Tuuma 20

Pɔɔl kiŋɛ Masedoniya la Girise tihi puan

1Gbiregere la n ma'ɛ la, ti Pɔɔl tum yi' a zahereba la na, kpemehe ba, gee keehe ba, gee yɛ'a Masedoniya. 2En ta paaɛ bilam doohe kaaɛ tihi la za'a kpemehe sakereba la suŋa suŋa ba'ahɛ la, a kiŋɛ la Girise, 3Bilam ti a ta kɛ̃ ŋmarehi sitã. A ta maahum mɛ ti a kiŋɛ Siriya, ti Yuuduma la maahum gbirege la en, ti bala la zuo, ti a iŋɛ a puti'irɛ ti a lebe Masedoniya. 4Ti Faruse dayua Sopata n ze'ele Beroya la, kɔlegɛ en, nyaa dikɛ Aristakuse, Sekunduse n yehe Tɛsalonika na, Gayɔse n yehe Dɛɛbi, la Timoti nyaa dikɛ Takikuse la Tirofimuse n yehe Esiya. 5Bana woo diŋɛ la nɛŋa ta gura tu Torowase, 6gee ti tumam zom uureŋɔ kiŋɛ Filipi tiŋa, ti boroboro zaŋa de'eŋo la tole, ti dabeha anuu daarɛ ti tu paaɛ ba Torowase, ti tu kɛ̃ bilam dabeha ayopɔi.

Pɔɔl keehe ti a kiŋɛ Torowase

7Dabeha ayopɔi pɔhega daarɛ, ti tu lagehɛ na ti tu di Daana tuulum dia la, ti Pɔɔl nyaa suhera suhega la ba, la eŋa n maahum ti a bahɛ yiimbeere la. A tɔgɛ la bala ta paaɛ yu'uŋɔ sunsua. 8Ti ba lamehɛ bugum zo'e zo'e bɔ'ɔ la n boi saazuo ha ti ba bɔna ku puan suhera la puan. 9Ti budibele paalega ti ka yu'urɛ yi'ira Yutikuse, zi'a lɛm takole nuuren, ti guum zɛɛ en ti a giha gee ti Pɔɔl kelum tɔgera wɔgera. Ti budibela wa gihi tole nyaa ta ze'ele yitugema butã puan la, lu ta paaɛ tiŋa, ti ba ɔ̃begɛ en ti a ki mɛ. 10Gee Pɔɔl sige mɛ, ta nyigele bia la zuo, ɔ̃begɛ en a nu'uhen, gee yeti, “Da bahɛ ya ti la dɛna daaŋɔ gee a vom ka kiŋɛ zi'an.” 11Ti Pɔɔl le zom saazuo la ha, ti ban ta di Daana tuulum dia la ba'ahɛ la, ti a le pɔhɛ suhega la ba tara tara ti beere ta yilegera, ti a nyaa bahɛ ba gee kiŋɛ. 12Gee budibela la n lu na la, vo'e mɛ ti ba tari en kiŋɛ la pupeelenkãtɛ.

Torowase yɛ'a Militusi

13Ti tu kiŋɛ ta zom uureŋɔ yɛ'a Asɔsi, ti'iha ti tu wan paaɛ Pɔɔl bilam dikɛ en, se'ere n sɔi la, a pun iŋɛ a puti'irɛ ti a kan doohe ko'om puan. 14En tu'uhɛ tu Asɔsi la, ti tu dikɛ en pa'ahɛ kiŋɛ Mitilene. 15Tu ze'ele la bilam dikɛ uureŋɔ, ti yiimbeere ti tu paaɛ Kiyose. Ti yiimbeere le yɛ'ɛha ti tu paaɛ Samose, ti dabehe se'ere n tagelɛ la, ti tu paaɛ Militusi. 16Se'ere n sɔi la, Pɔɔl iŋɛ a suure ti a mɔm zo'e Ɛfisu mɛ la a da gã'arɛ Esiya la, a nini ba' mu'ɛ la a paaɛ Yerusalɛm, la han wan ta'am ni iŋɛ, a paaɛ ni dabeha pinuu de'eŋo daarɛ la.

Pɔɔl tɔgɛ bo' Ɛfisu kiinduma

17Militusi puan, ti Pɔɔl bɔna gee tum sɔɔleŋa bo' Ɛfisu, yɛta ti a boti a zi'ire mɛ la lageŋɔ la kiinduma la. 18Kiinduma la n wa'am na paaɛ en la, ti a yele ba yeti, “Yamam mɛhi mi' mam daa boi la ya se'em, ta paaɛ daan se'ere daarɛ ti mam pɔhɛ nɛ Esiya puan. 19N tuni bɔ'ɔra Daana la la sigehe mɛŋa la nintam, ŋmibera mageha sɛ'a ti Yuuduma wa ni maahum ti a paaɛ mam. 20N ka zagehɛ ti n tum se'ere n wan tara suŋɛ. N muuli yelehum la mɛ bɔ'ɔra ya, gee pa'ala ya nɛrekuuŋɔ puan, dɔla yire yire, 21gee yɛta Yuuduma la, la Girikiduma ti ba tee ba suya lebe Yinɛ zi'an, gee sakɛ bo' Yezu 22Ti nananawa, mam Fa'a Sia la da'aberɛ wa ye' la Yerusalɛm, n ka mi' sɛla n wan ta iŋɛ mam bini, 23han dagena Fa'a Sia la mɛŋa n yeti mam tiŋa woo ti n paara ka puan yeti, ti paka la mɛlehegɔ en ga' gura mam bini. 24#2 Tim 4.7 Gee mam ka biheri n vom la ti bu tara vuurɛ bo' mam, n han wa nyaŋɛ ni ba'ahɛ n tuunɛ wa, la tuunse'ere ti n to'e tu Daana Yezu ze'a ti n muulɛ faarɛ yelehum wa, n de Yinɛ zu'uhegɔ yɛla wa.

25“Nananawa, mam mi' ti yamam sɛba woo ti n tari ya doohe muula Yinɛ sɔ'ɔlum wa yɛla la, ya ayima kan le nyɛ mam la ya niho. 26Bala zuo ti mam yɛta ya zina wa la ninmu'urɛ ti ya se'em han bɔregɛ, ya taala ka dole mam, 27se'ere n sɔi la, mam daa ka zagehɛ ti n yele la ninmu'urɛ, Yinɛ puti'irɛ za'a n de se'ere. 28Biheri ya, ya mɛhi suŋa, gee me biha piihi la ti Fa'a Sia la dikɛ ya ti ya biha la. Ya biha Yinɛ lageŋɔ la ti a dikɛ a mɛŋa Dayua ziim to'e ku la. 29Mam mi' ti mam han tole ba'ahɛ, sahi n obere wan wa'am na lagum ya, kan bahɛ piihi la. 30Basɛba wan pun yehe yamam mɛŋa puan gɛ̃ta yelemɛŋerɛ la, ti ba ta'am pã'ahɛ zahereba la basɛba ti ba doohe ba poore. 31Bala zuo la, ani ya wire, gee tɛra ti yuuma atã ti mam ka go'e n tɔgera bɔ'ɔra ya yu'uŋɔ la wuntɛɛŋa, ka'ana ya ayima ayima la ninmu'urɛ la nintam. 32Gee nananawa, mam dikɛ ya ita la Yinɛ nu'uhen la a zu'uhegɔ yelehum la puan. Yelehum sebo n wan ta'am mɛ ya ze'ele, gee bo' ya tɔtɛ la sɛba n pee ba mɛhi la. 33N ka fã nɛra salempɛɛlega, bii salema bii futo. 34Ya mɛhi la mi' ti mam daa tuni mɛ la n nu'uhi suŋera n mɛŋa la sɛba n tuni la mam. 35Yele ana wa woo puan la, mam iŋɛ mɛ pa'ali ya, ti tu han tuna bala tu wan ta'am suŋɛ sɛba n ka kpe'em la, doohe la tumam n tɛri tu Daana Yezu yelehum la. Se'ere n sɔi la, eŋa yeti, ‘Sunkãtɛ boi mɛ la se'em n bo'ori, gana se'em n to'ohe.’ ”

36En tɔgɛ ŋwana woo ba'ahɛ bo' ba la, a kpa' la duma la ba za'a suhɛ bo' ba. 37Ti ba kaahɛ la taaba zo'e zo'e, gee ti ba nyaa doohe kɔkɛ Pɔɔl kɔkɛ kɔkɛ, 38ti ba suya sagum mɛ yele yele woo en yele ba yeti ba pun kan le malum nyɛ en la niho le yɛ'ɛha la. Ti ba nyaa tari en na ki'ihɛ uureŋɔ.

Obecnie wybrane:

Tuuma 20: GBTP

Podkreślenie

Udostępnij

Kopiuj