Johana 12

Jesu kuvilo mavuta alye Bethania

(Matayo 26:6-13; Marko 14:3-9)

1Nao majua matandatu hambiri ya Pasaka, Jesu kaghenda Bethania, kwana Lazaro uyu azusilo ni Jesu kufuma kwa wafwa. 2Nawo wakamdeila chakulya cha hafukeni; naye Martha kawatumikila, na Lazaro oluo mumoju wa walye weluo mezeni ngila mojori na Jesu. 3Nao Mariamu kaleta nusu lita ya marashi gha zoghori mbwaa ghadeilo na nardi yaloli. Kamvila Jesu maghulu na kuwaghila maghulu ghake na sisiri zake; nayo nyumba yose ikanuka iruke lya ghalye marashi. 4Nao Juda Iskariote, mumoju wa wairimi ikumi na waili (uyu eluo umufunyagha), kaghamba, 5“Kudani marashi agha sighetaghilo kwa pesa ziito dinari maghana matatu, na kuhawo wakiwa?” 6Oghorire hung'u, si kwa kukala oluo kewafwila waya wakiwa, ela ni kwa kukala oluo kiting'a, na kwa kukala oluo ketwala mfuko ghwa pesa, oluo keusa icho chengizilo alye mweni. 7Jesu kamuza, “Msigheni, kwani waghaika muli ghwangu kirani kwa ijua lya kuziko kwangu. 8Wakiwa mwanakezanye nawo majua ghose, ela imi simukala nemi majua ghose.”

Njama yemulagha Lazaro

9Nao Wayahudi wengi waghenda wamanya kamba Jesu uwo alye, wakaghenda alye, si kumwona Jesu tu kungi, ela na kumwona Lazaro naese uyu azusilo kufuma kwa wafwa. 10Kwa hung'u wakohani wabwaa wakadea njama kumuulagha Lazaro naese. 11Kwani kwa undu ghwake Lazaro Wayahudi weluo wekewasigha wo, na kumudumusa Jesu.

Jesu kungila Jerusalemu na izumo

(Matayo 21:1-11; Marko 11:1-11; Luka 19:28-40)

12Nao ilyo ikesho ikoghano ibwaa lya wandu wejile kele karamu wakasikila kamba Jesu wendeja Jerusalemu. 13Nao wakatema manyasi gha mitende wakamumarira wekeimba, “Hosana! Wabarikio uyu ekujagha kwa izina lya Bwana, Mzuri wa Waisraeli!”

14Nao Jesu kadoka mwana wa punda kamjoka; selyi kwenyi iwandiko,

15“Simwaoghe wandu wa Zioni!

Loleni mzuri wenyu ondemujila,

wajoka ighulu ya mwana wa punda.”

16Ilya ngelo wairimi wake siwamanyile agha, ela Jesu aghenda aliko kwa kuzuka wakakumbuka kamba ilyi lyewandiko ighulu yake na lyamalila kukatila.

17Ikoghano lyilya lyeluo ngelo empang'ile Lazaro kufuma mbireni na kumuzusa kufuma kwa wafwa, nilyo lyierese uvoro. 18Na ni kwa undu ughu ikoghano lyikamumarira, kwa kukala wesikile gha mwakilimbita amudeile. 19Wafarisayo wakauzana wenyi, “Mwaona? Selyi simodimagha kudea kindu chingi! Loleni, urumengu ghose ghwamwirima.”

Wagiriki kushaya kumwona Jesu

20Nao wamoju wa walye weghendile kutasa ngelo ya karamu weluo Wagiriki. 21Nawo wakamughendela Filipo wa Bethsaida ya Galilaya, wakamuza, “Bwana Tanashaile kumwona Jesu.” 22Nao Filipo kaghenda kamughorera Andrea, naye Andrea ngila mojori na Filipo wakaghenda wakamughorera Jesu. 23Na Jesu katumbulila, “Ngelo yafika ya Mwana wa Mdamu kuliko. 24Fulo kwenyi, namuza, ndembe ya ngano ikakala siyewandilo msangeni ikafwa, yendetula ndembe; ela ilyi yafwa, yavala ndembe nyingi. 25Uwo wose ashaile umana ghwake ujeghulaghaza, na uwo wose emenyagha umana ghwake aha urumenguni ujekala nagho hata umana ghwa kale na kale. 26Uwo wose ashaile kunitumikila, ni suti aniirime; eri andu nio, na mtumishi wangu naese akale awenyi; naye uwo wose enitumikilagha, uhawogho ishima ni Aba.

Jesu kughora ighulu ya kifwa chake

27“Ndamu ngolo yangu yasirima. Nighoragha ije? ‘Aba nikize kele iyi saa?’ Hata, kwa undu ghwa saa iyi nanajile. 28Aba, izina lyako lyilike.” Nao lwaka lukeja lukaghora kufuma mlunguni, “Nalyilika, na sena nilyilikagha.”

29Nao ikoghano lyeluo kimusi alye wakasikila wakaghora, “Ni mururumo ghwa king'alang'ala.” Ela wamoju wakaghora, “Ni malaika aghora naye” 30Jesu kawatumbulila, “Lwaka ulu lwaghora kwa undu ghwenyu, si kwa undu ghwangu kungi. 31Ndamu niko kutaghanyo kwa urumengu ughu, ndamu mubwaa wa urumengu ughu wakumbo noko shighati. 32Nemi ilyi nanulo kufuma msangeni, nijewaruta wandu wose kwangu.” 33Naye oghorire agha kuonyeza ni kifwa muni ejefwa.

34Nao makoghano wakamtumbulila, “Sheria yetu ighambagha kamba Masihi ukalagha kwa kale na kale. Ndamu kudani ughambagha kamba ni suti Mwana wa Mdamu anulo? Nani Mwana Mdamu?” 35Jesu katumbulila, “Muo na mlangazi kwa ngelo njache, kwa hung'u seleni ngelo muo na mlangazi, eri simwadoko ni kiza; kwani uyu eselagha na kiza seonagha andu eghendagha. 36Ngelo muo na mlangazi, dumuseni mlangazi, eri mukale wana wa mlangazi.”

Kulegha kudumusa kwa wandu

Nao Jesu aghenda aghora agha, kauka kaghenda kakuvisa. 37Hata ikanakale wanadeile wana mwakilimbita awa wose hambiri yawe, siwamdumuse, 38eri ilagho lyighoriro ni tondolo Isaya lyikatile:

“Bwana, nani adumusa ghore taghora,

Ni kwa wana ani Bwana amanyisa ndighi zake?”

39Kwa hung'u siwadimile kudumusa. Kwani Isaya waghora sena,

40“Mlungu waghadea meso ghawe kukala kifondo

na kukulisa ngolo zawe,

eri siwaone na meso ghawe

na ngolo zawe sizamanye,

na kunighalukila niwaboese.”

41Isaya oghorire agha kwa kukala owonile ubwaa ghwake Jesu niko kamghora.

42Hata sani wengi wa wabwaa wa Wayahudi wemdumuse Jesu; ela kwa kuwaogha Wafarisayo wakaogha kughora mwazi mwazi, eri siwaguso kele sinagogi. 43Kwani weshaile kuliko ni wandu, kuchumba kuliko ni Mlungu.

Kutaghanyo kwa ghore za Jesu

44Nao Jesu kaghora na lwaka lubwaa, “Uwo wose anidumusa imi, senidumusagha imi ekeng'weri, ela na uyu anitumile. 45Uwo wose aniona imi wamwona na uyu anitumile naese. 46Nanajile sa mlangazi urumenguni, eri uwo wose anidumusa imi sakale kizeni. 47Ngera mundungi asikila ghore zangu na kalegha kuziwata, Imi simutaghanyagha kungi; kwani sijile kutaghanya urumengu, ela kughukiza. 48Uwo wose enileghagha imi na sewatagha ghore zangu uwo na mtaghanyi. Ghore naghora nizo zenyi zimutaghanya ijua lya kudua mbali. 49Kwani sighoragha ghwa udimo ghwangu imi mwenyi; Aba uyu anitumile niye mwenyi anilaghiza ilyi lyio lyeghora. 50Nemi namanya kamba mlomu ghwake ghwaleta umana ghwa kale na kale. Kwa hung'u selyi naghora, naghora selyi Aba aniuza nighore.”

Obecnie wybrane:

Johana 12: SAGALLANT

Podkreślenie

Udostępnij

Kopiuj