JOHAN 7
7
Jesuh Le A Naute
1Cia hnuaah Jesuh tu Galilee peng songah khual tlawng i; cen Judea ram Judah mi hotute in rek tum manin Judea ram ahcen tlawng nuam lo i. 2Ponhlam Puai nong zo ai, #Sua 23:34; Danp 16:13 3ciamanin a naute in Jesuh tu, “Na thil bawnhnak tepawl heh na hluntute in hmu tuhin he hmun in suak tulai Judea peng ah feh tu. 4Mi tampui ai linghnak a cang nuamtu in a thil bawnhnak tu thup awng kel lo i. Hebang thil na bawn manin laipua pumpui in na ling tu sio seh!” tiin ti tlang i. 5Amah ai naute rori inrin Jesuh heh sang lo i.
6Jesuh in anite hnenah, “I can khim lai lo i. Ning ca ahcen zai komkom khai ning can i. 7Lailung in ning tu ning hua lo i, ikhalselai kai in a thil tidan pha lo i tiin rel ṭiode manin lailung in i hua i. 8Puai bawnhnak hmunah feh tu ih. Kai tu i can a khim lai lo manin feh tuh lo ing,” tiin ti i. 9Ciatihin rel ai Galilee ah um lawk i.
Ponhlam Puai Ah Jesuh Feh I
10Puai ah a naute tu feh ai cia hnuaah Jesuh khai feh ve i; ikhalselai a lar ze in feh lo ai a thup deuh in feh i. 11Puai hmunah Judah mi hotute in si tlang ai, “Jesuh akonah i?” tiin zawt zianzo i.
12Miburpui in amah ai thula rel tlang ai phuncam tlang murhmo i. Hrekkhat in, “Mipha nakhaw e!” ti tlang i. Midang in, “I hlah e, mizapui hoisual nakhaw e!” ti tlang i.
13Aisu inkhai a lar in pong ngam lo i, zaimantifangin Judah mi hotute lau tlang i.
14Cia puai bawn can a hrek dung fangin Jesuh tu Biakinn ah feh ai thuzirh pan i. 15Judah mi hotute tu ngaihsunur tlang ngai ai, “Hemi pa tu akonah khai zirhhnak nai awng bang hlah; zaimanin hezah thu ling thil ini?” tiin ti tlang i.
16Jesuh in, “I thuzirhhnak heh kaimah thin suak ai zirhhnak ilo i; i hlattu hnenin a hlenghnak i. 17Pathian daihhnak a bawn tumtu aisu inkhai i thuzirhhnak heh Pathian hnenin hleng maw, kaimah lungsuak in rel ing, ti ling tuh i. 18Aisu khai ituseh amah ai thunaihnak ian in a pongtu in amah caah thangphathnak si i. Ikhalselai amah a hlattu ca thangphathnak a situ in a songah hrokhrawlhnak zaikhai nai lo ai sang tlak in um i. 19Moses in dan ning pe ilo im? Ikhalselai aisu inkhai cia dan heh hlun tlang lo i si. Zaimanin a rek lehlam i tum tlang hnelhno i si?” tiin ti i.
20Miburpui in, “Na songah khuasia um i! Aisu in na rek tum hnelhno i?” tiin ti tlang i.
21Jesuh in, “Ngaihsunurkul pakhat bawn ai khuaruah ning har sio i. 22Moses in ning fapate zarhtan tuhin thu ning pe awng i, (Hemi zarhtan a pantu heh Moses ilo i, ning pupate i); cen ning fapa heh Sabbath nia ah zarhtan tlang i si.#Sem 17:10; Sua 12:3 23Moses dan bal tuh loin tiin ning fapa heh Sabbath nia ah zarhtan le i sikhaw zaimanin kaimah in Sabbath nia ah mi pakhat i cakruai manin i vumah thinraw tlang i si?#Joh 5:9 24A pualam hmuhnak in thukhan mah ih; thudik a ihnak sik in thukhan tu ih,” tiin ti i.
Messiah I Maw?
25Jerusalem khuasong mi hrekkhat in, “Judah mi hotute ai rek a tumhnak pa tu he pa ilo im? 26Sik tu ih! Mizapui mithmuh ah duhtawk in thurel ai zaikhai ti tlang lo i. Hemi pa heh Messiah i tiin ling ngah ngaingai tang ini maw? 27Ikhalselai Messiah a hleng fangin tu a konteng in hleng i, ti khiah aisu inkhai ling tuh lo i; ikhalselai he pa tu a konteng in hleng i, ti kin veksen in ling siohnak i lawnsi i,” tiin ti tlang i.
28Jesuh in Biakinn songah ciatih ai thu a zirh laitak ah, aw cawm ngai in, “Kai tu i ling ngaingai aw i sim? A konteng in kawi ing ti khiah ling ngah ngaingai aw i sim? Kaimah thuthu in kawi lo ing. Ikhalselai i hlattu heh sang tlak ngaingai i. Ning cenin i hlattu heh ling lo i si, 29Ikhalselai kai incen ling ing, zaimantifangin amah in i hlat ai a hnenin kawi ing,” tiin ti i.
30Ciafangin ani tu pom tum tlang i, ikhalselai aisu inkhai pom ngam ngaingai lo i; zaimantifangin a can khim lai lo i. 31Ikhalselai mizapui songin mi tampui in sang tlang ai, “Messiah a hleng ngaingai fangin he pa ai bawnhnak tahin ngaihsunurkul tam deuh bawn ni tur im?” tiin ti tlang i.
Jesuh Pom Tuhin Mi Hlat I
32Jesuh thula mizapui in rel tlang murhmo khiah Farasite in za fangin suangbawi upate thawn Jesuh pomtu tuhin biakinn kiltu palikte hlat i. 33Jesuh in, “Ning hnenah can com niu song um rih tuhai cia hnuaah i hlattu hnenah feh tuh ing. 34I si tlang tuh napui i hmu tuh lo i si, zaimantifangin i umhnak ah feh thil tuh lo i si,” tiin ti i.
35Judah mi hotute in pakhat le pakhat, “Kin hmu thil lohnak hmun a konteng feh tum ini? Kin minungte umhnak Greek khua pakhatkhat ah feh in Greek mite zirh tum ini im? 36‘I si tlang tuh napui i hmu tuh lo i si. I umhnak ahcen feh thil tuh lo i si,’ tiin ti i. A rel nuamhnak ziang heh ini?” tiin ti dun tlang i.
Nunhnak Petu Rawnti
37Puai bawn nia hnuataber le songlawi ber nia ah Jesuh tu ding ai aw cawm ngai in, “Aisu khai ti a haltu in i hnenah kawi tu selai ding tuseh.#Sua 23:36 38Lai Thianghlim in ‘Aisu khai kaimah i sangtu in a thinlung songin nunhnak rawnti luang tuh i,’ #Ezk 47:1; Zec 14:8ti ai a tihnak bang i tuh i,” tiin rel i. 39Hetihin Jesuh in a rel fangin amah a sangtu hmuahhmuah in Rauhla a ngah tuhhnak thu a rel nuamhnak i. Ciami can ahcen Rauhla heh pe in um lai lo i, zaimantifangin Jesuh tu songlawihnak ah hlengruai lai lo i.
Miburpui Khek I
40Ciatihin a ponghnak khiah miburpui lakai mi hrekkhat in za fangin, “Hemi pa heh prophet ngaingai i,” tiin ti tlang i. A ponghnak zatu mi tampui in, “Hemi tu a hleng tuhlai prophet peu ngai i tuh i,” ti tlang i.
41A dang hrekkhat in, “Messiah i,” ti tlang i.
Midang in, “Messiah tu Galilee in hleng tuh lo i! 42Lai Thianghlim in ‘Messiah tu Kumpibawi David ai tesinfa i tuhai David um awnghnak Bethlehem khua in suak tuh i,’ #2Sam 7:12; Mic 5:2a ti khiah!” tiin ti tlang i. 43Ciatihin Jesuh manin mizapui lakah khekdunhnak um i. 44Mi hrekkhat in a rek nuam tlang i, ikhalselai aisu inkhai pom ngaingai lo i.
Judah Hotute Ai Sang Lohnak
45Biakinn kiltu palikte a let leh fangin suangbawi upate le Farasite in, “Zaimanin koihpui lo i si?” tiin zawt i.
46Palikte in, “Hemi pa bang heh aisu khai tawk awng lo i ing,” tiin sawn i.
47Ciafangin Farasite in, “Ningmah khai ning zawl ngah ve i awm? 48Judah hotute lakah pakhat tal, ihlahle Farasite lakah pakhat tal amah sangtu ning linghnak um awng aw im? 49Hemi mizapui sawhsawh tu Moses ai Dan ling tlang lo manin Pathian ai cukcamhnak hniaah a umtute i!” tiin ti i.
50Ciata ai a umtu Farasi mi lakah Necodemas tihnak, Jesuh a tawk ngah zomi khiah um ve i. Ani in amahte hnenah, #Joh 3:1-2 51“Kin Dan bangin rel lesingkhaw mi pakhat tu amah ai hmurka kin za hlan le a bawnhnak kin hmu ngah hlan ahcen hnawl thil tuh lo ising,” tiin ti i.
52Ciafangin anite in, “Nang khai Galilee mi ve isim? Lai Thianghlim khiah siar tulai Galilee in prophet suak awng lo i, #7:52 Galilee in prophet suak awng lo i,’ tihnak tu ‘Galilee in prophet suak tuh awng lo i,’ ti inkhai um i. ti khiah ling tuh isi,” tiin ti tlang i.
Obecnie wybrane:
JOHAN 7: RZB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Zanniat Bible © Bible Society of Myanmar, 2018.
