Romiko lạgitʼ Pạul Apostolakʼ ciṭhi 2
2
Isorakʼ bicạr
1 #
Mat 7.1; Luk 6.37 Jãhãege noa iạte eṭakʼkoe dusiko enḍekhan uniń metaea, amakʼ ạnḍuṅteakʼ do okortam? Am do eṭakʼkom dusiyetʼkore apnarge cetʼ dusi mente bam sạbudokʼ kana? Ente eṭakʼko dom dusiyetʼkoa menkhan am do onagem kạmikana. 2Baḍaegea bon okoe nonkanakʼko kạmikan Isor do onko hok reakʼgeye bicạrkoa. 3Oka kạmi lạgitʼ eṭakʼkom dusiyetʼko ona kạmige am hõm kạmiyetʼ khan enḍekhan cetʼ Isorakʼ sạjại khonem paskao daṛeakʼa? 4Am do Isorakʼ asambheṛ daya, sahao daṛe ar soborim neṅghaoetʼtaea. Am dom hiṛiń akada, Isorakʼ noa daya do kại khone ạcur ruạṛetʼmea mente.
5Menkhan amakʼ mon do keṭecʼgea; am do kại khon mon ạcur bam khojkana. Onate Isorakʼ edre tis sodorokʼ, enhilokʼ lạgitʼ amakʼ bakhra sạjạyem sõcjoṅ kana. Ar unrege Isorakʼ dhorom bicạr do sodorokʼa. 6#Ser 62.12; Kạh 24.12 Uni do mitʼke mitʼ hoṛ akoakʼ kạmi lekae halawakoa. 7Okoe sombhuri salakʼ bhage kạmikote Isor ṭhen khon ṭhonok, man ar bin maraokʼ jionko khojkan, onkoge Isor do jaejug jione emakoa. 8Menkhan okoe akoakʼ sana lekako senokʼ, ar sạriyakʼ baṅ bataokate bedhoromakʼko bataoetʼkan, Isor do onko ạḍi bạṛicʼe sạjạikoa. 9Okoe bạṛicʼakʼko kạmikan onko mimitʼko do duk saset ar santaoko ńama. Pạhilre Jihudiko, ar ona tayom do boṅgan hoṛ jạtrenko. 10Menkhan bhageakʼ kạmikanko do ṭhonok, man ar sulukko hameṭ joṅa. Pạhilre Jihudiko ar ona tayom do boṅgan hoṛ jạtrenkoge. 11#Bib 10.17 Ente Isor ṭhen mẽtʼãhã beṅgetʼakʼ do bạnukʼ anaṅ.
12Moseyakʼ ạn-ạri bahre tahẽkate okoeko kạiyetʼkan onko do begor ạntegeko nosṭokʼa. Menkhan okoe ạn bhitrire tahẽkateko kạiyetʼ onkoakʼ bicạr do ạn hotetege hoyokʼa. 13Okoe eken ạn reakʼ kathako ańjometʼkan onko do Isor samaṅre dhorom doko baṅkana, menkhan ạn lekate calakʼkankoge Isor do dhorom menteye ataṅkoa. 14Boṅgan hoṛ jạtrenko do Moseyakʼ ạn bako ńamakada, menkhan enrehõ onko do apnar khonge ạn lekako kạmiyeda, ar ạn bako ńamakatʼre hõ onko do apnar lạgitʼ ạn kanako. 15Ente ạn lekate oka lekge ona do onkoakʼ ontorrege ol menakʼa. Ar onkoakʼ bibek hõ ona gohageye emetʼkana. Onkoakʼ hudisge oka oka jokhecʼ doe dusikoa, arhõ oka jokhecʼ doe onko sejokʼa. 16Oka hilokʼ Isor do Jisu Mạsi hotete manwakoakʼ okoakʼkoe bicạra enhilokʼge ona do sodorokʼa. Ar okaṭakʼ bhage sombatiń porcaretʼkan ona lekage bicạr do hoyokʼa.
Ạn-ạri ar Jihudiko
17Am do apnarte Jihudiyem ńumogokʼ kana? Am do Moseyakʼ ạn-ạrikorem hirlạ joṅkana ar apnarte Isorren hoṛ mentem gorbokʼ kana. 18Isor okae khojkan ona hõm baḍaegea ar okaṭakʼ bhageakʼkan ona dom aṅgoceda, ente ạn-ạri khonge ona sikhnạt dom ńamakada. 19Am dom hudiseda kãṛãko horem udukʼ akokana. Ar ńutre okoe menakʼko onko ṭhen do marsal lekam hudisokʼ kana. 20Amakʼ hudisre, bebujko dom sudhrạuetʼkoa ar ạn-ạri reaṅ sikhạuna bako ńamakatʼ hoṛ dom cetʼako kana. Ạnre akel ar sạritetʼ menakʼ iạtege noako dom hudis aṭkareda. 21Bhagegea, eṭakʼ hoṛkom cetʼakokanre am do cedakʼ bam cetʼjoṅ kana? Am dom porcareda, “Alom kombṛoya,” Menkhan amge cetʼ bam kombṛoyeda? 22Am dom menetʼkana, “Alom laṭghaṭa,” Menkhan amge cetʼ bam laṭghaṭeda? Am ma murtikom hirkhạwako kan, menkhan amge cetʼ murtikoakʼ mundilte bolokate bam kombṛoyeda? 23Am do ạn-ạrikotem gorbokʼ kana, menkhan amge ạn bam bataoetʼte Isorge cetʼ bam henostawae kana? 24#Jes 52.5 (LXX) Sonot sostorre olakana, “Ape iạtege boṅgan hoṛ jạtrenko do Isorakʼ ńutumko henostawakʼ kana.”
25Ạn-ạrikom senakʼkan khan enḍekhan khatna do porhoanakʼ kangea, menkhan ạn-ạri bam bataoetʼ khan khatna akanre hõm Isor samaṅre do bin khatna akan hoṛ lekanam. 26Onate jãhãe bin khatna hoṛ ạn-ạrikoe manaoetʼ khan enḍekhan Isor do cetʼ khatna akan hoṛ mente bae aṅgocea? 27Am ṭhen ma coṅ olakʼ ạnko menakʼge ar khatna hõm khatna ocoakange. Menkhan ạn-ạriko bam bataoetʼ khan okoe bin khatna akanre hõ ạnkoe manaoetʼ, uni do cetʼ ạn bam bataoetʼkante bae dusimea?
28Eken bahre secʼte okoeye Jihudikan uni do khạṭi Jihudi doe baṅkana. Ar hoṛmo bahre secʼte khatna akanicʼ hõ khạṭi khatnayicʼ doe baṅkana. 29#Bib 30.6 Menkhan ontorte okoe doe Jihudikan uni kangeae khạṭi Jihudi. Ar khạṭigeye khatna akan reakʼ kạmi hõ ontorrege hoyokʼa. Ona do sonot Jiu reakʼakʼko kana, olakʼ ạnko pańjae reakʼ do baṅkana. Nonkan hoṛ do manwa secʼ khon sarhao do bako ńama, menkhan Isor secʼ khon sarhao doko ńamgea.
Obecnie wybrane:
Romiko lạgitʼ Pạul Apostolakʼ ciṭhi 2: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.
