Tuuma 4

Pita la Yɔn paaɛ Kiinduma nɛŋan

1Pita la Yɔn n ze' tɔgera bɔ'ɔra nɛreba la, ti Pu'uhegɔ nɛŋa daana, la kpɛ'ɛma se'em n biheri pu'uhegɔ yire la, la Sadusiiduma wa'am ba zi'an na, 2ti ba suure nyiie la ban pa'ali nɛreba la gee muula yeti Yezu puan a ki gee ihege boi mɛ la. 3Ŋwana zuo ti ba nyɔgɛ ba ta pagɛ yiimbeere se'ere n sɔi la yinɛ daa pun lu mɛ. 4Gee sɛba n wum yelehum la zo'e zo'e nam bu mɛ, ti ba kãlɛ dɛna wuu buraahi tuha anuu.

5Ti la iŋɛ ti yiimbeere la, ti naduma, kiinduma la gɔnmi'ineba la lagehɛ taaba Yerusalɛm puan, 6ti Annas n de malema kiima, la Kaifase, Yɔn, la Alɛgezanda la sɛba woo n de malema kiima yireduma la za'a wa'am na. 7Ban yu'ɛ ba na ti ba zɛ'a ba nɛŋan la, ti ba soke ba yeti, “Beni paŋa, bii yu'deni puan ti ya nyaŋɛ tum ŋwana wa?” 8Ŋwana ti Pita n pirɛ la Fa'a Sia la yele ba yeti, “Naduma n sɔi nɛreba, la kiinduma wa, 9Ya han sɔkera tumam mɛ zina wa doohe la yelesunɛ en tum bo' nɛra n bɛ̃'ɛri, ti ya sɔkera lan iŋɛ se'em ti buraa wa nyɛ ka tibegɔ, 10baŋɛ ya zina, yamam za'a, la Izirale buuri za'a, ti buraa wa n ze' ya nɛŋan dɛna ka mɛŋa wa, dela Yezu Kiresta n de Nazareti buraa la yu'urɛ la puan. Se'em ti yamam yuum kpa', gee ti Yinɛ vo'e en a kum la puan la. 11#Yoo 118.22 Yezu wa dela

‘Kugere se'ere ti yamam mɛteba la zagehɛ la,

n nyaa de ɛ̃berɛ kugere kãtɛ.’

12Faarɛ ka boi se'em puan, se'ere n sɔi la, yu'se'ere ka boi sagbanɛ wa tiŋa bo' nɛresaaleba ti ba wan yi' de nyɛ faarɛ.”

13Nɛreba wa n nyɛ Pita la Yɔn sukpe'ene la, gee me baŋɛ ti ba dagi gɔnmi'ineba gee ba yeen dɛna la nɛreba la, ti la iŋɛ ba pakerɛ, gee ti ba le baŋɛ ti ba ni bɔna mɛ la Yezu. 14Ban nyɛ ti buraa la n nyɛ ka tibegɔ la ze' la ba la, ba ka tari se'ere ti ba wan yele de puan. 15Bala ti ba bo' ba nuurɛ ti ba yehe kiinduma la nɛŋan fɔregɛ gee ti bamam suhɛ yele la la taaba bihɛ. 16Ti ba nyaa yele taaba yeti, “Beni ti tu wan dikɛ iŋɛ ba? Se'ere n sɔi la, la ka sugɛ nɛrawoo n boi Yerusalɛm wa ninin ti ba tum la daalehum n de yelemɛŋerɛ. Tu kan ta'a sugɛ dɛ. 17Gee tumam n ka boti ti de yiregɛ zi'an woo la, bahɛ ya ti tu ka'am ba la ninmu'urɛ ti ba da le dikɛ yu'dina wa tɔgɛ zi'an, nɛreba tiŋasuka.” 18Ŋwana ti ba nyaa yi' Pita la Yɔn lebena, yele ba la ninmu'urɛ ti ba da le tɔgɛ bii pa'alɛ Yezu yu'urɛ la puan le yɛ'ɛha. 19Gee Pita la Yɔn yele ba yeti, “Lebehe ya bo' ya mɛhi nyaa, la ani suŋa Yinɛ nɛŋan ti tu kɛlehi la yamam bii Yinɛ? Gakɛ ya. 20Se'ere n sɔi la, tumam kan nyaŋɛ mum tu nɔya kan tɔgɛ sɛla ti tu nini nyɛ, ti tu tuba wum.” 21Ti ba vuuhe ba le yɛ'ɛha, gee bahɛ ba ti ba kiŋɛ. Ban ka nyɛ yele se'ere ti ba wan ze'ele namehɛ ba la, gee me le nyɛ nɛrekuuŋɔ la me. Se'ere n sɔi la, nɛrekuuŋɔ la za'a pɛgeri la Yinɛ la tibegɔ daalehum la n tum la. 22Se'ere n sɔi la, buraa wa ti daalehum tum ka puan la gani yuumpihinaahi mɛ.

Sɛba en nam la pu'uhi bɔta sukpe'ene

23Ban bahɛ ba la, ti ba kiŋɛ ba pu'uhi taaba la zi'an, ta yele ba malema kiinduma la, la kiinduma la en yele ba se'em. 24#Yɛh 20.11; Nɛh 9.6; Yoo 146.6 Ba taaba la n wum la, ba za'a zɛkɛ la ba kuuhi buyina, kaahɛ bo' Yinɛ yeti, “Gaŋeza'a Daana se'em n naam saazuo la timpaberɛ wa, ateko la sɛla woo n boi bu puan, 25#Yoo 2.1-2 la dela fum n doohe Fa'a Sia la puan, doohe tu yaaba Deviti n de fum yameŋa la puan yeti,

‘Ŋwani ti sɛba n dagi Yuuduma wa suya nyiie,

ti nɛreba la ti'iha yeleyooro?

26Tiŋa wa zuo na'duma vaaɛ ihege mɛ,

Tiŋa wa zuo kpɛ'ɛnduma maahum mɛ zɛ'a

ti ba zabɛ la Daana la, ti ba zabɛ la a Kiresta la.’

27 # Mat 27.1-2; Mak 15.1; Luk 23.1, 7-11; Yɔn 18.28-29 Se'ere n sɔi la, tinkãtɛ wa puan, Hɛrɔd la Pɔntiyɔsi Palete ta ta' la sɛba n dagi Yuuduma la, la sɛba en de Izirale nɛreba la lagehɛ la taaba ti ba zabɛ la fum Fa'a yameŋa Yezu, se'em ti fum bi'ihɛ en; 28ti a tum sɛla woo ti fum nu'o la fum puti'irɛ pun diŋɛ maahum ti la tum la. 29Nananawa tu Daana, bihɛ ba vuuhego wa, gee la fum bo' fum yamehi wa sore ti ba muulɛ fum yelehum la sukpe'ene, 30gee ti fum mɛŋa tiɛ fum nu'o la fum tibɛ, gee ti nyalema la daalehum tuna Fa'a yameŋa yu'urɛ Yezu wa puan.” 31Ban pu'uhɛ la, zi'an la ti ba lagehɛ bɔna la miim mɛ, Ti Fa'a Sia la pirɛ ba za'a ti ba tɔgɛ Yinɛ yelehum la la sukpe'ene.

Sakereba la tɔrɛ ba lɔgerɔ la taaba

32 # Tuum 2.44-45 Nananawa, Lan de se'em la dela, sakereba la za'a tari la suyinɛ la putɛ'yinɛ la taaba, ti ba se'em ka sɔna a lɔgeseko bii en tari sɛla, gee ba se'em woo n tari sɛla dela ba za'a bunɔ. 33Ti Yezu tuntuneba la nyɛ pankãtɛ, muulɛ ban nyɛ sɛla la doohe Daana Yezu ihegere la, ti zu'uhegɔ kãtɛ bɔna ba za'a zuo. 34Naha ka boi ba puan, se'ere n sɔi la, basɛba zo'e zo'e n tari samana bii yiya koohe a mɛ tari ligeri la na. 35Ba tari i na biŋe la Yezu tuntuneba la nɛŋan, ti ba tari i tɔta bɔ'ɔra nɛrawoo n ka tari sɛla. 36Ti Levi buuri nɛra n wa bɔna ba puan, yehe Sapuruse na ti a yu'urɛ yi'ira Yosefe, gee ti tuntuneba la sigɛ en Banabase, (de vuurɛ dela “kpemehego dayua”). 37Eŋa koohe la a samanɛ, tari ligeri la za'a na biŋe tuntuneba la nɛŋan.

Obecnie wybrane:

Tuuma 4: GBTP

Podkreślenie

Udostępnij

Kopiuj