Tuuma 17

Tɛsalonika gbiregeri

1Pɔɔl la Silase n wa'am na gaŋɛ Amfipolisi la Apolonia tihi tole la, ba wa'am na paaɛ la Tɛsalonika, zi'an ti Yuuduma zamehegɔ yire bɔna bini. 2Ti Pɔɔl kiŋɛ ta kɛ̃ bini wuu en ni pun ita se'em la, vo'ohego dabeha atã ti eŋa la Yuuduma la tɔgera yɛla gulehegɔ la puan, 3ti a pa'ala ba, gee niira bɔ'ɔra ba ti la de la Kiresta la namehɛ gee ihege kum puan. Gee nyaa yele ba yeti, “Yezu kana wa, se'em ti mam muula bɔ'ɔra ya wa en de Kiresta la.” 4Ti ba zo'e zo'e nam yelehum la, dikɛ ba mɛhi pa'ahɛ Pɔɔl la Silase puan, ti sɛba me n de Giriki sɛba en de Yinɛ zɔteba la, me zo'e zo'e ta ta' la pɔgese'ehi n de zuo duma la me ka pɔ'ɛ. 5Gee nyuure n kɛ̃ Yuuduma la basɛba, ti ba me nyɛ nɛreyaalehi sise'ehi n boi da'a, ti ba pa' ba poore, ti ba nyaa lagehɛ taaba bahɛ ti gbiregeri kãtɛ sige tiŋa la puan. Ban eere Pɔɔl la Silase ti ba tari ba na ze'ele nɛrekuuŋɔ tiŋasuka la, ba kiŋɛ ta zabɛ mɛ la Yason yire. 6Ban ka nyɛ Pɔɔl la Silase bini la, ti ba vɛ' Yason la sakereba basɛba wa'am tiŋa la kpɛ'ɛnduma nɛŋan na, gee vɔɔla yeti, “Nɛreba wa en dole tuleha timpaberɛ wa kpabera la, nyaa paaɛ ka'lam me na, 7ti, Yason to'e ba ki'ihɛ a yire. Ba za'a iti la sɛla n ka dole Kaiza ze'elego la. Ba yeti, naba ayima me n boi ha ti a yu'urɛ yi'ira Yezu.” 8Nɛrekuuŋɔ la kpɛ'ɛnduma la n wum ŋwana la, la daam ba mɛ. 9Ti ban to'e bahega ligeri Yason la sɛba ti ba lagum nyɔgɛ ni la zi'an ba'ahɛ la, ba bahɛ ba mɛ ti ba kiŋɛ.

Pɔɔl la Silase boi Beroya

10Yu'uŋɔ kuŋɔ mɛa puan ti sakereba la tari Pɔɔl la Silase ta bahɛ sore ti ba kiŋɛ Beroya tiŋa. Ban ta paaɛ bini la, ba kiŋɛ la Yuuduma zamehegɔ yire puan. 11Yuuduma bana to'e ba gana Yuuduma sɛba n boi Tɛsalonika puan la mɛ, se'ere n sɔi la, ba to'e yelehum la ti ba muulɛ bo' ba la mɛ la ninmu'urɛ, gee viihɛ gulehegɔ la puan daarɛ woo ti ba bihɛ nyaa yɛla la ani la bala bini. 12Ŋwana zuo la, ba zo'e zo'e nam yelehum la mɛ ta ta' la Giriki pɔgehi la buraahi zo'e zo'e n de zuoduma. 13Gee Yuuduma sɛba n boi Tɛsalonika la n ta wum ti Pɔɔl le muulɛ yelehum la me, ba ɛ Beroya tiŋa puan mɛ, ti ba ihege wa'am bilam me na, ti ba gbirege gee tu'ule nɛrekuuŋɔ la. 14Bilam bilam ti sakereba la tari Pɔɔl kalam kiŋɛ ateko ko'om nuuren, gee ti Silase la Timoti yee pooren. 15Sɛba n tari Pɔɔl kina la, tari en kiŋɛ la zaaɛ zaarɛ ta paaɛ Atense, ti en pa'alɛ ba ba wan iŋɛ se'em bahɛ ti Silase la Timoti wa'am na paaɛ en ka'lam ba'ahɛ la, ti ba keehe en gee lebe.

Pɔɔl boi Atense

16Pɔɔl n boi Atense gee gura Silase la Timoti la, a suure sagum mɛ paaɛ paaɛ, la tinkãtɛ la n pirɛ la baga la. 17Bala a pɔhɛ yetɔgum mɛ la zamehegɔ yire la puan la Yuuduma la la Yinɛ zɔteba la, la da'ahi puan daare woo la sɛba en wan bɔna bini. 18Ti Epikureya la Sitoyiki yɛmduma wa'am na ŋmɛ'ɛra nɔkpe'ene la en. Ti sɛba yeti, “Gerego kuna me boti ku pa'alɛ la bem?” Ti sɛba me yeti, “A tɔgeri la tihi sise'ehi tingama yɛla.” (Se'ere n sɔi la Pɔɔl n muuli Yezu faarɛ yelehum la yeti a ki mɛ gee ihege la.) 19Ti ba tari en wa'am Areopagus tugum zi'an la puan na, nyaa soke en yeti, “Bahɛ ti tu baŋɛ pa'alesaaŋa wa ti fum pa'ala vuurɛ en de se'em? 20Se'ere en sɔi la, fum tari la pa'alesaanɛ wa'am tu tuba puan na, bala ti tu bɔta ti tu baŋɛ ku vuurɛ.” 21Atenseduma woo, la saama n ki'ire ka puan, ka tari ba saŋa ita sɛla gana ba yɛta bii ba kɛleha sɛla n de yele paalɛ.

22Ti Pɔɔl ihege ze'ele Areopagus wa nɛŋan yeti, “Atenseduma wa, mam nyɛ ti ya ba dɛna la Yinɛ pu'uheba sadɔseko woo puan paaɛ paaɛ. 23Se'ere n sɔi la, mam n doohe ya tiŋa wa za'a kaaɛ mum la, gee ma'ɛ n mɛŋa bihera ya lɔgeseto ti ya na'aha la, mam nyɛ la kaabegɔ bimbine deyima ti gulehegɔ gulehɛ iŋɛ de zuo yeti, ‘Yinɛ se'ere ti tu ka mina.’ Bala zuo la, yinɛ se'ere ti ya na'aha gee ka mina la, Yinɛ dinɛ n bala ti mam muula bɔ'ɔra ya wa. 24#1 Nad 8.27; Aza 42.5; Tuum 7.48 Yinɛ se'ere n naam timpaberɛ wa la sɛla woo n boi de puan la. Yinɛ se'ere n de Saazuo la timpaberɛ wa zuo Daana la ka kɛ̃'ɛ̃ri zɔnɔ ti saaleba dikɛ nu'uhi mɛ puan. 25Bii nɛreba tuna bɔ'ɔra en wuu a boti la sɛla, se'ere n sɔi la, eŋa en bo'ori saala woo vom, la sɛla woo vo'ohum. 26Yinɛ wa naam la nɛra ayima ma'a, ti nɛre-ina wa puan ti nɛreba buuri buuri wa pirɛ timpaberɛ wa zuo za'a, eŋa en bu ba woo ba bɔŋa saŋa ba bɔŋa saŋa. Eŋa n bo' ba za'a ba beene ba beene la ba bɔŋa ze'a ba bɔŋa ze'a. 27Yinɛ iŋɛ ŋwana wa, ti nɛreba wan ɛɛra en. Ba wan tu'una ɛɛra en, ta nyɛ en, gee ti Yinɛ me pun ka zaaɛ la tu se'em. 28Se'ere n sɔi la, ‘Eŋa zuo ti tu vɔna, gee kina gee dɛna nɛreba wa,’ wuu ya mɛŋa mageha guleheba en yele se'em yeti,

‘Se'ere n sɔi la, tumam me dela a kɔma la.’

29Tumam n yi de yinɛ kɔma la, la dagi ti tu ti'iha ti Yinɛ naanɛ wan ani mɛ wuu salema, bii salempɛɛlega bii kugere bii naanɛ se'ere ti ba gulɛ bii naanɛ bii ti'ihegɔ seko en yehe asaala na. 30Saŋa daa boi ti Yinɛ daa ka dikɛ saaleba yɛmka'alum ti la dɛna daaŋɔ. Gee nananawa, a bo' nɛrawoo n boi ze'sɛka woo la nuurɛ ti ba tee, 31Se'ere n sɔi la, a looe la dabeherɛ biŋe, ti daan dinɛ daarɛ ti a wan gakɛ nɛrawoo n boi timpaberɛ wa zuo tuuntɔɔ. A wan doohe la buraa kayima ti a mɛŋa looe la, doohe eŋa puan ti putɛ'kɔ'ɔrɛ bɔna, eŋa n ihege en kum puan la.”

32Ban wum ti a purɛ a ki gee ihege la, ti basɛba pureha, gee basɛba yeti, “Tu boti fum malum tɔgɛ yele ana wa pa'ahɛ mɛ ti tu kelehe.” 33Lan paaɛ ŋwana beene la, Pɔɔl bahɛ ba mɛ. 34Gee ba puan basɛba yehe me na pa' Pɔɔl poore dɛna sakereba, Diyonisuse n de Areopagus lageŋɔ nɛra la, la pɔka ti ba yi'ira Damaris la basɛba n lagum bɔna la ba lagum sakɛ.

Obecnie wybrane:

Tuuma 17: GBTP

Podkreślenie

Udostępnij

Kopiuj