Yowano 1

Lizu lya wumi

1Ha kutatika kwekalile Lizu, Lizu lyekalile hamo na Nyambi na Lizu lyengile Nyambi. 2Lizu lyekalile na Nyambi ha kutatika. 3Nyambi walengele byuma nimwabyo kupitila mumwendi, kowa shuma shimo shalengiwile kwakubula niye. 4Mumwendi mwekalile wumi kami uya wumi wengile lumuni lwa bantu. 5Lumuni lwamunikanga mu mincimpwe, kami mincimpwe kutwesha kuluzima yifwako.

6 # Mat 3:1; Mak 1:4; Luk 3:1, 2. Nyambi watumine ntumwana wendi, lizina lyendi Yowano. 7Niye wezile mukwinga paki, kupaka bya lumuni, ngayi bantu nimwabo bakulupile ndaba ya wupaki wendi. 8Kaliha wengile lumuni, ngoboni wezile mukupaka bya lumuni. 9Olwe nilwo lumuni lwakupwisha, luya lukeza mu kaye na kumunika ku bantu nimwabo.

10Lizu lyekalile mu kaye, hinge ndi Nyambi walengele byuma nimwabyo kupitila mumwendi, ngoboni bakakaye kaliha bamulimukile. 11Wezile ku litunga lyendi, ngoboni bawushinda wendi kaliha bamutambwile. 12Ngoboni kunimwabo bamutambwile, baya bakulupilile mu lizina lyendi, wabapanikile ngovu ngayi benge bana ba Nyambi. 13Kaliha bengile bana ba Nyambi na kuhemuwa ku mukeza, hinge na shifungo sha lutu, hinge na shifungo sha muntu, ngoboni na shifungo sha Nyambi.

14Lizu lyafutukile muntu, wekalile mukatiketu, wenzalile na nceshe na kupwisha. Twamonene wuwahe wendi, wuwahe ou atambwile hakwinga Mwana umo tuhu wa Tate.

15Yowano wapakile byendi. Wabilikizile ngayi, “Niye uya natoyele oho nambile ngayi, ‘Ou ukwiza munyima yami unampitakana, ndaba niye wekalileko oho ami shilolo nihemuwe.’ ” 16Ku nceshe zendi zakwinzala, nimwetu tunatambulu mfuywezi za kulishiyashiya. 17Nyambi wapanikile Ndayano kupitila muli Moshesha, ngoboni nceshe na kupwisha binezi na Yeshu Kilishitu. 18Kowa muntu wamona Nyambi, ngoboni Mwanendi umo pele ou walifweka na Nyambi, ou uli mu kapumpo ka Tatiyendi, niye wunamutontololo.

Wupaki wa Yowano Mukakuzubilisha

(Mateo 3:1-12; Mako 1:1-8; Luka 3:1-18)

19Ebye nibyo apakile Yowano oho bakulwane ba Bayunda ba mu Yelushalema batumine bakankombela na Balevi* na kwipula Yowano ngayi, “Kati obe yani?”

20Yowano kaliha wakanine kukumbula, ngoboni wambile shiwahe ngayi, “Kaliha ami Kilishitu.”

21 # Nday 18:15, 18; Mala 4:5. Bamwipwile kami ngayi, “Pe obe yani? Kati obe Eliya ndi?”

Yowano wakumbwile ngayi, “Kaliha ami Eliya.”

Bamwipile kami ngayi, “Kati obe Muluwe ndi?”

Yowano wakumbwile ngayi, “Byo.”

22Niho bambile kukwendi ngayi, “Obe yani? Tutongweze ngayi netu tukatongweze aba banatutumu. Kati ukulitoya ngayi obe yani?”

23Yowano wakumbwile ngonehe ambile muluwe Ishaya ngayi,

“Ami lizu lya mukakubilika mulibelelengwa ngayi,

‘Ololenu nzila ya Mwene.’ ”

24Baya bantumwana bafumine ku Bafwalishi, 25niho bepwile Yowano ngayi, “Ndabangani ukuzubilisha, ndi obe kaliha uli Kilishitu hinge Eliya hinge muluwe?”

26Yowano wakumbwile ngayi, “Nikuzubilisha na mema, ngoboni mukatikenu muli ou mukubula kulimuka. 27Niye ou ukwiza munyima yami, ami kufwanina kushobola mishulo ya makatulo wendi nifwako.”

28Nimwabyo ebye byatendiwile mu Mbetani munciza ya Yondana, oku Yowano azubilishilenga.

Mwana Mbelele wa Nyambi

29Mutena wakulundamina, Yowano wamonene Yeshu heza kukwendi, pe wambile ngayi, “Monenu, Mwana Mbelele wa Nyambi ou ukufumisha wubi wa bakakaye! 30Niye ou natoyele ngayi, ‘Munyima yami mukwiza muntu wamunene kumpitakana, ndaba wekalileko oho shilolo nihemuwe.’ 31Nanami kaliha namulimukile, ngoboni ninezi na kuzubilisha na mema, ngayi Baishalela bamulimuke.”

32Yowano wapakile ngayi, “Namonene Moyo wa Nyambi hiwushulumuka hahendi ngonehe litela kufuma kuyilu. 33Hinge noho kaliha namulimukile, ngoboni ou wantumine mukuzubilisha na mema, wambile kukwami ngayi, ‘Ukamona Moyo Wakuyela hiwushulumuka na kwikala ha muntu, niye uya ukazubilisha na Moyo Wakuyela.’ 34Ninamono, niho nikumitongweza ngayi niye Mwana Nyambi.”

Bandongesha ba Yeshu ba muntanzi

35Ha mutena wakulundamina, Yowano kami wemanine kuyo na bandongesha bendi babili. 36Oho amonene Yeshu henda, wambile ngayi, “Monenu, Mwana Mbelele wa Nyambi!”

37Bandongesha bendi babili bayuvwile ebye ambile, pe bakonkele Yeshu. 38Yeshu oho ashetukile, wamonene ngayi balinakumukonka, niho abepwile ngayi, “Mukushinga bishini?”

Bambile kukwendi ngayi, “Labi, wekalanga kuti?” (Labi, kununguluka ngayi Mulongeshi.)

39Yeshu wakumbwile ngayi, “Yekenu mumone.” Niho bayile nendi. Shengile shikati sha wulikumi na mutanu na shimo. Bakamonene oku ekalilenga, pe bonzele nendi mutena uyo.

40Anduleu mukonzo wa Shimoni Pita wengile umo wa babili baya bayuvwile ebye ambile Yowano, pe wakonkele Yeshu. 41Ha kutatika wawanine yayiyendi Shimoni, pe wamutongwezele ngayi, “Tunawana Meshiya.” (Elye lizina lya Meshiya likununguluka ngayi Kilishitu.) 42Wamuletele kuli Yeshu.

Oho Yeshu amutilaminine wambile ngayi, “Obe Shimoni mwana Yowano, ngoboni ukatumbiwa ngayi Kefwashi.” (Elye lizina likununguluka ngayi Pita, kutontolola ngayi, “Limanya.”)

Yeshu ukwihana Fwilipu na Natanele

43Ha mutena wakulundamina, Yeshu wahanganikile bya kuya ku Ngalileya. Wawanine Fwilipu, pe wambile kukwendi ngayi, “Nkonke!” 44Fwilipu wengile wa ku Mbeteshayinda, ku munzi wa Anduleu na Pita. 45Fwilipu wawanine Natanele niho amutongwezele ngayi, “Tunawana ou Moshesha atikitile byendi mu libuka lya Ndayano, uya kami bamiluwe batikitile byendi. Niye Yeshu wa ku Nazaleta mwana Yoshefwa.”

46Natanele wamwipwile ngayi, “Kati ku Nazaleta kukutwesha kufuma shuma shashiwahe ndi?” Fwilipu wamukumbwile ngayi, “Yeka umone.”

47Oho Yeshu amonene Natanele heza kukwendi, wambile ngayi, “Monenu Kaishalela wakupwisha, mumwendi mowa mahalo!”

48Natanele wepwile ngayi, “Ukundimuka nahiti?”

Yeshu wakumbwile ngayi, “Nakumona oho wekala munceto ya mutondo wa mukuyu, oho Fwilipu shilolo akwihane.”

49Natanele wambile ngayi, “Mulongeshi, uli Mwana Nyambi! Uli Mwene wa Ishalela!”

50Yeshu wambile ngayi, “Ukukulupila ndaba namba kukwobe ngayi nakumona munceto ya mutondo wa mukuyu ndi? Ukamona byuma byabinene byakupitakana ebye!” 51#Shi 28:12. Wambile kami ngayi, “Nikumitongweza kupwisha ngayi mukamona liyilu likashinkuluka, kami mangeloyi a Nyambi akakandama na kuhuluka hali Mwana Muntu.”

Obecnie wybrane:

Yowano 1: KK2008

Podkreślenie

Udostępnij

Kopiuj