मरकुस 10
10
तलाक चे बारे मां शिक्षा
(मत्ती 19:1–12; लूका 16:18)
1बल्ति ईशु उठु उठती कर यरदन नदी चे पार यहूदिया ची हद्दी मां आला। भीड़ ओचे गोढु बल्ति भेली हुती गेली। ते ओ आपणी रीति चे अनुसार वानु बल्ति उपदेश ङिऊं लाग़ला।
2तब फरीसी ओची परीक्षा गेहणे वास्ते आती कर ओकनु पूछले, “का ईं वाजिब छै कि मर्दा चे आपणी घराआली नु त्याग़णे?”
3ओणे वानु उत्तर ङिला “मूसा ने तम्हानु का नियम ङिला आला छै?”
4 #
मत्ती 5:31
वाणे केहले, “मूसा ने मर्दा नु त्यागपत्र लिखती कर घराआली नु छोड़ने ची इजाजत ङिली हुती।”
5ईशु ने वानु केहले, “तम्चे मना ची कठोरता ची वजह मूसा ने तम्चे वास्ते हा आज्ञा लिखली। 6नरीकार ने सृष्टि ची शुरु कनु ही वानु मर्द ते असतरी चे रूपा मां बणाले। 7ये वजह मर्द आपणे आई-ब़ा कनु अलग़ हुती कर आपणी घराआली चे लारे रिही। 8ते वे ङोनी हेक तन हुवे, ऐवास्ते वे हमा ङोन कोनी पर हेक तन छी। 9ऐवास्ते जानु नरीकारा ने जोड़ले ओनु इन्सान अलग़ ना करो।”
10बल्ति वे घरे वापिस आले ते चैला ने ऐ बारे मां ईशु कनु पूछले। 11#मत्ती 5:32; 1 कुरि 7:10,11ईशु ने वानु केहले, “जको कुई आपणी घराआली नु त्याग़ती कर ङुजी लारे बीहा करे तां ओ पेहली घराआली चे विरोध मां व्यभिचार करे, 12ते अगर घराआली आपणे मुणसा नु छोड़ती कर ङुजे लारे बीहा करे तां वा व्यभिचार करे।”
ईशु ची आशीष ब़ाला नु
(मत्ती 19:13–15; लूका 18:15–17)
13बल्ति लौक ब़ाला नु ओचे गोढु आणु लाग़ले, कि ओ वांचे उपर हाथ मेहलो, पर चैला ने वानु धमकाले। 14ईशु ने ईं ङेखती गुस्से हुती कर। वानु केहले, “ब़ाला नु माये गोढु आऊं ङिया ते वानु मना ना करा, कांकि नरीकारा चा राज़ इसड़ा ही चा छै। 15#मत्ती 18:3मैं तम्हानु सच्च किहे जको कुई नरीकारा चे राज़ नु ब़ाला आलीकर स्वीकार नी करी, ओ ओचे मां कङी ना जा सग़ी।” 16ते ईशु ने वानु गोङी मां चले, ते वांचे उपर हाथ मेहलती कर वानु आशीष ङिली।
हेक अमीर
(मत्ती 19:16–30; लूका 18:18–30)
17जब ईशु उठु कनु निकलती कर मार्ग़ा मां जाये पलता, तां हेक बन्दे ओचे सनु द्रोड़ते हुले आले, ते ओचे आग़ु गोङे टेकती कर ओकनु पूछले, “हे उत्तम गुरु, अनन्त जीवन चा अधिकारी हुवणे वास्ते मैं का करे?”
18ईशु ने ओनु केहले, “तु मनु उत्तम कां किही? कुई उत्तम कोनी सेर्फ हेक, यानि नरीकार। 19तु आज्ञा नु तां जाणी, ‘हत्या नी करनी, व्यभिचार नी करना, चोरी नी करनी, कूड़ी ग़वाही नी ङेणी, छल नी करना, आपणे ब़ा ते आपणी आई चा कद्दर करना।’ ”
20ओणे ईशु नु केहले “हे गुरु, यां सब नु मैं बचपन कनु मनता आला छै।”
21ईशु ने ओनु गौरा लारे ङेखती ओचे लारे प्रेम करला, ते ओनु केहले, “दुधे मां हेक बाते ची कमी छै। जा, आपणे सब कोच्छ बेचती कर कंगाला नु ङे, ते तनु स्वर्ग़ा मां धन मिली, ते आती कर माये भांसु टुरती पड़।” 22ये बाते लारे ओचा चेहरा उदास हुला, ते ओ ङोख करता हुला चाह्ला गेला, कांकि ओ ब़ोहत धनवान हुता।
23ईशु ने चारो-तरफ ङेखती कर आपणे चैला नु केहले, “धनवाना चे नरीकारा चे राज़ मां जाणे कितने मुश्किल छै।”
24चैले ओचीया बाता कानु अचम्भित हुले। ऐचे पर ईशु ने बल्ति वानु केहले, “हे ब़ाले, जको धन चे उपर भरोसा राखी, वांचे वास्ते नरीकारा चे राज़ मां जाणे कितने मुश्किल छै! 25नरीकारा चे राज़ मां धनवान चे जाणे कनु ऊंठा चे सुई चे दुक्का महु निकलती जाणे आसान छै।”
26वे ब़ोहत अचम्भित हुती कर आपस मां किहुं लाग़ले, “तां बल्ति काया उद्धार हो सग़े?”
27ईशु ने वांचे सनु ङेखती कर केहले “इन्साना कनु तां ईं ना हो सग़ी, पर नरीकारा कनु हो सग़े, कांकि नरीकारा कनु सब कोच्छ हो सग़े।”
28पतरस ने ओनु केहले, “ङेख, अम्ही तां सब कोच्छ छोड़ती कर दुधे भांसु टुरती पले।”
29ईशु ने केहले, “मैं तम्हानु सच्च किहे पला कि इसड़े कुई कोनी, जेह्णे माये सुसमाचारा चे वास्ते घर, जा भावां नु, जा ब़ेहणीया नु, जा आई नु, जा ब़ा नु, जा ब़ाला-ब़च्चा नु, जा खेता नु छोड़ती ङिले हो, 30ते हमा ऐ समय साओ गुणा ना गिहो, घर ते भावां नु ते ब़ेहणीया नु ते आईया नु ते ब़ाला-ब़च्चा नु ते खेता नु, पर सताव चे लारे ते परलोक मां अनन्त जीवन मिली। 31#मत्ती 20:16; लूक 13:30पर ब़ोहत से जको पेहले छी, वे भांसु हुवे, ते जको भांसु छी, वे पेहले हुवे।”
ईशु ने आपणी मौत चे बारे मां तीजी वारी केहले
(मत्ती 20:17–19; लूका 18:31–34)
32वे यरुशलेम नु जते हुले मार्ग़ा मां हुते, ते ईशु वांचे आग़ु-आग़ु जाये पलता, चैले अचम्भित हुते ते जको ओचे भांसु-भांसु आवी पलते, वे ङरले आले हुते। तब ओ दोबारा वां ब़ारहा नु लारे गेहती कर, वानु वे बाता किहुं लाग़ला जको ओचे उपर आणे आलीया हुतीया, 33“ङेखा, अम्ही यरुशलेम नु जऊं पले, ते मैं इन्साना चा पूत प्रधान याजका ते शास्त्रीया चे हाथा मां पकड़वाला जई, ते वे ओनु मारणे चे लायक ठहरावे, ते नेरीया जातिया चे हाथा मां सोंपे। 34वे ओनु ठठा मां उङारे, ओचे उपर थूके, ओनु कोड़े मारे, ते ओनु मारती नाखे, ते तीन ङिहां बाद ओ जीता हुती जई।”
याकूब ते यूहन्ना ची ईशु कनु बिनती
(मत्ती 20:20–28)
35तब जबदी चे पूत, याकूब ते यूहन्ना ईशु चे गोढु आतीकर केहले, “हे गुरु, अम्ही चाहु कि जको कोच्छ अम्ही दुधे कनु मांगु, ऊं तु अम्चे वास्ते कर।”
36ईशु ने वानु केहले, “तम्ही का चाहवा कि मैं तम्चे वास्ते करे?” 37वाणे ओनु केहले, “अम्हानु ईं ङे कि दुधी महिमा मां अम्चे महु हेक दुधे सज़्ज़े पासु ते ङुजा दुधे खब़्ब़े पासु ब़ेसो।”
38 #
लूक 12:50
ईशु ने वानु केहले, “तम्ही ना जाणा कि का मांगा पले? जको मुंगर मैं पीणे उपर छै, का तम्ही पी सग़ा? ते जको बपतिस्मा मैं गेहणे आला छै, का तम्ही गे सग़ा?”
39वाणे ओनु केहले, “अम्हा कनु हो सग़े।” ईशु ने वानु केहले, “जको मुंगर मैं पीणे उपर छै, तम्ही पीया, ते जको बपतिस्मा मैं गेहणे आला छै, ओनु गिहा। 40पर जाये वास्ते तियार करले गेले, वानु छोड़ती नेरे कानु आपणे सज़्ज़े पासु ते आपणे खब़्ब़े पासु ब़िसाणने माये काम कोनी।”
41ईं सुणती कर ङस चैले, याकूब ते यूहन्ना उपर गुस्से हुले। 42#लूक 22:25,26तां ईशु ने वानु गोढु हकारती कर वानु केहले, “तम्ही जाणा कि जको नेरीया जातिया चे हाकिम समझले जई, वे वांचे उपर प्रभुता करी, ते वांचे महु जको बङे छी, वांचे उपर अधिकार जतावी। 43#मत्ती 23:11; मरकु 9:35; लूक 22:26पर तम्चे मां इसड़े कोनी, बल्कि जको कुई तम्चे मां बङे हुवणे चाहवे ओ तम्चा सेवक बणो। 44ते जको कुई तम्चे मां प्रधान हुवणे चाहवे, ओ सब चा दास बणो। 45कांकि ‘मैं इन्साना चा पूत’ ऐवास्ते कोनी आला कि ओची सेवा-टहल करली जाओ, पर ऐवास्ते आला कि आप सेवा-टहल करो, ते ब़ोहता नु छुड़ावणे वास्ते आपणे प्राण ङियो।”
अन्धे नु आंखी ङिलीया
(मत्ती 20:29–34; लूका 18:35–43)
46वे यरीहो शहरा मां आले, ते जब ओ ते ओचे चैले, ते हेक बङी भीड़ यरीहो शहरा कनु निकले पलती, तब तिमाई चा पूत बरतिमाई, हेक अन्धा भिखारी, सड़के चे किनारे ब़ेहला हुता। 47ओणे ईं सुणले कि ईशु नासरी छै, साङ मारती कर किहुं लाग़ला, “हे दाऊद ची ऊलाद्ध, ईशु माये उपर दया कर।”
48ब़ोहता ने ओनु दड़काले कि चोप रिहो, पर ओ होर वी साङ मारु लाग़ला, “हे दाऊद ची ऊलाद्ध, माये उपर दया कर।”
49बल्ति ईशु ने रुकती कर केहले, “ओनु हकारा।” ते लौका ने ओ अन्धे नु हकारती कर ओनु केहले, “हिम्मत राख, ऊठ! ओ तनु हकारे पला।”
50ओ आपणी ओढ़णी भुकाती कर जल्दी ऊठला, ते ईशु चे गोढु आला।
51ऐचे उपर ईशु ने ओनु केहले, “तु का चाहवी कि मैं दुधे वास्ते करे?” अन्धे ने ओनु केहले, “हे रब्बी, ईं कि मैं ङेखु लाग़े।”
52ईशु ने ओनु केहले, “चाह्ला जा, दुधे विश्वास ने तनु चंगे करती ङिले।” ओ तुरन्त ङेखु लाग़ला, मार्ग़ा मां ओचे भांसु टुरती पला।
Obecnie wybrane:
मरकुस 10: ODR
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
CC BY-NC-ND 4.0
