LUKA 8

Jesuh Hluntu Nupangte

1Cia hnuaah Jesuh tu Pathian Ukhnak Thuthangpha rel in khuapui le khuatenau ah tlawng zianzo i. Hnuahlunte hlaihnih khai tel tlang i. 2Cen urhnak a phunphun le khuasia ai molh mite songin a cakruai mi nupangte khai tel ve i: a songin ramhuai pasarih a hnawtsuakmi Mary (Magdalene ti inkhai komi), 3Herod zung ah bawi a ṭuantu Khuza ai nupui Joanna, Suzanna le amahte naihnak thilri thawn Jesuh le a hnuahlunte a bawmtu nupangte khai tel tlang i.#Mat 27:55-56; Mar 15:40-41; Luk 23:49

Hlaici Vorhtu Santehhnak

(Mat 13:1-9; Mar 4:1-9)

4Khua khat hnua khua khat Jesuh hnenah mi kawi tlang i; mi tampui a hnenah a kawi tlang fangin hetihin santehhnak rel i.

5Vaikhat ah mi pakhat tu hlaici pawi tuhin feh i. Lo songah hlaici pawi fangin a hrekkhat tu lampui tluanah tlok ai ciamite tu mi in fon i, vaniu in khul sio i. 6A hrekkhat tu lungtlep vumah tlok ai hlaici tu po napui laipua hnum lo manin ro sek i. 7Hlaici hrekkhat tu hlingbur lakah tlok ai hlingkung thawn khang tlang ai hlingkung in det berh i. 8Cen hrekkhat tu laipua pha ah tlok ai po le a vui nai ai let zakhat in a thai nai i. Ngaihnak bil a naitu hmuahhmuah in za tu ih,” tiin ti i.

Ciami Santehhnak Ai A Sullam

(Mat 13:10-17; Mar 4:10-12)

9Ciami santehhnak ai a sullam tu ziang ini, tiin a hnuahlunte in Jesuh zawt tlang i. 10Jesuh in, “Pathian Ukhnak ai thuthup lingthilhnak heh ning hnenah ning pe zo i; ikhalselai midang hnenah tu santehhnak ian in rel tuh i. Ciamanin sik tuh hnelhno napui hmu thil tuh lo i, ngai tuh hnelhno napui ling thiam tlang tuh lo i.#Isa 6:9-10

Hlaici Pawi Santehhnak Ai A Sullam

(Mat 13:18-23; Mar 4:13-20)

11“Hemi santehhnak ai a sullam tu hetihin i: hlaici tu Pathian ai ponkam i. 12Lampui tluan ai tlokhnak hlaici tu Pathian ponkam za tlang napui Satan kawi ai sang tuh loin le omi a cang thil tuh lohnak in amahte thinlung songin Pathian ai thu a lang sah mite i. 13Lungtlep vumai a tlokhnak hlaici tu Pathian ponkam heh za ai lungawi ngai in pom tlang i. Ikhalselai amahte thinlung runruh ah lut lo i. Can comniu song sang ai sualsawmhnak can a hleng fangin a tlu lehtute i. 14Hlingbur lakai a tlokhnak hlaici tu Pathian ponkam tu za tlang i; ikhalselai laipua vum donharhnak, lian nuamhnak le taksa nuamhnak in khuk ai zaikom inkhai a thai hmin thil lo pawl i. 15Lai pha vumai a tlokhnak hlaici tu Pathian ponkam za tlang ai thinlung pha le thungai in a bo tian thai nai tuh rori in kho ngai in a pomtute i.

Kho Ai Khumhnak Maikhuat

(Mar 4:21-25)

16Cen Jesuh in, “Aisu inkhai maikhuat var fangin kho in khum awng kel lo i, Khuahluan hnia ahkhai dah awng kel lo i. Inn songah mi a lut fangin tleuhnak hmufiang thil tuhin maikhuat varhnak tungkhuam vumah dah de i.#Mat 5:15; Luk 11:33

17“A thupruk in thuphnak hmuahhmuah larruai leh tuh sio ai khukhnak thil hmuahhmuah khuatleu ah suakruai leh tuh sio i.#Mat 10:26; Luk 12:2

18“Ciamanin thu ning ngaidan ahhen ralring tu ih; zaimantifangin thil cateng a naitu heh pe tuh amam ai zaikhai a nai lotu heh a naihnak lam niu khai lang sah tuh i,” tiin ti i.#Mat 25:29; Luk 19:26

Jesuh Ai Nu Le Unaute

(Mat 12:46-50; Mar 3:31-35)

19Jesuh ai nu le a naute tu a hnenah kawi tlang i, ikhalselai mi a tam ze manin tawk thil lo i. 20Mi pakhat in Jesuh hnenah, “Na nu le na naute innka ah ding ai na tawk nuam tlang i,” tiin ti i.

21Jesuh in mizapui hnenah, “I nu le i naute tu Pathian thu za ai a hluntute i,” tiin ti i.

Jesuh In Khuahu Lawmruai I

(Mat 8:23-27; Mar 4:35-41)

22Vaikhat ah Jesuh tu a hnuahlunte thawn lawng songah lut ai anite hnenah, “Tili khat lam ralah feh ngasing,” tiin ti i. A tihnak bangin feh tlang i. 23Lawng in a feh laitak ah Jesuh tu mitmu i! Mangrin loin khuahu zuang dekdo i; lawng songah ti lut ai a dim dawn fangin thinlau tlang ngai i. 24A Hnuahlunte in Jesuh phawr tlang ai, “Bawipa, Bawipa! Kin thi dawn hang nakhaw,” tiin ti tlang i.

Jesuh tu tho ai khuahu le tilep heh thupe i. Khuahu khiah lawm ai zaikhai pau loin dap sek i. 25Cen a hnuahlunte tu, “Ning sanghnak akonah i?” tiin ti i.

Ikhalselai anite tu mangbang ai lau tlang roh i; cen pakhat le pakhat, “Hemi pa tu aisu i? Khuahu le tilep khai thupe ai a thu ngai ang!” tiin ti dun i.

Khuasia molhmi Jesuh In Cakruai I

(Mat 8:28-34; Mar 5:1-20)

26Jesuh le a hnuahlunte tu lawng in Galilee tili ralkhat Gerasene tihnak peng ah hleng tlang i. 27Jesuh tu varkam ah a suak sawng fangin khuasiate in molhmi pakhat in tawk i. Ciapa tu can raipui inn ah um loin le hnikpon sil loin vak hnelhno ai mithi phumhnak khukua songah um sawn de i. 28Jesuh a hmu fangin roh ngai in au ai Jesuh keham ah bok ai cawm ngai in, “Jesuh, Cungnungber Pathian ai Fapa! Nang le kai ziang kin seng dun i? I cawh hram malaw, tiin na ngen ing, tiin au i. 29Zaimanin ciatihin au i, tifangin Jesuh in khuasia khiah ciami pa songin suak tuhin tuh a pe manin i. Vel tampui tu khuasia in a bawn fangin thawnginn ah a kut a ke thir cikcin in pen khalselai thir cikcin heh catruai sek de ai khuasia in ramkhing ah pairuai lio de i.

30Jesuh in, “Na hming aisu isi?” tiin zawt i.

Ani in, “I hming tu burpui ing,” tiin sawn i. Zaimantifangin khuasia burpui a songah a um manin i. 31Khuasiate in Jesuh tu, “Khur thukpui songah i hlak hram malaw,” tiin ngen i.

32Ciami hiang mual vumah vokrual tampui um tlang murhmo i. Khuasiate in Jesuh tu, “Vok songah kin lut siang tu hram law,” tiin ngen tlang ai amahte ngenhnak bangin vok songah lutruai i. 33Ciapa songin suak ai vokrual songah lut tlang i. Ciami vokrual heh liang sangpui in dawp ai tili songah pil ai thi sek i.

34Ciami vokrual a khaltute in ziang cang i ti khiah hmu sio ai rang ngai in dawp tlang ai cia thu heh khuasong le lo lakah than dekdo i. 35Ziang cang i, ti sik tuhin mi tampui feh tlang i. Jesuh hnen hleng fangin a songin khuasia suakmi pa tu Jesuh keham ah to ai hnikpon sil in le thinlung fim ngai in hmu ai lau tlang ngai i. 36Akontih in cak i, ti a hmutute in a thula rel tlang i. 37Cia ram songai a umtu hmuahhmuah in lau tlang ngai ai amahte veksen in Jesuh tu hmundang ah feh tuhin ngen tlang i. Ciamanin Jesuh tu lawng songah lut ai feh i. 38A songai khuasia tampui a hnawtmi pa in, “Na hnenah i fehruai tu ve law,” tiin ngen dekdo i.

Ikhalselai Jesuh in, 39“Na inn ah tlung tulai, Pathian in nangmah ca a bawnhnak thu heh rel tu,” tiin ti ai tlungruai i.

Ciapa tu khuasong ah tlung ai Jesuh in amah ca a bawnhnak heh mi hnenah rel dekdo i.

Jairus Fanu Le Jesuh Pon A Daitu

(Mat 9:18-26; Mar 5:21-43)

40Jesuh tu tili ralkhat lam a hleng fangin mi tampui in hmuak tlang i, zaimantifangin can raipui iang tlang zo i. 41Cen Jairus tihnak pa hleng i. Jairus tu synagogue uktu i. Jesuh keham ah bok ai a inn ah kawi tuhin ngen i. 42Zaimantifangin a fanu naihsun, kum hlaihnih a khimmi nu heh ur ai a thi dawn ihang.

Jesuh tu feh ai ciatihin a vak laitak ah miburpui in a hiang cingkim in kawi ai hlun tlang thlurhthlo i. 43Ciami lakah nupang pakhat, kum hlaihnih song thisuak urhnak a tuartu tel ve i. A naihnak hmuahhmuah bo sek tian sibawite hnenah bawl napui aisu inkhai cakruai ben lo i. 44Mizapui lakah Jesuh hnua lamin kawi ai Jesuh ai a ponpar niu khiah dai i; cen a thisuakhnak heh cammalak in lawm i. 45Jesuh in, “I daitu aisu i?” tiin zawt ai,

“Aisu inkhai na dai lo i ing,” ti tlang i. Cen Peter in, “Bawipa, ‘Na cingkim in miburpui in na kulh ai na khing, na tet tlang murhmo i ing!” tiin ti i.

46Ikhalselai Jesuh in, “Mi pakhatkhat in i dai i, zaimantifangin i songin huham a suak ling ing, tiin ti i. 47Nupang nu in kaimah ing ti i ling zo i, tiin hlawng kongin kawi ai Jesuh keham ah bok i. Ciata ah mizapui hmuh ah zaimanin Jesuh dai ai akontih in i cak i tihnak thu khai rel sio i. 48Jesuh in, “I fanu, na sanghnak in na cakruai zo i, muang niu in tlung ta tuhang,” tiin ti i.

49Ciatih ai Jesuh a pong laitak ah Jairus inn in mi pakhat a hlatmi hleng ai Jairus khiah, “Na fanu thi zo i; Sayapa tu hnaihnok nawn mahang,” tiin ti i.

50Jesuh in ciami a za fangin Jairus hnenah, “Na thin lau mah! Sang tu ngio law; cen na fanu tu cak tuh ngawn i,” tiin ti i.

51Jesuh tu Jairus inn a hleng fangin Peter, John, James le naupang nu ai nu le pa siar lo aisu khai inn songah lutruai lo i. 52Ciata mithi inn ai a umtute hmuahhmuah lungsia in kap tlang thliahthlo i. Jesuh in, “Kap mah ih; he naupang nu heh thi lo i, a mitmu i,” tiin ti i.

53Naupang nu a thi ti khiah aisusu inkhai ling manin Jesuh heh hnihsan tlang i. 54Ikhalselai Jesuh in a kut in awh ai, “I fanu, tho tuhang,” tiin ti i. 55Nung leh ai cammalak in tho i. “Rong aih tuh pe tu ih,” tiin Jesuh in ti i. 56A nu le a pate tu ngaihsunur kawm roh i. Jesuh in cia thu heh aisu khai rel tuh loin tiam i.

Obecnie wybrane:

LUKA 8: RZB

Podkreślenie

Udostępnij

Kopiuj