसीया लारे प्रेम राखा, सारी होमबलिया ते बलिदाना कनु बढ़ती कर छै।”

34 # लूक 10:25–28 जब ईशु ने ङेखले कि ओणे समझदारी लारे उत्तर ङिला, तां ओनु केहले, “तु नरीकार चे राज़ कनु दूर कोनी।”

ते कानु वी बल्ति ओकनु कोच्छ पूछणे ची हिम्मत कोनी हुली।

मसीह काया पूत छै?

(मत्ती 22:41–46; लूका 20:41–44)

35बल्ति ईशु ने मन्दरा मां उपदेश करते हुले ईं केहले, “धर्मशास्त्री किवें किही कि मसीह दाऊद चा पूत छै? 36दाऊद ने खौद्द पवित्र आत्मा मां भरीती कर केहले हुते,

“प्रभु ने माये प्रभु नु केहले,

माये सज़्ज़े पासु ब़ेस,

जब तक कि मैं दुधे बैरीया नु

दुधे पग़्ग़ा तले ना नाखती ङिये।”

37दाऊद ओनु प्रभु किहे। तां बल्ति ओ ओचा पूत किवें ठहरला? ते लौक ओची खुशी लारे सुणते।

ईशु ने धर्मशास्त्रीया कनु चौकस रेहणे ची चितावनी ङिली

(मत्ती 23:1–36; लूका 20:45–47)

38ईशु ने आपणे उपदेश मां वानु केहले, “शास्त्रीया कनु चौकस रिहा, जको लम्बे-लम्बे चोले घाले हुले फिरने ते जानु बजारा मां नमस्कार, 39ते प्राथनाघरा मां खास-खास आसण ते मेहमान खाने खास-खास जग़ह आच्छी लाग़े। 40वे बांढीया चे घर खाती जई, ते ङिखाणने वास्ते बङी देर तक प्राथना करते रिही, ये ब़ोहत ङण्ड भोग़े।”

सच्‍चा दान

(लूका 21:1–4)

41ईशु मन्दरा मां भण्डार चे सामणे ब़ेसती कर ङेखे पलता कि लौक मन्दरा चे भण्डार मां किवें करती पैसे नाखी, ब़ोहत से धनवाना ने ब़ोहत कोच्छ नाखले। 42इतने मां हेक कंगाल बांढी ने आती कर ङोन दमड़ीया, जको हेक अधेले चे बराबर हुवी नाखलीया। 43तब ओणे आपणे चैला नु गोढु हकारती कर वानु केहले, मैं तम्हानु सच्‍च किहे पला कि मन्दरा चे भण्डार मां नाखणे आला महु ये कंगाल बांढी ने सबकनु बधती कर नाखले। 44कांकि सब ने आपणी धन ची बढ़ोतरी महु कोच्छ नाखले। पर यिणे आपणी घटी महु जको विचे हुते, यानि आपणी जीविका नाखती ङिली।

Obecnie wybrane:

मरकुस 12: ODR

Podkreślenie

Udostępnij

Kopiuj