Mateghusi 7
7
Mwa kutetera ndhango
(Luk 6:37–38, 41–42)
1“Mwa kutetera ndhango, kemo mba dhira namwe kumutetera ndhango. 2Thothi mbo mu teteritha ndhango hamweya, tho mbo ha mu teteritha namwe. No karo thiyedhekeritho thi mbo mu yedhekeritha hamweya, tho mbo ha mu yedhekeritha.
3“Nye ghuna kumonena kapara komudiho dyamuyendhoye, mutambo ghomudiho dyoye ne kadi wa mona? 4Endi ngepi sho kone kuninga kwamuyendhoye eshi: ‘Tango ni kutundithe kapara mudiho dyoye,’ oku we ne ghuna kara nomutambo mudiho dyoye? 5Ghomukadifurumeko, tundithe tango mutambo ghomudiho dyoye, po sho mone thiwana kukutunditha kapara komudiho dyamuyendhoye.
6“Mwa mwaghera kwawambwa yokupongoka, maghana sho dhi mu reghere no kumukenyaghura. Karo mwa vukumena makwarara ghenu kuyinguru, maghana sho yi gha djata‐djate.
Mayuverero ghondapero
(Luk 11:9–13)
7“Mu kumbere, mbo hana mu pa, mu shane mbo muna wana, mu kun̂ure mbana mu yandhwerera. 8Yoyishi kehe yu ghokukumbera, ghana kutambura, no kehe yu ghokushana ghana kuwana, noyu ghana kukun̂ura mbana mu yandhwerera.
9“Ngambi munu munye ghopapenu oyu ghana kupa mwanendi diwe oku ghana mu kumbera ghuroto? 10Ngambi kumupa thiyoka oku ghana mu kumbera thi? 11Ngeshi mwe mwayi, ha mu dimuka kutapa kwawanenu yoyiwa, yingatji keho sho gha tape Wihenu ghomudiwiru yoyiwa kwawa hana kumukumbera?
12“Yoyiheya yi mwa haka eshi ha yi mu tendere hanu, mu yi wa tendere nawo. Yoyishi kemo ya ninga mumuragho nawaporofeta.
Mayira mawadi
(Luk 13:24)
13“Mwingene mudikorogho dyodithorokoto. Dikorogho dyokutwara kumashinyihero ne kungwara nondhira dhako ne dhiyaghayu, nawa ha dhi yenda ne hengi. 14Ene dikorogho dyokutwara kumoyo ne dithorokoto, ndhira dhako ne dhimbiru, hakakudhiwana nawo hapu.
Haporofeta hombango
(Luk 6:43–44)
15“Mu koneke kwawaporofeta hombango. Awo hana kumwiyera muthifurukutu thondjwi. Ene mwimi dhawo ne hamambungu. 16Kumbuyo dhawo, mbo muna wa dimuka. Munu ne kukona kukokora mandjombo kumighunga endi n̂uyu kushosho? 17Kehe thitondo thothiwa thina kwima mbuyo dhodhiwa. Ene thitondo thothiyi, thina kwima mbuyo dhodhimango. 18Thitondo thothiwa kadi thika kwima mbuyo dhodhiyi nothothimango natho kadi wa kwima mbuyo dhodhiwa. 19Kehe thitondo thokudhira kwima mbuyo mwene, thina kupwa kuyeya no kuthivukumena mumudiro. 20Kemo mbo mu dimuka haporofeta hombango kumbuyo dhawo.
Kuyuva nokutenda
(Luk 13:25–27)
21“Kadi yomuhe ghokuninga kukwange eshi: ‘Hekudyange, Hekudyange,’ ho mbo ghengene mudiwiru, shimengwa ghokutenda ndani mahimeno ghaTate ghomudiwiru. 22Hengi mba ninga kukwange mudiyuwa di eshi: ‘Hekudyange, Hekudyange, mbadi twa yaghurire muDina dyoye ndi, nomuDina dyoye twa shwaghithithire hashatani, nomuDina dyoye twa tendire yitetukitha yoyingi?’ 23Po mbo ni wa tuywera eshi: ‘Shime ni shemwa eshi kumudimuka. Mu yakunuke kukwange mwe mwa regha muragho waNyambi.’
Tushemandhugho tuwadi
(Luk 6:47–49)
24“Yomuhe ghokuyuva man̂ando ghange ghano no kughatenda, ku kona kumurikanyitha namurume ghomaghano ghokutendera nghugho dhendi padiwe. 25Ko kuhotoka dihuru‐huru dyomvura, divavure ha diya, dipepo dya dhudhumukire kundhugho dhi. Ene mbadi dha yundukire nokamanana temba. Yoyishi kashemandhugho, ka tenamine padiwe.
26“No kehe yu ghokuyuva man̂ando ghange ghano, no mbadi ghana kughakutha, gha kona kukughanekera kwamukamandengure yu gha shokekera ndhugho dhendi pamuve ghodivegheya. 27Dihuru‐huru dya hurukire, divavure dya poposhire, dipepo dya dhudhumukerire kundhugho dhi no kudhiyundura no kudhimbandawera.”
28Apa gha manine Jesusi kughamba, ko kututukwa mbunga kuyihonga yendi. 29Yoyishi gha wa hongire yira murume ghongcamu, kadi yira hakamarukwaro wawo.
Obecnie wybrane:
Mateghusi 7: MHW1986
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Mbunga dhoBayibili dhaNamibia (Bible Society of Namibia) 1986
