यूहन्‍ना 2

काना शहर मां बीहा

1तीजे ङिओ गलील चे काना शहर मां काया बीहा हुता। ईशु ची आई वी ओठे आली हुती, 2ईशु ते ओचे चैला नु वी ओ बीहा चा छेड़ा ङिला गेलता ला। 3जिसे बेले दाखरस खत्तम हुती गेला, तां ईशु ची आई ने ईशु नु केहले, “वांचे गोढु नेरा दाखरस कोनी।”

4ईशु ने विनु केहले, “हे माई, तु मनु ईं कां किही पली? हालि माया समय कोनी आला।”

5ओची आई ने सेवका नु केहले, “जको कहीं वी ओ तम्हानु किहे, ऊंही करने।”

6ओठे यहूदिया चे शोद्ध करने ची रीति चे अनुसार पत्थरा चे छाऔ बङे मटके पलते ले, हर हेक मटके मां ङोन जा तीन मण पाणी आते। 7ईशु ने सेवका नु केहले, “मटका मां पाणी भरती ङिया।” वाणे मटका नु मुँहा तक भरती नाखले। 8बल्ति ओणे वानु केहले, “हमा पाणी काढ़ती कर भोज़ चे प्रधाना कनु चती जावा।” ते वे चती गेले। 9ते जिसे बेले भोज़ चे प्रधाना ने ईं पाणी चाखले जको दाखरस बणती गेलते, ते ना जाणता कि ईं किठु आले, पर जिसा सेवका ने पाणी काढ़ले हुते वानु पता हुता। तु भोज़ चे प्रधाना ने बीन्दा नु हकारती, 10ते ओनु केहले, “हर हेक बन्दे पेहले आच्छा दाखरस ङिये, ते जिसे बेले बन्दी पीती कर रज़ती जई, बल्ति हल्का ङीवी, पर तु आच्छा दाखरस हमा तक मेहलती छोड़ला।”

11ईशु ने जको अचम्भे चे काम गलील चे काना शहरा मां करले ईशु ने आपणा हा पेहला चैन्ह ङिखाणती कर आपणी महिमा प्रकट करली ते ओचे चैला ने ईशु उपर विश्‍वास करला।

12 # मत्ती 4:13 ऐचे बाद ईशु ते ओचे चैले ते ओची आई ते ओचे भऊ कफरनहूम शहरा मां चाह्‍ली गेली। ते कोच्छ ङिये वे ओठे रेहली।

ईशु यरुशलेम चे मन्दरा मां

(मत्ती 21:12,13; मरकुस 11:15–17; लूका 19:45,46)

13यहूदिया चा फसह चा तेंहवार गोढु आला, ते ईशु यरुशलेम सनु चाह्‍ला गेला। 14ओणे मन्दरा मां ङान्द, भेङा ते कबूतर बेचणे आला नु ते सराफा नु ब़ेहले आले ङेखले। 15तब ओणे बरहीयां चा कोड़ा बणाती कर, सब भेङा ते ङान्दा नु मन्दरा महु काढ़ती छोड़ले, ते सराफा चे पैसे खिंडाती ङिले ते तखत पलटती नाखले। 16ते कबूतर बेचणे आला नु केहले, “याहनु इठु गेहती जावा। माये ब़ा चे घरा नु व्यपारा चे घर ना बणावा।” 17बल्ति ओचे चैला नु चैता आला कि लिखले पले, “दुधे घरा ची धोन्‍न मनु खाली जाये।”

18ऐचे उपर यहूदिया ने ओनु केहले, “तु अम्हानु किसा चमत्कार ङिखाण सग़ी, कि जाये कनु अम्ही समझु दुधे कनु हा अधिकार छै?”

19 # मत्ती 26:61; 27:40; मरकु 14:58; 15:29 ईशु ने वानु उत्तर ङिला, “ऐ मन्दरा नु ढाती नाखा, तीन ङिहां चे भीतर मैं ऐनू बणाती नाखी।”

20यहूदिया ने केहले, “ऐ मन्दरा नु बणावणे मां छियालीस साल लाग़ले, ते का तु तीन ङिहां मां खड़ा करती ङिये?”

21पर जिसे मन्दरा ची बात प्रभु ईशु ने करली वा आपणे शरीरा चे बारे मां केहले। 22जिसे बेले ओह मुड़दा महु जीती ऊठला, ते ओचे चैला नु याद आले कि जको ईशु ने आप केहले हुते। ते वाणे पवित्रशास्त्र ते ओह वचना उपर ते ईशु उपर विश्‍वास करला।

ईशु बन्दा चे मना नु जाणे

23फसह चे तेंहवारा चे बेले ईशु यरुशलेम मां हुता, ब़ोहत लौका ने चैन्ह नु जको ओह ङिखाणता ङेखती कर ओचे नांवा उपर विश्‍वास करला। 24पर ईशु ने आपणे आप नु वांचे भरोसे कोनी छोड़ले, कांकि ओह सारा नु जाणता। 25ओनु ये बाते ची जरुरत कोनी हुती, कि कुई आती कर ओनु लौका चे बारे मां बावड़ो, कांकि लौका चे मना मां का छै, ओ ये बाते नु जाणता।

Obecnie wybrane:

यूहन्‍ना 2: ODR

Podkreślenie

Udostępnij

Kopiuj