Oduu Nagayaa Ka Maatewoosii 8
8
Yesuus Namicha Tokko Fayyise
(Mar. 1:40-45; Luq. 5:12-16)
1Yesuus hennaa gaara irraa gadi bu'e, gumiin hedduu isa faana deeman. 2Yoo san namichi dhukkuba gogaa kukkutuun qabame tokko gara isaa dhufee, «Gooftaa kiyya! Yoo fedha kee ta'e na fayyisuu dandeeta» jedha'aa sagadeef. 3Yesuus harka ufii diriirsee qabeenii, «Hin fedhaa, fayyi!» jedheen; hennama san namichi dhukkuba ufii irraa fayye. 4#9:30; Mar. 7:36; Luq. 17:14; Seera Leewwotaa 14:1-32 Achiin maayessa Yesuus, «Beekkadhu! Waan kana nama tokkottillee hin himin; haata'uu ammoo deemiitii, gadichatti uf mudhisi; fayyuun kee nama maraaf akka ragaa ta'u, fayyuu keetiif kennaa Muuseen ajaje dhiyeessi!» jedheen.
Yesuus Tajaajilaa Ajajaa Dhibbaa Fayyise
(Luq. 7:1-10)
5Yesuus hennaa qachaa Qifirnaahomii seene, ajajaan dhibbaa tokko gara isaa dhiyaatee, akkana jedhee isa kadhate. 6«Gooftaa kiyya! Tajaajilaan kiyya guddisee dhukkubsatee laamshayee mana ciiseera» jedhe. 7Yesuus, «Ani dhufee isa fayyisa» jedhe.
8Ajajaan dhibbaa sun ammoo, «Gooftaa kiyya! Ati mana kiyya seenu'uuf ani nama malee miti; jechuma callaa dubbadhu, tajaajilaan kiyya hin fayya. 9Ani mataan kiyyaa abbootii baallii qaban jala jira. Loltoota uf jalatti bulchu qaba. Tokkoon deemi yoo jedheen, innillee hin deema. Kaaniin ammoo koottu yoo jedheen, innillee hin dhufa. Hojjataa kiyyaan kana hujii yoo jedheen, innillee hin hojjata. 10#15:28 Yesuus hennaa waan kana dhagaye maalalee worra isa hordofuun, «Ani isinitti himaa, Isiraa'eliin keessatti amantaa guddaa akkanaa nama qabu tokkochallee hin argine. 11#Luq. 13:28-29; Isaayyaasii Raatticha 49:12 Ani akkana isiniin jedha, namoonni hedduu isaanii baya biiftu'uutii fi dhiya biftu'uutii dhufanii, jeennata sami'ii keessatti Abirahaam, Yisihaaqii fi Yaaqoobiin woliin taa'an; 12#13:42, 50; 22:13; 24:51; 25:30; Luq. 13:28 worri jeennata keessa taa'uu malan ammoo, hulee itti booyanii fi ilkaan itti qaran gara diidaa dukkanatti gataman» jedhe. 13#9:29; 15:28 Achiin maayessa Yesuus ajajjaa dhibbaatiin, «Deemi; akkuma amantaa keetii sii haata'u» jedhe. Tajaajilaan ajajaa dhibbaallee yoma san fayye.
Yesuus Namoota Hedduu Fayyise
(Mar. 1:29-34; Luq. 4:38-41)
14 #
Qor. 1ffaa 9:5
Yesuus hennaa mana Pheexroosii dhaqe, soddaatiin Pheexroosii oo'aa fi haxaxxe'een dhibamtee ka ciifteertu arge. 15Inni harka isi'ii hennaa qaqqabe haxaxxeenii fi oo'i isii dhiise. Isiinillee kaatee isaan tajaajilte.
16Haga aduun dhiiteen maayii, namoota jinni'iin qabaman heddu isaanii gara Yesuusii fidan. Innillee dubbii ufiitiin jinnoota baasee, worra dhibame maraa fayyise. 17#Isaayyaasii Raatticha 53:4; Yoh. 1:29 Wonti Isaayaas raattichi,
«Inni dadhabbii keenna nu irraa fudhate.
Dhukkuba keennallee baate» jedhe haa raawwatamu'uuf inni kana godhe.
Worra Yesuusiin Faana Deemuu Barbaadan
(Luq. 9:57-62)
18 #
Mar. 4:35; Luq. 8:22 Yesuus namoonni hedduu akka isa marsan argee, gama akka ceeyan darasoota ufii ajaje. 19Barsiisaan Seera Muuse'ee tokko gara isaa dhufee, «Barsiisaa'a! bakka ati dhaxxu maraa si faana deema» jedheen. 20#Qor. 2ffaa 8:9 Yesuus deebisee, «Jeedalti boolla qabdi; simbirtillee mana qabdi; Ilmi namaa ammoo hulee mataa ufii itti irkifatu hin qabu» jedheen.
21 #
Mootota 1ffaa 19:20
Darasoota isaa keessaa tokko Yesuusiin, «Gooftaa'a! Duraan dursee dhaqee abbaa kiyya akka awwaalu na hoffolchi» jedheen.
22Yesuus ammoo, «Ati na faana koottu! Du'aan du'aa ufii haa awwaalatuu» jedheen.
Yesuus Bubbee Cadhisiise
(Mar. 4:35-41; Luq. 8:22-25)
23Hennaa Yesuus gara yabalaa seenu, darasoonni isaallee isa faanaa deeman. 24Dambaliin yabala liqimsuu geennaan guddisanii raafaman; hennaa san Yesuus rafeera. 25Darasoonni gara Yesuusii dhaqanii, maal bannee Gooftaa keenna! Nu hambisi jedha'aa isa dammassan. 26#14:31; 16:8 Yesuus deebisee, «Isin bada worra amantaa dhidhu'uu maaf sodaattan?» jedheen. Achiin maayessa inni ol ka'ee bubbe'ee fi dambalii teedeffate, yoma san dambaliin cadhise.
27Kana irratti namoonni maalalfatanii, «Ka bubbeenii fi dambaliin ajajamuuf kun, nama attamiiti?» jedhan.
28Hennaa Yesuus gama ceeyee biyya Gergesenoonii dhufe, namoonni lamaan jinniin dhayeeru bakka awwaalaatii bayanii itti dhufan; isaan guddisanii hammeeyyii waan turaniif haga namni karaa saniin lufuu dadhabutti sodaachisa'aa turan. 29#Mootota 1ffaa 17:18; Mar. 1:24; Luq. 4:34, 41 Isaanillee, «Yesuus, Ilma Rabbii, maal nu irraa qabda? hennaan uduu hin geenne nu rakkisu'uuf dhuftee?» jedha'aa iyyan. 30Gobbuun booyye'ee heddu, isaan irraa fagaatanii bobbayanii dheeda'aaran. 31Jinnoonnillee, «Yoo ka nu baaftuu gara gobbuu booyyotaa san nu ergi» jedhanii isa kadhatan.
32Yesuus, «Dhaqaa'a!» isaaniin jennaan, jara keessaa bayanii booyyotatti galan. Gobbuun booyye'eellee ededa irraa gugatanii gara galaanaa ariifata'aa garba keessatti liqimfamanii du'an.#8:32 du'an: dhuman
33Worri booyyee tissan baqatanii qachaa seenanii, waan ta'ee fi waan namoota seexanni qabeeru irratti ta'e maraa achitti odeessan. 34Achiin maayessa namoonni qachaa san keessaa martinuu, Yesuusiin argu'uuf dhufan; Isaan hennaa dhufanii isa argan, akka inni biyya isaanii keessaa bayee deemu isa kadhatan.
Obecnie wybrane:
Oduu Nagayaa Ka Maatewoosii 8: WLNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Arsi-Bale Oromo New Testament, Literal Type Translation © Light of Hope Ministry, 2013.
