1 Korinthiko 7
7
Baplakʼ reaṅ
1Ape okako reaṅpe ol akawạdiń, ona reakʼ roṛ ruạṛiń emape kana. Okoe bae baplakʼ enḍekhan uni doe bhageyetʼgea; 2Menkhan goṭa ṭạnḍige loṭghuṭi hoyokʼ kana, onate mimitʼ herel hoṛren do rinicʼtetʼe tahentaema, ar mimitʼ maejiuren hõ jãwãetetʼe tahentaema. 3Hoṛmo secʼte herel do acʼ rinicʼtetʼ oka ńam reakʼ lek kantae onageye emaema; ar onkage rinicʼtetʼ hõ jãwãetetʼe emkataema. 4Rinicʼtetʼakʼ hoṛmo do eken acʼ eskarakʼ do baṅkana menkhan onare jãwãetetʼakʼ hõ ektiạri menakʼtaea ar onkaleka jãwãetetʼakʼ hoṛmo hõ acʼ eskarakʼ do baṅkana, menkhan onare rinicʼtetʼakʼ hõ ektiạri menakʼa. 5Alope apan ạpinokʼa; menkhan solha mitʼkate koejoṅ lạgitʼ thoṛa din begarre tahẽ hataṛokʼpe; ona tayom do ar hõ mitʼ ruạṛokʼpe jemon apeakʼ bin sambṛaokʼ iạte Soetan aloe biḍạupe. 6Iń do bạń hukumape kana bickom aṛakʼape kan lekageń roṛeda. 7Sanam hoṛge iń lekako hoyokʼma! Menkhan Isor ṭhen khon mimitʼ hoṛ do apan ạpin daya danko ńamakada. Mitʼ hoṛakʼ dan do mitʼleka ar eṭagicʼakʼ dan do eṭakʼleka.
8Baṅ bapla akanko ar rạnḍi maejiukoń metako kana, onko hõ iń lekako tahẽlen khan onko lạgitʼ bhage hoykokʼa; 9menkhan apnarte okoe bako sambṛao daṛeakʼ onko doko baplakʼma, ente hoṛmo reakʼ sanate lokʼ khon baplakʼge boroṅ bhagea. 10#Mat 5.32; 19.9; Mrk 10.11,12; Luk 16.18 Bapla akanko do noageń hukumako kana, iń do baṅ menkhan Probhu Isorge; bạhu do jãwãetetʼ ṭhen khon aloe chaḍaokʼma; 11menkhane chaḍao emanlen khan uni do ar aloe baplakʼma, menkhan jãwãetetʼ sãote arhõe mitʼ ruạṛokʼma. Jãwãe hõ bạhutetʼ aloe bạgiyema.
12Menkhan eṭakʼko do ińiń metakokana, Probhu Isor do baṅ; jãhãe boeharen Mạsire bepạtiạuicʼ bạhui tahentae ar bạhutetʼ do uni tulucʼ tahene rạjige khan enḍekhan jãwãe do uni aloe bạgiyema; 13onkage rinicʼtetʼren hõ Mạsire bepạtiạuicʼ jãwãeye tahentae ar jãwãetetʼ do uni tulucʼ tahene rạjige khan enḍekhan uni do jãwãetetʼ aloe bạgiyema; 14ente rinicʼtetʼ hotete uni bepạtiạricʼ jãwãe ar jãwãetetʼ hotete uni bepạtiạricʼ rinicʼtetʼ doe sonot ocoakana; ar onka baṅ hoylen khan aperen gidrạko do besaphako hoykokʼa, menkhan Isor samaṅre onko do besapha doko baṅkana. 15Menkhan uni bepạtiạricʼ jãwãetetʼ se rinicʼtetʼ do chaḍaokʼe menetʼ khan uni doe chaḍaokʼma; ar nonkanakʼ obostare uni pạtiạricʼ boeha se misera do bae golam akana. Menkhan Isor do sulukte tahen lạgitʼgeye hohoakatʼ bona. 16E ayo, cekatem baḍaea, am do amren jãwãeyem bańcao daṛeaea se baṅa? Ar E baba am hõ cekatem baḍaea, amren bạhum bańcao daṛeaea se baṅa?
17Onate Probhu Isor okoe okalekae dohoakade ar Isor okoe oka lạgitʼe hohoakawade, uni do onka lekageye calakʼma. Noa hukum do goṭa manḍerrenkogeń emakokana. 18Jãhãe hoṛ khatna akane hoho ocoakana? Enḍekhan aloe bin khatna ruạṛokʼma? Bin khatnage jãhãeye hoho ocoakana? Enḍekhan uni do aloe khatnakʼma. 19Khatna ar bin khatna do cetʼ hõ baṅkana, menkhan Isorakʼ hukum dohoege asolakʼ kana. 20Isor okoe oka lạgitʼe hohoakawade, uni do onarege tahẽ akane tahenma. 21Amem hoho ocolenre am do cetʼ golamem tahẽkana? Onate alom dukokʼa; ar sạdhinokʼ reakʼ ạtem ńam khan enḍekhan ona do hataome. 22Golam tahenre Probhu Isor okoeye hohoakawade uni do Probhu Isor hotetegeye sạdhin ocoakana. Onkage okoe sạdhin tahenreye hoho ocoakan uni do Mạsiren golame hoyakana. 23Ape do aema damtepe kiriń akana; onate manwakoren golam do ar alope hoyokʼa. 24E boehako, Isor okoe okalekae hohoakawade, uni do Isor samaṅre onkageye tahenma.
25Kũạ̃ri kuṛiko reaṅ do Probhu Isor ṭhen khon jãhãn hukum bạń ńamakada. Menkhan Isorakʼ daya ńamkate pạtiạr minạńte ińiń bujhạuetʼ lekageń roṛeda. 26Ạḍi harkhet ar saset reakʼ oka okte hijukʼkan ona lạgitʼ ińakʼ bujre okoe okaleka menakʼpe onka tahenge bogea. 27Am do cetʼ bạhu menae tama? Enḍekhan bạhu bạgiye reakʼ do alom kurumuṭuya. Am do cetʼ bạhu khonem chaḍao akana? Enḍekhan bạhu joṅ reakʼ do alom kurumuṭuya. 28Menkhan amem baplalenre am do bam kạiyetʼ kana. Ar jãhãe kũạ̃ri kuṛiye baplalenre uni hõ bae kạiyeda. Menkhan okoeko baplakʼkan onko do hoṛmore jalako ńama, ar iń do ona khon rukhiyạpeyiń meneda.
29E boehako, noageń meneda, okte do khaṭo akana. Onate ńit khon bạhuanko do begor bạhuanko lekako tahenma; 30ar rakʼetʼkanko do bin rarakʼko leka; ar rạskạkʼkanko do bin rạskạkʼko leka; ar kirińetʼkanko do cetʼge jemon aloko dohojoṅma; 31okoe dhạrti reakʼakʼko laṛcaṛetʼkan, onko do purạpuri aloko laṛcaṛma; ente noa dhạrti reakʼ rup do pheraokʼ kana. 32Menkhan iń doń menjoṅ kana, jemon nir dạndipe tahen. Bin bapla akanicʼ do Probhu Isor reaṅe dạndikʼ kana, uni doe hudiseda cekate Probhu Isore kusi ocoyea. 33Ar bapla akan hoṛge gharońj reakʼ doe dạndikʼ kana; cekate uni do rinicʼtetʼe kusi ocoya mente. 34Bạhu ar kũạ̃ri kuṛi reaṅ hõ begar menakʼa. Bin baplayicʼ maejiu do Probhu Isor reakʼakʼko reaṅe dandokʼ kana, jemon hoṛmote ar Jiute sonote tahen; menkhan bapla akan kuṛi do gharońj reakʼe dandokʼkana, cekate uni do jãwãetetʼe kusi ocoyea. 35Noa katha do apeakʼ porho lạgitʼgeń roṛeda. Iń do bạń ladeape kana, bickom oka jạruṛa ar okaṭakʼ bhagea ona lạgitʼgeń udgạuetʼpea, jemon ape do goṭa monte Probhu Isorakʼpe kạmi daṛeakʼ.
36Ar jãhãe acʼe cikhnạ akade acʼren kũạ̃ri kuṛi tulucʼ bin leke beohareda menteye bujhạuetʼ khan, ar kuṛiyakʼ baplakʼ umer hoyakan khan ar baplaye reakʼ jạruṛe bujhạu khan, enḍekhan uni do acʼakʼ sana lekae kạmi ma. Are onkae khan bae kạiyeda, bapla ocoakin. 37Menkhan jạruṛ bạnukʼtae iạte acʼakʼ monre ektiạri menakʼtaete jãhãeye mone muruk akatʼ ar ontorreye khạṭi akawan baṅma acʼren kũạ̃ri kuṛi bin baplaye tahẽ ocowaea mente, enḍekhan uni hõe beseda; 38onate okoe acʼe cikhnạ akade acʼren kũạ̃ri kuṛiye baplayede uni do artetʼe beseda.
39Jãwãetetʼ tinạkʼ din jiwetʼe tahen, unạkʼ din rinicʼtetʼ do tolgeye tahena, menkhan jãwãetetʼe gocʼlen khan uni doe sạdhinokʼa, ar jãhãegeye kusiyae unigeye bapla daṛeaea, menkhan uni hoṛ do Probhu Isorrenge jemone hoyokʼ. 40Menkhan ińakʼ bujre uni do enkageye tahẽlen khan artetʼ bhạgane hoyokʼa; ariń meneda, iń do Isorren Jiu hotete noa katha doń roṛeda.
Obecnie wybrane:
1 Korinthiko 7: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.