Gimpuunan 1
1
Ti Paglalang
1Sa kabag-u linalang Diyus ti langit hanggan ti kalibutan. 2Ti kalibutan unman waya may histuda, unman waya may imaw una hintay. Ti danum malantapan sa kalibutan nas-ub kadudulman. Ag ti Ispiritu Diyus#1:2 Ispiritu Diyus: ngatay, kamaskihan Diyus; ngatay, durus ginan sa Diyus; ngatay, mabaskug pag durus. mag-arayhay sa babaw danum.
3Magkun ti Diyus, “Magkaimaw karayawan!” Nagkaimaw ngani rayaw. 4Pagka nakitan Diyus ti karayawan nakabaya siya. Bag-u binulag niya ti karayawan ag ti kadudulman. 5Iningarnan niya “sirang” ti karayawan ag ti kadudulman “yabi”. Linmawuy ti yabi ag rinmas-ug ti surip. Tunda ti un-an pag sirang.
6Bag-u magkun ti Diyus, “Magkaimaw kalayawan bumulag sa sirung pag danum ag sa tungud pag danum.” 7Ag nangyari ngani inda. Binwat Diyus ti kalayawan imaw ti tab-anan sa sirung pag danum ag sa tungud pag danum. 8Inda pag kalayawan iningarnan Diyus “kapawaan.” Linmawuy ti yabi ag rinmas-ug ti surip. Tunda ti ikadwa pag sirang.
9Bag-u magkun ti Diyus, “Pagmatigsunan sa usa ka rugar ti danum sa sirung langit hampay lumutaw ti mamara pag bahagi.” Ag nangyari ngani inda. 10Iningarnan niya “daga” ti mamara pag bahagi, ag iningarnan waydi niya “dagat” ti matigsunan pag danum. Nakabaya ti Diyus sa kay nakitan.
11Bag-u magkun ti Diyus, “Pagtubu sa daga ti tuhay-tuhay pag manga halaman: ti manga magburak butir, hanggan ti manga puun kayu magburak angay sa kanda kalasi.” Ag nangyari ngani inda. 12Tinmubu ngani sa daga ti manga halaman, ag nakabaya ti Diyus sa kay nakitan. 13Linmawuy ti yabi ag rinmas-ug ti surip. Tunda ti ikatlu pag sirang.
14Bag-u magkun ti Diyus, “Magkaimaw manga bagay may rayaw sa langit hampay bulagun ti sirang ag ti yabi, ag imaw inda ti tanda manga panahun,#1:14 manga panahun: Ti manga panahun kapistahan, tig-taranum, tig-arani, ag iba waya mahalaga pag sirang. sirang ag timpu. 15Rumayaw inda ginan sa langit hampay pumakaun rayaw sa kalibutan.” Ag nangyari ngani inda. 16Linalang Diyus ti duwa ka daka pag rayaw: init ti pinakadaka, magrayaw nu sirang ag bulan kay diit, magrayaw nu yabi. Linalang diman niya ti manga pamgasan. 17-18Ipinauli Diyus inda pag manga bagay sa langit hampay pumakaun rayaw sa kalibutan nu sirang ag yabi, hanggan hampay bulagun ti sirang ag ti yabi.#1:17-18 ti sirang ag ti yabi: sa litiral, ti rayaw ag ti dulum. Nakabaya ti Diyus sa kay nakitan. 19Linmawuy ti yabi ag rinmas-ug ti surip. Tunda ti ikap-at pag sirang.
20Bag-u magkun ti Diyus, “Yumamu ti manga may buhi sa danum hanggan ti manga may buhi sa tungud maglayang.” 21Nakan linalang Diyus ti manga daraka pag manga hayup sa dagat, ti tanan pag kalasi iyay mag-ulian sa danum, katunda diman ti tanan pag kalasi hayup maglayang. Nakabaya ti Diyus sa kay nakitan. 22Pinapaladan niya inda pag manga hayup. Magkun siya, “Pagpakayamu kamu ag suubun niyu ti danum sa dagat, katunda diman pagyamu ti manga hayup maglayang.” 23Linmawuy ti yabi ag rinmas-ug ti surip. Tunda ti ikalima pag sirang.
24Bag-u magkun ti Diyus, “Magkaimaw tuhay-tuhay pag hayup sa babaw daga: manga hayup marignuk ag manga hayup maila, daraka ag dariit.” Ag nangyari ngani inda. 25Linalang Diyus inda tanan ag nakabaya siya sa kay nakitan.
26Bag-u magkun ti Diyus, “Lalangun nita ti tawu ga kanta histuda. Sida ti manpamahala sa tanan pag kalasi hayup: manga maglanguy, maglayang, maglakaw ag magyapang.” 27Nakan linalang Diyus ti tawu, lalaki ag babayi ga kay histuda. 28Pinapaladan niya sida magkun, “Pagpakayamu kamu agud mangalat kanyu manga lahi ag mamahala sa buu kalibutan. Pamahalaan niyu ti tanan hayup.”
29Bag-u magkun ti Diyus, “Pag-ipakaun niku sa kanyu ti manga halaman magburak butir hanggan ti manga puun kayu magburak hampay kanyu karan-unun. 30Ag pag-ipakaun diman niku sa tanan hayup ti tanan malangba pag ilamnun hampay kanda karan-unun.” Ag katida ngani ti nangyari. 31Nakitan Diyus ti tanan niya linalang ag nakabaya gid siya. Linmawuy ti yabi ag rinmas-ug ti surip. Tunda ti ikan-um pag sirang.
Obecnie wybrane:
Gimpuunan 1: HNN
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Copyright © 2023 by OMF International, Philippines
