Luk 6

Mbiba abangɛ Ɔfo Ɛrɛdɛkɛr

Matiyu 12.1-8; Mak 2.23-28

1Na Ɔfo Ɛrɛdɛkɛr Jisɔs ajɔl jɛn na ɛgbɛ ji abimɔ nsɔl yi akoga arɛ nsam, atɔnanjim abɛ akuma mfugi asi a nsam, afore afuli afɛb aliga amug. 2Anɛ ba Farasi abibɛ, “Bɛjom ji wun ɔlema litom li ajigi abongɔ arɛ wun ɔdɛlem na Ɔfo Ɛrɛdɛkɛr?”

3Jisɔs afanga abɔ, “Wun ɔka kogam ji Defid na anɛ ba ɔta lijɛn abɛ alemɔ ngara yi njal ayamɔ abɔ-ɛ? 4Wɛ ayɛl na njo Ɔsɔwɔ aji tab brɛd bi ɛrenɔ ɛkarɛ Ɔsɔwɔ ali, atɔb akarɛ anɛ ba ɔta lijɛn abɛ. Njing atamam arɛ anɛ banga ali ndɛg nemanjɔm Ɔsɔwɔ.”

5Jisɔs akur bong atɔg abɔ arɛ, “Mɔn a Nɛnom yɔ arenɔ Tata bi Ɔfo Ɛrɛdɛkɛr.”

Jisɔs alem Nɛ yɔ Ɔbɔ ɛlɔ jog anɔb na Ɔfo Ɛrɛdɛkɛr

Matiyu 12.9-14; Mak 3.1-6

6Na Ɔfo bingɔ bi Ɛrɛdɛkɛr Jisɔs ajil na ɛkpasega aji kuma nteba. Nɛnom wurang yɔ ɔbɔ bilom ɛlɔ jog ajɔl fɔ. 7Anɛ ba Farasi na ba Teba ajing ajɔl sɛb mba yi akone Jisɔs mfɛm na ɛsi, ajɔl babɛ arɛ ayɛn mɔng alagɔ wɛ lem anɔb na Ɔfo Ɛrɛdɛkɛr. 8Jisɔs akukun ji abɔ ajɔl kɛrɛ. Abong atɔg nɛ yɔ ɔbɔ ɛlɔ jog arɛ, “Tum yema wɔ ɔjɛn ɔba na ɔsi.” Wɛ atum ayema fɔ.

9Jisɔs atɔg abɔ arɛ, “Nag wun bib mbiba. Bɛjom ji njing adalɔ wur abɔ arɛ wur ɛlem na Ɔfo Ɛrɛdɛkɛr. Bilom bi afi nɔba? Ɔnyangɛ likpen afi ɔrungi likpen?”

10Wɛ abri abɔ fɛb, abong atɔg, nɛnom ɔfɔ, “Tini ɔbɔ ɛba.” Wɛ atini ɔbɔ ɛtore ɛnɔb. 11Abɔ arag ntem akuma mbonga atɔga atɛm ɛjom ji ala lem Jisɔs.

Jisɔs arang Arɔb ayɛ woba na ɛbal

Matiyu 10.1-4; Mak 3.13-19

12Ɔfo brang, Jisɔs ayur na ɛwɔng arɛ aji kag ɔrɔ, ajɔl alagtu kpukpul akaga ɔrɔ akarɛ Ɔsɔwɔ. 13Na ji ɔforanfo ɛlɔ kparɛ, akog batɔnanjim abɛ atu ɛlɛ arang anɛ woba na abal akog abɔ Arɔb: 14Sayimɔn (yɔ agorɔ wɛ mbeng Pita), na mɔnyɛn ɔwɛ Andru; na Jemsi, na Jɔn, na Filip, na Batilɔmi, 15na Matiyu, na Tɔmasi, na Jemsi mɔn a Alfɛyus, na Sayimɔn yɔ ajɔlɔ wɛ kog arɛ Silɔt#6.15 ɛkaga asig ayɔma lirɔng anɛ ba ajɔl nɔg arɛ ajog na liyɔ Rom 16na Judas mɔn a Jemsi, na Judas Isikariyɔt, yɔ ayubɔ Jisɔs na ata.

Jisɔs ateb, atore anɛ

Matiyu 4.23-25

17Naji Jisɔs na Arɔb ayɛ abudɔ na ɛwɔng, ɛbɔngɛ Batɔnanjim abɛ aba yema na mfom yi arenɔ sɛl, ɛbɔngɛ anɛ ba ajogɔ Judiya, Jɛrusɛlɛm bandɛga ajog na nkɛ ɛgbok aya Taya na Sayidɔn. 18Abal arɛ aba yogɛ afɛngɛ anɔb ayam, anɛ ba abe atugi afege abɔ ayɔ alem abɔ anɔb. 19Anɛ kpakpa ajɔl sɛb mba arɛ alagɛ abɔ ateb ɛkɔ ji ɛjɔlɔ wɛ jog ɛjɔl lem abɔ fɛb anɔb.

Ɛyɛbalitem na Ndɔn

Matiyu 5.1-12

20Jisɔs abri batɔnanjim abɛ abong,

“Lifola na akpak,

Ɔtol Ɔsɔwɔ ɛre ɛkarɛ wun.

21Lifola na anɛ ba njal batig;

ala wuwuri.

Lifola na anɛ ba arera batig;

wun ɔla yɔyɔl.

22Lifola na na yɔ anɛ ajinga wa,

atɛna wa, atoga wa ateb Mɔn a Nɛnom.

23“Rang, wɔ ɔbin na ɛyɛbalitem, nsɔl yi fɔ ɛlɔ lem ɛkara ateb ntore ɛya afafang na Ɔtol Ɔsɔwɔ. Anɔ yɔ anɛ abɔ ba ɛmini alemɔ ba yɛn amir.

24“Ligbo na nina afang anɛ batig,

ateb arɛ wun ɔgba bɛl nyɛba likpen.

25Ligbo nana yɔ ɔlɔ wuri batig,

wɔ ɔla jɔl njal.

Ligbo ɛjɔl nana yɔ ɔyɔla batig,

wɔ ɔla kar liku ɔjɔ fɛngɛ ɔrer.

26Ligbo ɛjɔl na na yɔ anɛ

abonga atenga nsɔl abangɛ wa,

anɔ yɔ anɛ abɔ ba ɛmini

alemɔ bayɛn amir ba akemakem.

Likɔrɔ li anɛ ba ɔjing

Matiyu 5.38-48

27“Wun ba ɔyoga mam: Ba bɛl likɔrɔ na anɛ ba ɔjing abina, wun ɔlem ateng a nsɔl ɔkarɛ anɛ ba ɔraga abɔ. 28Tɔg Ɔsɔwɔ akarɛ anɛ ba atoga wa lifola. Wɔ ɔkag ɔrɔ ɔkarɛ anɛ ba akaga wa ɛriga. 29Nɛ awiawi yɔ aromɔ wa na ɛja ɔkpɔga, sibi ɛja jingɔ wɔ ɔkarɛ akpɛ rom. Nɛ awiawi yɔ atabɔ wa nkot, nɔngɛ wɛ akur kɔ ɛlimi. 30Karɛ nɛ awiawi yɔ alɛmɔ wa, nɛ awiawi yɔ atabɔ ɛjom ɛja ɔtɔbɛ tɔg arɛ afɛra wa. 31Lem karɛ anɛ ji ɔsɛbɔ arɛ alem akara.

32“Ɔlɔ bɛl likɔrɔ na anɛ ba ɔkɔra abɔ baba, ba nseng yi ɔla bɛl? Ɛjɔl anɛ ba abeɔfɛm akpe likɔrɔ na anɛ ba ateba abɔ likɔrɔ. 33Ɔlɔ lem ateng a nsɔl ɔkarɛ anɛ ba alema ateng nsɔl akarɛ wa, ba nseng yi ɔla bɛl? Ɛjɔl anɛ ba abeɔfɛm anɔnga alema anɔ. 34Ɔlɔ bɔ anɛ akpuga ba ɔkɛrɛ arɛ ala tore atu akara, ba nseng yi ɔla bɛl? Ɛjɔl anɛ ba abeɔfɛm abɔga atɛm akpuga asega arɛ akpe abɔ ngara mɔng abɔ akarɔ.

35“Bɛl likɔrɔ na anɛ ba ajing aba, ɔlem nɔba ɔkarɛ abɔ, ɔlɔ bɔ nɛ akpuga ɔdɛ bɛl ɛkɛkɛrɛ arɛ atore atu akara. Wɔ ɔla bɛl ntakpa ntore, wɔ ɔla jɔl Mɔn a Ɔsɔwɔ bi Ɛyurɔyura, ateb wɛ anɔb litem na anɛ ba adɛgɛ kag sam na abe anɛ. 36Nɔb litem na anɛ mɔng Nsɔja anɔbɔ litem.

Ɔtɔb lam anɛ

Matiyu 7.1-5

37“Ɔtɔb lam anɛ adɛ tɔb alama. Ɔdɛ rungi anɛ, anim tɔb arungi wa. Tum karɛ anɛ ateg atum akara. 38Karɛ anɛ, ala kakarɛ. Ɛyarɛ ɛja alɔ atore afɛngɛ njim akara ɛla ror ɛwuri na nde, ji ɔgarɔ ɔkarɛ jiji ala tɔb akɔ agara akara.”

39Jisɔs atob abɔ ligan li fa. “Naga amir amamal ateb ntɛm naga amir mba ɛ? abɔ anim gbɔ ayɛl na libe ɛ? 40Nkpekpele anim ma jɔg aseng nteteba, nkpekpele yɔ atorɔ wɛ ala jɔl mɔng nteteba yɔ atebɔ wɛ. 41Bɛjom ji ɔbri lisan na limir mɔnyɛn ɔwa, ɔdɛk yɛn ɛbɛg ɔte na limir ɛla? 42Ɛla lem nan ɔtɔg mɔnyɛn ɔwa arɛ, ‘mɔnyɛn ɔma, ɛtiti nɔng mɛ nyege wa lisan na limir ɛla,’ na ji wɔ ɔdɛk yɛn ɛbɛg ɔte na limir ɛla? Wɔ nɛ a nbri ɛbal! Gbɔ mba yege ɛbɛg ɔte na limir ɛla, na ji ɔla ɔmal ɔyɛn ɛnɔbnɔbɛ ɔyege lisan na limir mɔnyɛn ɔwa.

Ɔte na akab ayɛ

Matiyu 7.16-20

43“Ɛteng ɔte ɛnim teg ɛkab abe akab, nig ɛbe ɔte ɛkab ateng akab. 44Ɔte abiabi ɔrenge na akab ayɛ, ɔnim ma bɔng akab ɔjuju na ɔte ajɔnga, ɔnim ma bɔng amuruku na ɔtenyam akoma. 45Ɛteng nɛ abaga na ateng a nsɔl ya ayɔbɔ wɛ na litem, ɛbe nɛ titi abaga na abe nsɔl ya ayɔbɔ wɛ na litem, nyɔ bi ɛbonga nsɔl yi ɛlɔ ror na litem.

Ɛdadab na nwak a nsiga ɛtɛk

Matiyu 7.24-27

46“Bɛjom ji wun ɔkoga mam, ‘Tata, Tata’ ɔdɛg lem ji mɛ ntɔga wun? 47Nɛ awiawi yɔ abalɔ na agama ayog alom ama alem anɔ mɔng nbongɔ, mɛ na teb mɔng wɛ arenɔ. 48Are mɔng nɛ yɔ arimɔ alub atana adul asil ɛtɛk ɛjɛ akone na atal, nyɛl alɔ ba akud abole ɛtɛk ji fɔ ɛnim teg ɛnyɛngɛ ateba arɛ asil na nsɛrɛ. 49Yɔ nɛ awiawi yɔ ayogɔ alom ama adɛ kɔ akag na nema, are mɔng nɛ yɔ asilɔ ɛtɛk adɛ rim aluba atana adul, nyɛl alɔ ba akud ɛtɛk ji fɔ ɛgbɔgbɔ ɛrungi fɛb.”

Obecnie wybrane:

Luk 6: ABM

Podkreślenie

Udostępnij

Kopiuj