Johana 3

Jesu na Nikodemu

1Nao koluo na mundu wa Wafarisayo, izina lyake Nikodemu, mubwaa wa Wayahudi. 2Uyu mundu ojile kwa Jesu na kiro na kamuza, “Mwalimu, tamanya uwe nuwe Mwalimu afuma kwa Mlungu, kwa kukala sikwesi mundungi edimagha kudea wana mwakilimbita wawadea seo na Mlungu.”

3Jesu kamuza, “Fulo nakuza, ikakala mundu sevelo sena, sedimagha kughuona Uzuri ghwa Mlungu.” 4Nikodemu kamuza, “Mundu udimagha ije kuvalo ewo mughosi? Ungilagha kifu kwa mee kaili na kuvalo?” 5Jesu kamutumbulila, “Fulo nakuza, ngera mundu sevelo kwa meji na kwa Roho, sedimagha kungila Uzuri ghwa Mlungu. 6Icho chivelo ni muli ni muli na icho chivelo ni Roho ni Roho. 7Kwa hung'u swashinike andu nakuza. Ni suti muvalo sena. 8Mbeo yaruma andu ishaile; nawe wasikila lwaka lwake, ela sumanyagha andu ifumagha hata andu ighenda. Ni hung'u kwenyi na kila mundu avelo kwa Roho.” 9Nikodemu kamkotela, “Ghedimikagha ije agha?” 10Jesu kamtumbulila, “Uwe nuwe mwalimu wa Waisraeli, na sena sutambukilogho ni agha? 11Fulo nakuza, taghora agha timanyagha na tashuhudia agha tionile, ela inyo simudumusagha ushuhuda ghwetu. 12Ikakala namughorera malagho gha urumenguni nenyo simunidumusagha, mjedumusa ije ilyi namughorera malagho gha mlunguni? 13Sikwesi mundungi ajokile mlunguni lyingi, sala Mwana wa Mdamu uyu aselele kufuma mlunguni.

14“Nao sa ilyi kwenyi Musa ajosile nyoka ya shaba kireti, niko kwenyi na Mwana wa Mdamu ejosogho; 15eri uyo wose emudumusagha iye apate umana ghwa kale na kale. 16Kwani Mlungu oshaile urumengu hata kumufunya Mwana wake mumojori, eri uwo amudumusa iye, sahaite, ela apate umana ghwa kale na kale. 17Kwani Mlungu samutumile Mwana wake urumenguni eri ataghanye urumengu, ela urumengu ghukile kwa iye.

18“Uwo wose amudumusa Mwana setaghanyo; ela uwo wose semudumuse wamalila kutaghanyo, kwa kukala samudumuse Mwana mumojori wa Mlungu. 19Na uku niko kutaghanyo, mlangazi ghojile urumenguni, ela wandu wakashaya kiza kuisa mlangazi, kwa kukala madeo ghawe gheluo ghawase. 20Kwani uwo wose edeagha ghawase wanamenya mlangazi, naye sekujagha kele mlangazi, eri madeo ghake ghawase sighejeoneka. 21Ela uwo wose edeagha gha fulo wanakujagha kele mlangazi, eri madeo ghake ghaoneke mwazi ghadeo kwa Mlungu.”

Jesu na Johana

22Nao agha ghaita, Jesu na wairimi wake wakaghenda isanga lya Judea, kakala nawo alye na kubatiza. 23Johana naese oluo kebatiza Ainoni iwo avui na Salimu, kwa kukala alye koluo na meji mengi, nawo wandu wakamughendela wakabatizo. 24Kwani Johana okaile kungizo kifungoni.

25Nao kukakala na nganyi ghati ya wairimi wa Johana na Myahudi mumoju ighulu ya kueleso kwa kuogha. 26Nao wekeja kwa Johana, wakamuza, “Mwalimu, uyu moluwanyo naye chambuko cha Jordani, na kumshuhudia, uwo anyaha, ondebatiza, na wandu wose wendeghenda kwake.”

27Johana katumbulila, “Sikwesi mundungi edimagha kupata kindu chingi sehawilo ni Mlungu. 28Inyo wenyi mwamanya kamba nemushuhudie nikeghora; ‘Imi si Masihi ungi, ela nanatumilo hambiri yake.’ 29Uyu ewo na mwali, niye musi muke, mgheni wa musi muke wanakalagha kimusi na kumsikizila, naye waboelo na ndighi ni lwaka lwa musi muke, kwa hung'u ndamu kuboelo kwangu kwakatila. 30Ni suti ajuzilike kumanyikana, ela imi ni suti nigotue.”

Uyu ekujagha kufuma mlunguni

31Uyu ekujagha kufuma ighulu ni mubwaa kuisa wose, naye efumagha msangeni ni wa msangeni, naye waghora gha msangeni. Ela uyu ekujagha kufuma mlunguni uwo ighulu ya wose. 32Naye washuhudia agha aonile na agha asikile, hata mundungi sahokere ushuhuda ghwake. 33Ela uyu ahokeragha ushuhuda ghwake waika hachi Mlungu ni Fulo. 34Kwani uyu atumilo ni Mlungu wanaghoragha ghore za Mlungu. Kwani Mlungu sampimilagha mundungi Roho. 35Aba wanamshaile Mwana, na wamuhawa vindu vose. 36Uwo wose amudumusa Mwana, uwo na Umana ghwa kale na kale, ela uwo wose semsikilagha Mwana seonagha Umana, ela hare ya Mlungu iwo ighulu yake.

Obecnie wybrane:

Johana 3: SAGALLANT

Podkreślenie

Udostępnij

Kopiuj