Luka 5

Jesu peet zheppkamm keeniy wu'shee

Mat 4:18-22; Mar 1:16-20

1Par'meeh puus shi kaarooh Jesu kihh dharr pwoo Kur'am Gennesaret, bhi gurum mwopp ja okhor nyi p'ee klihng pwooNaan, 2bhi naah m'ee zhepp kong'am mwopp vel kihh l'e pwoo'am ni. Mhi-yaksherep ni mwopp baa pwat dhighin kong'am ni, mwopp kaah vwang tenggsherep keeru. 3Bhi Jesu dhel dhighin m'ee kong'am ni wu'zeh, w'u a mhi Siman, bhi satt nyi le, “Pann ghi gyess kong'am ni dyi lee lhi'baa sh'i khing.” Bhi Jesu tong dhighin kong'am ni sh'in kamm diy gurum ni mwopp.#Mat 13:1,2; Mar 3:9,10; 4:1

4Kaarooh Jesu kyes laa'pwoo, bhi satt Siman le, “Gha tungg kong'am ni lhidum pee w'u zhizhurruk bhi wu meng tenggsherep keewu dhighin am tihh ghi yak sherep diy.”

5Siman pring nyi le, “Gwoohyon, mu teer mu nyak weh khipar kihhdihng'dihng dhangg baah mu y'aa mee'bii mou, weett kihhsheh sh'i satt keegha, bhi a'n p'ee meng tenggsherep ni am.”#Yoh 21:3

6Kaarooh mwopp sh'in kaa Jesu satt mwopp seh, bhi mwopp yak sherep dhess, harr tenggsherep khimwopp kihh t'ang tee.#Yoh 21:6 7Bhi mwopp gwed mhinut w'u dhighin kong'am wu'zeh tihh mwopp taah bham runn diy. Bhi mwopp taah gam kong'am ni weett vel kihh sherep mwengg, harr kong'am ni mwopp kihh t'ang rwa dhighin am.

8Kaarooh Siman Bitrus naah bii mihhseh, bhi taah yill tekhem Jesu, satt nyi le, “Daah, shang ghi yakhal kihpee na diy, p'ee a'n a gu'shigbis.” 9P'ee aa'phi Siman kihh kakhar mhinin w'u mwopp dang nyi p'ee sherep w'u mwopp yak seh. 10Bii ni aa'phi Yakub mwopp kihh Yohanna, w'u a zhepp khi Zebedi, w'u gyet mwopp a shaardhakk khi Siman.

Bhi Jesu satt Siman le, “Tapp kihkhirmuut y'aa gha mou. Yakhal mwasseh kihhshe dheeh gha p'ee kihh ji a kihh gurum mwopp kihpee na diy.” 11A kihhsheh bhi kaarooh mhi-yaksherep ni mwopp taah kihh kong'am keeru ni phi'khing, bhi mwopp yet koohmeeh nhighin, mwopp dumdang Jesu.

Jesu bar m'ee Gulokhom

Mat 8:1-4; Mar 1:40-45

12Kaarooh Jesu m'ee tughuzyill shi bhi m'ee gurum w'u lokhom #5:12 Lokhom yill khi Isra'ila a kooh a shw'al w'u bhelem shi'm shoopshik gurum kyekk. so nyi pwetd naah nyi, bhi taah kurum tekhem nyi, shup yit niy yill bhi so'kumbokk nyi, le, “Daah, mihh ghi kihh dh'om, bhi ghi kihh mak tu'angg lokhom a'n tihh ih dheeh wu'bhangg diy.”#Lev 14:1-32

13Bhi Jesu shenn sarr niy bwum Gulokhom ni diy, kihh satt nyi le, “Ih kihh dh'om, ghi dheeh wu'bhangg dhak.” Abet bhi lokhom ni yet nyi.

14Bhi Jesu delkom gwoh ni le, “Tapp ghi satt bii mihhse menguh 'y! Kop kihhsheh bhi ghi dum a kihpee Prist tihh dyee gha diy, yakhal ghi wus'biizhukhum mhi tu'angg lokhom w'u gyet Musa satt, tihh koohweeh man rooh baa ghi dheeh wu'bhangg diy.” #Lev 14:1-32

15Weett kihhsheh bhi pwookaah Jesu waa kihh sihkhitt pihpiin kangpee, bhi dw'uu gurum mwopp kihh tuud ja tihh mwopp klihng kamm khinyi diy, yakhal tihh bar mwopp diy pwoo v'ur shw'al khimwopp. 16Pee'mhinyi, bhi Jesu mihh yakhal bhi kihh byaah dum dh'em tihh kad arr laa'pwoo diy kihh Naan.

Jesu bar m'ee gurum w'u a kud

Mat 9:1-8; Mar 2:1-12

17Par'meeh puus kaarooh Jesu kaah kamm, bhi Farisiiy mwopp kihh Mhikamm W'aar khi Naan w'u gyet mwopp mwan pwat v'ur tughuzyill w'u Galili kihh pakk tughuzyill w'u gaar'yill Yahudiya, kihhsheh kihh pakk gurum w'u mwopp tong pwat Urshalima zag mwopp nhighin, yakhal maa'pee khi Naan w'u p'ee bar mhi'shwal mwopp kihshag kihh Jesu. 18Bhi m'ee gurum mwopp ji kihh m'ee gwooh a kud kih p'aal. Mwopp kamm lyap arr weh tihh mwopp dhel diy kihh nyi luh p'ee dhen kihkyeen Jesu. 19Dhangg kaarooh mwopp kad arr wonn, lhiwaa dw'uu khi gurum ni mwopp, bhi mwopp k'aa dum kih daghabluh ni, mwopp fwallap pee, bhi mwopp shenn gwoh ni lhisam kih p'aal keeniy, sam dhen kihkyeen Jesu, naar mwooh dhighin luh ni.

20Kaarooh Jesu naah pihhzeenn khimwopp, bhi satt gwoh ni le, “Gwoh m'aan, ih fwa shigbis keegha gha.”

21Bhi Mhikamm-w'aar, kihh Farisiiy mwopp y'aa shwan nyi en ru le, “A wuyeh se w'u kihh kas Naan kihhshe se? A wuyeh kihh mak fwa shigbis kad baah a Naan kyekk mou ayeh?”

22Kaarooh Jesu man p'an khimwopp, bhi nang phi mwopp le, “A mihyeh l'e bhi wunn phi shwan bii mihhse en wu ayeh? 23A meehrangg fyeell mett p'ee satt? A rooh p'ee satt le ‘Ih fwa shigbis keegha gha,’ h'aa a rooh p'ee satt le, ‘Yakhal ghi dharr, ghi y'aa mwaan ayeh?’ 24Pee'mhinyi bhi a'n p'ee bar nyi tihh wu man diy wu le a'n L'aa khi Gurum ih kihh mak fwa shigbis dhighin yill ni.” Bhi Jesu satt gwooh shoopshik nyi m'uut seh le, “An ih satt gha, yakhal ghi dharr, m'ang p'aal keegha ghi dum tuluh.” 25Abet, bhi gwoh ni kyes'gyereng yakhal dharr kihkyeen gurum ni mwopp weett, bhi m'ang p'aal w'u dyinn kihh dhen dyikihh seh, y'aa kwoob Naan, dum tuluh keeniy. 26Bii ni aa'phi gurum ni mwopp pwetd bhi mwopp kwoob Naan; khighiy shwat mwopp pwetd; mwopp kihh satt le, “Hai, mu naah bii'aapwoo shinn.”

Jesu Peet Levi

Mat 9:9-13; Mar 2:13-17

27Bwoon bii mihhse, kaarooh Jesu put, bhi naah m'ee gu'lappwapp w'u shumm nyi a Levi kihh tong reb bid mhi lappwapp. Bhi Jesu satt nyi le, “Gha lang'dang na.” 28Bhi Levi yet koohmeeh dheeh l'e, bhi yakhal lang'dang Jesu.

29Bhi Levi shed gag soh'var mhi rettyit p'ee Jesu luh niy. V'ur mhi-lappwapp mwopp dhess ja p'ee so soh kihshag kihh mwopp. 30Bhi pakk Farisiiy kihh pakk Mhikamm-w'aar w'u seghen pwooNaan mhi Farisiiy ni mwopp y'aa gwakbhelepp zheppkamm khi Jesu, le, “A mihyeh l'e bhi wu kihh so wu shwaa kihshag kihh mhi-lappwapp kihh mhinyee mwopp mhi-shigbis ayeh?” #Luk 15:1,2

31Bhi Jesu pring Farisiiy ni mwopp le, “Ai baah a mwooh kakhamm kihh t'ang guyen mou, a mhi'shwal mwopp kihh t'ang nyi. 32Baah ih sam p'ee peet a mwooh kihh le runn a mhi-shigrett mou, a p'ee peet mhi-shigbis mwopp p'ee tu'wapp.”

T'al kaah yaa'pwoo

Mat 9:14-17; Mar 2:18-22

33Bhi m'ee gurum mwopp satt Jesu le, “Zheppkamm mhi Yohanna Gu-Baptisma mihh lee-lee bhi mwopp kihh yaa'pwoo ru; yakhal mwopp kihh dhangNaan; zheppkamm mhi Farisiiy mwopp kihh sh'in a kihhsheh zag, dhangg zheppkamm mag'gha mwopp kihh so mwopp shwaa chitt.”

34Bhi Jesu pring mwopp le, “Wunn p'ee mak l'e shaar mis'mwar mwopp yaa'pwoo p'ar bhal'dyik bhi mis'mwar ni kudyi kihshag kihh mwopp mihngg? 35Puus kudyi kihh ji, w'u mwopp p'ee m'ang mis'mwar ni lhidhel kih mwopp; a dhighin t'eer mhizeh ni mwopp bhi shaar mis'mwar ni mwopp p'ee dhekhem yaa'pwoo dhak ser'seh.”

36Bhi Jesu satt m'ee shumpwoo gurum ni mwopp le, “Baah gwooh kihh gab kleb-fwaat sh'i bh'aar wu'pwooh tihh twan pee w'u bh'aar wu'sihkhir tee diy mou. Mihh sh'in kihhsheh bhi nyi p'ee bhalang niy a tee bh'aar wu'pwooh ni b'aan, yakhal baah kleb-fwaat wu'pwooh ni p'ee cham mw'aan kihh bh'aar wu'sihkhir mou. 37A kihhsheh zag, baah gwooh kihh wurr am'anab wu'pwooh dhighin fonn'shim am'anab wu'sihkhir mou. Mihh sh'in kihhsheh, bhi am'anab wu'pwooh ni p'ee fil harr pyan fonn'shim am'anab wu'sihkhir ni mwopp. A kihhsheh bhi am'anab ni p'ee ky'em kr'ong, yakhal fonn'shim am'anab ni mwopp p'ee pyan ky'em zag. 38Am'anab wu'pwooh kihh nang a fonn'shim am'anab wu'pwooh a ching. 39A kihhsheh zag, gwooh kudyi kihh yakhal shwaa am'anab wu'sihkhir p'ee t'ang shwaa wu'pwooh dyi abet mou, p'ee gwoh ni kihh satt le am'anab wu'sihkhir ni rettmett wu'pwooh ni riy.”

Obecnie wybrane:

Luka 5: Chakfem

Podkreślenie

Udostępnij

Kopiuj