Luk 13

Tolla ge seŋe ta se pe

1Ge sok mbe go me ɗe, nda a̰me ma deɗ-ɗa wan Zeso fare ge see nda ge Galile ma go: Dwam a̰me go, Goformo̰ Pilaɗ hṵṵ num sok kirgi num swàm digi kirwiɗ ge kaŋ kogor ge àa vyan kee tuwaleya hon Dok ma way. 2Gwan ge num janna go: Ḛ dwaɗ go, ge yal mbe ge dee ge nda ge Galile mbe ma pagal pe, num sone gḛḛ waɗe maa ka̰a̰m gegene ma peɗ de? 3To, mbi jan ḛ go, fare mbe be fare ge fareba ne to. Ɗaŋɗe, kaɗɗa ḛ seŋe ta ja se to, ḛ mbo suu mbe go ca. 4O̰o̰ num ge wol pɔgwa wa gezi zi ge zok ge haal ge Silowe ne guu num pagal ma ɗoo, hṵṵ num no ma ɗe, ḛ dwaɗ go num sone waɗe maa ka̰a̰m ge ɗogle ge kaa no suwal ga̰a̰l Jerusalem diŋ ma peɗ de? 5To, mbi jan ḛ go fare mbe be fare ge fareba ne to, ɗaŋɗe, kaɗɗa ḛ seŋe ta ja se to, ḛ peɗ ḛ mbo ban gezi ge num sḛ mbe ma go.

Fare sḭḭ ge fere ge too ndwa to pagal

6Guwa̰, Zeso ɗege kee num fare sḭḭ iya go: Ndu a̰me ɗu, a ge fere ge ka donna ge na gaaso on̰or zì. Mbo ya ge dwaɗɗa ge ɓyare ndwa tolla, seɗ a̰me digi to. 7Sok mbe go jan ndu ge kee tèmel gaaso on̰or zì go: Kuwa gale, del mà no taa ge mbi mbo ya ɓyare fere ndwa ge fere mbe digi, mbi be seɗ a̰me digi dwam ɗu to. Chiya ne gezi: Ge dape wa ame sok bàŋ kay de? 8Ndu ge kee tèmel gaaso on̰or zì mbe gwan ge ne janna go: Bagezok, n̰a ne aa del ge madel mbe no, mbi wa nuusi ne pe, mbi kan kaŋ kogor ma njoo ne pe zì me, 9ge dwam ge mbo no ge zḛḛ ya ma zì mbo tol ndwa mekyala de. Kaɗɗa go to, mo gaa chal ne gezi.

Zonna ge gwale ge sulgu ne dwam sabaɗ go

10Ge dwam sabaɗ a̰me go ɗu, Zeso ka hate nda fare ge zok kee kaɗeya ge Yahuɗ ma way zì. 11Dasene no, gwale ge sulgu a̰me ɗu ge on̰om ge sone ngwage ne ya se har del wol pɔgwa wa gezi zi, ge go ne pool ge mḛḛ digi temel go fyalag to, wa ya ge num buwal zì. 12Sok ge Zeso kuwa ne, tol ne jan ne go: Gwale, mo tuguɗi mbe aa mà ne. 13Ee na tok ma ge ne pagal. Sok mbe go gaw, ne gòŋ mwaɗe digi temel, ee pe sale Dok. 14Ɗaŋɗe, ga̰a̰l ge zok kee kaɗeya ge Yahuɗ ma way laa vḛḛne, ge zonna ge Zeso zo̰o̰ ndu ge dwam sabaɗ go pe. Ɗege jan ɓase ma go: Eeya ma ho̰ nè vin̰a go, ndu ge diige mbiya kee tèmel ge dwam ge menengal ma pul zì, a ma̰ kaŋ tele ne go ndu mbo ya ge dwam mbe ma pul zì zon tene waɗme to de? A be ge dwam sabaɗ go to! 15Bagezok gwan ge ne janna go: Nda ge mbuɗi nda ndwa ma! Dwam sabaɗ go no, ndu a̰me ge ḛ buwal zige, day saa na nday koo na tisi ge na kir go, gene ne mbo hon mam to de? 16Mà kaɗ ge gwale mbe ge no rusu ge Abraham ne zì, ge Saytan vuwa ne no se, har del wol pɔgwa wa gezi zi de. Be kee kwaɗa ge go, àa saa ne digi ge tuguɗi ge na ne zì, ge dwam sabaɗ go to de? 17Sok jan fare mbe ma no go ɗe, daŋso mbo ya wan ne nda ge ho̰o̰l ma peɗ. Kaɗɗa ge ɓase ma me ɗe, laa saal waɗe num pool ge kaŋ ajab ge ne sḛ ga kee num ma pe.

Fare sḭḭ ge sugu ndwa ge zaaso njalsan̰ ne

Mat 13.31-33; Mrk 4.30-32

18Zeso jin̰a no go iya: Muluk ge Dok ne dḭḭ sḭḭ ge da go de? Mbi ngay ne mà ge ma̰ kaŋ go de? 19A dinna ge sugu ge àa tol ne mutard ndwa, ge ndu ge gaa kaŋ hê ne, doo ne na gaaso zì no go. Do̰o̰ digi no, seŋe no ge mojo̰o̰ ɔwara go, njoole ge ɗege pḭḭ digi ma gaa mbo ya ee vum ge ne tok ma digi no.

Fare sḭḭ ge jìn̰al hore ne

20Gwan jan no go iya: Mbi ngay muluk ge Dok ne mà ge ma̰ kaŋ de? 21A dinna ge jìn̰al hore ge ndu gwale hee ne, kan ne ge swam peɗem koro taa ndwa zì go, ɗiŋ mbo ɗege ne digi ge ɓul mɔɗwag.

Zok wa ge gwarse

Mat 7.13-14, 21-23; 8.11-12

22Zeso sok mbo mbo Jerusalem yà go, ka kale mbo suwal ga̰a̰l mage suwal jiyale ma diŋ, ka hate fare ge Dok ne me. 23Ndu a̰me ɗu ele ne go: Bagezok, a nda hoɗege guwa mbo seɗ monna ne no kade? Gwan num mbe ge kaa sok mbe go ma janna go: 24Ḛ harge ta mbo waɗ ge zok wa ge gwarse go. Ago, mbi jan ḛ ne no, nda gḛḛ ge ḛ buwal zige ma mbo ɓyare go ma wuwa zok wa mbe, àa mbo seɗ vin̰a to.

25Dwam ma mbo ya, ge ndu ge zok mbo ɗege digi, wa dibi zok wa. Ge zum ya, ḛ wa ɗege dabe zok wa, ḛ ka janna go: Bagezok-goo! Hage i zok wa! Mbo gwan ge ḛ janna go: Mbi kuwa sok ge ḛ mbo no ge ya to. 26Sok mbe go ḛ mbo ɗege janna go: I ka zamma mage njoɗɗa ge mo dagre, mo ka hate nda fare ge sok seɗ ta ge i suwal ga̰a̰l ne ma go. 27Mbo gwan ge ḛ janna iya go: Mbi kuwa sok ge ḛ mbo no ge ya to, ḛ mbo kaal ge mbi, ḛ peɗ mbe ge kee fare ge maa vin̰a go to ma. 28Sok mbe ge àa dibi ḛ ge ne zum yà, gaa sok ge fiyaso mage kin̰a sulla ma mbo kàɗ-ɗa ne go ne. Ge sok mbe yà, ḛ mbo kuwa Abraham, Isak, Jakob mage nda ge zwagre Dok wa ma peɗ ge muluk ge Dok ne zì yà. 29Nda mbo mbo ge lee mbii ya, ge lee kuu ya, ge lee chiya ya, ge lee ham ya me, àa mbo kaɗ ge taabul wa go ge muluk ge Dok ne zì yà. 30Ḛ kuwa go, nda ge no guwa̰ yà ge sego ma, àa mbo seŋe ya zḛḛ, ge no zḛḛ ge sego ma me ɗe, àa mbo gwan guwa̰ yà me.

Zeso ndaa ya na swày ta zì

Mat 23.34-39

31Ge sok mbe go me ɗe, Farisi a̰me ma gwan ta ya Zeso ta guwa, àa jan ne go: Ɗege ge sok mbe go, mo ɓyare sok mo pagal, ago Heroɗ ɓyare vin̰a go hun mo. 32Ne sḛ gwan ge num janna go: Ḛ mbo jan An̰a mbe go: Ne za̰a̰ kwaɗa: Mbi yan on̰om ge sone ma go, màno mage kin̰are, mbi zon nda, dwam ge taa me ɗe, a mbi tèmel ma wa aaya ne. 33Ɗaŋɗe, màno, kin̰are, dwam ge ne pagal go ge, ɓyare go mbi mbo zḛḛ ge mbi tèmel. Ago, wa̰a̰ ndwa go ndu ge zwagre Dok wa seɗ swày ge Jerusalem yà ge go ne see swày ge sok ge ɗogle go.

34Ḛ nda ge suwal ga̰a̰l Jerusalem diŋ-ge ma! Ḛ nda ge suwal ga̰a̰l Jerusalem diŋ-ge mbe ge hun nda ge zwagre Dok wa mage mbal nda ge temeya ma gezi ge njal ma! Ndwa gyana ga ge mbi ɓyare kwate ḛ ya mbi ta, dinna ge baare na̰ kwate na van ma ge na faa pul zì go, ano peɗ puy, ḛ be vin sok mbe to. 35Ḛ kuwa, Dok mbo swaɗ zok ge ḛ tok go. Ɗaŋɗe, mbi jan ḛ waŋ go, ḛ mbo daa gwan kuwa mbi ndwa to baɗ, ɗiŋ ge go ḛ jin̰a ge ḛ wa zì go: «Dok ke wa tare ge ndu ge mbo ya ge dḭḭl ge Bagezok ne pagal.»#Mkm 118.26.

Obecnie wybrane:

Luk 13: kiaGRB

Podkreślenie

Udostępnij

Kopiuj