Joni 1
1
A WASE I. —Sa tukuni ni sa Kalou ko koya na Vosa, ka yaco me tamata talega, 1-18. Ai tukutuku i Joni, 19-39. Erau sa kacivi mei talatala i Jisu ko Adriu kei Petero. Eratou sa veikune ko Jisu kei Filipo kei Nacanieli, 40-51.
1E NAI vakatekivu sa bula ko koya na Vosa, a rau sa tiko vata kei na Kalou ko koya na Vosa, a sa Kalou ko koya na Vosa. 2Erau sa tiko vata ko koya o qo kei na Kalou e nai vakatekivu. 3Ko koya sa caka kina na ka kecega; a sa sega e dua na ka sa caka, me sega ni cakava ko koya. 4Sa tu na bula vei koya; ia sa nodra rarama na tamata na bula. 5A sa cilava na butobuto na rarama; ia na butobuto sa sega ni kunea.
6Sa dua na tamata sa talai mai vua na Kalou, a yacana ko Joni. 7O koya o qo sa lako mai me dautukutuku, me tukuni koya na Rarama, me ra vakabauta na tamata kecega e na vukuna. 8Sa sega ni Rarama ko ya ko koya, ia sa nonai tavi me tukuna ga na Rarama. 9Sai koya ga o qo na Rarama dina, sa lako mai ki vuravura ka vakararamataki ira na tamata kecega. 10Sa tiko e vuravura ko koya, a sai koya ka caka kina ko vuravura, ia ka sega ni kilai koya ko ira na kai vuravura. 11Sa lako mai ko koya ki na nona, ka sega ni vakabauti koya ko ira na kai nona. 12Ia ko ira kecega sa vakabauti koya, sa solia ko koya vei ira me ra yaco rawa me ra luve ni Kalou, vei ira sa vakabauta na yacana: 13era sa vakasucumi, e sega e na vukudra na qase, se na sucu vakayago, se na veitalia ni tamata, mai na Kalou ga.
14A sa yaco me tamata ko koya na Vosa, ka tiko vata kei keda, (ia keitou a raica na nonai ukuuku, ni sa vaka nai ukuuku ni Le dua bauga sa vakasikavi maivei Tamana,) sa sinai e na loloma kei na dina.
15Sa tukuni koya ko Joni, ka kacivaka, ka kaya, Sai koya o qo kaʼu a vosataka, O koya sa muri au sa uasivi caka vei keirau; ni sa liu vei keirau ko koya.
16Ia eda sa rawata kecega, mai na ka sa sinai tu vua, a loloma sa vakaikuri. 17Ia ko Mosese sa soli kina na vunau; ko Jisu Karisito sa yaco kina na loloma kei na dina. 18E sega e dui na tamata sa raica na Kalou e na gauna e dua; ko na Luvena ga e dua bauga, sa vakasikava ko koya, o koya sa tiko e na lomasere i Tamana, sa tukuna.
19IA sai koya o qo nai tukutuku i Joni, ni sa tala e so na bete ka so na luve i Levi ko ira na kai Jutia mai Jerusalemi me ra tarogi koya, O cei beka ko iko? 20A sa tukuna ko koya, ka sega ni cakitaka; ka tukuna ga, Au sa sega ni Karisito koi au. 21A ra sa tarogi koya, O cei talei o Ilija beka? A sa kaya ko koya, E segai. O iko beka na parofita ko ya? A sa kaya ko koya, E segai. 22Era sa qai kaya vua, O cei beka ko iko? me keitou tukuna yani vei ira sa talai keitou: o sa tukuni iko mei cei? 23Sa kaya ko koya, Oi au na domona e dua sa kacikaci e loma ni veico, Vakadodonutaka na sala i Jiova, me vaka sa kaya na parofita ko Isaia.
24Ia ko ira sa talai mai, era sa maivei ira na Farisi. 25A ra sa tarogi koya, ka kaya vua, O sa qai veipapitaisotaki e na vuku ni cava, ni ko sa sega ni koya na Karisito, se Ilija, se na parofita ko ya? 26Sa vosa vei ira ko Joni, ka kaya, Au sa veipapitaisotaki e na wai: ia ka sa tu e na kemudou maliwa e dua dou sa sega ni kila; 27sai koya o qo, sa muri au ka sa uasivi cake vei au, ia na wa ni nonai vava kaʼu sa sega ni yaga meʼu sereka. 28Sa kitaki na veika o qo mai Peca-para e na tai kadua ni Joritani, a tikina sa veipapitaisotaki kina ko Joni.
29E na sabogibogi sa raici Jisu ko Joni ni sa lako mai vua, a sa kaya, Raica na Lami ni Kalou, o koya sa kauta tani na nodrai valavala ca na kai vuravura. 30Sai koya o qo kaʼu a tukuna, Sa muri au e dua na tamata, sa uasivi cake vei au: ni sa liu vei keirau. 31Ia kaʼu a sega ni kilai koya; ia me kilai koya ko ira na Isireli, o koya o qo kaʼu sa lako mai kina ka veipapitaisotaki e na wai.
32A sa tukuna ko Joni, ka kaya, Au a raica na Yalo ni sa lako sobu mai lomalagi me vaka na ruve, a sa mai toka vua: 33ia kaʼu a sega ni kilai koya eliu: ia ko koya sa talai au mai me veipapitaisotaki e na wai, sa kaya ga vei au, O koya ko na raica ni sa lako sobu kina na Yalo, a sa mai toka vua, sai koya o qo sa veipapitaisotaki e na Yalo Tabu. 34Ia kaʼu a raica, ka tukuna ni sai koya o qo na Luve ni Kalou.
35E na sabogibogi sa tu tale ko Joni, kei rau e lewe rua na nona tisaipeli; 36a sa vakaraici Jisu ni sa lako voli, a sa kaya, Raica na Lami ni Kalou! 37A sa rogoca na nona vosa koi rau na tisaipeli, ka rau sa muri Jisu. 38Sa qai vuki ko Jisu, ka raici rau ni rau sa muria, ka kaya vei rau, A cava drau sa vakasaqara? Erau sa qai kaya vua, Rapi, (a kenai balebale, Vakavuvuli,) o sa tiko maivei? 39Sa kaya vei rau ko koya, Lako mai ka raica. Erau sa lako, ka raica na yasana sa tiko kina ko koya, ka ratou sa tiko vata kaya e na siga ko ya; a sa voleka nai katini ni tiki-ni-siga.
40Sa dua vei rau sa rogoci Joni, ka muri Koya, ko Adriu na taci i Saimoni Petero. 41Sa kunea ko koya eliu na tuakana ko Saimoni, ka kaya vua, Keitou sa kunea na Mesaia; (a kenai balebale, a Karisito.) 42A sa kauti koya mai vei Jisu. Ia sa vakaraici koya ko Jisu, ka kaya, O iko ko Saimoni na luve i Jona: o na vakatokai ko Kifa; (a kenai balebale ko Petero.)
43E na sabogibogi sa via lako yani ki Kalili ko Jisu, a sa kunei Filipo, ka kaya vua, Muri au. 44A sa kai Peciseita ko Filipo, a nodrau koro ko Adriu kei Petero.
45Sa kunei Nacanieli ko Filipo, ka kaya vua, Keitou sa kunei koya sa vola kina ko Mosese e na vunau, kei ira talega na parofita, o Jisu na kai Nasareci, a luve i Josefa. 46A sa kaya vua ko Nacanieli, E tubu rawa beka mai Nasareci e dua na ka vinaka? Sa kaya vua ko Filipo, Lako mai ka raica.
47Sa raici Nacanieli ko Jisu ni sa lako mai vua, a sa kaya ni sa tukuni koya, Raica e dua sa luve i Isireli dina, sa sega vei koya na dauveivakaisini! 48Sa kaya vua ko Nacanieli, O sa kilai au maivei? Sa vosa ko Jisu, ka kaya vua, Ni sa bera ni kacivi iko ko Filipo, ni ko a tiko e ruku ni lolo, au a raici iko. 49Sa vosa ko Nacanieli, ka kaya vua, Vakavuvuli, o iko na Luve ni Kalou; o iko na nodra Tui na Isireli. 50Sa vosa ko Jisu, ka kaya vua, E na vuku niʼu sa kaya vei iko, Au a raici iko e ruku ni lolo, ko sa vakabauta, ne? o na raica na veika sa uasivia o qo. 51A sa kaya vua ko koya, E dina, e dina, au sa kaya vei kemudou, E na gauna maimuri dou na raici lomalagi ni sa tawase, kei ira na agilose ni Kalou ni ra sa lako cake ka lako sobu me ra qarava na Luve ni tamata.
Obecnie wybrane:
Joni 1: FIJ1864
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
First full Bible in the Fijian language © British and Foreign Bible Society, 1864.
