Génesis 31
31
Jakobi sïpakorhekusïnti Labanini
1Jakobi kurhach'pesïrempti eskaksï Labani uáp'echa arisï uantasïrempka: Jakobi, iámu ampe enka juchari táteripka pakatakorhesti ka iásï kánekua jatsikorherhistia. 2Jakobi p'ikuarherasïrempti eska Labani nóteru mák'ueni sési kamasïrempkia eska urheti. 3Tátsekua ACHA arhispti Jakobini: K'uanhatsentsï chénio, chéti táteri echerirhu chéti márkuecha jinkuni, jikini xanhari k'uach'akuaka.
4Jakobi nemani axaspti juátarhu eska uant'apapirinka Rakelika Líani imaksï karichi erankuani jámaxapti, 5Ka arhiaspti: Exeskia eskarini chári táte nóteru mák'ueni sési kámasïnkia eska úrhetku ísï. K'óru jucheti táteri Diósï jinteni jinkuni jarhasti.
6Cháts'ï mítetixaka eskani ji chári táteni kánekua ánchekorhekuska, 7ka eskarini chári táte ch'ánacheska ka mémechani nórini sési maiamuni, k'óru Diósïrini kuách'akusti. 8Enka ima uantempka: Karichi uachasïchani jimpokini maiamukua iámentu karichichaksï uachasï p'itarheasïrempti, enka ima uantempka: No uachasïchani jimpokini maiamuaka iámentu karichichaksï no uachasïchani p'itarheasïrempti. 9Diósï chári táteni ísï euantasti manakorherichani ka jínteni íntsaani.
10Imani jurhiatekua ísï enkaksï karichicha kutsïticha kánekua p'ítarhpenchani jarhak'a, ji tsánharispka ka tsánharhikuarhu exespka eskaksï karichicha tatakecha iámentuksï uachaxespka. 11Ka Diósïri ánjelirini uantap'asti tsánharhikuarhu ka ji arhispka: Ixu jarhaska. 12Ka arhisptirini: Era eskaksï iámentu karichi tatakecha uachaxeska enkaksï karichi kutsïtichani jinkuni p'ítarhperaaka. Ji iámentu ampe exeska enkakini xáni Labani úcheka. 13Ji Diósïska enkakini Beteli xarhacheka, jima enkari tsakapuni anhamarhekueni péraaka ka tamakua atarhepka mínta jatsikuni. Jauara ka íni echerirhu uéaku ka ni chénio nitani.
14Rakelika Lía uantasptiksï: Jucheti táteo jucha nóteru ampe kánkorhesïnkia.
15Ísïts'ïni kámaski eska no jima anapueni, ka atarantastits'ïni ka maiamperata iámu arhasti. 16Iámu jatsikorhekua enka Diósï jucheti táteni euaka, ¡Jucharisti ka juchari tatakecheri!. Ísï jimpo ú iámentu ampe enkakini xáni Diósï arhika.
Jakobi kéntikusïnti Padani-arami
17Jakobi jauaraspti ka iámentu ampe tanakorhentaspti ka témpechani ka uáp'a tatakechani kameiu jatsiraspti.
18Ka imeri manakorherichani jinkuni enka xáni Padani-arami antapka, xanhari jatsiraaspti táte jempa Isaaki jinkuni nintani Kanaani echeri. 19Labani ima jurhiatekua karichichani xurhata p'ikuani niraspti. Rakelitáte jempani t'arhesïchani sïpakuaspti. 20Jakobi chánakuspti Labani arameoni enka no uantanukorhentapka ka sïpakorhentani. 21Ka sïpakorhekuspti ka iámentu ampe pakorhentaspti, ka Éufrates iurhekua parhimespti ka Galaadi juátarhu ísï niraxapti.
Labani niraspti Jakobini antakuni
22Tanimu jurhiatekua nitamasptia enka Labani mítepka eska Jakobi sïpakorhekuspka. 23Labani imeri márku jémpechani jinkuni niraspti Jakobini antankuni ka iumu tsimani jurhia xanharaspti enkaksï Galaadi juatarhu antakuapka. 24K'óru ima chúrekua Diósï, Labani arameo anapuni tsánharhitaspti ka arhispti: Sési uantaxeku, ásï nósesi uantontskorheku Jakobini.
25Labani, Galaadi juátarhu antakuspti Jakobini, ima kuákua t'uini úntatixaptia ima juátarhu, Labani ka imeri márkuecha imat'uksï Galaadi juáta pakaraspti k'uini. 26Ka Labani arhispti Jakobini: ¿Amperisï úni jámpki?
¿Antirinisï sïpakorheche ka jucheti uáp'a nanakechani ísï juáni eska uarhiperakata jupikatecha? 27¿Antirisï sïpasïpats'ïpak'i sïpakorheni ka nórini jamperi uantanuni? Jikini tsípekua jinkuni tsïnkuntapirinka, pirekua jinkuni ka kústakua tamporueri ka arperi jinkuni. 28Nórini jurak'uska jucheti uátsïchani ka nimakuechani sési tsïnkuantaani ni putinharhikuani. ¡Ísï eskari na jámaka kánekua no sési jarhasti! 29Ji kánekua uinhapekua jatsika, enkani ji uékapirinka jíksïni nósesi úchepirinka, k'óru chúririni chéti táteri Diósï uantaxechesti ka arhistirini: Sési uantaxechu ásï nósesi uantontskorheku Jakobini 30Enkari xáni kánekua ninhech'antani jápka, ¿Antirinisï t'arhesïchani sïpachea?
31Jakobi arhispti Labanini: Ji chéspka jimpokani ji uantaspka eskarini euantaapirinka chéti uáp'a nanakechani.
32K'óru chéti t'arhesïchani, ne enkari exekuntaaska ima uarhiati. Jucheti ka chéti márkuechani japantiru jirinhakorhentsï ampe enkakini sïpacheka ka pakorhentsï.
Jakobi no mítespti eska Rakeli sïpakuaspka.
33Labani, Jakobiri kuakuarhu inchaspti, tátsekua Líaueri kuakuarhu ka tátsekua tsimani jántspiricheri kuakuarhu ka no ma ampe exentaspti, enka Líaueri kuakuarhu uéntapka tátsekua Rakeliri kuakuarhu inchaspti. 34Rakeli t'arhesïchani p'íkuaspti ka kameiueri tatsuparhakuarhu inchach'utaaspti ka jima uaxakaspti, Labani kuakuarhu iápuru isï jirinhantaspti ka no xentaspti. 35Ima arhispti táte jempani: Jucheti táte ásï jama ikia jarhani enkani no úk'a jauarani t'u japantiru, ji íni jurhiatekuechani iurhiri tsïtasïnka.
Labani t'arhesïchani iápuru jámaspti jirinhantaani ka no exeantaspti.
36Jakobi ikiaspti ka Labanini uinhamarhespti kurhamarheni: ¿Ampe nósesi úski? ¿Ampekini nósesi úcheski enkari xáni ikiatinku juka antakuni?
37Enkari xáni iápuru ísï p'óntikurhaka ¿Amperi xentaski? Ixu péra jucheti ka chéti márkuechani japantiru, ka eskaksï inte uantak'a ne jurhimpekuarhu uantaxaki ji o t'u. 38Ma ekuatse uéxurhini ánchekorhecheskakini ka nóma karichi sapichu p'itarhpekata uarhisti, ni ma karichi anta. 39Nómakini karichi pakamukukata páchentaska enkaksï manakorheri ikimenharhicha katsarheauenka, o enkaksï chúrekua o jurhiakua sïpauempka, jimpokarini t'u jínteni maiampetasïrempka. 40Jurhiakua uarhisïrempka aparheni ka chúrekua uarhisïrempka tsírani ka no jamperi úsïrempka k'uini. 41Chéni ísï irekorhespka ma ekuatse uéxurhini, ka tempeni t'ámu uéxurhinikini chéti tsimani uáp'a nanakechani jimpo ánchekorhecheska, ka kuimu uéxurhini chéti manakorhericha jimpo, ka t'úrini mémechani mót'akucheska jucheti antakua. 42Enka no jinteni jinkuni japirinka jucheti táteri ka jucheti tatita Abrahaniri Diósï, Diósï enka Isaaki chénharhipka, t'úrini iámentu ampe euantapirinka ka ískurini axantapirinka. Diósïrini exesti na enkani kómu nitamaka ka na enkani xáni ánchekorheka, jimpokinisï chúri arhinharhikuti.
Jakobi ka Labani pakatperakua ma úspti
43Labani arhintaspti Jakobini: Íksï nanakecha ji uáp'esti, ka íksï tataka sapichuecha jucheti nimakuesti ka imaksï karichicha juchetisti, ¡Iámentu ampe enkari xáni ixu exeni jaka juchetisti! Ka ¿Iásï, jucheti uáp'a nanakechani ka jucheti nimakuechani ampe úa úkuani?
44Exe, ju axu ka pakatperakua máchi úaka ka nómenichi mirikurhiaka.
45Jakobi tsakapu ma p'ikuspti ka anhamarhekuani péraspti. 46Jakobi márku jempechani arhiaspti:
Tsakapuecha tánaa je ka imaksï uánekua tánaaspti ka márkuksï úaspti ka jimaksï t'irespti.
47Labani, Jegaari Saduta jakankurhitaspti jima imeri uantakua jimpo, ka Jakobi, Galaadi jakankurhitaspti jima imeri uantakua jimpo.
48Labani uantaspti:
I tsakapuecha márku úkatecha miataratits'ïni pakatperakua. Jimposï jima Galaadi jakankurhiti.
49Ka támu Mispa jakankurhisïnti, jimpoka Labani uantaspka: Eskats'ïni ACHA exeaka enkachi nóteru márku jauakia.
50Enkari nósesi káaska jucheti uáp'a nanakechani, o enkari máteru kuntaaska tempa úani, ka nókini nema exeni jarhani, mía eskats'ïni Diósï exeni jauaka.
51Labani arhispti Jakobini: Exe tsakapuecha enkani márku péraaka, ka tsakapu anhamarhekua ixu juchari teruk'ani péraaka.
52I tsakapu tánakata marhuauati eskachi no jámaka parhiakutsperani nósesi útsperani uékani. 53Eskats'ïni chéti tatita Abrahamiri Diósï, ka jucheti tatita Najoriri Diósï arhinharhikuaka. Ka Jakobi imani Diósï jimpo aiátspekorhespti enka Isaaki táte jempa janhanharhimpka.
54Jakobi ataspti manakorherini ma ka kéts'ïtakuspti ka kurhirhakuni juátarhu ka iámentu márku jempechani uantap'aspti echuskuta ka t'irekua arhani, juátarhuksï pakaraspti chúrekua.
55Labani pauantekuarhu xarhentku jauaraspti ka imeri uáp'a nanakechani ka nimakuechani uantanukorhentaspti ka úch'akuraspti ka k'uanhatsentaspti.
Obecnie wybrane:
Génesis 31: BI-PURHE
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Biblia en P´urhépecha, Michoacán, México © Sociedad Bíblica de México, A.C.
