मर्कुस् 3
3
या खर्बे म्ही फेन्बल
(मत्ती १२:९-१४; लुका ६:६-११)
1येसु देबेएनो यहुदीमा र्हुब् तबे दीम्री स्येःज्यी। हुजुरी या खर्बे म्ही गीः मुबल। 2येसुचे दुःब न्हबे दीन्री हुजु म्हीत फेन्न लज्यी पङ्सम् थेङ्त दोस् ल्हइदील पङ्ज्यीम् डेत्-डेत् म्हीमाचे थेङ्त ज्यब्ज्यीम् च्याटीब मुबल। 3येसुचे हुजु या खर्बे म्हीत, “खज्यीम् जम्मइ गुङ्री रपो” बी सुङ्ज्यी। 4हुजु लीप्चे येसुचे थेङ्यीमात, “दुःब न्हबे दीन्री नीयम् अनुसार खजु लक् स्य्हेङ्ब तब? ज्यबे लक् स्य्हेङ्ब वुइ नइबे लक् स्य्हेङ्ब? थर्नलब वुइ स्यीनलब?” बी ङ्योत्जेत्ज्यी। तर म्हीमा कुटीले टीज्यी। 5ओसेम् थेङ्यीमाकी कोङ्बे सेम्त खेम्ज्यीम् येसुइ थु ङ्योङ्ज्यीम् बोमो खज्यी। ओसेम् येसुचे या खर्बे म्हीत, “एइ या स्यल् लोउ” बी सुङ्ज्यी। हुजु म्हीचे थेइ या स्यल् लज्यी, ओसेम् थेइ या फेन्ज्यी।
6ओसेम् यहुदीमा र्हुब् तबे दीम्चे फरीसीमा डोङ्ज्यीम् ग्योन्-ग्योन्नो हेरोद ग्यल्बोइ म्हीमाज ङ्यीज्यी। ओसेम् येसुत खले सेत्प बी तम् डीज्यी।
7हुजु लीप्चे येसु र्हङ्की डबमातेङ् बक्च्य ग्येरी स्येःजेत्ज्यी। ओसेम् हुजुरी य्हक्को म्हीमा थेङ्की लीप्-लीप् खज्यी। थेङ्यीमा गालील प्रदेस्, यहुदीया, 8यरुसलेम, इदुमीया ओसेम् यर्दन क्योम्सङ्की टुरोसतेङ् सीदोनकी रेइ-रेइकी ग्लामाचे खज्यी। तलेपङ्सम् थेङ्चे स्य्हेङ्जेत्पे तेङेन्की लक्माकी बारेरी थेङ्यीमाचे थ्येःब मुबल। 9ओसेम् येसुचे य्हक्को म्हीमाचे र्हङ्त अप्लेखइ बी र्हङ्की लागीरी डबमात दोङ्ग गीः बोउ बी सुङ्जेत्ज्यी। #मर्कुस् ४:१; लुका ५:१-३ 10थेङ्चे य्हक्को म्हीमात फेन्न लजेत्पल तज्यीम् नेत् स्यप्पे जम्म म्हीमा येसुत छुबरी तोर् इ मोर् इ तटीब मुबल। 11ओसेम् म्हङ् स्यप्पे म्हीमा जम्मचेनो येसुत म्रङ्ब साच्चेनो थेङ्की स्य्हब्री पब्लु लज्यीम् क्रीङ्ज्यीम् पङ्ज्यी, “थेङ् पर्मेस्वर्की ज य्हीन्ब!” 12तर येसुचे, “ङ खल य्हीन्ब पङ्बे तम् म्हीमात थपङो” बी म्हङ्मात कुल्जेत्ज्यी।
येसुचे चुङ् ङ्ही प्रेरीतमा दम्जेत्पल
(मत्ती १०:१-४; लुका ६:१२-१६)
13येसु गङ् गीःरी स्येःजेत्ज्यी। ओसेम् र्हङ्की सेम्री स्यीबलमा जतीत थेङ्चे ङ्होत्जेत्पल तज्यीम् थेङ्यीमा थेङ्तेङ् खज्यी। 14-15ओसेम् र्हङ्तेङ् बक्च्य ब्रबतेङ् ज्यबे सम्तर् स्येत्पे लागीरी पीत्परी ओसेम् म्हङ्मात ल्हब्लाबे लागीरी थेङ्चे चुङ् ङ्ही डबमात दम्जेत्ज्यी। थेङ्यीमात प्रेरीत पङ्बे मीन् न्हङ्जेत्ज्यी। 16येसुचे दम्जेत्पे चुङ् ङ्ही डबमाकी मीन् चुमा य्हीन्ब- सीमोन, थेत येसुचे पत्रुस पङ्बे मीन् थेन्जेत्ज्यी। 17ओसेम् जब्दीयाकी जमा याकुबतेङ् युहन्नात थेङ्चे बोअनर्गेस पङ्बे मीन् थेन्जेत्ज्यी। बोअनर्गेस पङ्बलमी मु गुरुङ्बइ जमा य्हीन्ब। 18ओसेम् अन्द्रीयास, फीलीप, बारथोलोमाइ, मत्ती, थोमा, अल्फायसकी ज याकुब, थेदीयस, य्हुल्त म्होइबे सीमोन, 19ओसेम् लीक्यम् येसुत चुङ्नलपीन्बे यहुदा इस्करीयोत।
येसुतेङ् बालजीबुल
(मत्ती १२:२२-३२; लुका ११:१४-२३; १२:१०)
20हुजु लीप्चे येसु दीम्री स्येःज्यी। ओसेम् देबेएनो हुजुरी य्हक्को म्हीमा र्हुब् तबल तज्यीम् थेङ्तेङ् थेङ्की डबमाचे चब सोल्बे ल्होङ्गोम् अयङ्। 21येसुइ म्हेम्यमाचे चु थ्येःज्यी, ओसेम् थेङ्त बोर्बरी थेङ्यीमा डोङ्ज्यी। तलेपङ्सम् थेङ्यीमाचे येसुइ सेम् ठेगान्री अरे बी पङ्टीबल मुबल।
22ओसेम् यरुसलेम ग्यम्चे खबे धर्म लोप्पोन्माचे पङ्ज्यी, “चुत म्हङ्माकी ग्यल्बो बाल्जीबुल म्हङ् स्यप्पल मुब, हुजु म्हङ्की सक्ती ग्यम्चे म्हङ्मा ल्हब्लाबल य्हीन्ब।” #मत्ती ९:३४; १०:२५
23तर येसुचे थेङ्यीमात र्हङ्ज ङ्होत्ज्यीम् अर्थरी सुङ्ज्यी, “सैतान्चे सैतान्त खले ल्हब्लाब खम्ब? 24य्हुल्की म्हीमा र्हङ्-र्हङ् न्हङ्री छेत्ज्यी पङ्सम् हुजु य्हुल् थीब। 25ओसेम् दीम्की म्हीमा र्हङ्-र्हङ् न्हङ्री छेत्ज्यी पङ्सम् हुजु दीम् थीब। 26होलेनो सैतान्तेङ् थेइ लीप्चे ब्रबलमा न्हङ्री छेत्ज्यी पङ्सम् सैतन्की य्हुल्एनो नास् तब। 27खल्चे पङ्लेनो बङ्ज्येन् म्हीइ दीम्री वङ्ज्यीम् हुजु दीम्की स्य्हेमा य्हो लज्यीम् बोर्ब म्हइज्यी पङ्सम् थेचे ङोन्ग्यम् हुजु बङ्ज्येन् म्हीत चुङ्ज्यीम् खीःथोब। हुजु लीप्चे थेचे हुजु दीम्की स्य्हेमा य्होलब खम्ब।
28“ङ एङ्यीमात देमेन्नो पङ्ब, म्हीमाचे स्य्हेङ्बे जम्म पापमातेङ् जम्मनो खीसइतीज्यीम् स्य्हेङ्बे पापमाएनो क्षम यङ्ब खम्स्ये मुब। 29तर पबीत्र आत्माइ बीरुद्दरी खीसइतीबलत खेमेएनो क्षम यङ्स्ये अरे। तलेपङ्सम् हुजु खेमेएनो क्षम अयङ्बे पाप य्हीन्ब।”#लुका १२:१० 30म्हीमाचे येसुइ ल्ही न्हङ् म्हङ् मुब पङ्बल तज्यीम् थेङ्चे चोले सुङ्बल य्हीन्ब।
येसुइ अमतेङ् अलेमा
(मत्ती १२:४६-५०; लुका ८:१९-२१)
31हुजु लीप्चे येसुइ अमतेङ् अलेमा थेङ् मुबे दीम्री दोखज्यी। ओसेम् थेङ्यीमा दोरीनो रप्ज्यीम् येसुत ङ्होत्परी डेत्डेत्त पीत्ज्यी।
32येसुइ कोरोरो य्हक्को म्हीमा टीटीबल मुबल, ओसेम् डेत्-डेत्चे थेङ्त, “थेङ्की अमतेङ् अलेमा थेङ्त दोरी ब्रेन्टीबल मुब” बी पङ्ज्यी। 33येसुचे, “ङइ अमतेङ् अलेमा खल य्हीन्ब?” बी ङ्योत्जेत्ज्यी। 34ओसेम् येसुचे र्हङ्की कोरोरो टीटीबे म्हीमात स्हीःज्यीम्, “ङइ अमतेङ् अलेमा चुमानो य्हीन्ब। 35पर्मेस्वर्चे म्हेन्ब र्हङ्बे लक् स्य्हेङ्बलमानो ङइ अले, अङतेङ् अम य्हीन्ब” बी सुङ्ज्यी।
Obecnie wybrane:
मर्कुस् 3: WTDG
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2024 (Active), Wycliffe Bible Translators, Inc. All rights reserved.
