Luka 23
23
Yesu mo Pailadi para karu popisimiya ei
(Madiu 27:1-2,11-14; Maka 15:1-5; Dioni 18:28-38)
1Gupuma ande repaa raayome rekoma Yesu Pailadi nipuna lee rona ma-paisimiya. 2Go lena ara nipu kinipu na-pi einuna nipu ma-ria ria pisimiya. Gupuma nimumi gupi lisimiya. Go alimi naana wenaali pa porana karu polameya gupi lalo aripa lena pangamae, lisimiya. Mo Romo andasu andere pia ali repara dakisi muni na-adapape lo pange nimu repara lalore, nipuri ande Keriso kini ali ae, lisaya.
3Pailadi nipumi Yesu angaa meala arare gupi lisaya. Neere ande Isaraelimi mandu rangala pae wenaalinuna kini aliyapae, lisaya. Go lisayandare Yesumi gupi lisaya. Nena gole go lalenda, lisaya.
4Gupuma Pailadi nipumi monde Gode repara alinau puaeme alinuna andaa alinu para pange mo wenaali para lalore, Neme go ali nipumi ale menda pe aunda komenda na-andaloae, lisaya.
5Go lisayandare mo wenaalimi puri waru paloma ara gupi lisimiya. Apo ali nipuna wala angelemere wenaalina lo para awoma koae kone ma-sia eiri Diudia wenaalina lo para ma-sia eiri epae, lisimiya. Nipumi mo Galili andasu para ara kini puma ipuma ambia go lena epea, lisimiya.
Yesu Erodi repara rapaisimiya ei
6Pailadimi go lisimiya angele pangomare gupi lisaya. Go aliri Galili aliyapae, lisaya. 7Gupi lomare Pailadimi Yesu nipuri Erodimi andere pia andasu naneyame epea kone sumare wala Erodi repara rapaisaya. Erodi nipu pange go naarenare Diurusaleme ree anda para aisaya. 8Erodi nipumi Yesu andoma raname komisaya. Akepeare Yesumi pisaya einuna su ala pangomare Yesu andawe kone suaisaya. Gupuma Yesumi su wenaalimi mandana na-pape aunu menda pinya andola kone wisaya. 9Go eina Erodi nipumi Yesu one mone angaa mea einu raayo pisayapare Yesumi nipuna angele na-lisaya. 10Gupuma ande Gode repara alinau puaisimiya alinuna kalu alinumi pange Mosesimi Rudule Angele waloaeme alinumi ao-moneala ara puri pale angelenu Yesu ma-lopaluameya, lisimiya. 11Erodi pange nipuna endali ripinyi alinumi Yesu ero la la puma ora epe aka kana andaaipe pea aka ma-yamaoma Pailadi repara wala rapaisimiya. 12Go aleme gole go naarena Erodi pange Pailadi niipu laapore yanda runguli ali aisipiyapare andamisipiya.
Yesu komainya liisimiya ei
(Madiu 27:15-26; Maka 15:6-15; Dioni 18:39–19:16)
13-14Pailadi nipumi ande Gode repara alinau puaisimiya alinuna andaa alinu pange ande ririna alinu pange wenaalinu raayo mendaa lena mombedapa wi loma gupi lisaya. Nimimi go ali ni para karu ipuma lalore, Go alimi pia aunumi wenaalinu pa porana karu pula lame, lisaya. Go eina neme nimina lee rona ara go waisawapare neme nipumi koae aunu pea einuna ma-ria ria pimi einu komenda na-andalo, lisaya.
15Erodimi pange go alimi pu koyaya aunu komenda na-andoma wala naa repara go rapayanda, lisaya. Nipu luma komamonoyanda koae aunu menda na-pea, lisaya. 16Go einayandare neme nipu podeyainyalomare kepe rapalua, lisaya. 17[Pasopa enda pambala pisimiya naarena einiri nimuna dipula piri ali komea Pailadi nipumi andaa penaya rapala pinya lisimiya.]
18Go lisayandare mo wenaali raayosimi andapu wi loma gupi lisimiya. Go ali nipu liiae, lisimiya. Naanare Barabasi kepe rapae, lisimiya. 19Barabasiri go ree anda para rendaa rendaa ma-rekaoma ali luma komaisayanda dipula anda para ma-piraisimiya.
20Pailadimi Yesu kepe rapaluameya monde wenaali konge lisayapare monde wenaalimi nipuna angele yango liada ara lalore gupi lisimiya. 21Go ali nipu lu andiae. Go ali nipu lu andiae, lisimiya.
22Pailadi nipumi nimu andalo wala rana repopao gupi damepare nipumi koae au menda ake au pisayapae, lisaya. Nipu liiape eina neme ale menda nipumi pu koyaya ei komenda na-andala ara nipu podeyainyalomare kepe rapalua, lisaya.
23Go lisayapare Pailadina ange oro para rambuaoma Yesu lu andiae, lisimiyanda ora pisimiya.
24Pailadimi nimumi lisimiya ei raluma Yesu komena lisaya. 25Gupuma nimuna lameya ali kepe raparipaya. Go ali nipuri ande rendaa rendaa puma ali lu ma-komaisayanda dipula ma-piraisimiya ali. Gupuma Pailadimi Yesu mo wenaalina ki nane alo monema nimuna rana pi au pinya, lisaya.
Yesu ekeraisa wape pi repanana lu andiaisimiya ei
(Madiu 27:32-44; Maka 15:21-32; Dioni 19:17-27)
26Gupuma ande endali ripinyi alinumi Yesu pane ma-pulu-ainyaloma Sairini ali menda nipuna bi Saimono rarane aoma ree anda ipulu-ainyaloma yolo rumare ande Yesumi rilisaya ekeraisa wape pi repana nipuna paisana ma-riaisimiya. Gupuma Yesuna kou nane raluma rilisaya.
27Wenaali andapumi nipu ralisimiya. Gupuma go rupara aisimiya wena mendaparere pu yokoma ara ree lisimiya. 28Go lisimiyandare Yesumi wala nipu repara lekeyala arare gupi lisaya. Diurusaleme ree anda wenasinuo, lisaya. Nina ree na-lere nimina nongo nakinuna pange nimina ree dapa, lisaya. 29Akepeare werepe nane naare menda nimimi go angele da peme ei epeleae, lisaya. Nimimi gurupa lalore, Nongo naki na-maidame wenanuri raname komoaeme, deme, lisaya.
30Go naaremere wenaali gupi deme. Go songo aya kananuo naa mandaa lopa. Go su wilinuo, naa ma-panga pirae, loalimi, lisaya. 31Ale menda na-pi ali repara pakama go aunda pilimindare gore ora koae koae aunu pia ali nipuri ora koaeyanda ora andelea, lisaya.
32Mendaa naarenare ali laapo nipuri koae ali laapo pange Yesu rapu mendaa niipu laapo lu andialuameya karu paisimiya. 33Gupuma ande alinu mo rundu menda wisaya ei nipuna bi Ali Kalu lisimiya alena opolo pumare Yesu lu mundiaoma monde koae ali laapo pange menda Yesuna popeke ki nane lu andiaoma menda nipuna koaya nane ki nane andiaisaya.
34Gupisimiyandare Yesumi lalore gupi lisaya. Apao, go alinu nimumi pimi aunu kone na-widamele neeme go pimi ei naini kone na-siape, lisaya. Gupuma monde alinumi Yesuna akanu muma kase pisimiya eimiri nimuna nimunale nipuna akanu rali pisimiya. 35Monde wenaali andala-ainyalomare ande Isaraelimi mandu rangala pae wenaalina kalu alinu ero la la pulu ara gupi lisimiya. Go ali nipumiri pa wenaaliri pa rambamipi pandepare wala nipu ande Keriso Godeme ma-aya ali deandare nipuna gole nipu rambaminyawa, lisimiya.
36Gupuma ande endali ripinyi alinu ipuma ero la la pulu arare waini ipa yangi andapu na-pea ei alisimiya. 37Gupuma nimumi Yesu para lalore, Neere ande Isaraelimi mandu rangala pae wenaalinuna Kini Ali dendare nena gole nee rambamea, lisimiya.
38Ali mendame nipuna kalu mandaare go angele wape pisaya.
Gore ande Isaraelimi mandu rangala pae wenaalinuna Kini Ali wape pisaya.
Mo wape pisaya angelere Iburu angele pange Romo Ladini angele pange Giriki angelenumi wape pisaya.
39Gupuma monde alenda lu mundi aisimiya koae au puaya ali mendame e lalo lalo ara manda manda mea ei angele lalore gupi lisaya. Neere ande Keriso ali dia. Apiya, lisaya. Nena gole nee rambamuma naa rambamu pa, lisaya.
40Go laayapare monde ali mendame lalore, Gupi na-lape, lisaya. Neere Gode paala na-komalepae, lisaya. Nee pange nipumi mida rendaa mida pe, lisaya.
41Saare saana papa eina yangi midapapare nipu komea alenda na-pi ali para pimi, lisaya. 42Go loma go alimi Yesu repara go lisaya. Yesuo, nee Kini Ali mandana ipumare ni kone siapeae, lisaya.
43Yesumi nipuna angele yango liada arare gupi lisaya. Neme nee wili mandaa mealoae, lisaya. Ambia go naarena nee ni rapu so Yaa Nane pidiae, lisaya.
Yesu ora komisaya ei
(Madiu 27:45-56; Maka 15:33-41; Dioni 19:28-30)
44Gupuma naare kalu rikirana ainya mandanare ande naare wala na-roma rimbayala ara andasu kuni raayosi rambuaoma gaepame nane naare wala risaya.
45Go pisaya naarenare monde Gode repara alinau puaisimiya andaa anda para andiaisimiya akare runa rekele pualumbisaya. 46Yesumi andapu wi lalo ara gupi lisaya. Apao, nena ki nane na remo apo sunealondae, lisaya. Go lomare nipu komisaya.
47Go para aisaya endali ripinyi alinuna andaa alimi go pisaya ei andomare Godena bi minyasiada ara lalore, Nipuri ora epe aliyanae, lisaya.
48Gupuma monde wenaali gonde ei andola paisimiya wenaali go pisaya einu andomare yarame koma eiri nimuna anda pu yokoma ree la eiri wala pawasi paisimiya. 49Yesu ora nipu waru andoma kepeaisimiya wenaalimi pange monde Galili aoma nipu raluma paisimiya wenasinumiri ongepusi papare arare andisimiya.
Yesu dapa pisimiya ei
(Madiu 27:57-61; Maka 15:42-47; Dioni 19:38-42)
50-51Gupuma Arimadia lee ree anda mo Diudia su para wia anda ali menda nipuna bi Diosepa lea ali menda aisaya. Nipuri ora epe ali menda wenaalimi andasiao andoaisimiya alimi Godena Ki Rambuao-aya Ei epenaya maisambao-aisaya. Gupuma nipuri mo Yesu lu andialuameya puri palameya Kalesoro alinu rapu ralayapare golere go alinumi lameya angelenumiri nipu na-komisaya. 52Gupuma nipu Pailadi repara puma lee rona opolo puma Yesu ro pua konge lisaya. 53Gupuma nipumi monde Yesu ro mo ekeraisa wape pi repanana konda muma akana koraoma ali koraluame kana lupima menda ali ambe na-dapa pi apenda para dapa pisaya. 54Go naarere su naarena pisimiya. Gupuma Isaraelimi mandu rangala pae wenaalinuna koro piruae naarere repara kini pulameya palainya.
55Ande Galili nane aoma Yesu raluma ipisimiya wenanu Diosepa rapu puma no apenda andomare Yesu ro wisaya ei andisimiya. 56Go andomare anda nane puma roropo roropo pi danganu pange wambala mo rona koyaluameya analao pisimiya. Gupuma Isaraelimi mandu rangala pae wenaalinuna koro piruae naarena ande Mosesimi Rudule Angeleme lisaya rupasi para pirisimiya.
Obecnie wybrane:
Luka 23: POLENT23
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
