यूहन्‍ना 10

आजड़ी ते भेङा ची मिसाल

1ईशु ने बल्ति वानु केहले, “मैं तम्हानु सच्‍च किहे कि जको कुई दरवाजे कनु बाड़ी मां ना आवी, पर किठु ङुजी जग़हा कनु चढ़ती आवे, ओह चोर ते ङाकु छै। 2पर जको दरवाजे कनु भीतर आवे ओह भेङा चा आजड़ी छै। 3ओचे वास्ते चौकीदार दरवाजे खोलती ङिये, ते भेङा ओची अवाज सुणी। ओह आपणीया भेङा चे नां गेहती कर हकारे ते ब़ाहर गेहती जाये। 4जिसे बेले ओह आपणीया सारीया भेङा नु ब़ाहर काढ़ती गिहे, ते वांचे आग़ु-आग़ु टुरे ते भेङा ओचे भांसु-भांसु टुरती पड़ी, कांकि वे ओचीया अवाज पिछाणी। 5वे पराये भांसु नी जाये, पर आजड़ी सनु द्रोड़े, कांकि वे पराई अवाज ना पिछाणी।”

6ईशु ने वानु मिसाल मां केहले, पर वे ना समझ सग़ले कि ओ का किहे पला।

ईशु आच्छा आजड़ी

7तब ईशु ने वानु बल्ति केहले, “मैं तम्हानु सच्‍च-सच्‍च किहे, भेङा चे दरवाजे मैं छै। 8जितने माये कनु पेहले आले वे सारे चोर ते ङाकु छी, पर भेङा ने वांची कोनी सुणली। 9दरवाजे मैं छै, अगर कुई माये लारे भीतर आवे तां ऊं बचाले जई। ऊं भीतर ब़ाहर आवी जई ते चर्रा मिली। 10चोर किसी नेरे कामा वास्ते ना पर हेको चोरी करने वास्ते ते मारणे ते बर्बाद करु आवे, पर मैं ऐवास्ते आला कि वानु जीन्दगी मिलो, भरपूर जीन्दगी मिलो।

11“आच्छा आजड़ी मैं छै। आच्छा आजड़ी भेङा चे वास्ते आपणी जान ङिती ङिये। 12मजदूर ना तां आजड़ी छै ना ही भेङा चा मालिक छै। भेड़िये नु आते ङेखती कर, भेङा नु छोड़ती कर नासती जाये। भेड़िया वानु पकड़ती इंगे-ऊंगे खिंडाती नाखे। 13ऐवास्ते नासती जाये कि ओह मजदूर छै ओनु भेङा ची चिन्ता कोनी।

14 # मत्ती 11:27; लूक 10:22 “आच्छा आजड़ी मैं छै, मैं आपणीया भेङा नु जाणे माया भेङा मनु जाणी, 15जिंवे कि ब़ा मनु जाणे ते मैं ब़ा नु जाणे। मैं आपणीया भेङा वास्ते आपणी जान ङिये। 16माया नेरीया वी भेङा छी जको वे ये भेङशाला ची कोनी। मनु वानु गेहती आणे जरुरी छै। वे वी माई अवाज सुणे, बल्ति हेक ही झोण्ड ते हेक ही आजड़ी हुवी।

17“ब़ा ऐवास्ते माये लारे प्रेम राखे कि मैं आपणी जान ङिये कि जीन्दगी बल्ति गे सग़े। 18कुई विनु माये कनु खौश ना, बल्कि मैं आप ही विनु ङिये। मनु विनु ङेणे चा अधिकार छै ते ओनु बल्ति गेहणे चा वी अधिकार छै। हा आज्ञा माये ब़ा कनु मनु मिड़ली।”

19यां बाता ची वजह यहूदी लौका मां बल्ति फूट पड़ती गेली। 20वांचे महु घणे किहुं लाग़ले, “ओचे मां दुष्टात्मा छै ते ओह बावला छै। ओची कां सुणा?”

21नेरा लौका ने केहले, “जाये मां दुष्टात्मा सवार हो ऊं बन्दे इसड़ीया बाता ना केह सग़ी। का दुष्टात्मा अन्धा ची आंखी खोल सग़े?”

यहूदिया चा अविश्‍वास

22यरुशलेम मां मन्दरा चा समर्पण चा तेंहवार मनाला जाये पलता। ते सर्दीया चा मौसम हुता, 23ईशु मन्दरा मां सुलैमान चे ओसारे मां घूमे भीलता। 24बल्ति यहूदिया ने ईशु नु घेरती ते पूछले, “तु अम्चे मन नु कब तक परेशानी मां राखे? अगर तु मसीह छी, तां अम्हानु साफ-साफ केहती ङे।”

25ईशु ने केहले, “मैं तम्हानु केहती ङिले, पर तम्ही विश्‍वास ही ना करा। जको काम मैं आपणे ब़ा चे नांवा लारे करे वे ही माये ग़वाह छी, 26पर तम्ही विश्‍वास ना करा कांकि माया भेङा महु कोनी छिवा। 27माया भेङा माई अवाज सुणी, मैं वानु जाणे, ते वे माये भांसु-भांसु टुरी। 28मैं वानु अनन्त जीवन ङिये, वे कङी वी नी मरे, ते कुई वानु माये हाथा कनु खौश ना सग़ी। 29माया ब़ा, जेह्णे वानु मनु ङिले, ओह सबकनु बङा छै, ते कुई वानु माये ब़ा चे हाथा कनु खौश ना सग़ी। 30मैं ते माया ब़ा हेक छिऊं।”

31यहूदी नेता ने ओचे उपर पत्थराव करने वास्ते पत्थर चले, 32ऐचे उपर ईशु ने वानु केहले, “मैं तम्हानु ब़ा ची तरफु घणे सारे आच्छे काम ङिखाणले। वांचे महु किसे कामा वास्ते माये उपर पत्थराव करा पले?”

33यहूदी नेता ने ओनु केहले, “आच्छे कामा वास्ते दुधे उपर पत्थराव कोनी करु पले, पर नरीकारा ची निन्दा करने ची वजह कनु ते ऐवास्ते कि तु इन्सान हुती कर, आपणे आप नु नरीकार बणावी।”

34ईशु ने वानु केहले, “का तम्ची व्यवस्था मां कोनी लिखले पले कि नरीकारा ने केहले, ‘तम्ही सारे ईश्‍वर सिरखरे छिवा?’ 35अगर ओणे वानु सारे ईश्‍वर सिरखरे केहले, जाये कनु नरीकारा चा वचन पुज़ला, ते बल्ति पवित्रशास्त्र ची बात अलोफ ना हो सग़ी 36तां मनु जको ब़ा ने पवित्र बणाती कर दुनिया मां भेज़ले, तम्ही कां किहा कि मैं निन्दा करे पला, कांकि मैं केहले, ‘मैं नरीकारा चा पूत छै?’ 37अगर मैं आपणे ब़ा चे काम ना करे तां माया विश्‍वास ना करा। 38पर अगर मैं करे, तां चाहे माया विश्‍वास ना वी करा, पर वा कामा चा तां विश्‍वास करा, ताकि जाणा ते समझा कि ब़ा माये मां छै, ते मैं ब़ा मां छै।”

39बल्ति वाणे ओनु पकड़ने ची कोशिस करली, पर ओह वांचे हाथा कनु निकलती गेला।

40 # यूह 1:28 बल्ति ईशु यरदन चे पार वे जग़हा चाह्‍ला गेला जिठे यूहन्‍ना पेहले बपतिस्मा ङिता, ते ईशु ओठे जती कर रेहला। 41घणे सारे लौक ओचे गोढु आती कर केहते, “यूहन्‍ना ने तां कुई चैन्ह कोनी ङिखाणला, पर यूहन्‍ना ने जको कोच्छ ऐ बन्दे चे बारे मां केहले हुते ऊं सारे सच्‍च हुते।” 42ते ओठे घणा सारा बन्दा ने ईशु उपर विश्‍वास करला।

Obecnie wybrane:

यूहन्‍ना 10: ODR

Podkreślenie

Udostępnij

Kopiuj