मट्टि 3
3
बाप्टिस्मा पिक्खुबा युहान्नामि योम्पक्
(मारकुस १:१-८; लुका ३:१-१८; युहान्ना १:१९-२८)
1डिरिक् निङ् डॆङ्पि बाप्टिस्मा पिक्खुबा युहान्ना याहुडियाबिऎ आसास पेन्मिनिहा ठालबि टाआहाङ् गर कामानुङ् खेम्मिपक्कुचि, 2“टाङ्पा टाङ्पामि हिङ्वाबाङ् ऎम्पकानॆ हाङ् निवाँहाङ्मि लाम्फुबि लाम्ढुसानॆ मान्ठाभनॆ पारुबिऎ हाङ्डाम् मुबिॽन चु।” 3मान्ठाभनॆ खो आक्कन, खोम् बारेबि यासाइया लोमॆ निवाँहाङ्मि खानावाँ लोखुबाबाङ् गर लोमिम्पा लॆटा,
“आसास पेन्मिनिहा ठालबि एक्क याॽमि ढ्या साम्लाऎ गरहाङ् कामेपाइ
‘पारभु टामॆ लाम्फु टङाम्नॆ,
खोम् लागि लाम्फु काम्नुऎ मुसाम्नॆ’।”#यासाइया ४०:३
4युहान्नाऎ उटामि टाङाक्बाङ् डाक्मिम्पा चे चाङ्युक्सु हाङ् मिचिक्पि साखक्मि हम्डङ् डङ्युक्सु हाङ् लुङ्खिक् हाङ् ठाॽनाम् खुड चायुक्सा। 5याॽमिचि यारुसालेम हाटाबाङ्, याहुडियामि चोब्न ठालबाङ् हाङ् यारडान हङ्मा गॆअङ्मॆअङ्हा ठालबाङ् खोबि खारामि। 6हाङ् आसा उम्चि हिङ्वाबाङ् ऎम्पकामि हाङ् होइढा याॽमिचि लोसुचि युहान्नाऎ खोचि यारडान हङ्माबि बाप्टिस्मा पिट्टुचि।
7टर फारिसि हाङ् साडुकिचिबाङ् ऎॽवा याॽमिचि सङ्क खोनुङ् बाप्टिस्मा लासि टामिम्पा खाङुहाङ् युहान्नाऎ आक्खाचि लोसुचि, “ओ पुसॆःॽमामि पासाचि, आसॆ आन्ना टामा परक्मिम्पा निवाँहाङ्मि सिरिबाङ् हिङ्चाहिकानि कामानुङ् लोसानिहा? 8हिङ्वाबाङ् ऎम्पॽमिम्पान हाङ्ग आक्रक्न पाइटानॆ। 9हाङ् ‘कानि आबाराहाममि पासा याङ्मिन्चि लिमिम्पासॆॽन हिङ्चाकि’ कामानुङ् आमिनानॆ। मान्ठाभनॆ कॆ आन्ना लोकानि, निवाँहाङ्ऎ इघा लुङ्कॽवाबाङ् आबाराहाममि पासा याङ्मिन्चि लाबक्मा हेकु। 10सिङ्मि लाङ्पि निवाँहाङ्मि न्यायॆमि बेन्ठि सिक्खॆडा। मसॆ काम्नुऎ उम्चा आसिखुबा चोब्न सिङ् डेस्से मिबि हिट्ठाङ्कु।
11“कॆ चाइ आन्ना हिङ्वाबाङ् ऎम्पक्मिम्पामि चुमॆक्सङ्मि लागि योवाऎ बाप्टिस्मा पिकानि, टर का डॆङ्पि टाखुबा चाइ ढ्या चॆक्मावा नुङ्मा लॆ। काङा ग खोम् ङारिङ्पि माङ्स हॆॽनॆ, खोसॆ आन्ना सॆङ्सॆङॆ लावा हाङ् मिऎ बाप्टिस्मा पिकानि। 12खोसॆ सिचाम् नुङ् चाप्अ फाक्माम् लागि ठाप्ठाम् हुक्पि याङ्सिडु। ठाप्सिकु हाङ् सिचाम् चाइ काम्नुऎ ठालबि युङुकु हाङ् चाप्अ चाइ हानाम्स सिखॆॽनियॆ मिःबि हिरुकु।”
येसुमि बाप्टिस्मा
(मारकुस १:९-११; लुका ३:२१-२२; युहान्ना १:३२-३४)
13हाङ् येसु गालिलबाङ् टाआ हाङ् युहान्नामि हुक्बाङ् यारडान हङ्माबि बाप्टिस्मा लासु। 14टर युहान्नाऎ खो ऎक्मा यगुहाङ् लोसु, “आनाबाङ् रे कॆ बाप्टिस्मा लामा लॆऎ, टर मान्ठा आना रे काबि टाआनॆ?” 15येसुऎ खो लोसु, “ह गरक्न लिमिटॆ, मान्ठाभनॆ निवाँहाङ्ऎ लोमिम्पा चोब्न खानावाँ कानिऎ यिक्मा लॆ।” मर लोसुहाङ् युहान्ना खासिआ।
16बाप्टिस्मा लासिटाहाङ् येसु मरक्लन योवाबाङ् आम्पखारा हाङ् पारु हेम्बका। हाङ् खोसॆ निवाँहाङ्मि लावा उक्खिरिॽवा रक्न टाङ्पाबि उङ्मे पाइऎ खाङ्टकु। 17हाङ् पारुबाङ् गरक्मा एक्क साम्ला टाआ, “ग कॆ नाम्नाम् पिसिकुङॆ काम् पासा यो, काङा खोनुङ् एट्टान चेन्चाडिङ।”
Obecnie wybrane:
मट्टि 3: LBR
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2023, Wycliffe Bible Translators, Inc. and Nepal Bible Society
