Dioni 3
3
Yesumi Nikodimasi rapu angele lisaya ei
1-2Ande Parisi anda repaa ali komea Nikodimasi nipuri mo Isaraelimi mandu rangala pae wenaalina bi wi kalesoro ali arare naare mendana rimbala Yesu para puma lalore, Waloale Alio, neere Godeme rapayanda Waloale Ali ale eiri andalemae loma lalore, Neeme puri pade rupa Gode lapo na-aya alimi puri palape-na-ya loma lisaya.
3Yesumi nipuna angele yango liada ara lalore, Neme nee para ora angele lalo loma lalore, Ali apimi wala pena nakisi mandana na-aliandare gore Godeme nipuna Ki Rambuao-aya Ei na-andelea, lisaya.
4Nikodimasi nipumi lalore, Ambala andale alimiri akipuma nipuna amame pena nakisi mandana wala maidiapae loma Ialore, Nipuna amana lo para wala konda pambaoma nipuna amame rana laapopao wala mandinaya lalepae, lisaya. 5Yesumi nipuna angele yango liada ara lalore, Neme nee para ora angele lalo ei loma lalore, Ali komea menda ipame pange Epe Yaakopi Sipiridimi pange nipuri pena nakisi mandana wala na-ma-ainya deandare Gode nipuna Ki Rambuao-aya Ei para na-konda pambola pelea, lisaya. 6Wenaalinumi naki manduaemepare nimuna do yongale aya ei mandana manduaeme. Go rupa mo Epe Yaakopi Sipiridimiri ali menda para endoaya ei giliandare mo aliri nipu mandana piralia loma lisaya. 7Neme nimi raayo pena naki nongonu mandana aliminya Ialo eina, kone rando rando na-siape, lisaya. 8Mo pokiki ipula eiri nipuna konemele ipula lama nipuna kuu la ipula eiri neemere pangalepare nipuna aoma ipula eina ree pange neeme na-andele. Mo pokikimi pia rupa mo Epe Yaakopi Sipiridimi wenaali pena naki nongonu mandana ma-ainya dea, lisaya.
9Yesuna angele pangoma Nikodimasi nipumi angaa meala ara lalore, Neeme go lale eiri akipuma papeyapae, lisaya.
10Yesumi nipuna angele yango liada ara lalore, Neere go Isaraeli wenaalina waloale andaa ali menda alepare go lalo einuri kone na-suma lalepae, lisaya.
11Neme nee para ora angele lalo loma lalore, Naame koneme andalema einu pange leeme andalema einu pange la gialemapare nimi para aya ali mendame pange go angele pangapele kone na-wia, lisaya. 12Go suna ei neme walalo einu na-pangamendare gore so Godena Aya Lena pea einu pange wadoandare akipu pangelemepae, lisaya. 13Ali mendame so Godena Aya Lena na-peapare ande Alina Si Naki komea Godena Aya Lena aoma epea ali loma lisaya.
14Ambaisenande ara Mosesimi mo weambi pia lena ara mo barasi lee aionimi wari kero ma-minyasiao wisaya rupa ande Alina Si Naki ma-minyasialimi, lisaya.
15Nipu para kone rulao-aeme wenaalimi endoaya ei minyaya, nipu ma-minyasialimi, lisaya. 16Go eina lawae. Godeme su wenaali raayo para kone waru siala ara nipuna Naki komea gole gisaya. Gupuma ali apimi nipuna Naki para kone rulaoma aliandare gore go alimi na-kome endoaya ei milia. 17Godemere nipuna Naki komea su wenaalina angele yokanali pala pea ali komea ainyaya na-rapaya. Nimi ma-endala pea ali ainyaya raparipa, lisaya.
18Ali apimi Godena Naki para kone rulao-aliandare angele yokanali puaeme ei para na-pelea. Gupula peapare ali menda apimi kone na-rulae aliandare ande angele yokanali puaeme dinare Gode nipuna Naki komea para kone na-rulao-aya eina Godeme nipu para ambala angele yokanali pea, lisaya. 19Mo angele yokanali puaeme eiri gurupae. Go suna paa pi eiri ambala epeapare wenaalimiri nimuna koae aunu puaeme eimi ande paa pi eiri giaoma mo rimbale para aluameya kone sialeme, lisaya. 20Koae au puaeme wenaalimiri mo paa pi eimi nimuna koae aunu penameyao walapeyare ora giada ara mo paa pi ei para na-ipuaeme, lisaya. 21Go peapare ali apimi ora au puaya ali aliandare mo paa pi ei para epelea. Go eina mo paa pi eimi nipuna pea einuri Gode lapo ara go ali nipuna pi einuri penameyao walenaya epelea, lisaya.
Dionina kou nane raluaisimiya alinumi Dioni para lora pisimiya ei
22Go naare werepe nanere Yesu nipuna kou nane raluaisimiya alinu rapu mo Diudia andasu nane puma go para ara wenaali baparaisi pala pisimiya. 23Dionimi pange mo Salimi anda repara Aenoni anda arare ipa waru pirisayandare nipu para opapala ipisimiya wenaaliri nipumi baparaisi pala pisaya. 24Go dinare Erodimi Dioni dipula ambe na-mi-ainya pisaya.
25Gupuma Dionina kou nane raluaisimiya alinu menda parame Isaraelimi mandu rangala pae ali komea rapu Isaraelimi mandu rangala pae wenaalinuna ipa paisala pisimiya eina, angele yokanali pisimiya. 26Go eina Dioni para pua lalore, Waloale alio, mo Diodani ipa mone ree nane nee rapu mendaa para aripande alimiri ande neeme naa para walaende alimi gore ambiare nipumi baparaisi padanda wenaali raayo nipu para puala pimiae, lisimiya.
27Go eina Dionimi nimuna angele yango liada ara lalore, Godeme naa para ale menda na-giliandare gore meape-na-ya, lisaya. 28Go eina niri Keriso diae. Godeme ririna ni ambala raparipanda lawa. Nimi para la giawa eiri ambala pangamende, lisaya. 29Ande wena lamuala eiri mo wenare alina wenaalia. Mo wena realina amere mendaa para arare wenana realimi dea angele pangala arare raname waru komelea. Go eina na raname kome eiri rumbia wia, lisaya. 30Go einare Yesu nipuna bi waru andayala ainyare nina biri ongesi siainyala papeya, lisaya.
Godena Aya Lena aoma kolopinyaoma ipisaya ali
31-32So yaa mandaa nane aoma epea aliri wenaali pange alenda alenda raayo para mandaa aliae. Suna aoma epea alimiri suna angelenu dea. So Godena Aya Lena aoma epea alimiri olemole raayo pange wenaali raayo pange mandaa arare nipumi ande ei pange, pange ei pange la gialapare ali mendame nipuna angele na-pangoma na-ripinyaya, lisaya. 33Ali apimi Keriso nipuna angele pangoma ripinya aliandare go eimiri Gode ora ei aya loma dea, lisaya. 34Godeme rapaya alimiri Godena angelenu la aloaya. Godeme nipu para Epe Yaakopi Sipiridimi rumbia ao-aya ei aleanda lawa.
35Apa Godeme nipuna Naki para nipuna pumi raname komala ara alenda alenda raayo nipuna Naki Yesuna ki para winya, lea. 36Ali apimi ande Godena Naki para kone rulao-aliandare go alimi endoma ala peapare ali menda apimi ande Yesuna angele na-pangeleandare endoaya ei na-mi, pa ainya. Gode nipuna rono pange ei go ali para sualia, lisaya.
Obecnie wybrane:
Dioni 3: POLENT23
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
