मर्कूस 10
10
ख्योवा-पी़हमी थाक्पा च्येकेन्गी तेहन्दाला सुङदेन
(मत्ती १९:१-१२; लूक १६:१८)
1ओहले येशू ओ़ह ग्या़ क्युर ज़्या़दी यर्दन चाङबुगी फार्केन देपकी यहूदीयागी युहलया़ला फार फेप नाङसीन ओहले मिह माहङबुराङ येशूसाला जोम ओहङसीन, ओहले येशूगी येहपाराङ तोहङले ल़ेहमुराङ जेती खुङया़ला सुङ ख्येप्टा नाङज्ये छ़ूसीन।
2फरिसीया़गी येशूसाला ओहङदी येशूगी खोक्पा कोर्ती, “ख्योवागी राहङगी पी़हमीला क्युर्च्ये ओहङगेनी मेहयोहङगे सुङ नाङदोङ ले लाह?” म़ेदी टी़हसीन। 3येशूगी खुङया़ला सुङ नाङसीन, “मोशागी ख्याया़ला च्यि का नाङग्यो येहबा?” 4ओहले खुङया़गी, “मोशागीनी थाक्पा च्येकेन्गी यिहगी प्री़हदी राहङगी पी़हमी ङ्याम्बु खा फे़नाॱआङ ओहङगे म़ेदी माक्यो येह।”#व्य २४:१-४; मत्ती ५:३१ 5येशूगी खुङया़ला सुङ नाङसीन, “ख्यागी सेम सान्दी येहकें सुङगोराङ मोशागी दि का प्री़हदी तेरक्यो यिहम्बा। 6यिहॱनाङ किन्ज्योगी जाम्बुलीङ छ्या़ च्य़ूक्यो ती़हजीला मिह ज़ो नाङगेमु क्येप-ख्योवा दाङ पी़हमी-पेहजा जेती ज़ो नाङग्यो यिहम्बा। #उत १:२७; ५:२ 7‘ओ़ह सोङबे क्येप-ख्योवागी राहङगी आबा-आमाला क्युर ज़्या़दी राहङगी पी़हमी ङ्याम्बु डी़दी तेहकें,#उत २:२४ 8ओहले खुङ ङ्यी़ ज़ुबु च्यी़राङ डोज्ये येह।’ ता़ह खुङया़ ङ्यी़ मिहम्बा च्यी़राङ यिहन। 9ओहले किन्ज्योगी जोम च्य़ू नाङग्योया़ला मिहया़गी खा माहफ़ेज्यु” म़ेदी येशूगी सुङ नाङसीन।
10खुङ फ़ेबेॱया खाङबाला लो़ह फेप नाङ फान्ज्यो स्याहप्च्यीया़गी येशूला दि तामगी तेहन्दा च्यि यिहम्बा म़ेदी टी़हसीन। 11येशूगी खुङला सुङ नाङसीन, “का़हन्दीगी राहङगी पी़हमी ङ्याम्बु थाक्पा च्येती लेहमेन पी़हमी ङ्याम्बु पा़हमा पेहकें, खोगी तोहङमागी पी़हमीगी तेहन्दाला छ्येउ-छ्येंमु पेहक्यो ओहङगे। 12ओ़ह ल़ेहमुराङ पेहती राहङगी ख्योवाला क्युर्ती राहङसा ख्योवा ङ्याम्बु पा़हमा पेहकेन्दीगीॱआङ छ्येउ-छ्येंमु पेहक्यो ओहङगे।”#मत्ती ५:३२; १ कोर ७:१०,११
येशूगी पेहजाया़ला मेलाम नाङग्यो
(मत्ती १९:१३-१५; लूक १८:१५-१७)
13येशूगी राहङगी छ्या़ ज़्या़दी मेलाम क्याहप नाङज्यु म़ेदी मिहया़गी राहङ-राहङगी पेहजाया़ येशूसाला ख्योङसीन। दि थोङदी स्याहप्च्यीया़गी ओ़ह मिहया़ला बार्ता लाङसीन। 14येशूगी दि ज़ी़ नाङदी थुयाल ज़्याङ नाङसीन ओहले खुङया़ला सुङ नाङसीन, “पेहजाया़ला ङाहसाला ओहङ च्य़ूदोङ, खुङया़ला मा़हका! च्यिबेमाना किन्ज्योगी क्याहल्सीनी दि ल़ेहमुराङ पेहजाया़गी तेहन्दाला यिहम्बा। 15तेहम्बाराङ ङाह ख्याला माएँ, किन्ज्योगी क्याहल्सीला फेमा पेहजाया़गी ल़ेहमुराङ पेहती ख़े-माहलेहन थु सुॱआङ ओ़ह नाहङला स्य़ूह ङ्युहङज्ये म़ेह।”#मत्ती १८:३ 16ओहले येशूगी ओ़ह पेहजाया़ला राहङगी फाङबाला ल़ेहन नाङसीन ओहले पेहजा रे़ह-रे़ह थो़ला छ्या़ ज़्या़ नाङदी मेलाम क्याहप नाङसीन।
छ्युक्पु मिह
(मत्ती १९:१६-३०; लूक १८:१८-३०)
17येशू ओहलेगी फेप्च्ये जेकेमु मिह च्यी़ छ्योङदी ओहङदी येशूगी दिनला पी़मु च़ूदी, “ओ़ थाम्ज्यी म़ेदी या़हबु लोबेन लाह, नाहमॱआङ स्यिज्ये म़ेहबागी मिहली ज़ाङबु थोप्च्येला ङाहगी च्यि पेह कोहएँ?” म़ेदी स्युहसीन। 18ओहले येशूगी सुङ नाङसीन, “ख्ये ङाहला च्यिबे थाम्ज्यी म़ेदी या़हबु माएँ? किन्ज्यो च्यी़ मिहम्बानी, लेहमेन सुॱआङ या़हबु म़ेह। 19ओहले किन्ज्योगी सुङरापगी काया़नी ख्येला क्यी़ह येहॱराङ येह– ‘मिह माहसे, छ्येउ-छ्येंमु माहबे, कुमेन माहक्याहप, स्योप क्याहप्ती पाङबु माहतेर, मिहला ठाग माहती, ओहले राहङगी आबा-आमाला ची़नाङ डुप्तोङ’” म़ेदी येशूगी सुङ नाङसीन। #प्रस २०:१२-१६; व्य ५:१६-२० 20ओहले ओ़ह मिहगी, “लोबेन लाह, दि काया़नी ङाहगी फेमा यिहन्ज्यु ची़देॱराङ ओहङदी येहबा” म़ेदी स्युहसीन। 21ओहले येशूगी खोला ज़ी़ नाङसीन ओहले च्याहम्बा जेती सुङ नाङसीन, “ता़ह ख्येगी राहङसा ल़ेह च्यी़ पेह कोहच्ये येहबा। काहल्दी राहङगी थाम्ज्यीराङ क्युह नोहरया़ चोङदी ओहङग्योगी टाङगा प्राङबुया़ला तेर ओहले ख्येगी स्यिहङगामला क्युह-नोहर ज्योर्च्ये येह ओहले ख्ये लोह ओहङदी ङाहला ताहदा क्याहप्ती स्यो।” 22दि स्याहल थे़दी ओ़ह मिहगी तोहङबा ना-स्यी़ले काहल्सीन ओहले खो ज्यिबुराङ तुहङाल पेहती लो़ह काहल्सीन च्यिबेमाना खो ङ्याम्बु माहङबुराङ क्युह नोहरया़ येहकें।
23ओहले येशूगी कोर-क्यिहलेॱराङ ज़ी़दी सुङ नाङसीन, “छ्युक्पु मिहला किन्ज्योगी क्याहल्सीला स्य़ूहज्येलानी ज्यिबुराङ खेन्दा-का़हबु ओहङगु दु।” 24येशूगी स्याहल थे़दी स्याहप्च्यीया़ ह्अ ल़ेहसीन। ओहले येशूगी येहपाराङ सुङ नाङसीन, “ते़ पेहजाया़! किन्ज्योगी क्याहल्सी नाहङला स्य़ूहज्येला काहजे खेन्दा-का़हबु येहबा। 25मिह छ्युक्पुला किन्ज्योगी क्याहल्सी नाहङला स्य़ूहगे म़ेदीनी ङाबुङला खापगी मी़-ओङ नाहङला स्य़ूहज्येला का तेहमु ओहङडो।” 26दि थे़दी स्याहप्च्यीया़गी तोहरोङ ह्अ ल़ेहदी टी़हसीन, “ओ़हठी यिहन्सीमानानी सुगी थार्पा ज्योर ख़ूएँ ले?” 27येशूगी खुङया़ला ज़ी़ नाङदी सुङ नाङसीन, “दि मिहया़लेगी ओहङॱराङ मी़हखुएँगी ल़ेह यिहम्बा, यिहॱनाङ किन्ज्योलेगी ओहङ ख़ूएँ च्यिबेमाना किन्ज्यो लाहमले थाम्ज्यीराङ ल़ेहया़ डुप ख़ूएँ।”
28ओहले पत्रुसगी मासीन, “ज़ी़-नाङदोङ, ङ्यिहगीनी थाम्ज्यीराङ से़हया़ क्युर ज़्या़दी राहङला ताहदा क्याहप्ती ओहङदी येहबा लाह।” 29येशूगी सुङ नाङसीन, “तेहम्बाराङ ङाह ख्याला माएँ, ङाहगी तेहन्दाला ओहले या़हबु लेहङगुगी तेहन्दाला राहङगी आबा-आमा, पुह-पोहमो, आदा-नो़ह, आज्यी-नुहमु, खाङबा स्यिहङया़ क्युर ज्याएँदीगी 30दि म़ेदीॱआङ दाप क्याह च्यी़ माहङबु ज्योर्च्ये येह। ङ्येन्ज्येन दाङ तुहक्पु ङ्याम्बु नाहरेराङ खोगी आबा-आमा, पुह-पोहमो, आदा-नो़ह, आज्यी-नुहमु, खाङबा स्यिहङया़ ज्योर्च्ये येह ओहले ओहङगेन्गी ती़हजीलादी नाहमॱआङ मिहस्यीएँगी मिहली ज़ाङबु ज्योर्च्ये येह। 31यिहॱनाङ ताहन्दा तोहङले येहकेनया़ नाहङला मिह माहङबुराङ तिङला लिहच्ये येह ओहले ताहन्दा तिङला येहकेनया़दी माहङबुराङ तोहङला ओहङज्ये येह।”#मत्ती २०:१६; लूक १३:३०
राहङ टोहङदी सोम्बो लो़गेन्गी तेहन्दाला येशूगी लुहङदेन सुम्बा
(मत्ती २०:१७-१९; लूक १८:३१-३४)
32खुङ फ़ेबेॱया यरूशलेम क्याहसा ङो़ले फेप्केनॱराङ येहकें, ओहले येशू स्याहप्च्यीया़गी तोहङदा-तोहङ फेप नाङगेराङ येहकें। स्याहप्च्यीया़ ज्यिबुराङ ह्अ ल़ेहदी येहकें ओहले तिङदा तिङ ओहङगे मिहया़ती ज्यी़दी येहकें। ओहले येहपाराङ येशूगी राहङगी स्याहप्च्यी च्यिङ्यी़ला ग्या़ च्यी़ला नोम्दे राहङ थो़ला बाप ओहङगेन्गी तुहक्पुगी तेहन्दाला सुङ नाङसीन। 33“ङ्यिहन्दोङ, ओहराङ यरूशलेमला डोएँॱराङ येहबा। ओ़हला लेप्ती मिहगी स़ेबु पूजाहारी छ्यिम्बु दाङ छ्य़े-ठिम ताङगे लोबेनया़गी लाहक्पाला चि क्याहप्च्ये येह। खुङगी खोला से कोहकें म़ेदी लेहमेन क्यिहपागी मिहया़गी लाहक्पाला चि क्याहप्च्ये येह। 34खुङगी खोला स्याहम्डेन तेन्दी थुक्स्याल क्याहप्च्ये येह, ताक्स्यु क्याहप्च्ये येह ओहले सेच्ये येह। यिहॱनाङ ङ्यिहमा सुम तिङले खो येहपाराङ स्यिक्योलेगी सोम्बो लो़हज्ये येह।”
याकूब दाङ यूहन्नागी येशूला स्युहवा फुल्ग्यो
(मत्ती २०:२०-२८)
35ओहले जब्दियागी पुह पिन ङ्यी़ याकूब दाङ यूहन्ना येशूसाला ओहङदी, “ङ्यिहगी सेमला क्येक्योगी ताम राहङगी तेहन्दा डुप च्य़ू नाङदोङ लाह” म़ेदी स्युहसीन। 36ओहले येशूगी “म़ेदोङ ख्याला च्यि कोहएँ?” म़ेदी टी़ह नाङसीन। 37ओहले खुङगी, “राहङदी ज़िज्यिद-च्येनगी क्याहल्सीला ङ्यिह पिन ङ्यी़ राहङगी योबा दाङ योमा ङो़ले#१०:३७ योबा दाङ योमा ङो़ले : क्याहल्बुकी योबा दाङ योमा ङो़लादी ओ़ह क्याहल्सीगी थाम्ज्यी म़ेदी ओङ छ्यिम्बु येहकेन मिहया़ च्यी़राङ तेह ङ्युहङगो येहकें। तेह ङ्युहङज्यु” म़ेदी स्युहसीन। 38ओहले येशूगी सुङ नाङसीन, “ख्यागी च्यि लाङगेॱराङ येहबा, ओ़ह ख्याला क्यी़ह म़ेह। च्यि ङाहगी थुङगेन्गी तुहक्पुगी फार्कोले ख्यागी थुङ ख़ूएँ? ङाहगी ल़ेहन कोहकेन्गी बप्तिस्मा च्यि ख्यागीॱआङ ल़ेहन ख़ूएँ ले?”#लूक १२:५० 39“ङ्यिहगी ला़ खाएँ लाह” म़ेदी खुङगी येशूला स्युहसीन। ओहले येशूगी खुङला सुङ नाङसीन, “यिहम्बा, ङाहगी का़हन्दी फार्कोले थुङगे ओ़ह ख्यागीॱआङ थुङज्ये येह, ओहले ङाहगी लेहन्ग्योगी बप्तिस्मा ओ़ह ख्यागीॱआङ लेहन्ज्ये येह। 40यिहॱनाङ ङाहगी योबा दाङ योमा ङो़ले तेहच्येलादी ङाहगी तेर्के स़ेह मिहम्बा। दि ग्या़या़नी किन्ज्यो राहङगी सुगी तेहन्दाला ठाबे जे नाङग्यो यिहम्बा, खोलाराङ नाङज्ये येह।” म़ेदी येशूगी सुङ नाङसीन।
41दि केच्या थे़दी लेहमेन स्याहप्च्यी च्युगी खुङ पिन ङ्यी़ याकूब दाङ यूहन्ना ङ्याम्बु स्यिहताङ पेहसीन। 42ओहले येशूगी खुङ थाम्ज्यीलाराङ ग्या़ च्यी़ला क़े क्याहप नाङदी सुङ नाङसीन, “ख्याला क्यी़हराङ येहबा, जाम्बुलीङला क्याहल्बु पेहकेनया़गी लुहङबागी थाम्ज्यी मिहया़ थो़ला राहङगी सेमला ने़जेबा ओङ छ्य़ेएँ ओहले मिह छ्यिम्बुया़गीॱआङ लेहमेन मिहया़ थो़ला ओङ छ्य़ेएँ।#लूक २२:२५,२६ 43यिहॱनाङ ख्यादी ओ़ह ल़ेहमु ओहङज्ये मेहयोहङगे। ख्या नाहङला छ्यिम्बु ओहङज्ये छोल्गेन्दीगी मिह थाम्ज्यीला स्याहप्तो स्य़ूह कोहएँ।#मत्ती २३:११; मर्क ९:३५; लूक २२:२६ 44ओहले थाम्ज्यी म़ेदी छ्यिम्बु ओहङज्ये छोल्गेन्दी मिह थाम्ज्यीगी योक्पु ओहङ कोहएँ 45च्यिबेमाना मिहगी स़ेबुॱआङ लेहमेन मिहया़गी स्याहप्तो स्युहज्यु म़ेदी मिहम्बा, यिहॱनाङ लेहमेन मिहया़ला स्याहप्तो स्य़ूहज्येला ओहले मिह माहङबुलाराङ थार च्य़ूज्ये म़ेदी राहङगी मिहली तेर्च्येला ओहङग्यो यिहम्बा।”
मी़ मेहथोङगेन्गी बारतिमै
(मत्ती २०:२९-३४; लूक १८:३५-४३)
46येशू स्याहप्च्यीया़ ङ्याम्बु यरीहो क्याहसाला फेप नाङसीन। ओ़ह क्याहसा क्युर ज़्या़दी फेप्केमु मिह माहङबुराङ येशू ङ्याम्बुराङ ओहङसीन। लाहमगी सुहरलाॱराङ तिमैगी पुह बारतिमै माएँ मिह च्यी़ लाङदी तेहती येहकें। खोगी मी़ मेहथोङ येहकें। 47नासरतगी येशू फेप नाङग्यो क्यी़ह ज्योर्ती खोगी क़े तेन्गेॱराङ मासीन, “ओ़ दाऊदकी स़ेबु#१०:४७ दाऊदकी स़ेबु : यहूदीया़ला ओङ छ्य़ेएँगी क्याहल्बुदी दाऊदकी क्यिह लाहमलेॱराङ ओहङज्ये येह म़ेदी ताहम्ज्या ज़्या़क्यो येहकें। ओ़ह सोङबे ओङ छ्य़ेएँगी मास्यीकालादी दाऊदकी स़ेबुॱआङ म़ेदी माउ येह। येशू, ङाह थो़ला निङज्यी जे नाङदोङ लाह!”
48मिह माहङबुराङगी खोला खाजुम तेह म़ेदी बार्ता लाङसीन। यिहॱनाङ खोगी तोहरोङ क़े तेन्दी मासीन, “ओ़ दाऊदगी स़ेबु येशू, ङाह थो़ला निङज्यी जे नाङदोङ!” 49येशू फेप्कें फेप्केमुराङ थेमे ज़्य़ूदी सुङ नाङसीन, “खोला देला क़े क्याहप्तोङ ले!” खुङया़गी ओ़ह मी़ मेहथोङगेन मिहला क़े क्याहप्ती मासीन, “ख्ये क़ेहनाङ पेहतोङ, येशूगी ख्येला क़े क्याहप नाङदी येहबा, ग्यो़बा स्यो!” 50खो राहङगी योल्गेन्गी गार्क्याङ क्युर चाहङसीन ओहले ह्ओप लाहङदी येशूसाला ओहङसीन। 51येशूगी खोला टी़ह नाङसीन, “ख्येगी तेहन्दाला ङाहगी च्यि पेहतोङ ले?” “लोबेन लाह, ङाहगी मी़ थोङ ख़ूज्यु!” म़ेदी खोगी स्युहसीन। 52येशूगी सुङ नाङसीन, “सोङ, ख्येगी तेहपा पेहक्यो सोङबे ता़ह ख्येगी मी़ थोङ ख़ूएँ काहल्सीन।” ओ़ह ती़हजीलाराङ खो मी़ थोङगेन काहल्सीन ओहले येशूला ताहदा क्याहप्ती काहल्सीन।
Obecnie wybrane:
मर्कूस 10: HYLM
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2023 (Active), Wycliffe Bible Translators, Inc. All rights reserved.
