Luka 24

Kuzuka kwa Jesu

(Matayo 28:1-10; Marko 16:1-8; Johana 20:1-10)

1Nao ijua lya Jumwa na ikesho kiro, walye wake wakaghenda kaburini weketwala marumba weghaboese. 2Wakadoka iwe lyabingilisho kufuma kaburini. 3Nawo wakangila; ela siwadokile muli ghwa Bwana Jesu. 4Nao ilyi weluo wekeshinika kwa ilagho ilyi, iyo shwa yenyi wandu waili waruse nguo zeng'alang'ala wakakala kimusi kavui nawo. 5Walye wake wakangilo ni wogha, wakadamisa maushu ghawe msangeni. Nao walye wandu wakawauza, “Kudani mumuhadagha uyu ewo moyo kwa walye wafwile? 6Seo aha, ela wazuka. Kumbukeni selyi amuuzile ilyi eluo Galilaya: 7Kamba Mwana wa Mdamu ni suti angizo kele mikonu ya wandu wa kaung'a na awambo, nao ijua lya katatu azuke.”

8Nao walye wake wakakumbuka malagho ghake. 9Wakauya kufuma kaburini, na wakawaghorera malagho agha ghose walye wairimi ikumi na mumoju na wazima wose. 10Nawo walye wake wawaghorerere wairimi weluo ni Mariamu Magdalene, Joana na Mariamu mee Jakobo, ngila mojori na wazima. 11Ela ghore izi zikaoneka sa uzimu kwa watumo, nawo siwazidumuse. [ 12Ela Petro, kauka kakimbila hata kaburini, kadamika na kusungila, naye kaona sanda keng'weri; kagala nyumba kwake keshinika kwa ghalye ghadeike.]

Charo cha Emau

(Marko 16:12-13)

13Nao ijua lyilya lyenyi waili wa wairimi wa Jesu weluo wekeghenda muzi ghumoju ghuitogho Emau, ghuo kilomita ikumi na moju kufuma Jerusalemu. 14Nawo weluo wekehelea ighulu ya malagho ghose ghadeike. 15Nawo ilyi weluo wekehelea na kutumbulilana, Jesu mwenyi kawasughutila avui na kaghendanya nawo. 16Ela meso ghawe ghakafungo siwamtambule.

17Naye kawauza, “Ado nini mughendagha mukehelea?” Nawo wakamanga wakamlola kwa kuwasilo. 18Nao mumoju wawe, aitogho Kiliopa, kamtumbulila, “Ado nuwe mgheni Jerusalemu somanyagha agha ghadeike alye agha majua?” 19Naye kawauza, “Ni malagho muni?” Nawo wakamuza, “Malagho gha Jesu wa Nazareti, mundu eluo tondolo ewo na udimo ghodea na kughora hambiri ya Mlungu na wandu wose. 20Na selyi wakohani wabwaa na wabwaa wa mzetu wamufunyile ataghanyo kufwa na kuwambo. 21Ela isi teluo tikekoserea kamba niye ekombolagha Israeli. Hata hung'u lelo ni ijua lya katatu kufuma agha ghadeika. 22Sena wake wamoju wa mzetu watishinisa. Weghendile kaburini na ikesho kiro, 23nawo siwadokile muli ghwake. Wakauya wekeghamba waona iono lya malaika wekewauza kamba wazuka. 24Wamoju wetu wakaghenda kaburini, wakadoka selyi kwenyi walye wake waghorire, ela iye siwamwonile.”

25Nao Jesu kawauza, “Ee wazimu na wandu wa ngolo zigwaile kudumusa ghalye ghose ghaghoriro ni wana tondolo. 26Ado siyemfweni Masihi kutiriro hung'u na kungila kele ubwaa ghwake?” 27Nao kawatambulila malagho ghose ghawandiko kele Mawandiko gha Kuela ighulu yake, kudyowela kwa Musa na wana tondolo wose.

28Nao wafika kavui na ghulya muzi weluo wekeghenda, Jesu kadea sa mundu eghendagha hambiri, 29ela wakamuvoya wekemuza, “Kalanya nesi, kwani kwaswa na kiro cheja.” Kwa hung'u kangila kukalanya nawo. 30Nao akala kitembo mezeni kulyanya nawo, kawata mkate, kaghubarikia, na kughuvunja na kuwahawa. 31Nao meso ghawe ghakafunguka na wakamtambula, ela iye kalaghaya kwawe. 32Nawo wakauzana, “Ado ngolo zetu sizeluo zikewaka amweni kwetu ilyi eluo kehelea nesi ngileni ilyi eluo ketitambulila gha Mawandiko gha kuela?” 33Wakauka ilya ngelo yenyi, wakauya Jerusalemu; wakawadoka walye watumo ikumi na mumoju andu kumojori na walye wekezanye. 34Wekeghora, “Fulo Bwana wazuka, naye wamfumila Simoni.” 35Nao walye waili wakawaghorera ghalye ghadeike ngileni, na selyi amanyikane kwawe kwa kuvunja mkate.

Jesu kuwafumila Wairimi wake

(Matayo 28:16-20; Marko 16:14-18; Johana 20:19-23; Madeo 1:6-8)

36Nao ilyi weluo wekeghora hung'u, Jesu mwenyi kakala kimusi ghati yawe, na kuwauza, “Sere ikale kwenyu.” 37Nao wakangilo ni kiture na wogha, nawo wakaririkanya wendeona kisuga. 38Naye kawauza, “Kudani mwasirima na kukala na ngera ngoloni kwenyu? 39Zighaneni mikonu yangu na maghulu ghangu na mwone kamba nimi mwenyi. Niwateni nao muone, kwani kisuga sichiwesi muli ango maindi selyi muonagha nio navo.”

40Naye aghenda aghora hung'u, kawaonyeza mikonu yake na maghulu ghake. 41Nawo watulagha siwedumuse kwa kuboelo na kushinika, kawauza, “Mwanawesi kindu chingi aha chelya?” 42Wakamhawa luhande lwa ikumba luochilo. 43Kawata kalya hambiri yawe. 44Nao kawauza, “Agha nigho malagho nemughorere ilyi tekezanye ngila mojori nenyo; kamba ghose ghawandiko ighulu yangu kele Mawandiko gha Sheria ya Musa na wana tondolo na Zaburi ni suti ghakatile.”

45Nao kafungula akili zawe watambule Mawandiko gha Kuela. 46Na kawauza, “Niko kwenyi iwandiko, kamba Masihi ni suti atiriro, na ijua lya katatu azuke kufuma kwa wafwa. 47Na kwa izina lyake, kuchilo uvoro ghwa kuriha na kusigho kaung'a kwa mbari zose kudyowela Jerusalemu. 48Nenyo ninyo washahidi wa malagho agha. 49Na loleni, nimuletelagha ilagano lya Aba, ela kaleni kele ughu muzi hata mpate ndighi kufuma ighulu.”

Jesu kujoka Mlunguni

(Marko 16:19-20; Madeo 1:9-11)

50Nao kawalongoza shighati ya muzi hata Bethania, kanula mikonu yake kawabarikia. 51Naye kewabarikia, kakuika na mbali nawo, katwalo noko ighulu mlunguni. 52Nawo wakamtasa, wakauya Jerusalemu kwa maboelo mabwaa; 53na weluo ngelo zose hekaluni wekemlika Mlungu.

Obecnie wybrane:

Luka 24: SAGALLANT

Podkreślenie

Udostępnij

Kopiuj