পত্থম 8
8
পানি বান শেজত্
1জাহাজত্ নোহ আর তা লগে যিদুক্কুন ঘোর্বো আর ঝাড়্বো য়েমান এলাক্ গোজেনে তারারে মনত্ রাগেয়্যে। তে পিত্থিমীয়ান উগুরে বোইয়্যের্ পাদেল, সেক্কে পানি কমা ধুরিলো। 2ইয়েন আগেদি মাদি তলেত্তুন্ বেক্ পানিগান নিগিলেনা আর আগাজর্ বেক্ ফাদা মারানি নাঢা গেলঅ সেক্কে আগাজত্তুন্ ঝড় পড়ানায়ো থামেল। 3সেক্কে মাদি উগুরে পানিগান্ সোরেই যাহ্ ধুরিলো, আর পানি বান আরম্ভ অবার একশ পঞ্চাশ দিন পরেদি দেগা গেলদে পানিগান বোউত্ কুমি যেইয়্যে। 4সাত মাস সতর দিনোত্ জাহাজছান্ অরারট মুড়োবো উগুরে যেইনে আক্সো থেলঅ। 5ইয়েন পরেদিয়ো পানি কুমি যাহ্ ধুরিলো, আর দশ মাসর্ পোইল্যা দিনোত্ মুড়োবো মাঢাবো দেগা দিলো।
6ইয়েন চোল্লিশ দিন পরেদি নোহ জাহাজর যে জানালাগান বানেইয়্যে সিয়েন খুলিলো, 7আর সে জানালা গানদি তে এক্কো গাঙ্ কবা ইরি দিলো। মাদি উগুরেত্তুন্ পানি শুগেই ন-যানা সং গাঙ্ কবাবো ইন্দি-উন্দি ঘুরাঘুরি গরানাত্ এলঅ। 8মাদি উগুরেত্তুন্ পানি কুমি গেলঅ নাহি সিয়েন জানিবাত্তে নোহ ইয়েন পরেদি এক্কো কোদোর্ ইরি দিলো। 9মাত্তর্ সেক্কেয়ো গোদা পিত্থিমীয়ান উগুরে পানি এলঅ, সিয়েনত্তে কনঅ জাগাত্ টেং থবার জাগা ন-পেইনে তে জাহাজত্ নোহ ইধু ফিরি এলঅ। নোহ আত্ বাড়েইনে সে কোদোরবোরে জাহাজত্ তা ইধু নিলো। 10সে পরেদি তে আরঅ সাত দিন বাজ্জেই থানার পর আর সে কোদোরবোরে জাহাজত্তুন্ ইরি দিলো। 11সাজোন্যে অক্তত্ কোদোরবো জাহাজত্ নোহ ইধু ফিরি এলঅ আর তা ঠুদোত্ জলপাই গাজত্তুন্ লগেলগ্ ছিনি আন্যে এক্কান পাদা এলঅ। সেক্কে নোহ বুঝিলোদে মাদি উগুরেত্তুন্ পানি কুমি যেইয়্যে। 12তে আর সাতদিন বাজ্জ্যেই থানার পর আরঅ সে কোদোরবো ইরি দিলো, মাত্তর্ এবেরা সিবে আর তাইধু ফিরি ন-এলঅ।
13নোহর বয়জ সেক্কে ছয়শ এক বজর চলের্। সে বজরত্ পত্তম মাসর্ পৌইল্যা দিনোত্ মাদি উগুরেত্তুন্ পানি সুরি গেলগোই। সেক্কে নোহ জাহাজ ছালান্ খুলিনে রিনি চেলঅ, মাদি উগুরেগান্ শুগেই যার্। 14দ্বি মাসর সাদেশ্ দিনোত্ মাদিগান এক্কুবারে শুগেই গেলঅ।
15সেক্কে গোজেনে নোহরে কলঅ, 16“তুই তঅ মোক্কোরে আর তঅ পুয়োগুন আহ্ তারা মোক্কুনোরে লোইনে জাহাজত্তুন্ নিগিলি আয়, 17আর সে লগে বেক্ য়েমানুন-পেক্কুন আর বুক্কোই-আঢি বেড়েয়্যে প্রাণীগুন, অত্তাৎ যিদুক্কুন য়েমান আগন্ তারারে বেক্কুনোরে নিগিলেই আন। মুই চাং পিত্থিমীয়ানত্ তারার বংশ বোউত্ বাড়ন্ আর বংশবাড়েবার খেমতালোই তারা জনেদি বাড়ি উদোন।”
18সেক্কে নোহ তা মোক্কোরে আহ্ পুয়োগুনোরে আর তা পূদবোগুনোরে লোইনে জাহাজত্তুন্ নিগিলি এলঅ। 19তারা লগে বেক্ য়েমানুন-পেক্কুন আর বুক্কোই-আঢি বেড়েয়্যে প্রাণীগুন, অত্তাৎ মাদি উগুরে ঘুরি বেড়েয়্যে বেক্ প্রাণীগুন নিজো জাদ্ অনুসারে নিগিলি এলাক্।
গোজেন নাঙে য়েমান-উৎসর্ব
20সে পরেদি নোহ লগেপ্রভুর্ নাঙে এক্কো ডালিপূজো বানেল আর পত্তি জাদর গম্ য়েমান্ আর পেগত্তুন্ কয়েক্কো নেযেনে সে ডালিপূজোবো উগুরে পুজ্যে-উৎসর্বর অনুষ্ঠান গুরিলো। 21লগেপ্রভু সে উৎসর্বর বাজ্ পেইনে হুজী অলঅ আর মনে মনে কলঅ, “মান্জ্যর কারনে আর কনদিন্ মুই মাদিগানরে অভিশাব্ ন-দিম, কিত্তে চিগোনত্তুন্ ধুরি দঅ-মান্জ্যর মনানি ভান্ন্যেয়ন্দি। এবেরা যেবাবোত্যে মুই বেক্ জেদা পরান্বলাগুনোরে শেজ্ গোজ্যং সেবাবোত্যেগুরি আর কনদিনঅ ন-গুরিম। 22যেদকদিন এ পিত্থিমীগান্ থেবঅ সেদকদিন সুদোম মোজিম্ বিজি ছিদেনা আর খেত-খেত্তি কাবানা, ঠান্ডা আর গরম, ঝার্কাল আর গরমকাল আহ্ দিন আর রেত্ ওই থেবঅ।”
Obecnie wybrane:
পত্থম 8: CBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Copyright © 2021 Bangladesh Bible Society
