JOHAN 18
18
Jesuh Pomhnak
(Mat 26:47-56; Mar 14:43-50; Luk 22:47-53)
1Hetihin Jesuh saw a ngen ben hnuaah hnuahlunte thawn suak tlang ai Kidron tihnak rawn niu ralkhat ah feh tlang i. Ciata ah vuandum pakhat um ai Jesuh le a hnuahlunte tu ciami vuandum songah lut i. 2Cia vuandum khiah Jesuh le a hnuahlunte tawk dun dehnak imanin a zuartu Judas in a konteng ah um i ti ling i. 3Ciamanin cia vuan ahcen Judas khiah Rome ralkap bur khat, suangbawi upa le Farasite ai hlathnak Biakinn kiltu palikte thawn, ralthuam keng ai maikhuat le maifar thawn feh tlang i. 4Jesuh in a vumah zaibang thil hleng tuh i, ti a ling cia sio manin hmaiah suak ai, “Aisu si i si?” tiin zawt i.
5Anite in, “Nazareth mi Jesuh,” ti tlang i.
Jesuh in, “Kaimah ing,” ti i.
A zuartu Judas tu a hiangah ding i. 6Jesuh in, “Kaimah ing,” a tihnak za fangin khel lamah let ai laipua lakah sawn tlang i. 7Jesuh in, “Aisu si i si?” tiin zawt lala i.
Anite in, “Nazareth mi Jesuh ti thotho i. 8Jesuh in, “Kai ing,” tiin ning rel zo ing. Kaimah i si ile i sikhaw midang tu fehruai tu ih,” tiin ti i. 9Hetihin a tihnak tu, “I Pa, i kut songah na pehnak tu pakhat khai i pairuaihnak um lo i,” a tihnak a khimruaihnak tuhin i.
10Simon Peter in a kenghnak ralvang phok ai Suangbawi Sang salpa ai kiahhan lam bil tawng lio in sat i. Cia sal pa hming tu Malchus i. 11Jesuh in Peter hnenah, “Na ralvang a kawng songah thun leh tu! I Pa ai i pehnak tuarhnak khuat heh ding tuh loin i ruat isim?” tiin ti i.#Mat 26:39; Mar 14:36; Luk 22:42
Annas Hmaiah Jesuh Fehpui I
12Cen Rome ralkapte in amahte hotu ralbawi le Judah mi palikte thawn Jesuh heh pom ai; a pen hnuaah, 13hmasaber ah Annas hnenah fehpui i. Annas tu cia kum ai Suangbawi Caiaphas nupui ai pa i. 14Caiaphas tu mizapui caah mi pakhat thi pha sawn i tiin Judah hotute hnenah ruathnakpetu khiah i.#Joh 11:49-50
Peter In Jesuh Pheh I
(Mat 26:69-70; Mar 14:66-68; Luk 22:55-59)
15Simon Peter le a dang hnuahluntu pakhat in Jesuh hlun kawm i. Cia hnuahluntu heh Suangbawi Sang thawn ling dun ngai mi i ai Jesuh hlun ai Suangbawi Sang ai tualvan ah feh i. 16Ikhalselai Peter tu kotka pualam ah um i. Cen ciami hnuahluntu khiah let ai kotka kiltu nu a pon hnuaah Peter lutpui i. 17Kotka kiltu nu in, “Khia pa tu a hluntu lakah tel ve ilo im?” tiin Peter khiah ti i.
Peter in, “I hlah ing,” ti i.
18Khua sik manin hnenumte le kiltu palikte in maihol in maipual sep tlang ai ding kongin mai aai tlang i. Peter khai feh ve ai amahte hnenah ding in mai aai ve i.
Suangbawi Sang In Jesuh Thu Zawt I
(Mat 26:59-66; Mar 14:55-64; Luk 22:66-71)
19Suangbawi Sang in Jesuh tu a hnuahlunte ai thu le a thuzirhhnak thute zawt dekdo i. 20Jesuh in, “A lar ngai in mizapui hnenah thu rel ṭiode ing. Mi tampui tai khawm hmun synagogue ah le Biakinn pui ah thuzirh ṭiode ing. A thupniu in ziang thu khai rel awng lo ing. 21Ciatih inapui zaimanin thu i zawt i si? I thurelhnak a lingtute zawt tu sawn. I relhnak ling tlang sio hlen i,” tiin ti i.
22Ciatihin a ti fangin ciata ai a umtu palik pakhat in Jesuh heh beng ai, “Suangbawi Sang hnenah zaimanin ciatihin pong ngam isi?” tiin ti i.
23Jesuh in, “I pongsualhnak um lekhaw i pongsualhnak heta ai a umtu hmuahhmuah hnenah rel tucuk! Ikhalselai i ponghnak heh a dikmi ilekhaw zaimanin in beng isi?” tiin sawn i.
24Ciatihin Annas in a penhnak hawk sah cuanglo in Jesuh tu Suangbawi Sang Caiaphas hnenah kuat i.
Peter In Jesuh Pheh Lehthio I
(Mat 26:71-75; Mar 14:69-72; Luk 22:58-62)
25Peter tu ciata ah mai aai in ding hlen lai i. Cialak fangin midangte in, “Nang khai he a hnuahlunte lakah pakhat i ve ilo sim?” tiin ti tlang i.
Peter in, “I lo ing,” ti i.
26Suangbawi Sang hnenum lakah pakhat, Peter in a bil sathnak mi pa ai songkhat pa in, “Hemi Jesuh thawn vuandum songah na hmu vuah bang ing?” tiin zawt i.
27Ikhalselai Peter in, “Kaimah ilo ing,” ti thotho i. Ciafangin ar khuang i.
Pilat Hmaiah Jesuh Fehpui I
(Mat 27:1-2; Mar 15:1-5; Luk 23:1-5)
28Zingniu in Jesuh tu Caiaphas inn in Mangki bawi inn ah fehpui i. Judah mi hotute tu amahte dan bangin thianghlim niu in Kansuak Puai rong ai nuam tlang manin Mangki bawi inn song ahcen lut tlang lo i. 29Ciamanin Pilat tu suak ai anite hnenah, “Hemi pa heh ziang sualhnak nai heh i?” tiin zawt i.
30Anite in, “Sualhnak nai hlah selai na hnenah koih tuh lo i ing,” tiin sawn tlang i.
31Pilat in anite hnenah, “Ciatih ilekhaw ningmah in fehpui tu ilai ningmah ai dan bangin a thu rel tu ih,” tiin ti i.
Anite in, “Kin incen minung rek thilhnak thu nai lo i ing,” tiin ti tlang i. 32Jesuh in zaibang thihhnak tuar tuh ing ti ai a relciahnak ponkam khim tuhin hetih bangin thil a canghnak i.#Joh 3:14; 12:32
33Pilat tu a inn songah lut leh ai Jesuh heh ko i. “Judah Kumpibawi isim?” tiin zawt i.
34Jesuh in, “Hemi thu na zawthnak heh na lungsuak in i zawt maw, midang in i thu na rel manin i?” tiin zawt i.
35Pilat in, “Judah mi i vuah isim? I hnen na hlentute heh na miphun le suangbawite nakhaw! Na bawnhnak thil tu ziang heh i?” tiin ti i.
36Jesuh in, “I ukhnak ram tu he lailung ah ilo i; he lailung ah iselai Judah mi hotute kut songah hleng tuh loin i hnuahlunte in tawng tuh i. I ukhnak ram tu he lailung ah ilo i,” tiin ti i.
37Ciafangin Pilat in, “Kumpibawi ngaingai isim?” tiin zawt i.
Jesuh in, “Nang in Kumpibawi isi, iti isi. Lailung ai i tesanhnak le i kawisanhnak tu thu pakhat ian i: ciami tu thutak rel tuh khiah i. Thutak songah a ummi hmuahhmuah in i thurelhnak khiah ngai tlang i,” tiin ti i. 38Ciafangin Pilat in, “Thutak tu ziang heh i?” tiin zawt i.
Cen Pilat tu mizapui hnenah suak leh ai anite hnenah, “A vumah mawhhnak thu hmu lo ing. 39Ciamanin dan ning naihnak bangin Kansuak Puai ah thawngtotu pakhat ning hlat sah de ing. Judah Kumpibawi heh ning hlat sah inglai ning daih awm?” tiin zawt i.
Jesuh Rek Tuhin Relcat I
(Mat 27:15-31; Mar 15:6-20; Luk 23:13-25)
40Anite in, “Amah hlat kin nuam lo i! Barabbas hlat kin nuam i!” tiin au tlang dekdo i. Barabbas tu damiah awng i.
Obecnie wybrane:
JOHAN 18: RZB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Zanniat Bible © Bible Society of Myanmar, 2018.
