Maatiusiup Aglangit 8

Jiisusiup Aaqqiksininga Angummik

Maakusi 1:40-45; Luukasi 5:12-16

1Jiisusi qaqqamit ammuangmat, inugiakturjuat malikpaat. 2Takugit angummut upaktauvuq, sivuuragijaujumik paqtiqtumut, taanna saanganut siiqqurluni, uqaqpuq, “Ataniiq, pijumaguvit, paqtirunniiqtittunnaqparma.”

3Jiisusiup isagluni aktuqpaa, uqautillugu, “Pijumavunga, paqtirunniirit!” Tavvainnaq angut taanna paqtirunniiqpuq. 4Tavva Jiisusiup uqautivaa, “Ikpigusutsiarit! Nalliannutuinnaq unikkaaqtailigit; tunirrusiqtitsijimulli ailirit qaujisaqtauniaravit; inungnut qaujijautsiaqullutit aaqqiktaunirnik, Muusisiup tunisiqujininga maliglugu tunirrusiriaqtulirit.”

Unataqtuksait Angajuqqaatta Ukpirninga

Luukasi 7:1-10

5Jiisusi Kapiirniamut tikiliqtillugu, Ruumamiut unataqtuksaqutinginnut 100-nut angajuqqaangujuup Jiisusimuaqpuq, qinuvigillugu uqaqpuq: 6“Ataniq, pijiga qanimalluni nalangmat angirranni, aulajjagunnanngimmalluunniit aksummarialuk ilungiqsualluni.”#8:6 Iniqtuumatsuni

7Jiisusiup uqautivaa, “Ainiaqpunga aaqqigiaqturlugu.”

8Unataqtuksailli angajuqqaangatta kiuvaa, “Ataniq iglunnut itiqtitsijariaksaq naluqqutivunga; uqatuinnalirit aaqqiqujilutit, pijiga tavva aaqqiktauniaqpuq. 9Uvangattauq angajuqqaaqarmigama, unataqtuksaqutiqarlunga sialaarijannik,#8:9 Sialaarijannik uvvalu kipalunnik ilangannut uqaruma, ikunngarit! Taikunngaqpuq tavva; asianut uqaruma, qaigit! Qaivuq tavva; pijinnut uqaruma, una sanalauruk! Sanavaa tavva.”

10Jiisusiup tamanna tusaramiuk kamaniarivaa, maliktini uqautivait, “Sulijumik uqautivassi, taimaak ukpirniqaqtigijumik, qaujilaunngilanga Isarialimi. 11Qularnanngittumik uqautivassi inuit amisut tikittumaaqput, siqiniup nuivianit nipivianillu, iksivaqatiqariaqturlutik Aiprahaammik, Aisakimik, Jaikumiglu, Guutiup Ataniuvingani qilangmi. 12Taakkua tavvunngaqtuksaulauqtuugaluat Guutiup Ataniuvinganut, igitaujumaaqput taaqturjuarmut, tavvani qianiqarumaaqput aannianirmullu aglirulaalutik.” 13Jiisusili unataqtuksait angajuqqaangannut uqaqpuq, “Angirralirit; tamatuminga ukpirijarnik tunisiviuniaqputit.”

Unataqtuksaillu angajuqqaangatta pijinga tavvainnaq aaqqiktauvuq ikarrami tavvani.

Jiisusiup Inungnik Amisunik Aaqqiksininga

Maakusi 1:29-34; Luukasi 4:38-41

14Jiisusili Piitturuusiup iglunganuarami, tavvani takuvuq Piitturuusiup sakinganik arnamik, qanimmalluni nalajumik uutirnaqtumik qanimmasiqarluni. 15Jiisusiup arnaq aggangitigut akturmagu; qanimmasiup uutirnaqtuup qimakpaa, arnaq makippuq, Jiisusi pijitsiraliqpaa niriniaqtanginnik.

16Unnungmat, inuit Jiisusimuarujjivut anirnirlungnut ilummiqtausimajunik amisunik; Jiisusiup anirnirluit inungnit anitippait uqausirmut, qanimajullu tamarmik aaqqikpait. 17Tamanna Jiisusiup piniarnirilauqpaa, nalauttaijuup Aisaiasiup uqausirilauqtangit nalautsiliqullugit imailijut: “Taassuma qanimmasivut tiguvait, aanniarutigijavullu aullarutillugit.”

Jiisusimu Maliktiujumajut

Luukasi 9:57-62

18Jiisusi inugasagjuanik avatiminiittunik qaujimagami, ilinniaqtini tasiup akianuaquvait. 19Piqujanik ilisaijiup Jiisusi upakpaa, uqautillugu, “Ajuriqtuiji, malingniaqpagit namutuinnaq aigaluaruvit.”

20Jiisusiup kiuvaa, “Tiriganiat sitiqaqput, tingmiallu ulluqaqput, Inuulli Irninga nallangaviksaqanngilarluunniit taqaiqsirviksamik.”

21Taassuma asiata ilinniaqtiup Jiisusi uqautivaa, “Ataniq, ataataga iluviriaqtukalaurlagu.”

22Jiisusiup kiuvaa, “Malinnga, tuqungajut tuqujiamingnik nangminiq iluviqsilaurlit.”

Jiisusiup Anurimik Ikullaqtitsininga

Maakusi 4:35-41; Luukasi 8:22-25

23Jiisusi umiamut ikingmat, ilinniaqtingita malikpaat. 24Takugillu, tavvainnaq anurirjuamut tikitauvut, umiaq malingnut qalliraqtaqtaunirmut immaliqpuq; Jiisusili sinikpuq. 25Ilinniaqtingita upakkamijjuk tupaarlugu, uqautivaat: “Ataniq! Saputilauqtigut, tuquligaaliratta!”#8:25 Tuqugiavikkatta

26Jiisusiup kiuvait, “Sungmat kappiasuktualuuvisi? Ukpirnikiluarassi!” Makittluni anuri imarlu iniqtiqpaak, anuraarunniiqpuq ikullatsiarluni.

27Taakkua kamaniammarikput, uqarlutik, “Una qanuittuugami aglaat anuriup imaullu naalaktangat?”

Jiisusiup Angutiingnik Marruungnik Anirnirlungnut Itiqtausimajuungnik Aaqqiksininga

Maakusi 5:1-20; Luukasi 8:26-39

28Jiisusi tasiup akianut tikimmat nunaup Gaataramiut nunangata ilanganiittumut, angutiingnut marruungnut upaktauvuq, iluvit qairusunginnit pijuungnut, anirnirlungmut itiqtausimajuungnut, kappianammarilirmatik inungnut tamanna nuna najuqtangak upaktaujumajunniilauqpuq. 29Taakkuak nillialiqpuuk qaigalaarlutik, “Uvattingnut qanuiliuriaqtuqpit Guutiup Irninga? Aanniatitsijaqtuqpit suli piviksaq nalliutilauqtinnagu?”

30Tamaani qanigijaani nunami kuukkuusigasagjuaqtaqaqpuq nirinasuktunik. 31Anirnirluit Jiisusimut qinuvut, “Uvattinnik anititsiniaruvit, kuukkuusigasagjuanut itiquniaqpattigut.”

32Jiisusiup uqautivait, “Anilirissi,” inuungnillu taakkungnangat anivut kuukkuusinut itirlutik; kuukkuusigasagjuallu uimmaglutik pangaliksivut innaarurmut, ijukkaramik tasirmut ipivut.

33Angutiit kuukkuusinik paiqsijit qimaksivut nunalingnuarlutik, tamatumingalu piniarniurataaqtumik unikkausiqaqput, taakkuak angutiik anirnirlungnut itiqtausimalautuuk sulaurmangaatik uqausirivait. 34Takugit, nunalingnit inulimaat Jiisusimut upagutivut; takugamijjuk, qinuvigivaat nunamingnit aullaqullugu.

Obecnie wybrane:

Maatiusiup Aglangit 8: EAIBR

Podkreślenie

Udostępnij

Kopiuj