Luka 15
15
Sisisipi mena alu paisaya eina siapi angele lee ei
(Madiu 18:12-14)
1-2Naare mendana mo dakisi muni muaisimiya alinu pange wenaalimi raname na-komoaisimiya wenaalinu andapupe mo Yesumi lisaya angelenu pangolameya ipisimiya. Go pisimiyandare mo Parisi alinu pange Mosesimi Rudule Angelenu waloae alinumi Yesu repara kundipa pula ara lalore, go lisimiya. Baae. Go ali andalepa, lisimiya. Nipumi naame giaema wenaali para ipulupa loma komea para piri enda nalale, lisimiya. 3Gupi lisimiyandare Yesumi go siapi angele la alisaya.
4Nimi mendame ali ria mendane kipu sipisipi mena andere-aliapare komeasi ma-alu paomare nipumi ake piliayapae, loma angaa misaya. Nipumi monde ali ria malapuna ki laapo pereyoma mendane ange pereyoma mendane angena malapu sipisipi menanu noma nala-ainyaloma nipumi mo alu pae sipisipi mena komea wasuma puaya, lisaya. 5-6Nipumi andasumare nipu raname ora waru komala ara nipuna paisana ma-ruma anda puaya, lisaya. Go pumare nipuna andami wenaali pange nipuna repara wenaali para lalore, Nimi raayosi ipulupae, laya, lisaya. Akepeandare nipuna sipisipi mena alu paripapare wala andasu meawale raname waru komalole enda pambaminya ipulupae, laya, lisaya. 7Gurupa mandanare neme nimi repara angele apo lalole, pangalepape, lisaya. Koae aunu puaya ali menda nipumi nipuna ambala ao-paluaya rupa gialiandare so Godena andasu nane aeme repaame pange raname ora waru komeleme, lisaya. Go ranare ambalana epe rupa aeme ali ria malapu pereyoma ki laapo pereyoma mendane ange pereyoma mendane angena malapu wenaali para komala rupa mandana dia. Akepeandare nimuna konemere nimu epe rupa aema kone suma nimuna ambalana ao-paluaeme rupa na-gialima, kone wimi, lisaya.
Kana kili alu paya siapi angele lee ei
8Gupuma Yesumi mendaa rupa siapi angele menda nimu para lalore, Wena mendame kana kili ki laapo siambayapare nipumi komea ma-alu paomare nipumi ake piliayapae, lisaya. Nipumi nipuna wedambi kewomare anda rupara wia leenu raayosi yawi rilipumi kima pa muma aisa pumare ora wala andasu milia, lisaya. 9Gore mo wename monde alu paripande kana kili komea andasumare nipuna repaa repaa wenaalinu pange nipuna repara wenaalinu raayosi komea lena mombedapa, laya, lisaya. Gupuma nipumi mo wenaalinu para lalore, gurupa la alisaya. Na-ande alu paripande muniri ambia gosi andasiawale nimi raayosimi ni rapu ara raname komaminya, laya, lisaya.
10Gurupa mandanare neme nimi repara angele apo lalole pangalepape, lisaya. Koae aunu puaya ali menda nipumi nipuna ambala ao-paluaya rupa gialiandare so Godena eindiolonu nimumi pange raname ora waru komeleme, lisaya.
Naki mendame ara giala paisaya ei
11Gupuma Yesumi siapi angele menda pange nimu para la alala ara lalore, go lisaya. Ambaisena ali menda aripayapare nipumi naki laapo mandu siaya, lisaya.
12Gupuma werepe nane mo nakimi nipuna apa para lalore, Apao, neeme nena muni pange nena alenda alenda raayosi rumaoma nai giae, lisaya. Go einare nipuna apame nipuna alenda alenda raayosi niipu laapo para rumaomare mo naki niipu laapo alaya, lisaya. 13Go einare yapi laapo o repo rupa aomare monde werepe nane nakiri nipunande alayande alenda alenda raayosi rapaoma yodo mumare kana mealome nipuna anda gioma ora papare ae andasu menda nane puma pua aripaya, lisaya. Andasu papare pua arare monde ma-puayande muni alenda alenda raayosiri nipuna koae koae einu pua pamu paya paranu ale ale puma ma-bembolaripaya, lisaya. 14Go einare mo naki nipunande muni alenda alenda raayosi nipuna koae koae einu puma ma-pereyaripaya naarenare mo nipu aripaya andasu para rea gipa andaai menda pambaya, lisaya. Gupumare nipuna olemolenu raayosi ora pereyaoma ale menda na-siaya. 15Gupumare nipu mo anda ruru ali mendana pupudengi naripaya. Gore mo alimiri mo naki nipuri mo nipuna su para nipuna menanu pua andere-ape loma raparipayandare nipu puma mo menanu pua andere-aripaya, lisaya. 16Go dinare nipu rea andaai komayapare mo menanumi maa kera nameya ei andomare nipu pange go maa kera nolae, kone siayapare mendame nipu enda na-alaya. 17Go au payandare nipuna kone wala lekeyoma siaya, lisaya. Gupuma nipuna gole lalore, Mo na apana pupudengi nao-aeme alinu aeme parare endanu ora andapu waru suaya kone su kimbumaripaya, lisaya. Go peapare ni go para ara reame reesi para komalo kone siaya. 18Go einare ni go andasu minyapalaoma na apana andasu nane wala lekeya pola kone siaya. Go eina ni pumare pua gupi lala ara lalore, Apao, nee para pange Gode niipi laapo para koae aunu pawande pua la doa, kone siaya, lisaya. 19Ambiare ni para nena naki pi na-lapeae, doa, kone siaya, lisaya. Niri nee repara muni pupudengi noaeme alinu mandana wi lala papeae, doa, kone siaya.
20Go ei kone sumare nipu aoma nipuna apaya puaya, lisaya. Gore mo naki nipu ora papare ipula-ainyaloma nipuna apame ambala andasiaya. Gupumare nipuna pumi nipuna naki para yarame waru komala ara nipu alo pumare mo naki pua kupima siamba ara pua nunu paya, lisaya. 21Go au payanda mo nakimi nipuna apa para lalore, gurupa la alaya. Apao, neme Gode para pange nee para pange koae einu puma yanda liawae, lisaya. Go einare neme koae au pawale ni nena naki mandana na-ma-au lapeae, lisaya.
22Go peapare nipuna apame nipuna pupudengi nao-arimi alinu wi loma lalore, Ipulupae, laya. Nimi pumare nipuna au lala ara pambao-ayo aka apo wiale wange wangepu ma ipuma epa ma-pambalepa, laya. Gupuma pange nipuna ki engali amena mo lini menda epa ma-piralepa pange ange anda menda pange ma yamalepape, lisaya. 23Gupumare mo kapame kome gawasi mena pua muma raname waru komala ara enda pambaminya, lisaya. 24Akepeandare na nakiri komea kone siawapare ambiare wala nipu pa aripana, nipu alu paripapare ambiare nipu andasiawa, lisaya. Go einare nimu raayosimi raname waru komala ara enda andaai pambameya, lisaya.
25Go aunu puarimiya eiri mo nipuna mupa nakiri nipuna e nane ainyaloma puarimiya, lisaya. Gupuma mo naki nipu anda nane wala lekeya ipuma anda reesi para epa ara wenaalimi yaisanu liala ara pange kewange puluarimiya ei pangoma pange andaya, lisaya.
26Gore monde nakimi pupudengi noae naki menda wi loma angaa meala ara lalore, Mongore ake au pimipae, loma angaa meaya, lisaya. 27Gore monde pupudengi noae nakimi nipu para epa lala ara lalore, gurupa la alaya. Nenande ame anda wala epanda nena apame monde kapame kome bulumakauna si mena menda luma pimi, laya. Akepeandare nena apame nipuna naki ale mendame pange na-ma-koyae wala epe rupasi wala karu mealo ara pia, lisaya. 28Gore mo mupa nakimi rono waru pangala ara mo anda para na-konda pambaripaya, lisaya. Go einare nipuna apame kama opalumba ipula ara mo nipuna naki pua kongeyala ara lalore, Anda para ipuae, lisaya. 29Go layapare mo naki nipumi nipuna apa para angele yango liada ara lalore, gurupa la alisaya. Anda. Kuni gipa andapu neme nena pupudengi noae alinu mandana pakama nao-aripu, laya, lisaya. Neme nena mana mana la einu pange neme na-rungulawa, lisaya. Go peapare neeme niri ale giapae, laya, lisaya. Payapo ma-kirada ara pange nanigosi mena komea pange nina rana pi wenaali rapu nano na-guaripiae, lisaya. 30Go peapare nena raname komale pake nakimiri nena alenda alenda raayosi mo koae koae einu puaeme wenanu repara pua rumbepe puma wala nipu anda ipulandare neemere wala monde kapame kome gawana si mena liadeae, lisaya. Go peapare ambiare neemere alena raname komala ara pilipae, laya, lisaya. 31Gore arame mo nipuna nakina angele yango liada ara lalore, gurupa la alaya. Na nakio, naare raayosiri neere sana ao-paluae pandeae, laya, lisaya. Go einare na alenda alenda raayosiri nena eimi pala ara peae, lisaya. 32Go peapare ambiare nena amere komea kone siamandepare ambiare nipu pa aya pange nipu alu paripapare nipu wala andasiarima, laya, lisaya. Go einare raname komala ara enda pambarimandeae, laya, lisaya.
Obecnie wybrane:
Luka 15: POLENT23
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
